Apocalipse 14

ಮೇಂಢಾನು ಚೆಲ್ಕು ಅಜು಼ ಇನು ಅದ್ಮಿಖ್ಹಾರು

1 ಅನಪಾರ್ ಮೆ ದೇಖಾಮ ಬಲಿ ಮೇಂಢಾನ ಚೆಲ್ಕುಹುಯಿರ‍್ಹವಾಳೊ ಚೀಯೋನ್ ಪರ್ಭತ್‌ಪರ್‌ ಭಿಯುರ‍್ಹವಾನು ದೇಖ್ಯೊ. ಇನ ಜೋ಼ಡ್ಮ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್‌ಜ಼ಣು ಥು. ಇವ್ಣ ತಾಳ್ವಪರ್ ಇನು ನಾಮ್‌ಬಿ ಇನ ಬಾನು ನಾಮ್‌ಬಿ ಲೀಖೈರ‍್ಹೂಥು. 2 ಆನಾಹುಯಿನ್ ಪರಲೋಕ್‌ಥು ಪಾಣಿನ ತೋಫಾನ್ನಿತರಾಬಿ, ಘಲಾರನ ಅವಾಜ಼್‌ನಿತರಾನೊ ಏಕ್‌ ಮೋಟ ಅವಾಜ಼್‌ನ ಖ್ಹಮ್‌ಜೊ. ಮೆ ಖ್ಹಮ್‌ಜೋತೆ ಯೊ ಅವಾಜ಼್ ಖ್ಹಾರಂಗೊ ವಜಾ಼ಡಿನ್ ಗೀದ್‌ ಬೋಲಾವಾಳಾವ್ನು ಅವಾಜ಼್‌ನಿತರಥು. 3 ಇವ್ಣೆ ಸಿಂಹಾಸನ್ನ ಖ್ಹಾಮ್ಣೆಬಿ ಯೊ ಚಾರ್ ಜೀವಿನ ಅಜು಼ ಶಾಣವ್ನ ಖ್ಹಾಮ್ಣೇಬಿ ನವು ಗೀದ್‌ ಬೋಲ್ಯು. ಆ ಧರ್ತಿಥು ಮೋಲ್ ಲೀರಾಖ್ಯುಥೂತೆ ಏಕ್‌ ಲಾಕ್ ಚಾರ್‌ಉಪ್ಪರ್ ಚಾ಼ಳಿಖ್ಹ್ ಹಜಾ಼ರ್ ಅದ್ಮಿನ ಪಣ್ಕಿ ಬಿಜು಼ ಕೋಣ್‌ಬಿ ಯೊ ಗೀದ್‌ನ ಶಿಕಾನ ಕೊಉಷೇನಿ. 4 ಇಮ್ಮಸ್ ತಯೇಡಾನಿ ಶವಾಶಿಥಿ ಮೈಲು ಹುಯುಕೊಂತೆ ಕವಾರಿನಿತರ ಥೂತೆ ಅವ್ಣೇಸ್. ಬಲೀನ ಮೇಂಢಾನು ಚೆಲ್ಕು ಹುಯಿರ‍್ಹಾವಳೊ ಕಿಜ್ಜಾ಼ ಗಯೊತೋಬಿ ಇವ್ಣೆ ಅನ ಪೀಠೆ ಜಾ಼ಸ್. ಅವ್ಣೆ ಅದ್ಮಿವ್‌ಮಾಥು ಶೊಂತ್ ಅದ್ಮಿಹುಯಿನ್ ಮೋಲ್ ಲೆವೈಜೈ಼ನ್ ದೇವ್‍ನಾಬಿ ಮೇಂಢೊ ಹುಯಿರ‍್ಹಾವಳನಬಿ ಪಹಿಲ ಫಲ್ನಿತರಹುಯ. 5 ಅವ್ಣ ಮ್ಹೋಡಾಮ ಝೂ಼ಟಿ ಕೋಸ್‌ಥೂನಿ. ಅವ್ಣೆ ನಿರ್ದೋಷ್ ಹುಯಿರ‍್ಹಾಸ್.

ತೀನ್ ದೇವ್ನ ದೂತರ್

6 ಬಿಜೇಕ್ ದೇವ್‌ನೊ ದೂತ ಆಬ್‌ನ ಇಚ಼್‌ಮ ಉಡುಕರಾನು ದೇಖ್ಯೊ. ಜ಼ಮೀನ್‌ಪರ್ ಜಿವ್‌ಕರಾತೆ ಹರೇಕ್ ಜ಼ಗ್‌ಜಾ಼ತ್‌, ಖೂಮ್‌, ಬೋಲಿ, ಅದ್ಮಿಖ್ಹಾರನ ಬೋಲಿವತಾಳಾನ ಖ್ಹಾಜೆ ಹರ್‌ಹಮೇಶಾನು ಅಛ್ಛಿ ಸಂದೇಶ್ ಇನಾಕನ ಥು. 7 ಯೊ ದೇವ್ನದೂತನೆ ಜೋ಼ರೇಥಿ, "ದೇವ್‍ಥಿ ಡರೊ ಇನ ಮಹಿಮೆಕರೊ. ಶನಕತೊ ಯೊ ಅದ್ಮಿಖ್ಹಾರನ ತೀರ್ಪ್ ದ್ಯವಾನಿ ವಖ್ಹತ್ ಐಗಿ. ಇನ ಆರಾದನೆ ಕರೊ ಸೊರ್ಗನಾಬಿ, ಜ಼ಮೀನ್ನಾಬಿ, ದರ‍್ಯಾವ್ನಾಬಿ, ಪಾಣಿನ ಚೇಜ಼್‌ಭಾರನಾಬಿ ಬಣಾವವಾಳನ ಆರಾದನೆ ಕರೊಕರಿ ಬೋಲ್ಯೊ. 8 ಇನ ಪೀಠೆ ಬೇನೊ ದೇವ್ನದೂತನೆ ಐನ್, "ರಡ್ಕಿಗೈ, ರಡ್ಕಿಗೈ, ಬಾಬೆಲ್‌ಕರಿ ಹುಯಿರಿತೆ ಮೋಟಿ ನಂಗ್ರಿ ರಡ್ಕಿಗೈ! ಹೈರಿತೆ ಹರೇಕ್ ಜ಼ಗ್‌ಜಾ಼ತ್‌ವಾಳಾನ ವ್ಯಬಿಚಾರ್‌ಕರಿ ಬೋಲಾನ ದ್ರಾಕ್ಷಿನ ರಖ್ಹ್‌ನ ಪಿಡೈದಿದಿ" ಕರಿ ಬೋಲ್ಯೊ. 9 ಇನ ಪೀಠೆ ತೀನ್ನೊ ದೇವ್ನದೂತನೆ ಅಯಿನ್, "ಕೋಣ್‌ತೋಬಿ ಖೆವತೋಬಿ ಜಾನ್ವರ್‌ನಾಬಿ ಇನು ಮೂರತ್‌ನಾಬಿ ಆರಾದನೆಕರಿನ್‌ ಇವ್ಣ ತಾಳ್ವಪರ್‌ರ‍್ಹವೊ ಹಾತ್‌ಪರ್‌ರ‍್ಹವೊ ಇನು ಖ್ಹಣೇದ್ನ ನಖೈರಾಖ್ಯೂತೊ, 10 ಯೋಬಿ ಜಿನುಕು ದೇವ್‌ನೊ ಇರಾದೊಕರಿ ಬೋಲಾನ ಕಟೋರಮ ಶಾತ್ಬಿ ಮಳಾಯುಕೊಂತೆ ನಾಖಿಹುಯು ದೇವ್ನು ಇರಾದೊಕರಿ ದ್ರಾಕ್ಷಿನ ರಖ್ಹ್‌ನ ಪೀಶೆ. ಪರಿಶುದ್ ದೇವ್ನ ದೂತರ‍್ನ ಖ್ಹಾಮ್ಣೇಬಿ, ಬಲೀನ ಮೇಂಢಾನ ಚೆಲ್ಕಾನ ಖ್ಹಾಮ್ಣೆ ಅಗ್‌ಥೀಬಿ, ರಂಜ಼ಕ್‌ಥಿ, ಖ್ಹತಾಪ್ಣಿ ಪಡ್‌ಶೆ. 11 ಎಥ್ರಾನವಾಳನೆ ಖ್ಹತಾಪ್ಣಿನೊ ಧುವೊ ಜ಼ಗ್‌ಜ಼ಮಾನಮಾಬಿ ಛ಼ಡುಕರ್ಷೆ, ಜಾನ್ವರ್‌ನ ಅಜು಼ ಇನ ಮೂರತ್ನ ಖ್ಹಲಾಮ್ ಕರವಾಳು ರ‍್ಹವೊ, ಇನ ನಾಮ್ನ ಖ್ಹಣೇದ್ನ ನಖೈರಾಖವಳೊ ರ‍್ಹವೊ ರಾತ್‌ಬಿ ದನ್ ಅರಾಮ್‌ಕೊಂತೆ ರ‍್ಹಿಶೆ ಕರಿ ಮೋಟಿ ಅವಾಜ಼್‌ಥಿ ಬೋಲ್ಯೊ. 12 ಅನಾಮ ದೇವ್ನಿ ಹುಕುಮ್‌ನಾಬಿ, ಯೇಸುನಿ ಬಾರೇನಿ ವಿಶ್ವಾಸ್‌ನ ಪಾಡಿನ್ ಚಾ಼ಲುಕರಾವಳ ದೇವ್ನ ಅದ್ಮಿಖ್ಹಾರನ ಖ್ಹಮಾಳಿರ‍್ಹವಾನು ಹಜ್ಜಾ಼ ವತಾಳ್ಣು ಪಡಾಸ್‌. 13 ಪರಲೋಕ್‌ಥು ಏಕ್‌ ಅವಾಜ಼್ ಮನ ಖ್ಹಮಜ್‍ಪಡ್ಯು. ಇನೆ ಹಂಕೇಥು ಪ್ರಭುನ ಭಕ್ತರ್‌ಹುಯಿನ್ ಮರಾವಳು ಧನ್ಯಕರಿ ಲೀಖ್‌ಕರಿ ಮನ ಬೋಲ್ಯು. ಇನ ಆತ್ಮನೆ, ಒಹೊ ಇವ್ಣೆ ಧನ್ಯರಸ್. ಇವ್ಣೆ ಇವ್ಣ ಮ್ಹಿನತ್‌ನ ಖತಮ್‌ಕರಿನ್ ಅರಾಮ್ ಕರ್ಶೆ ಅಜು಼ ಇವ್ಣು ಅಛ್ಛು಼ ಕಾಮ್‌ಖ್ಹಾರು ಇವ್ಣ ಜೋ಼ಡ್ಮ ಚಾ಼ಲ್‌ಷೆ ಕರಿ ಬೋಲ್ಯೊ.

ಜ಼ಮೀನ್ನು ಖ್ಹುಗ್ಗೀನ ದನ್ನಿ ಬಾರೇಮ

14 ತದೆ ಮೇ ದೇಖಾದಿನ್ ಮಾರಖ್ಹಾಮ್ಣೆ ಅದ್ಮಿನೊ ಛಿಯ್ಯಾನಿತರ ದೆಖವ್‍ಕರಾತೆ ಏಕ್ಜ಼ಣೊ ಧೋಳ ವಾದ್‍ಳಾನ ಉಪ್ಪರ್ ಬೆಠೋಥೊ. ಇನ ಮುಡ್‌ಕ್ಯಪರ್ ಖ್ಹೊನ್ನಾನಿ ಕಿರೀಟ್‌ಥಿ. ಅಜು಼ ಇನ ಹಾತ್ಮ ಚಾ಼ಲ್ತಿ ದರಾತಿಥಿ. 15 ತದೆ ಬಿಜೇಕ್ ದೂತನೆ ಮಂದಿರ್‌ಮಾಥು ಭಾರ್‌ ಆಯಿನ್ ವಾದ್ಳಪರ್ ಬೆಠೂತೆ ಇನ, "ಜ಼ಮೀನ್‌ಮಾನು ಅನಾಜ಼್ ಪಕೈಗಯು, ವಢಾವ್ಣಿನ ದನ್ ಅಯಿಗ. ತಾರಿ ದರಾತಿನ ಪಾಡಿನ್ ಅನಾಜ಼್‌ನ ವ್ಹಾಡ್‌" ಕರಿ ಜೋ಼ರೇಖ್ಹು ಬೋಲ್ಯೊ. 16 ಇಮ್ಮಸ್ ವಾದ್ಳಪರ್ ಬೆಠೋಥೋತೆ ಯೊ ಇನಿ ಚಾ಼ಲ್ತಿ ದರಾತಿನ ಜ಼ಮೀನ್‌ಪರ್ ನಾಖ್ಯೊ. ತದೆ ಜ಼ಮೀನ್‌ಪರ್‌ನು ಅನಾಜ಼್ ವ್ಹಡೈಗು. 17 ಇನಪಾರ್ ಬಿಜೇಕ್ ದೇವ್‌ನೊ ದೂತ ಪರ್‌ಲೋಕ್‌ನು ಮಂದಿರ್‌ಮಾಥೊ ಭಾರ್‌ಆಯೊ. ಇನಕನಾಬಿ ಏಕ್‌ ಚಾ಼ಲ್ತಿ ದರಾತಿ ಥಿ. 18 ಅನವಾರ್ ಬಿಜೇಕ್ ದೇವ್‌ನೊ ದೂತ ಚಾ಼ಚ಼ರ್‌ಕನಥೊ ಆಯೊ. ಇನ ಆಗ್ನ ಉಪ್ಪರ್ ಅದಿಕಾರ್ ಥು. ಯೊ ಚಾ಼ಲ್ತಿ ದರಾತಿವಾಳನ, "ತಾರಿ ಚಾ಼ಲ್ತಿ ದರಾತಿನ ಪಾಡಿಲೀನ್, ಜ಼ಮೀನ್‌ಪರ್‌ನು ಬಾಗ್‌ನು ದ್ರಾಕ್ಷಿನ ಗುಚ್ಚಾ಼ವ್ನ ವ್ಹಾಡ್‌. ಇನು ಪಂಡುಖ್ಹಾರು ಅಖ್ಖೂಸ್ ಪಕೈಗಯು ಕರಿ ಊಚ಼ ಅವಾಜ಼್‌ಥಿ ಚಿಕ್‌ರ‍್ಯೊ. 19 ತದೆ ಯೋ ದೇವ್‌ನೊ ದೂತನೆ ಇನಿ ದರಾತಿ ಥಿ. ಜ಼ಮೀನ್‌ಪರ್‌ಲ್ಯು ದ್ರಾಕ್ಷಿನ ವೇಲಮಾನು ದ್ರಾಕ್ಷಿನ ಪಂಡಾನ ವ್ಹಾಡಿಎಕ್ಟುಕರಿನ್, ದೇವ್‌ನೊ ಇರಾದೊಕರಿ ಬೋಲಾನು ಮೋಟಿ ಬಾನೇಮ ಫೇಕ್ಯೊ. 20 ತದೆ ಯೊ ದ್ರಾಕ್ಷಿನ, ಬಾನೇನ ಖ್ಹಯೇರ‍್ನ ಭಾರ್‌ ಲೀಜೈ಼ನ್ ಖುಂದ್‌ಲ್ಯು. ಯೊ ಬಾನೆಮಾಥು ಲ್ಹೋಯಿ ನಿಕ್ಳಿನ್ ಘೋಡಾವ್‌ನು ಲಗಾಮೇನ ಛಿಮಾವಯೆತ್ರೆ ಊಚು಼ ಛ಼ಡಿನ್ ಬೇಖ್ಹೊ ಮೈಲ್ಎತ್ರೆ ದೂರ್ ಪಾಚ಼್ ಅಡಿ ಗಧಾರ್ ವ್ಹಯು.