ಹಬಕ್ಕೂಕ್‍ 1

1 ಪ್ರವಾದಿ ಹಬಕುಕ್‍ನು ಪ್ರಕಟನೆ ಹುಯಿರುಸ್ತೆ ದೆವ್ ನಿ ವಾತ್:

ಅನ್ಯಾಯಂನಖ್ಹಜೆ ಹಬಕುಕ್ ನಿ ಬೊಲ್ಯೊತೆ

2 ಮೇ ಕೆತ್ರ ಕಾಲಂ ದೇವ್, ತುನ ಮದತ್ ಕಾಜೆ ಮೊರೆ ಮ್ಹೆಲ್ ತು ರ‍್ಹಾನು, ತು ಕೆತ್ರ ಕಾಲಂ ಶೊಪೊರ‍್ಹೈಶ್ ಮನ ಕಾನ್ ನಾ ದೇನುತಿಮ್? ಹಿಂಸೆಹುಂಕರಸ್ ಕರಿ ಮೆ ಚಿಕ್ರ್ಯೊ; ರೈತೊಬಿ ತೂ ಶೊಪೊರ‍್ಹೈಶ್, ರಕ್ಷಣೆ ನಾದೇನುತಿಮ್. 3 ಖರಾಬ್ ನ ಮೆ ದೆಖನಿತರ ಕರ್ಯೊಶನ? ಕಷ್ಟಂನ ಮೆ ದೆಖನಿತರ ಕರ್ಯೊಶನ? ಹಿಂಸೆಬಾಧೆಖ್ಹರು ಅಸ್ ಮರ ಡೊಳನ ಖ್ಹಮೆ. ಹಂದೇಕ್, ಲಡೈ ಹುಂಕರಸ್, ಎಕ್ ಹುಂಕರಸ್. 4 ಇನಕಾಜೆ ಖ್ಹಾಚಿನು ಪ್ರಮಣಂ ಚಲವ್‍ಶೆ. ನಿಯತ್ ನು ನ್ಯಾವ್ ಕೆದೆಬಿ ಲಾಡ್‍ಷೆಕೊಯಿನಿ. ಖರಾಬ್ ಅಛ್ಚುಅದ್‍ಮಿವ್‍ನ ಕೊಂಡಿರಕ್ಯುಸ್. ಇನಕಾಜೆ ಛುಟಿನು ನ್ಯಾವ್ ಚಲ್ ಶೆ

ದೆವ್ ನು ಜವಾಭ್

5 ತದೆ ದೇವ್ ಇನು ಅದ್ಮಿನ ಅಂಬೊಲುಕರಸ್: "ಖ್ಹರು ದೇಖ್ಹ್ ನ ಮ್ಹೈ ಚಲುಕರ್ತುತೆ ದೆಖೊ. ದೆಖ್ಯಾತೊ ಆಶ್ಚರ್ಯಂಹುಯಿಜಾಶು. ತುಮಾರು ಕಾಲಮ್ಮ ಮೆ ಎಕ್ ಕಾಮ್ ನ ಕರ್ಯೊಥೊ. ಇನ ಬಾರೇಮ ತುಮೆ ಕಾನ್‍ ಖ್ಹುಬಿ ಖ್ಹಂಜ್ಯ ತೊಬಿ ತುಮೆ ಕೊ ನಂಶು ನಿ. 6 ಹಂದೇಕ್, ಬಾಬಿಲೋನ್ ವಳವ್ ನ ವುಠಡಿಶ್. ಇವ್ಣೆ ಭಯಂಕರ ಬುಜು ಕಠಿಣವಳು. ಇವ್ಣೆ ಜಮಿನ್ ಅಖ್ಖು ಪ್ಹೈಲಯಿನ್ ಇನುಖಾಯೆತಿಮ್ ಇವ್ಣ ಭಣಿ ಕಬ್‍ಜ ಕರಿಲಿಶೆ. 7 ಇವ್ಣೆ ಡರ್ರಸ್ ಕೊಯ್ನಿ, ಡರವವಾಳು. ಇವ್ಣನು ಇವ್ಣೆಸ್ ಖ್ಹಾಚಿನಿಯತ್ ನ ಉಬ್-ಜೈಲೆವಳು; ಇವ್ಣನು ಇವ್ಣೆಸ್ ಗೌರಂನ ಲಿಲೆವಳು. 8 ಇವ್ಣನು ಘೋಡಖ್ಹರು ಚಿರತೆಥೆಬಿ ಡಾರವನು ಗ್ಹೊಣಿ; ಬ್ಹುಕ್ಯು ರ‍್ಹಾವಳು ಹಡೊತ್ಹೆಬಿ ಛತುರ್. ಇವ್ಣ ಘೋಡ ಚಲವವಳು ಜೊರೆಖ್ಹು ಅವ್ ಶೆ. ಹಲ್ಡೊನ ಧರಿಲೆವನ ಘಬ್ರೈನ್ ವುಡಸ್ತೆ ಖ್ಹಂಳಿ ನಿತರ ದೂರ್‌ತುಸ್ ಜೊರೇಖ್ಹು ಅವ್‍ಶೆ. 9 ಹಿಂಸೆ-ಬಾಧೆಖ್ಹರು ನ ಲಿಲಿನ್ ಖಣದ್ ಕರ್ಲಿ ಖ್ಹಮೆ-ಖ್ಹಮೆ ಅವ್ ಶೆ. ಮಟಿನು ಕಾಕ್ರನಿತರ ಗಣ್ತಿಸ್ ಕೊಯಿಂತಿಮ್ ಅದ್ಮಿನ ಖ್ಹೊತಿನ್ ಧರಿಲಿಶೆ. 10 "ಇವ್ಣೆ ರಾಜನ ಶರಂಕಡ್ ಶೆ; ಅಧಿಪತಿವ್ ನ ಶರಂ ಅವನಿತರ ಕರ್ದಿಶೆ. ಖ್ಹರುಖ್ಹೊಟೊನ ಧೂಳ್ ನಿತರ ಕರ್ದಿಶೆ. ಮಟಿನು ಗುಡ್ಡೊ ನಾಕಿನ್ ಕೊಂಡಿಲಿಶೆ. 11 ಡುಂಜ್ ನಿತರ ಅಯಿನ್ ಇವ್ಣೆ ಮಾಯಂ ಹುಯಿಜಶೆ, ಸೊಂತ್ ಥಕತ್ತಸ್ ದೇವ್ ಕರಿ ಬೊಲಿಲೆವಳು ಅಪರಾದಿಖ್ಹರು." ದೂರು ನೀಡುತ್ತಾನೆ

ಹಬಕ್ಕೂಕ್‍ನಿ ದುಃಖಂನ ಬುಜಜೆಕ್ ಹಲ್ಲ ಬೊಲಸ್ತೆ

12 ಜಗತ್ ನೊ ದೇವ್, ಮಾರೊ ದೇವ್, ಘಣೊ ಪರಿಶುದ್ಧಂನೊ ಗುರು, ಜಮನತುಬಿ ರ‍್ಹಾವಳೊ ತುಸ್. ಹಮೆ ಖ್ಹಾಛಸ್ ಕರಿ ಮರ್ಶು ಕೊಯ್ನಿ. ಹಮ್ನ ಖ್ಹತವನಿತರ ಯೊ ಬಾಬಿಲೋನ್ ವಳನ ನೇಮ್ ಸೈರಕ್ಯೊತೆ ತುಸ್, ಇವ್ಣ ಉಂಚೊವಳನಿತರ ಕರ್ಯೊತೆ ತುಸ್. ಹಮ್ನ ಮೊಟೊ ಬಂಡೊ ತುಸ್. 13 ಖರಾಬ್ ನ ದೆಖನಹೊಯಿಕೊಂತೆ ಎತ್ರು ಕಚ್ರೊಕೊಂತೆ ತುಮರ ಡೊಳೊ. ಖರಾಬ್‌ನ ಖ್ಹಮಳನ ಹೊಯಿಕೊಂತೆ ಇಮ್ ಪವಿತ್ರಂವಳೊ ತುಸ್. ಅಮ್ ರ‍್ಹವಮ ಖರಾಬ್ನ ದೆಖುಕರಸ್ ಶನ? ಖರಬ್ಅದ್ಮಿ ನಿಯತ್ ವಳನ ಗಳುಕರಸ್ತೆ ದೇಖಿನ್‌ ಶೊಪೊಶನ ಛಾ? 14 ಅದ್ಮಿವ್ ನ ದರ್ಯವ್ ನು ಮಾಚ್ಲನು ಸಮಹುಯಿರುಸ್, ಶೆ. ಶಾಣುಸ್ ಕೊಯಿನ್ತೆ ನ್ಹಾನ ಕಿಡವ್‍ನಿ ಗತಿ ಶನ ಬೊಲಿಮೊಕ್ಯೊ? 15 ಅ ಕರಣಂ ಯೊ ಬಾಬಿಲೋನ್ ವಳು ಅದ್ಮಿವ್ ಮ ಗಾಳ್ ಖ್ಹು ಕ್ಹೆಚಿಲೆವ್ ಕರಸ್; ಜಾಳಖ್ಹು ಖ್ಹೊತಿಲೆವ್ ಕರಸ್; ಇನು ಜಾಳ ಮ ಗುಡ್ಡೊಕರಿಲೆವ್ ಕರಿಲಿನ್; ಕುಶಿಪಡಸ್. 16 ಇನು ಜಾಳನ ಬಲಿದಿಶೆ; ಗುಗಳ್ ನಾಕಸ್. ಯೊ ಮುಲಕಂ ಇವ್ಣು ಜಾನ್ ಘಣು ಘಟ್; ಇವ್ಣು ಖಾಣು ಥಕತ್. 17 ಅಮ್ ಇವ್ಣೆ ಕೆದೆಕೆದೆಬಿ ಇವ್ಣ ಜಾಳಮಥು ಖ್ಹಲಿ ನಾ ಮ್ಹೆಲ್ ನು ತಿಮ್ ಜತುರ‍್ಹನು ನಾ? ಗೋರ್‌ ಕೊಂತೆ ಖ್ಹರನಂಗ್ರಿನ ಕೆದೆಬಿ ನಾಶನಂ ಕರ್ತುರ‍್ಹನು ನಾ?