ಗಲಾತ್ಯವಾಳಾನ 2

ಪೌಲ ಅಜು಼ ಬಿಜು಼ಖ್ಹಾರ ಅಪೊಸ್ತಲರ್

1 ಚೌ಼ಧ ವರಖ್ಹ್‌ನ ವಾರ್ ಮೆ ಬಾರ್ನಬನಿ ಜೋ಼ಡ್ಮ ತೀತನಬಿ ಬುಲೈಲಿನ್, ಬಿಜೇಕ್ ಹಲ್ಲ ಯೆರೂಸಲೇಮ್ನ ಗಯೊ. 2 ದೇವ್ನಿ ಖ್ಹೂಜ಼್‌ನಿತರ ಜಾ಼ವ್ಣುಥೂತೆ ಇನಖ್ಹಾಜೆ ಯೆಹೂದ್ಯರ್‌ಕಾಹೆತೆ ಅದ್ಮಿಮ ಮೆ ಬೋಲಿವತಾಳನು ಸುವಾರ್ತೆ ಶಾತ್‌ಕರಿ ಹಿಜ಼್ಜಾಥೂತೆ ಗಲ್‌ಢಾವ್‌ನಾಸ್ ಖ್ಹಮ್‌ಜಾ಼ಡ್ಯೊ. ಶನಕತೊ ಮೆ ಸುವಾರ್ತೆನಖ್ಹಾಜೆ ಪಡ್ಯೋತೆ ಕಾಮ್‍ರ‍್ಹೆವೊ, ಮೇ ಹಮ್ಕೆ ಕರುಕರುಸ್ತೆ ಕಾಮ್‌ಖ್ಹಾರು ಬಿಣ್‌ಫಾಯಿದಾನು ನಾಹೊಣುಕರಿ ಮಾರಿ ಆಖ್ಹ್. 3 ಮಾರ ಜೋ಼ಡ್ಮಥೋತೆ ತೀತ ಗ್ರೀಕ್‌ನೊ ಹುಯಿರೊತೋಬಿ ಇನ ಖ್ಹತ್ನಕರಾವ್ಣುಕರಿ ಕೋಣ್‌ಬಿ ಜು಼ಲಮ್‌ ಕೊಕರ‍್ಯುನಿ. 4 ಕತೋಬಿ ಭಾಣೇಥಿ ಪೇಠುಥೂತೆ ವಿಶ್ವಾಸಿಖ್ಹಾರು ಗಪ್ಲಥ್ಥಿ ಹಮುನ ಧರ್ಮಶಾಸ್ತ್ರನಿ ಕಬ್‌ಜಾ಼ಮ ಖ್ಹಪ್‌ಡಾವ್ಣುಕರಿ, ಕ್ರಿಸ್ತ ಯೇಸುಮ ಛಾ಼ತೆ ಅಪ್ಣಿ ಛುಟ್ಕಾರ್‌ನ ಮಾಲುಮ್‌ಕೊಂತೆ ತಿಮ್ ಪುಛಾ಼ವನ ಐರ‍್ಹುಥು. 5 ಸುವಾರ್ತೆನು ಖ್ಹಾಚು಼ ತುಮಾರಮ ಘಟ್ ರ‍್ಹೇವ್ಣುಕರಿ ಹಮೆ ಇವ್ಣಿ ಅಧೀನ್‌ಮ ಏಕ್‌ ಘಡೀಬಿ ಕೊದಿದಾನಿ. 6 ಕತೋಬಿ ಕೋಣ್ ಗಲ್‌ಢಕರಿ ದೆಖಾವಸ್ಕಿ ಮೇ ಬೋಲುಸ್ ಆ ಮಾರಮ ಅಜು಼ ಇವ್ಣಾಮ ಅನು ಫರಕ್ ಕೊಯ್ನಿ; ದೇವ್ ಅಖ್ಖಾ ಅದ್ಮಿವ್‌ನ ಎಕ್ಕಸ್ ತರ ದೇಖಸ್. ಯೊ ಗ‌ಲ್‌ಢಾವ್‌ಥಿ ಮನ ಶಾತ್ಬಿ ಮಳ್ಯು ಕೊಯ್ನಿ.✝2:6 ಧರ್ಮೊ 10:17 7 ಕತೋಬಿ ಖ್ಹತ್ನಕರೈಲ್ಯವಾಳಾನ ಸುವಾರ್ತೆನ ಬೋಲಿ ವತಾಳನು ಕಾಮ್ ಪೇತ್ರಾನ ಕಿಮ್ ದೆವಾಯುಕಿ, ಇಮ್ಮಸ್ ಯೆಹೂದ್ಯರ್‌ಕಾಹೆತೆ ಅದ್ಮಿನ ಯೊ ಬೋಲಿ ವತಾಳನು ಕಾಮ್ ಮನ ದೆವಾಯು. 8 ಶನಕತೊ ಯೆಹೂದ್ಯರ್‌ಮ ಅಪೊಸ್ತಲಹುಯಿನ್ ಕಾಮ್ ಕರಾನ ಪೇತ್ರಾನ ದಿದೋತೆ ದೇವ್, ಯೆಹೂದ್ಯರ್‌ಕಾಹೆತೆ ಇವ್ಣಾಮ ಅನ ಚ಼ಲಾವನಖ್ಹಾಜೆ ಮನ ದಿರಾಖ್ಯೊಥೊ. 9 ಸಬೇನು ಖಂಬುಕರಿ ಬೋಲೈಲಿದಹುಯ ಯಾಕೋಬ್, ಪೇತ್ರ, ಯೋಹಾನ ಇವ್ಣೆ ದೇವ್ನೆ ಮನ ದಿರಾಖ್ಯೋತೆ ವಾರ್‌ಖ್ಹಾನ ಮಾಲುಮ್ ಕರಿಲಿನ್ ಗಳ್‍ಜೋ಼ಡ್‍ಥಿ ರ‍್ಹವಾನು ವತಾಳನಖ್ಹಾಜೆ ಮನಾಬಿ ಬಾರ್ನಬನಾಬಿ ಹಾತ್ ಮಳಾಯೊ. ಅಜು಼ ತುಮೆ ಯೆಹೂದ್ಯರ್‌ಕಾಹೆತೆ ಅದ್ಮಿಕನ ಜಾ಼ವೊ, ಹಮೆ ಯೆಹೂದ್ಯರ್‌ಕನ ಜೈ಼ಯೇಸ್‌ಕರಿ ಮಾನಿಲಿದ. 10 ಕತೋಬಿ ತುಮೆ ಹಮಾರಮ ಛಾ಼ತೆ ದಿಕ್‌ದೆಶಾರ್‌ ಕೊಂತೆ ಇವ್ಣುನ ಖ್ಹಯಾಲ್ಮ ರಾಕ್ಣು ಕರಿ ಎಕ್ಕಸ್ ವಾತೆ ಮನ ಬೋಲ್ಯು. ಇಮ್‌ ಕರಾಮ ಮೇಬಿ ದಿಲ್‌ಲಗಾಡವಾಳೊ ಹುಯಿರ‍್ಹೊಥೊ.

ಪೌಲನೆ ಅಂತಿಯೋಕ್ಯಮ ಪೇತ್ರನ ಘುರ್ಕಾಯೊತೆ

11 ಪೇತ್ರನೆ ಅಂತಿಯೋಕ್ಯನ ಆವಾನಿ ವಖ್ಹ್‌ತೆ ಇನಾಮ ಗಲ್ತಿದೆಖಾಯುತೆ ಇನಖ್ಹಾಜೆ ಮೇ ಇನ ಖ್ಹಾರನ ಖ್ಹಾಮೇಸ್ ವಿರೋದ್ ಕರ‍್ಯೊ. 12 ಅಗ್ಗಳ್ ಯೊ ಅಂತಿಯೋಕ್ಯನ ಆವಾನಿ ವಖ್ಹ್‌ತೆ ಯೆಹೂದ್ಯರ್‌ಕಾಹೆತೆ ಇವ್ಣ ಜೋ಼ಡ್ಮ ಖಾಣು ಖಾತೋಥೊ. ಇನಪಾರ್ ಯಾಕೋಬ್ ಭಣೀಥು ಥೋಡುಜ಼ಣು ಆಯು. ತದೆ ಪೇತ್ರನೆ ಯೆಹೂದ್ಯರ್‌ಕಾಹೆತೆ ಇವ್ಣಿ ಜೋ಼ಡ್ಮ ಖಾಣುಖಾವನು ಭಿರಾಖಿದಿದೊ. ಯೆಹೂದ್ಯರ್ ಅದ್ಮಿಥಿ ಡರಿನ್, ಯೊ ಇನುಯೋಸ್ ಯೆಹೂದ್ಯರ್‌ಕಾಹೆತೆ ಅದ್ಮಿಥಿ ಅಲಕ್ ಹುಯೊ.✝2:12 ಅಪೊ 11:28—12:1-3 13 ಅತ್ರೇಸ್ ಕಾಹೆತೆ ಥೂತೆ ಯೆಹೂದ್ಯರ್‌ಬಿ ಇನಜೋ಼ಡೆ ಮಳಿನ್ ಇಮ್ಮಸ್ ಢಂಗ್ ಕರ‍್ಯು. ತದೆ ಬಾರ್ನಬಬಿ ಇವ್ಣಿ ಢಂಗ್ಮ ಪಡಿಗೊ. 14 ಇವ್ಣೆ ಸುವಾರ್ತೆನಿ ಖ್ಹಾಚಿ ತರೀಖಾಮ ಬರೋಬರ್‌ಥಿ ಚಾ಼ಲುಕರ ಕೊಯ್ನಿಕರಿ ಬೋಲಾನು ಮನ ದೆಖಾವಮ ಅಖ್ಖಾನ ಖ್ಹಾಮ್ಣೆ ಪೇತ್ರನ ಶಾತ್‌ ಬೋಲ್ಯೊಕತೊ; ತು ಏಕ್‌ ಯೆಹೂದ್ಯವಾಳೊ‍ರ‍್ಹೀನ್ ಯೆಹೂದ್ಯರ್‌ಕಾಹೆನಿತರ ಬಚಿನ್, ಯೆಹೂದ್ಯರ್‌ಕಾಹೆತೆ ಇವ್ಣುನ ಯೆಹೂದ್ಯರ್‌ನಿಘೋಣಿ ಚಾ಼ಲ್‌ನುಕರಿ ಜು಼ಲಮ್‍ಕರಿ ಬೋಲಾನುಬಿ ಶಾತ್?

ಯೆಹೂದ್ಯರ್‌ಬಿ ಯೆಹೂದ್ಯರ್‌ಕಾಹೆತೆ ಇವ್ಣುನ ವಿಶ್ವಾಸ್‍ಥಿ ರಕ್ಷಣೆ

15 ಹಮೆತೋಬಿ ಪೈದಾಖ್ಹ್‌ಥು ಯೆಹೂದ್ಯರ್, ಪಾಪಿಕರಿ ಬೋಲೈಲಿದೂತೆ ಯೆಹೂದ್ಯರ್‌ಕಾಹೆತೆ ಅದ್ಮಿಕಾಹೆ. 16 ಖಿವೊತೋಬಿ ಖಲಿ ಧರ್ಮಶಾಸ್ತ್ರನ ಪಾಡಿಚಾ಼ಲಾಥಿ ನೀತಿವಾಳೊಕರಿ ಬಣಾನ ಕೊಹುವ್ವಾನಿ ಕರಿ ಮನ ಮಾಲುಮ್. ಯೇಸು ಕ್ರಿಸ್ತಮ ವಿಶ್ವಾಸ್ ರಾಖಾಥೀಸ್ ನೀತಿವಾಳೊ ಬಣಾನ ಹುವಾಸ್. ಇನಖ್ಹಾಜೆ ಹಮೆ ನೀತಿವಾಳ ಹುವಾನಖ್ಹಾಜೆ ಯೇಸು ಕ್ರಿಸ್ತಾಮಸ್ ವಿಶ್ವಾಸ್ ರಾಖ್ಯ. ಅಮ್‌ರ‍್ಹಾವಪರ್ ಹಮೆ ನೀತಿವಾಳ ಹುಯಾತೆ ಕ್ರಿಸ್ತಮ ವಿಶ್ವಾಸ್ ರಾಖಿನಸ್ ಪಣ್ಕಿ ಧರ್ಮಶಾಸ್ತ್ರನಿಘೊಣಿ ಚಾ಼ಲಾಥಿ ಕಾಹೆ. 17 ಕತೋಬಿ ಅಪ್ಣೆ ಯೇಸು ಕ್ರಿಸ್ತಥಿ ನೀತಿವಾಳ ಕರಿ ತೀರ್ಮಾನ್ ಹುವಾನಿ ಕೋಶಿಶ್ಮ ಅಪ್ಣೆ ಪಾಪಿಕರಿ ದೆಖಾಯತೊ ಕ್ರಿಸ್ತ ಪಾಪ್ನ ಮದತ್‌ಕರಾವಾಳೊ ಕಿಶು? ಕೆದೇಬಿ ಕೊಯ್ನಿ. 18 ಮೇ ರಡ್ಕಾಯ ಹುಯಾನಸ್ ಪಾಛು಼ ಭಾಂದ್ಯೊತೊ ಮಾರುಮೇಸ್ ಅಪರಾದಿಕರಿ ದೆಖೈಜಿಷ್ನಿ. 19 ಮೇತೋಬಿ ದೇವ್ನಖ್ಹಾಜೆ ಬಚಿರ‍್ಹಾವನಖ್ಹಾಜೆ ಧರ್ಮಶಾಸ್ತ್ರಮಾಥೊ ಧರ್ಮಶಾಸ್ತ್ರನ ಭಾಗ್ನ ಮರ‍್ಯೊಹುಯೊ ಹುಯಿರೊಸ್. ಇನಖ್ಹಾಜೆ ಮೇ ಜಿನು ಕ್ರಿಸ್ತಾನಿಜೋ಼ಡ್ಮ ಶಿಲ್‌ಬೆಪರ್ ಘಲೈಗಯೊ ಹುಯೊ ಹುಯಿರೊಸ್. 20 ಅಜು಼ ಜಿವ್‌ಕರೂಸ್ತೆ ಮೇಕಾಹೆ, ಕತೋಬಿ ಕ್ರಿಸ್ತ ಮಾರಮಹಿ ಜಿವವಾಳೊ ಹುಯಿರೊಸ್. ಹಮ್ಕೆ ಮೆ ಶರೀರ್‌ಮ ಜಿವ್ಣುಕರಾನು ಕಿಮ್ ಕತೊ ದೇವ್ನ ಛಿಯ್ಯಾಪರ‍್ಲಿ ವಿಶ್ವಾಸ್‌ಥೀಸ್. ಯೋ ಮನ ಪ್ಯಾರ್ ಕರೀನ್ ಮಾರ ಖ್ಹಾಜೇಥಿ ಇನಾಸ್ ದಿನಾಖಿದಿದೊ. 21 ಮೇ ದೇವ್ನ ವಾರ್‌ಖ್ಹೊನ ಝಿಟ್ಕಾರುಕೊಯ್ನಿ. ಕತೋಬಿ ಧರ್ಮಶಾಸ್ತ್ರಥಿ ನೀತಿವಾಳ ಹುಯೆಜಾ಼ಯ್‌ ಕತೊ ಕ್ರಿಸ್ತನು ಮರಾನು, ಫಾಯಿದೊಸ್ ಕೊಯ್ನಿಕರಿ ಬೋಲೆಜಾ಼ಯ್.