Atos 2

ಪೇತ್ರನಿ ಬೋಧನೆ

14 ತದೆ ಪೇತ್ರನೆ ಜೋ಼ಡ್ಮಥಾತೆ ಗ್ಯಾರ‍್ಹಜ಼ಣ ಅಪೊಸ್ತಲರ‍್ನಿ ಜೋ಼ಡ್ಮ ಉಠಿಭೀರಿನ್, ಅದ್ಮಿನ ಟೋಳ್ನ ಊಚಿ ಆವಾಜ಼್‌ಥಿ ಅಮ್‍ ಬೋಲ್ಯೊಕಿ, "ಯೆಹೂದ್ಯವಾಳವೊ, ಯೆರೂಸಲೇಮ್ನ ಖ್ಹಾರ ಅದ್ಮಿವೊ, ಮಾರಿ ವಾತ್ನ ಖ್ಹಮ್‍ಜೊ, ತುಮೆ ಮಾಲುಮ್ ಕರಿಲೇವ್ಣುತೆ ವಾತೆ ಕಾನ್‌ ಲಗಾಡಿ ಖ್ಹಮಜ಼್‌ಣುಕರಿ ಮೇ ತುಮೂನ ಬೋಲುಸ್. 15 ತುಮೆ ಲಾಝಿರ‍್ಯಾಖ್ಯತೆ ತಿಮ್ ಅವ್ಣೆಖ್ಹಾರು ಕಯೇಪ್ ಛ಼ಡೈಲಿದುಕಾಹೆ" ಹಮ್ಕೆ ಬಿಜೂ಼ಬಿ ವ್ಹಾಣಾನ ನೌ ಘಂಟಾ ಹುಯಿರಾಸ್ ಎತ್ರೇಸ್. 16 ಕತೋಬಿ ಹಮ್ಕೆ ಚಾ಼ಲುಕರಾತೆ ಹಾಲತ್‌ನಿ ಬಾರೇಮ ಪ್ರವಾದಿ ಯೋವೇಲನೆ ಅಮ್‍ ಲೀಖಿರಾಖ್ಯೊಸ್; 17 ✝2:17 ಯೋವೇಲ 2:17-21 ದೇವ್ನೆ ಅಮ್‍ ಬೋಲ್ಯೊಕಿ, ‘ಖ್ಹರ್ತಿನ ದನ್ಮ ಖ್ಹಾರ ಅದ್ಮಿಪರ್, ಮಾರಿ ಆತ್ಮಾನ ಖ್ಹಾರ ಅದ್ಮಿವೋನ ಉಪ್ಪರ್ ರಂಚೀಶ್, ತುಮಾರ ತಯೇಡ ಪರ್ಖ್ಹಾ ಪ್ರವಾದ್‌ನೆ ಕರ್ಶೆ; ತುಮಾರ ಜಾ಼ನ್ಜ಼ಮಾನ್ ಖ್ಹಾರು ದರ್ಶನ್ ದೇಕ್‌ಶೆ; ಅಜು಼ ತುಮಾರು ಗಲ್‌ಢಖ್ಹಾರು ಖ್ಹೋಣ್ಯಮ ದೇಕ್‌ಶೆ.