João 12

ಬೇಥಾನ್ಯಮ ಯೇಸುನ ಅಬಿಷೇಕ್ ಹುಯೂತೆ

1 ಪಸ್ಕ ಪೂಜಾ಼ನ ಛೊ಼ ದನ್ನ ಪಾಛ಼ಳ್ ಯೇಸು ಬೇಥಾನ್ಯ ಗಾಮ್‌ನ ಗಯೊ, ಯೇಸುನೆ ಮರ‍್ಯಾಹುಯಾಮಾಥು ಜಿವ್ತೊ ಉಠಾಡ್ಯೋತೆ ಲಾಜ಼ರ್‌ಬಿ ಹಿಜ್ಜಾ಼ಸ್ ರ‍್ಹೇತೊಥೊ. 2 ಯೇಸುನಖ್ಹಾಜೆ ಹಿಜ್ಜಾ಼ ಖಾಣು ತೈಯಾರ್ ಕರಿರಾಖ್ಯುಥು, ಮಾರ್ಥ ಖಾಣು ನಾಖಿನ್ ದೇವ್‌ಕರ್ತೀಥಿ, ಯೇಸುನ ಜೋ಼ಡೆ ಖಾಣನ ಬೆಠುಥೂತೆ ಇವ್ಣಾಮ ಲಾಜ಼ರ್‌ಬಿ ಏಕ್‌ ಜ಼ಣೊ. 3 ತದೆ ಮರಿಯನೆ, ಘಣ ಮೋಲ್ನು ಜಟಮಂಸಿ ವಾನು ತೇಲ್ನ ಲೈನ್‌, ಯೇಸುನ ಗೋಡಾಪರ್ ರಂಚಿನ್, ಇನ ಮುಡ್‌ಕ್ಯಾನ ಕೇಖ್ಹ್‌ಥಿ ಯೇಸುನ ಗೋಡ ನೂಛಿ. ಯೋ ತೇಲ್ನಿ ಮಿಠ್ಠಿ ವಾಖ್ಹ್‌ ಹಿಡಿ ಘರ್ ಅಖ್ಖುಸ್ ಮಹಿಕವ್‍ಕರ‍್ತುಥು. 4 ಇನ ಶಿಷ್ಯರ್‌ಮ ಏಕ್‌ ಜ಼ಣೊ ಹುಯಿರ‍್ಹೋತೆ, ಕತೊ (ಇನ ಧೋಕೇಥಿ ಧರಿದ್ಯವಾಳೊ ಇಸ್ಕರಿಯೋತ ಯೂದಾನೆ), 5 "ಆ ತೇಲ್ನ ತೀನ್‌ಖ್ಹೊ ರೂಪಾನು ಪಾವ್ಲನ ವೇಚಿನ್, ಗರೀಬ್‌ನ ಶನ ಕೋದಿದಿನಿ?" ಕರಿ ಬೋಲ್ಯೊ. 6 ಗೋರ್‌-ಗರೀಬ್‌ನಿ ಬಾರೇಮ ಫಿಕರ್ ಕರೀನ್, ಆ ವಾತೇನ ಬೋಲ್ಯೋತೆ ಕಾಹೆ, ಪಣ್ಕಿ ಯೋ ಚೋ಼ರ್ ಹುಯಿರ‍್ಹೊಥೋತೆ ಇನಖ್ಹಾಜೇಸ್ ಅಮ್ ಬೋಲ್ಯೋತೆ.ಅಜು಼ ಪೈಶಾನಿ ಚ಼ಂಚಿ ಇನ ಹಾತ್‌ಮ ರ‍್ಹೇತುಥು, ಯೋ ಚ಼ಂಚಿಮ ನಾಖಸ್ತೆ ಪೈಶಾನ ಯೋ ಕಾಡಿಲೇತೋಥೊ.

7 ಕತೋಬಿ ಯೇಸುನೆ ಇನ, "ಅನ ಮ್ಹೇಲೊ! ಮನ ಮಖ್ಹಾಣ್ಯನ ದನ್ನುಕಾಮ್ ಹಮ್ಕೇಸ್ ಕರಿಲಿದಿ. 8 ಗರೀಬ್ ಖ್ಹಾರು ಹಮೇಶ ತುಮಾರ ಜೋ಼ಡೆ ರ‍್ಹಿಶೆ, ಕತೋಬಿ ಮೇ ಹಮೇಶ ತುಮಾರ ಜೋ಼ಡೆ ಕೋ ರ‍್ಹೀಶ್‌ನಿ" ಕರಿ ಬೋಲ್ಯೊ.

ಲಾಜ಼ರ್‌ನಿ ವಿರೋದ್ ಮಶ್ಲತ್ ಭಂದಾಯುತೆ

9 ಯೆಹೂದ್ಯರ್ ಅದ್ಮಿನಿ ಮೋಟಿ ಭೀಡ್, ಯೇಸು ಬೆಥಾನ್ಯಾಮ ಛಾ಼ ಕರಿ ಮಾಲುಮ್‌ ಕರಿಲೀನ್, ಖಲಿ ಇನ ದೇಖಾನಖ್ಹಾಜೆ ಕಾಹೆತೆ, ಇನೆ ಮರ‍್ಯಾಹುಯಮಾಥು ಜಿವ್ತು ಉಠಾಡ್ಯೋತೆ ಲಾಜ಼ರ್‌ನಾಬಿ ದೇಕ್ಣು ಕರಿ ಹಿಜ್ಜಾ಼ ಗಯು. 10 ಕತೋಬಿ ಮಹಾಯಾಜಕರ್‌ ಲಾಜ಼ರ್‌ನಾಬಿ ಮರೈನಾಕ್ಣು ಕರಿ ಸೋಚ್ಯು. 11 ಶನಕತೊ ಲಾಜ಼ರ್‌ನಟೇಕೆ ಘಣು ಅದ್ಮಿ ಯೆಹೂದ್ಯರ್ ಖ್ಹಾರು ಇವ್ಣುನ ಮ್ಹೆಂದಿನ್, ಯೇಸುನ ವಿಶ್ವಾಸ್‌ ಕರ‍್ಯು.

ಯೇಸು ರಾಜಾ಼ನಿಘೋಣಿ ಯೆರೂಸಲೇಮ್ಮ ಗಯೋತೆ

12 ತಿನವ್ಹಾಣೆ, ಪಸ್ಕ ಪೂಜಾ಼ನ ಆಯುಥೂತೆ ಅದ್ಮಿನಿ ಭೀಡ್‌ನೆ, ಯೇಸು ಯೆರೂಸಲೇಮ್ಮ ವಳ್ಯಾವಸ್ ಕರಿ ಖ್ಹಮ್‌ಜ್ಯು. 13 ತದೆ ಇವ್ಣೆ ಖಜೂ಼ರ‍್ನಿಡಾಳಿಯೇನ ಪಳ್ಳಿನ್‌, ಯೇಸುನ ಮಳಾನ ಗಯು, ಅಜು಼ ಚಿಕ್ರಿನ್ ಬೋಲ್ಯುಕಿ, "ಹೊಸನ್ನ! ಪ್ರಭುನ ನಾಮ್‌ಪರ್‌ ಆವಾಳ ರಾಜಾ಼ನ ದೇವ್ ಆಶೀರ್ವಾದ್‌ ಕರಾದೆ! ಇಸ್ರಾಯೇಲ್‌ನ ರಾಜಾ಼ನ ದೇವ್ ಆಶೀರ್ವಾದ್‌ ಕರಾದೆ!"

14 ಯೇಸುನೆ ಏಕ್‌ ಗಧೇಡಾನ ದೇಖಿನ್‌, ಇನಾಪರ್‌ ಬೇಶಿಗಯೊ.

15 "ಚೀಯೋನ್ ನಂಗ್ರಿ ಡರ್‌ನಕೊ!

ಹಂದೇಕ್, ತಾರೊ ರಾಜ಼,

ಗಧೇಡಾನ ಚೆಲ್ಕಪರ್‌ ಬೇಶಿನ್ ವಳ್ಯಾವಸ್ತೆ" ಕರಿ ಧರ್ಮಶಾಸ್ತ್ರಮ ಛಾ಼ತೆ ವಾತೆ ಅಮ್ ಚಾ಼ಲಿಗಿ.*12:15 ಜಕರೀಯ 9:9

16 ಯೇಸುನ ಶಿಷ್ಯರ್‌ನ ಯೋ ವಖ್ಹತ್‌ಮ ಆ ಮಾಲುಮ್‌ ಕೋ ಪಡ್ಯುನಿ; ಕತೋಬಿ ಯೇಸು ಮಹಿಮೆನು ಪದವಿಮ ಆವಾನ ಬಾದ್‌ಮ, ಆ ಇನಿ ಬಾರೇಮಸ್ ಲೀಖೈರ‍್ಹೂಸ್ತೆ ಕರಿ, ಅಜು಼ ಅಪ್ಣೆ ಆ ಖ್ಹಾರಾನ ಯೇಸುನಖ್ಹಾಜೆ ಕರ‍್ಯಾ ಕರಿ ಇವ್ಣ ಯಾದ್ಮ ಆಯು.

17 ಅತ್ರೇಸ್ ಕಾಹೆತೆ ಲಾಜ಼ರ್‌ನ ಘವಿನ ಮಹಿಥು ಚಿಕ್ರಿನ್‌, ಜಿವ್ತು ಉಠಾಡ್ಯೋತೆ ವಖ್ಹತ್‌ಮ, ಇನಜೋ಼ಡೆ ಥೂತೆ ಇವ್ಣೆ ದೇಖ್ಯುತೆ ಅದ್ಮಿಖ್ಹಾರು ಅನಿ ಬಾರೇಮ ಸಾಕ್ಷಿ ಬೋಲುಕರ್ತೂಥು. 18 ಯೇಸುನೆ ಆ ಅದ್ಭುತ್ ಕಾಮ್ ಕರ‍್ಯೊ ಕರಿ ಖ್ಹಮ್‌ಜ್ಯೂತೆ ಇನಖ್ಹಾಜೆ ಅದ್ಮಿನು ಝೂ಼ಂಡ್‌ ಇನ ಮಳಾನ ಜೈ಼ರ‍್ಹೂಥು. 19 ತದೆ ಫರಿಸಾಯರ್‌ವಾಳು ಏಕ್‌ಥಿ-ಏಕ್‌, "ಹಂದೇಖೊ, ಅಪ್ಣೊ ಹಾತ್‌ ಶಾತ್ಬಿ ಕರಾನ ಕೋ ಹೂಕರಾನಿ! ಆ ಜಗತ್‌ನು ಖ್ಹಾರು ಅದ್ಮಿ ಇನ ಪೀಠೆ ಒಳ್ಯುಜಾ಼ಸ್!" ಕರಿ ಬೋಲಿಲಿದು.

ಗ್ರಿಕ್‌ವಾಳು ಥೋಡುಜ಼ಣು ಯೇಸುನ ಢೂಂಡ್ಯುತೆ

20 ಪಸ್ಕಪೂಜಾ಼ನ ಆರಾದನೆ ಕರ್ನುಕರಿ ಯೆರೂಸಲೇಮ್‍ಥು ಆಯುಥೂತೆ ಇಸ್ರಾಯೇಲ್‍ವಾಳಮ ಥೋಡು ಜ಼ಣು ಗ್ರೀಕ್‌ವಾಳುಬಿ ಥೂ. 21 ಇವ್ಣಾಮ ಯೊ ಗ್ರೀಕ್‍ವಾಳು ಗಲಿಲಾಯಮ ಛಾ಼ತೆ ಬೆತ್ಸಾಯಿದ ಗಾಮ್‌ನೊ ಫಿಲಿಪ್ಪಕನ ಜೈ಼ನ್‌, "ಮಾಲಿಕ್, ಹಮೆ ಯೇಸುನ ದೇಕ್ಣು" ಕರಿ ಇನ ಗಿಂಗಾಯು.

22 ಫಿಲಿಪ್ಪನೆ ಜೈ಼ನ್‌, ಅಂದ್ರೆಯನ ಆ ಬಾರೇಮ ಬೋಲ್ಯೊ, ತದೆ ಫಿಲಿಪ್ಪ ಅಜು಼ ಅಂದ್ರೆಯ ಭೇಜ಼ಣನೆ ಯೇಸುನ ಬೋಲ್ಯ. 23 ಯೇಸುನೆ ಇವ್ಣುನ ಜ಼ವಾಬ್ ದಿದೊ, "ಅದ್ಮಿನ ಛಿಯ್ಯಾನಿ ಮಹಿಮೆ ಮಳಾನಿ ವಖ್ಹತ್ ಐಗೈ. 24 ಮೇ ತುಮೂನ ಖ್ಹಾಚ ಬೋಲು ಕರುಸ್; ಕಬ್ಲಗು ಘವ್‌ನೊ ದಾಣೊ ಜ಼ಮೀನ್‌ಮ ಪಡೀನ್, ಮರ‍ಕೊಯ್ನಿಕಿ, ತಬ್‍ಲಗು ಎಕ್ಕಸ್ ರ‍್ಹಿಶೆ; ಕದೆ ಮರ‍ಸ್ಕಿ ತದೆ, ಘಣು ದಾಣಾನ ದಿಶೆ. 25 ಇನೊ ಶೊಂತ್‌ ಜಾನ್ನ ಪ್ಯಾರ್ ಕರಾವಾಳು ಇನ ಗುಮೈಲಿಶೆ, ಆ ಜಗತ್‌ಮ ಕೋಣ್ ಇನ ಶೊಂತ್ ಜಾನ್ನ ಕಾಡಿಲ್ಯವಾನಬಿ ಪೀಠೆ ಕೋ ಹಟಾನಿಕಿ, ಯೊ ಹರ್‌ಹಮೇಶಾನ ಖ್ಹಾಜೆ ಇನ ಬಚಾ಼ಡಿಲಿಶೆ. 26 ಕೋಣ್ ಮಾರಿ ಸೇವೆ ಕರ್ನುಕರಿ ಛಾ಼ಕಿ ಮಾರ ಪೀಠೆ ಆವ್ಣುಸ್ ಆವ್ಣು, ತದೆ ಮೇ ಕಿಜ್ಜಾ಼ ರ‍್ಹೀಶ್‌ಕಿ ಹಿಜ್ಜಾ಼ಸ್ ಮಾರೊ ಸೇವಕ್‌ಬಿ ರ‍್ಹಿಶೆ. ಕೋಣ್ ಮಾರಿ ಸೇವೆ ಕರಾಸ್ಕಿ, ಇವ್ಣುನ ಮಾರೊ ಬಾ ಸನ್ಮಾನ್‌ ಕರ್ಶೆ.

ಯೇಸುನೆ ಇನಿ ಮರಣ್ಣಿ ಬಾರೇಮ ಬೋಲ್ಯೋತೆ

27 "ಹಮ್ಕೆ ಮಾರೊ ಜಾನ್‌ ಘಬ್ರಾವ್‍ ಕರಾಸ್ ಅಜು಼ ಮೇ ಶಾತ್‌ ಬೋಲು? ಅಮ್‍ ಬೋಲುಕಿಶು ‘ಬಾ, ಆ ಖ್ಹತಾಪ್ಣಿನಿ ವಖ್ಹತ್‌ಮಾಥು ಮನ ಬಚಾ಼ವ್‍ಕರಿ? ಕತೋಬಿ ಅನಖ್ಹಾಜೆಸ್ ಮೇ ಆಯೋತೆ. 28 ಬಾ, ತಾರು ನಾಮ್ ಮಹಿಮ ಕರಿಲೆ!" ಕರಿ ಬೋಲ್ಯೊ.

ತದೆ ಸೊರ್ಗಮಾಥು ಆವಾಜ಼್ಆಯು, "ಮಾರು ನಾಮ್ನ ಮಹಿಮೆ ಕರಿಲಿದೊ, ಮೇ ಅಜು಼ ಪಾಛೊ಼ ಅನಿ ಮಹಿಮೆ ಕರೀಶ್" ಕರಿ ಬೋಲ್ಯು.

29 ಹಿಜ್ಜಾ಼ ಭೀಯುಥೂತೆ ಝೂಂಡ್‍ಖ್ಹಾರು ಆ ಅವಾಜ಼್‌ನ ಖ್ಹಮ್‌ಜಿನ್‌, "ಗಲ್ಹಾರ‍್ಯು" ಕರಿ ಬೋಲ್ಯು. ಅಜು಼ ಥೋಡಾನೆ, "ದೇವ್‌ನೊ ದೂತಾನೆ ಯೇಸುನ ಜೋ಼ಡೆ ವಾತೆ ಬೋಲ್ಯೊ" ಕರಿ ಬೋಲ್ಯು.

30 ಕತೋಬಿ ಯೇಸುನೆ ಇವ್ಣುನ, "ಆ ಅವಾಜ಼್ ಹುಯೂತೆ ಮಾರ ಅಛ್ಛಾ಼ನಖ್ಹಾಜೆ ಕಾಹೆ, ಪಣ್ಕಿ ತುಮಾರ ಅಛ್ಛಾ಼ನ ಖ್ಹಾಜೆಸ್. 31 ಆ ಜಗತ್ನ ತೀರ್ಪ್ ಹುವಾನಿ ಘಡಿ ಆಸ್; ಯೊ ಆ ಜಗತ್ನ ರಾಜ಼್‌ಭಾರ್‌ ಚ಼ಲಾಯೊತೆ ಆ ಅದಿಪತಿನ ಭಾರ್‌ ಧಕೇಲ್‌ಶೆ. 32 ಮೇ ಜ಼ಮೀನ್‍ಪರ್ಥೊ ಉಪ್ಪರ್ ಪಡೈಜೈ಼ಶ್‌ತೆ ತದೆ ಹರೇಕ್ನ ಮಾರಕನ ಖೇಚಿಲೀಶ್‌" ಕರಿ ಬೋಲ್ಯೊ. 33 ಯೋ ಮರಾನಿ ತರೀಖಾನ ಯೇಸುನೆ ಆ ವಾತೇಥಿ ವತಾಳಿಲಿದೊ.

34 ತದೆ ಅದ್ಮಿನಿ ಭೀಡ್‌ನೆ, "ಕ್ರಿಸ್ತ ಹರ್‌ಹಮೇಶ ಜಿವ್ತೊ ರ‍್ಹಿಶೆ’ ಕರಿ ಧರ್ಮಶಾಸ್ತ್ರಮ ಬೋಲಾಸ್ನಿ?*12:34 ಕೀರ್ತನೆ 110:4; ಯೆಶಾಯ 9:7; ಯೆಹೆಜ್ಕೆಲ್ 37:25; ದಾನಿಯೇಲ್ 7:14 ಇಮ್‍ಕತೊ, ‘ಅದ್ಮಿನೊ ಛಿಯ್ಯೊ ಉಪ್ಪರ್ ಪಡೈಜಾ಼ಶೆ’ ಕರಿ ತೂ ಬೋಲಾಸ್ತೆ ಕಿಮ್? ಯೋ ಅದ್ಮಿನೊ ಛಿಯ್ಯೊ ಕೋಣ್?" ಕರಿ ಪುಛಾ಼ಯು.

35 ತದೆ ಯೇಸುನೆ ಇವ್ಣುನ ಬೋಲ್ಯೊ, "ಬಿಜು಼ ಥೋಡ ದನ್ನಸ್‌ ಉಜಾ಼ಳು ತುಮಾರಾಮ ರ‍್ಹಿಶೆ, ಅಂಧಾರು ತುಮಾರಪರ್ ಢಪಾವನ ಅಗಾಡಿಸ್ ಉಜಾ಼ಳು ರ‍್ಹವಾನಿವಖ್ಹ್‌ತೆಸ್ ಚಾ಼ಲೊ. ಅಂಧಾರಾಮ ಚಾ಼ಲವಾಳಾನ ಯೋ ಕಿಜ಼್ಜಾ ವಳ್ಯೊಜಾ಼ಸ್ ಕರಿ ಮಾಲುಮ್‌ ಕೋಪಡಾನಿ. 36 ತುಮಾರಕನ ಉಜಾ಼ಳು ರ‍್ಹವಾನಿ ವಖ್ಹತ್‌ಮಾಸ್‌ ಉಜಾ಼ಳಾನ ನಂಬೊ, ನಂಬ್ಯಾತೊ, ತದೆ ತುಮೆ ಉಜಾ಼ಳವಾಳ ಹುಯಿರ‍್ಹೀಶು" ಕರಿ ಬೋಲ್ಯೊ.

ಯೆಹೂದ್ಯರ್‌ನಿ ಅವಿಶ್ವಾಸ್

ಆ ಬೋಲಾನ ಬಾದ್‌ಮ, ಯೇಸುನೆ ಇವ್ಣ ಖ್ಹಾಮೇಥೊ ಓಠೆಚ಼ಲೆಗಯೊ. 37 ಯೇಸುನೆ ಇವ್ಣ ಖ್ಹಾಮ್ಣೆಸ್ ಆ ಖ್ಹಾರು ಅದ್ಭುತ್‌ಕಾಮ್ ಕರ‍್ಯೊತೋಬಿ, ಇವ್ಣೆ ಇನಾಪರ್‌ ವಿಶ್ವಾಸ್ ಕೋ ಕರ‍್ಯುನಿ 38 ಅನೇಥಿ ಪ್ರವಾದಿ ಯೆಶಾಯನೆ ಬೋಲ್ಯೋತೆ ವಾತೆ ಖ್ಹಾಚಿ ಹುಯಿಗು: ಯೋ ಶಾತ್‌ಕತೊ,

"ಪ್ರಭು, ಹಮೆ ಬೋಲ್ಯಾತೆ ಖಬರ್‌ನ ಕೋಣ್ ವಿಶ್ವಾಸ್ ಕರ‍್ಯು?

ಪ್ರಭುನಿ ಭುಜ಼್‌ನಿ ತಾಖತ್ ಕಿನ ದೆಖಾಯು?"*12:38 ಯೆಶಾಯ 53:1 ಕರಿ ಬೋಲಾನುಸ್.

39 ಇವ್ಣೆ ನಂಬ್ಯುಕೊಂತೆ ಇನಖ್ಹಾಜೆ ಯೆಶಾಯನೆ ಬಿಜೇಕ್‌ ವಾತೆ ಬೋಲಿರಾಖ್ಯೊಸ್, ಯೋ ಶಾತ್‌ಕತೊ,

40 ‘ದೇವ್ನೆ ಇವ್ಣ ಡೋಳಾನ ಕಾಣು ಕರಿರಾಖ್ಯೋಸ್,

ಅಜು಼ ಇವ್ಣ ದಿಲ್ನ ಕಠಣ್ ಕರಿರಾಖ್ಯೋಸ್,

ಶನಕತೊ, ಇವ್ಣೊ ಡೋಳೊ ದೇಕ್ಣು ನಾ

ಅಜು಼ ಇವ್ಣೊ ದಿಲ್‌ ಪರಖ್‌ಣು ನಾ’ ಕರಿ

ಅಜು಼ ಇವ್ಣೆ ಇನಾಭಣಿ ಫರೀನ್,

ಇನಖ್ಹಾಜೆ ಅಛ್ಛು಼ ನಾ ಹೋಣು ಕರಿ" ಬೋಲೈರ‍್ಹುಸ್ತೆ.

41 ಯೆಶಾಯನೆ ಯೇಸುನಿ ಮಹಿಮೆನ ದೇಖ್ಯೋತೆ ಇನಖ್ಹಾಜೇಸ್ ಇನಿ ಬಾರೇಮ ಆ ವಾತೇನ ಬೋಲ್ಯೋತೆ.

42 ತದೇಬಿ ಘಣು ಯೆಹೂದ್ಯರ್‌ನು ಅದಿಕಾರಿನೆ ಯೇಸುಪರ್‌ ವಿಶ್ವಾಸ್‌ ಕರ‍್ಯು, ಕತೋಬಿ ಸಭೆ ಭರಾವನು ಮಂದಿರ್‌ಮಾಥು ಭಾರ್ ನಾಖಿದಿಶೆ ಕರಿ ಫರಿಸಾಯರ್‌ನ ಡರ್‌ಥಿ, ಅದ್ಮಿನ ಖ್ಹಾಮೆ ಬೋಲಿಲಿದುಕೊಯ್ನಿ. 43 ಶನಕತೊ ಇವ್ಣೆ ದೇವ್‍ಥಿ ಆವಸ್ತೆ ಖ್ಹರಾವ್ಣಿಥೀಬಿ, ಅದ್ಮಿಥಿ ಆವಸ್ತೆ ಮರ್ಯಾದಿಪರಸ್‌ ಇವ್ಣುನ ಘಣು ಪ್ಯಾರ್ ಥೂ.

ಯೇಸುನಿ ವಾತೇಪರ್‌ ತೀರ್ಪ್

44 ಯೇಸುನೆ ಜೋ಼ರೇಖ್ಹು ಚಿಕ್ರಿನ್, "ಮಾರಪರ್ ವಿಶ್ವಾಸ್‌ ಕರಾವಾಳೊ ಖಲಿ ಮಾರಪರಾಸ್‌ ಕಾಹೆ, ಕತೋಬಿ ಮನ ಮೋಕ್‌ಲ್ಯೊತೆ ಇನಾಪರ್‌ಬಿ ವಿಶ್ವಾಸ್‌ ಕರಾವಾಳೊ ಹುಯಿರ‍್ಹೋಸ್. 45 ಕೋಣ್‍ ಮನ ದೇಖವಾಳೊಕಿ, ಮನ ಮೋಕ್‌ಲ್ಯೊತೆ ಇನಾಬಿ ದೇಖವಾಳೊ ಹುಯಿರ‍್ಹೋಸ್. 46 ಮೇ ಉಜಾ಼ಳು ಹುಯಿನ್ ಆ ಜಗತ್‌ಮ ಐರ‍್ಹೋಸ್ತೆ, ಮನ ನಂಬವಾಳು ಏಕ್‌ಬಿ ಅಂಧಾರಾಮ ನಾ ರ‍್ಹೇವ್ಣುಕರಿಸ್. 47 ಕೋಣ್‌ತೋಬಿ ಮಾರಿ ವಾತೆಅಖ್ಖಾನ ಖ್ಹಮ್‌ಜಿನ್‌ಬಿ, ಇನಲೀನ್ ಚಾ಼ಲ್ಯನಾತೊ, ಇನ ಮೇ ತೀರ್ಪ್‌ ಕರುಕೊಯ್ನಿ. ಜಗತ್ನ ತೀರ್ಪ್ ಕರಾನಖ್ಹಾಜೆ ಮೇ ಆಯೊ ಕೊಯ್ನಿ, ಪಣ್ಕಿ ಆ ಜಗತ್ನ ಬಚಾ಼ಡಾನಖ್ಹಾಜೆ ಆಯೊತೆ. 48 ಕೋಣ್ ಮನ ಝಿಟ್ಕಾರಿನ್, ಮಾರಿ ವಾತೇನ ಮಾನಕೊಂತೆ ಇವ್ಣುನ ತೀರ್ಪ್‌ ಕರಾವಾಳು ಏಕ್‌ ಛಾ಼. ಯೋ ಕೆಹುಕತೊ ಮೇ ಬೋಲ್ಯೋತೆ ಯೋ ವಾತೇಸ್‌, ಖ್ಹರ್ತಿನ ದನ್ಮ ಇವ್ಣುನ ತೀರ್ಪ್ ಕರ್ಶೆ. 49 ಆ ಖ್ಹಾಚು಼, ಶನಕತೊ ಮಾರಿ ಅದಿಕಾರ್‌ಥಿ ಮೇಸ್ ವಾತೆ ಕೋ ಬೋಲ್ಯೋನಿ ಮನ ಮೋಕ್‌ಲ್ಯೊತೆ ಬಾನೇಸ್, ಮೇ ಶಾತ್‌ ಬೋಲ್‌ನು ಅಜು಼ ಖಿವಿವಾತೆ ಬೋಲಿ ವತಾಳ್ಣು ಕರಿ ಮನ ಹುಕುಮ್ ದೀರಾಖ್ಯೊಸ್. 50 ಬಾನಿ ಹುಕುಮ್‌ ಹರ್‌ಹಮೇಶಾನಿ ಜಿ಼ಂದ್‌ಗಿ ದೇಸ್ ಕರಿ ಮನ ಮಾಲುಮ್‌. ಇನಖ್ಹಾಜೆ ಬಾನೆ ಮನ ಬೋಲಿದಿದೋತೆ ಇನಾಸ್ ಮೇ ಬೋಲುಸ್" ಕರಿ ಬೋಲ್ಯೊ.