ಯೋಹಾನ 6

53 ಯೇಸುನೆ ಇವ್ಣುನ, "ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ತುಮೆ ಅದ್ಮಿನೊ ಛಿಯ್ಯಾನು ಬೋಟಿನ ನಾ ಖಾದಾತೊ, ಅಜು಼ ಇನು ಲ್ಹೋಯಿನ ನಾ ಪೀದಾತೊ ತುಮಾರ ಮಹಿ ಜಾನ್‌ ಕೊ ರ‍್ಹಿಶೇನಿ. 54 ಕೋಣ್ ಮಾರಿ ಬೋಟಿನ ಖಾಸ್ಕಿ, ಮಾರು ಲ್ಹೋಯಿನ ಪಿಯ್ಯಾಸ್‍ಕಿ ಇವ್ಣುನ ಹರ್‌ಹಮೇಶಾನಿ ಜಿ಼ಂದ್‌ಗಿ ಛಾ಼, ಅಜು಼ ಮೇ ಇನ ಖ್ಹರ್ತಿನ ದನ್ಮ ಜಿವ್ತು ಉಠಾಡಿಶ್‌. 55 ಮಾರಿ ಬೋಟಿ ಖ್ಹಾಚ ಖಾಣು ಅಜು಼ ಮಾರು ಲ್ಹೋಯಿ ಖ್ಹಾಚ ಪಾನ್ಕ ಹುಯಿರ‍್ಹುಸ್‍. 56 ಮಾರಿ ಬೋಟಿನ ಖೈನ್, ಮಾರೂ ಲ್ಹೋಯಿನ ಪಿಯ್ಯಾವಾಳು ಯೊ ಮಾರಾಮ ರ‍್ಹೇಸ್‌, ಅಜು಼ ಮೇ ಇವ್ಣಾಮ ಜಿವಿರ‍್ಹೀಶ್‌. 57 ಜಿವ್ತೊ ಹುಯಿರ‍್ಹೋತೆ ಬಾನೆ ಮನ ಮೋಕ್ಲಿರಾಖ್ಯೊಸ್, ಅಜು಼ ಮೇ ಇನೇಥಿಸ್ ಜಿವ್‌ಸ್‌. ಇನಖ್ಹಾಜೆ ಕೋಣ್ ಮನ ಖಾಸ್ಕಿ ಯೋ ಮಾರೇಥಿ ಜಿವ್‌ಶೆ. 58 ಹೈರುತೆ ಸೊರ್ಗಾಥು ಉತ್ರಿ ಆಯೋತೆ ರೋಟೊ ಆಸ್. ತುಮಾರ ಗುರುಗುರಬ್‌ಲ್ಯ ಮನ್ನಾ ಖಾದು ಅಜು಼ ಮರಿಗಯು. ಕತೋಬಿ ಕೋಣ್ ಆ ರೋಟಾನ ಖಾಸ್ಕಿ ಯೋ ಕದೇಬಿ ಜಿವ್ತೊ ರ‍್ಹಿಶೆ."