ಹಬಕುಕ್ ನ ದೇವ್ ನು ಜವಾಬ್
1 "ಮೇ ಕಾವ್ಲಿಕರವಳೊ ಹುಯಿನ್ ಹುಬ್ಯೊರ‍್ಹೈಶ್. ಕಾವ್ಲಿಕರಸ್ತೆ ಗೊಪುರನ ಉಪ್ಪರ್ ಛಡಿನ್ ಹುಬ್ಯೊರ‍್ಹೈಶ್. ಯೆಹೋವ ದೇವ್ ಮನ ಶಾತ್ ಬೊಲಸ್ಕಿ, ಕ್ಹೆವು ಜವಾಬ್ ದೇಸ್ ಕಿ, ಕರಿ ಇಂತಜಾರ್ ಕರುಕುರುಸ್." 2 ತದೆ ಯೆಹೋವ ದೇವ್ ಮನ ದಿದೋತೆ ಜವಾಬ್ ಅ: "ತೂ ದೆಕ್ಯೊತೆ ದರ್ಶನಂನ ಲೀಕ್. ಫಡವಳು ಜಲ್ದಿ ಫಡಖ್ಹರ್ಖ್ಹು ಖೊಡ್‍ಶನ ಉಪ್ಪರ್ ಅನ ಲಿಕ್. 3 ನೆಮ್‍ಸೈರಕ್ಯೊಸ್ತೆ ಕಾಲಮ್ಮ ಯೊ ದರ್ಶನಂ ಜರಗ್ ಶೇ. ಇನು ಛಟ್‍ನು ತಿರ್ ಮನಂ ಜಲ್ದಿಶ್ ಮಲಂಪಡಿಜಸ್. ದಿರ್ಪಡಿತೊಬಿ ಜಪಿರ‍್ಹಾ; ಮೋಸಂಕರಕೊಯಿನಿ. ಯೋ ಖ್ಹಾಚಸ್ ಕರಿ ಹತ್ ಮ ಮಳ್‍ಶೆ; ಧಿರ್ ಪಡ್ ಶೆ ಕೊಯ್ನಿ. 4 ದೇಕ್, ಖ್ಹಚ್ಚ ಮನಸ್ ಕೊಂತೆವಳು, ಫುಲಿರುಸ್ತೆ ಯೊ ಖ್ಹರಬ್ ಅದ್ಮಿ ಕೊ ಬಚ್‍ಶೆನಿ; ನಿಯತ್ ವಳೊ ವಿಶ್ವಾಸಂತಿ ಬಚ್ ಶೆ.
ಖಾರಬ್ ವಳವ್ನು ಮುಸಿಬತ್
5 ಯೊ ಖಯೆತೆ ಧನ್ ದವ್‍ಲತ್ ಮೊಸಹುಯಿರುಸ್, ಇನಕಾಜೆ ದುಷ್ಟರ್ನ ನಿಶಛಡಿರುಸ್, ಇನು ಸೊಂತ್ ಜಘೊಮ ಕೊ ಹುಬಿರಶೆನಿ; ಇನು ಅಖ್ಹ್ ಪತಳಂನಿತರ ಘಣುಮೊಟು, ಮರಿಹುಯನಿತರ ಛಾ, ಭಶ್ಶಸ್ ಕೊಯ್ನಿ; ಖ್ಹಾರ ಅದ್ಮಿವ್ ನ ಕ್ಹೆಚಿಲಿಶೆ, ಅಖ್ಖುಸ್ ಅದ್ಮಿವ್ ನ ಗುಡ್ಡೊಕರ್ಲಿಶೆ. 6 ರೈತೊಬಿ ಅಮ್ ಇವ್ಣೆತೆ ಅಖ್ಹ್ ಪಡ್ಯುತೆಅಕ್ಕು ಇನು ವತ್ ನ ಛೊಡಿ ಬೊಲವಳು ಶರಂ ಕಡವಳು. "ಇನು ಖ್ಹಯೆತಿಮ್ ಜಾಖ್ಹತ್ ಜಾಖ್ಹತ್ ಭರೈರಖವಳನಿ ಗತಿನ ಶಾತ್ ಬೊಲ್‍ನು! ಬಡ್ಡಿನಕಾಜೆ ಅಡುಮೆಲ್ಯುತೆ ಖ್ಹರು ರ‍್ಹಾಛನ ಗುಡ್ಡೊಕರಿಲೆವಳನಿ ಗತಿ ಶಾತ್ ಬೊಲು! ಕೆತ್ರ ಕಾಲಂ ಅಮ್ ಕಿರಿಶ್?’ 7 ತಾರು ಹುದರ್ ಲಿರ‍್ಹಾಖವಳು ಪಟಕ್ ಕರಿ ತರ ಖ್ಹಮೆ ಅಯಿನ್ ಹುಬಿರ‍್ಹಶೆ; ಬಾಕಿದೆವಳುಸ್ ಚತುರ್ ಹುಯಿನ್ ತುನ ಡರವ್‍ಶೆ. ಠಗೈನ್ ತುನ ಜೊಟೈಲಿಶೆ. 8 ಶನಕತೊ ತೂ ಕೈಏಕ್ ದೆಖ್ಹ್ ನ ಠಗೈರಕ್ಯೊಸ್. ಅದ್ಮಿನು ಲ್ಹೋಯಿನ ಚಿಡ್‍ಕಿರಕ್ಯೊಸ್. ಮುಲಕ್‍ನ ಖ್ಹಾಯೆರ್ನ ಇನಮಲ್ಯು ಬಚಿರಸ್ತೆ ಅದ್ಮಿವ್ ನ ಖ್ಹಾತೈರಕ್ಯೊಸ್ ಭಚಿರುತೆಖ್ಹಾರುಸ್ ಜಣು ತುನ ಠಗವ್‍ಶೆ. 9 ವಾದಖ್ಹೊಮತು ಬಚಿಜವಳು ಇಜಿಖ್ಹು ತರ ಗರ್ನ ಉಂಚಪರ್ ಭಂದಿಲಿದೊ. ತರ ಕುಟುಂಬನಕಜೆ ಅಲದನು ಆಸ್ತಿನ ಅನ್ಯಾಯಂಖ್ಹು ಖ್ಹೊಚಿಲಿದೊ, ತಾರಿ ಗತಿನ ಶಾತ್ ಬೊಲ್‍ನು! 10 ತಾರು ಖ್ಹಾಯಲ್ ಖ್ಹು ತಾರ ಗರ್ ನ ಖರಬ್ ನಾಮ್ ಲಯಿತ್ರೊ. ಕೆತ್ರುಕಿ ಮುಲಕ್‍ನ ನಾಶ್ನಂ ಕರೀನ್ ತಾರ ಜತ್‍ನಬಿ ನಾಶ್ನಂ ನ ಲಯಿತ್ರೊ. 11 ಭಿತ್ ನ ಮ್ಹೈಚತೆ ಭಂಡಸ್ ತುನ ವಿರೋದ್ ಖ್ಹು ಚಿಕರ್ಶೆ. ಗರ್ ನ ಉಪ್ಪರ್ಲ್ಯ ಲಕ್ಡ ಖ್ಹರು ಬಿ ಇನ ಜವಾಬ್ ದಿಶೆ. 12 ಅದ್ಮಿನ ಜಾನ್ ನಾಕಡ್‍ನು ಖ್ಹಯೆರ್ ನ ಭಂದವಳನಿ ಗತಿನ ಶಾತ್ ಬೊಲ್‍ನು! ಅನ್ಯಾಯಂಖ್ಹು ಹಾದಿನ ಉಪ್ಪರ್ ಗಾಮ್‍ನ ಭಂದವಳನಿ ಗತಿನ ಶಾತ್ ಬೊಲ್‍ನು! 13 ಅದ್ಮಿಖ್ಹಾರು ಕಮಾಯುತೆ ಆಗ್‍ನು ಪಾಲ್ ಉಷೇ. ಅದ್ಮಿಖ್ಹಾರು ಪಡ್ಯುತೆ ಕಷ್ಟಂನು ಕಾಮ್ ಬೇಕರ್ ಉಷೆ. ಅಖ್ಹರು ಯೆಹೋವ ದೇವ್‍ನುಸ್ ಚಿತ್ತಂಖ್ಹಯೆ ನಾ? 14 ದರ್ಯವ್ ಪಣಿತೆ ಭರೈನ್ ಚಾ ತಿಮ್ ಜಮಿನ್ ಯೆಹೋವ ದೇವ್‍ನು ಮಹಿಮೆನು ಜ್ಞಾನಂಖ್ಹು ಭರೈರ‍್ಹಷೆ. 15 ತಾರು ರೋಷಂನ ದ್ರಾಕ್ಷಿನು ರಖ್ಹ್ ಮ ಮಳೈನ್, ಇನಕಾಜೆ ತಾರ ಅಶ್ ಪಿಶ್‍ಲ್ಯವ್ ನ ಮತ್‍ಮ ಲಾಯಿನ್, ಇವ್‍ಣು ಹುಗಡುನ ದೆಕ್‍ನುಕರಿಚತೆ ತರಿ ಗತಿ ಶಾತ್ ಬೊಲು! 16 ತೂ ಸನ್ಮಾನಂವಳೊ ಖಾಯೆ, ಅವಮಾನಂಖ್ಹು ಭರೈರ‍್ಹೈಶ್; ತೂಬಿ ಪಿ, ಪೀಲಿನ್ ಹುಗಡೊಹು. ಯೆಹೋವ ದೇವ್ ನು ಖ್ಹವಾತ್‍ಮ ಚತೆ ಛಂಡಲ್‍ನು ಬಿಂದಿ ತರ ಪಾಲ್‍ನ ಅವ್‍ಶೆ. ಅವಮನಸ್ ತಾರ ಸನ್ಮಾನಂನ ಲಿಪ್‍ಟೈಜಶೆ. 17 ತೂ ಅದ್ಮಿನ ಲ್ಹೋಯಿನ ಚಿಡ್‍ಕಿರಕ್ಯೊಸ್. ಮುಲಕ್‍ನ ಖ್ಹಾಯೆರ್ನ ಇನಮಲ್ಯು ಬಚಿರಸ್ತೆ ಅದ್ಮಿವ್ ನ ಖ್ಹಾತೈರಕ್ಯೊಸ್. ಲೆಬನೋನ್ ಖ್ಹರು ಜ್ಹಾಡಿನ ಕತ್ರಿನಕಿರಕ್ಯೊಸ್. ಹಂಕ್ಕೆ ತುನಸ್ ಕತ್ರಿನಾಕಿದಿಶೆ. ಇನಮಲ್ಯು ಖ್ಹಾರ ಜಿನವರ‍್ನ ನಾಶನಂ ಕರಿರಕ್ಯೊಸ್. ಹಂಕ್ಕೆ ಯೋ ತುನ ಢರವ್‍ಣಿ ಹುಯಿರ‍್ಹಶೆ. 18 ಕೆತ್ತನೆ ಕರಸ್ತೆ ವಿಗ್ರಹಂಖ್ಹು ಫಾಯಿದೊ ಶಾತ್? ಯೋ ಖಲಿ ಅದ್ಮಿನು ಕಾಮ್, ಜ್ಹುಟಿ ಖೆಣಿನ ಮ್ಹೆಲಿರಕ್ಯಸ್ತೆ ಥಕತ್ ಕೊಯಿಂತೆ ಫುತುಲು. ಇನ ತಯರ್ ಕರವಳನ ಯೊ ಖೆವುಬಿ ಡರ್ ಕೊಯಿಂತಿಮ್ ಯೊಸ್ ಲಯು? ಯೋ ಮೊಡುಕಡಕೊಯಿಂತೆ ಗೊಂಬೆಯೆತ್ರೆಸ್. 19 ಜ್ಹಡನು ತುಕ್ಡೊ, ‘ಜ಼ತನ್ ಹುಯುಜ’ ಹಠಂನೊ ಭಂಡೊ, ‘ಉಟ್’ ಕರಿ ಹುಕುಂದೆವಳು ಖ್ಹಚಕರಿ ಅಕ್ಕಲಾಸ್ ಕೊಯ್ನಿ. ಫುತುಲು ಬೊಲಿವೊತಳಸ್ ನಾ? ಖ್ಹೊನ್ನುರುಪು ಇನ ಲಗಡಿರಕ್ಯಸ್ ಖ್ಹಚಸ್. ಕತೋಬಿ ಇನ ದಮ್ ಕೊಯಿನಿಸ್ ಕೊಯ್ನಿ. 20 ಯೆಹೋವ ದೇವ್ ಪ್ರಸನ್ನತೆಹುಯಿರೊಸ್ ಪವಿತ್ರಜಗೊಮ; ಜಮಿನ್ಅಕ್ಕು ಶೊಪೊಹುವದೆ ಇನು ಸನ್ನಿದಿಮ.