ಪ್ರಕಾಶಿತ್ ವಚನ್ 14

ಮೇಂಢಾನು ಚೆಲ್ಕು ಅಜು಼ ಇನು ಅದ್ಮಿಖ್ಹಾರು

1 ಅನಪಾರ್ ಮೆ ದೇಖಾಮ ಬಲಿ ಮೇಂಢಾನ ಚೆಲ್ಕುಹುಯಿರ‍್ಹವಾಳೊ ಚೀಯೋನ್ ಪರ್ಭತ್‌ಪರ್‌ ಭಿಯುರ‍್ಹವಾನು ದೇಖ್ಯೊ. ಇನ ಜೋ಼ಡ್ಮ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್‌ಜ಼ಣು ಥು. ಇವ್ಣ ತಾಳ್ವಪರ್ ಇನು ನಾಮ್‌ಬಿ ಇನ ಬಾನು ನಾಮ್‌ಬಿ ಲೀಖೈರ‍್ಹೂಥು. 2 ಆನಾಹುಯಿನ್ ಪರಲೋಕ್‌ಥು ಪಾಣಿನ ತೋಫಾನ್ನಿತರಾಬಿ, ಘಲಾರನ ಅವಾಜ಼್‌ನಿತರಾನೊ ಏಕ್‌ ಮೋಟ ಅವಾಜ಼್‌ನ ಖ್ಹಮ್‌ಜೊ. ಮೆ ಖ್ಹಮ್‌ಜೋತೆ ಯೊ ಅವಾಜ಼್ ಖ್ಹಾರಂಗೊ ವಜಾ಼ಡಿನ್ ಗೀದ್‌ ಬೋಲಾವಾಳಾವ್ನು ಅವಾಜ಼್‌ನಿತರಥು. 3 ಇವ್ಣೆ ಸಿಂಹಾಸನ್ನ ಖ್ಹಾಮ್ಣೆಬಿ ಯೊ ಚಾರ್ ಜೀವಿನ ಅಜು಼ ಶಾಣವ್ನ ಖ್ಹಾಮ್ಣೇಬಿ ನವು ಗೀದ್‌ ಬೋಲ್ಯು. ಆ ಧರ್ತಿಥು ಮೋಲ್ ಲೀರಾಖ್ಯುಥೂತೆ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿನ ಪಣ್ಕಿ ಬಿಜು಼ ಕೋಣ್‌ಬಿ ಯೊ ಗೀದ್‌ನ ಶಿಕಾನ ಕೊಉಷೇನಿ. 4 ಇಮ್ಮಸ್ ತಯೇಡಾನಿ ಶವಾಶಿಥಿ ಮೈಲು ಹುಯುಕೊಂತೆ ಕವಾರಿನಿತರ ಥೂತೆ ಅವ್ಣೇಸ್. ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹಾವಳೊ ಕಿಜ್ಜಾ಼ ಗಯೊತೋಬಿ ಇವ್ಣೆ ಅನ ಪೀಠೆ ಜಾ಼ಸ್. ಅವ್ಣೆ ಅದ್ಮಿವ್‌ಮಾಥು ಶೊಂತ್ ಅದ್ಮಿಹುಯಿನ್ ಮೋಲ್ ಲೆವೈಜೈ಼ನ್ ದೇವ್‍ನಾಬಿ ಮೇಂಢೊ ಹುಯಿರ‍್ಹಾವಳನಬಿ ಪಹಿಲ ಫಲ್ನಿತರಹುಯ. 5 ಅವ್ಣ ಮ್ಹೋಡಾಮ ಝೂ಼ಟಿ ಕೋಸ್‌ಥೂನಿ. ಅವ್ಣೆ ನಿರ್ದೋಷ್ ಹುಯಿರ‍್ಹಾಸ್.