João 9

ಯೇಸುನೆ ಪೈದಾಖ್ಹ್‌ಥು ಕಾಣು ಥೂತೆ ಅದ್ಮಿನ ಅಛ್ಛು಼ ಕರ‍್ಯೊತೆ

1 ಯೇಸು ಚಾ಼ಲ್ತೊ ಜಾ಼ವಾನಿ ವಖ್ಹತ್‌ಮ, ಪೈದಾಖ್ಹ್‌ಥೂಸ್‌ ಕಾಣು ಥೂತೆ ಏಕ್‌ ಅದ್ಮಿನ ದೇಖ್ಯೊ. 2 ಯೇಸುನ ಶಿಷ್ಯರ್‌ನೆ ಇನ, "ಗುರು, ಆ ಅದ್ಮಿ ಕಾಣುಹುಯಿನ್‌, ಪೈದಾ ಹುಯೂತೆ ಕಿನ ಪಾಪ್‌ಥಿ? ಅನು ಪಾಪ್‌ಥೀಕಿ? ಅನ ಆಯ-ಬಾನ ಪಾಪ್‌ಥಿ?" ಕರಿ ಪುಛಾ಼ಯ.

3 ಯೇಸುನೆ, "ಅನೇಬಿ ಪಾಪ್ ಕೋ ಕರ‍್ಯೋನಿ, ಅನ ಆಯಾ-ಬಾನ ಪಾಪ್ನಟೇಕೆ ಕಾಹೆ. ದೇವ್‌ನು ಕಾಮ್ ಅನಾಮ ಹುವಾನಟೇಕೆಸ್‌ ಅನ ಅಮ್ ಹುಯೂತೆ. 4 ಮನ ಮೋಕ್‌ಲ್ಯೊತೆ ಇನು ಕಾಮ್ನ ಅಪ್ಣೆ ದನ್ನಿ ವಖ್ಹತ್‌ಮಾಸ್‌ ಕರ‍್ನು, ರಾತ್‌ ಆವ್‌ಶೆ ತದೆ ಕಿನೇಥೀಬಿ ಕಾಮ್ ಕರಾನ ಕೋ ಉಶೇನಿ. 5 ಮೇ ಆ ಜಗತ್‌ಮ ರ‍್ಹವಾನಿ ವಖ್ಹತ್‌ಮ, ಮೇಸ್ ಆ ಜಗತ್ನ ಉಜಾ಼ಳು ಹುಯಿರ‍್ಹೋಸ್" ಕರಿ ಬೋಲ್ಯೊ.*9:5 ಮತ್ತಾಯ 5:14; ಯೋಹಾನ 8:12

6 ಅನ ಬೋಲಾನ ಬಾದ್‌ಮ, ಯೇಸುನೆ ಜ಼ಮೀನ್‌ಪರ್ ಥೂಕಿನ್, ಇನೇಥಿ ಚಿಕ್ಕಡ್‌ ಬಣೈನ್, ಯೋ ಅದ್ಮಿನ ಡೋಳಾನ ಲಗಾಡ್ಯೊ. 7 ಅಜು಼ ಯೋ ಅದ್ಮಿನ ಬೋಲ್ಯೋಕಿ, "ಜೈ಼ನ್‌, ಸಿಲೋವ ಕೋಳಮ್ಮ ಧೊಯಿಲೆ" ಸಿಲೋವ ಕತೊ, ‘ಮೋಕ್‌ಲ್ಯೊಹುಯೊ’ ಕರಿ ಮತ್‌ಲಬ್. ಇಮ್ಮಸ್ ಯೋ ಅದ್ಮಿನೆ ಜೈ಼ನ್, ಧೊಯಿಲಿನ್ ಪಾಛೊ಼ಫರಾನಿ ವಖ್ಹತ್, ಅಜು಼ ಇನ ಡೋಳಾ ದೆಖಾವಲಗ್ಯ.

8 ತದೆ ಇನ ಅಜು಼-ಬಾಜು಼ವಾಳು ಅಜು಼ ಯೋ ಅಗಾಡಿ ಧರಮ್ ಮಾಂಗುಕರ್ತೊಥೋತೆ ಇನ ದೇಖಿಹುಯು ಅದ್ಮಿಖ್ಹಾರು, "ಬೇಶಿನ್, ಧರಮ್ ಮಾಂಗ್‌ತೊಥೋತೆ ಆಸ್ ಕಾಹೆಕಿ ಶು?" ಕರಿ ಪುಛಾ಼ಯು.

9 ಥೋಡು ಜ಼ಣು, "ಆಸ್ ಯೋ" ಕರಿ ಬೋಲ್ಯು, ಕತೋಬಿ ಬಿಜು಼ ಥೋಡು ಜ಼ಣು, "ಆ ಯೋ ಕಾಹೆ, ಇನೀನಿತರಸ್ ದೆಖಾವಸ್" ಕರಿ ಬೋಲ್ಯು,

ತದೆ ಯೋ ಅದ್ಮಿನೇಸ್, "ಮೇಸ್ ಯೋ" ಕರಿ ಬೋಲ್ಯೊ.

10 ತದೆ ಇವ್ಣೆ ಇನ, "ತುನ ಡೋಳಾ ಕಿಮ್ ಆಯಾ?" ಕರಿ ಇನ ಪುಛಾ಼ಯು.

11 ಯೋ ಅದ್ಮಿನೆ, "ಯೇಸು ಕರಿ ಏಕ್‌ ಜ಼ಣೊ ಛಾ಼ನಿ, ಇನೆ ಚಿಕ್ಕಡ್‌ ಕರೀನ್, ಮಾರ ಡೋಳಾನ ಲಗಾಡಿನ್, ಸಿಲೋವ ತಲಾವ್ಮ ಜೈ಼ನ್‌, ಧೊಯಿಲೆ ಕರಿ ಬೋಲ್ಯೊ. ಇಮ್ಮಸ್ ಮೇ ಜೈ಼ನ್ ಧೊಯಿಲಿದೊ, ತದೆ ಮನ ಡೋಳಾ ದೆಖಾವಲಗ್ಯ" ಕರಿ ಬೋಲ್ಯೊ. 12 ಯೊ ಅದ್ಮಿಖ್ಹಾರು ಇನ, "ಯೋ ಕಿಜ್ಗಾ಼ ಛಾ಼?" ಕರಿ ಪುಛಾ಼ಯು. ಯೋ ಅದ್ಮಿನೆ, "ಮನ ಮಾಲುಮ್‌ ಕೊಯ್ನಿ" ಕರಿ ಜವಾಬ್‌ ದಿದೊ.

ಪರಿಸಾಯರ್‌ನೆ ಅಛ್ಛು಼ ಹುಯೂತೆ ಅದ್ಮಿನ ಪುಛಾ಼ಯೂತೆ

13 ತದೆ ಅದ್ಮಿಖ್ಹಾರು ಅಗಾಡಿ ಕಾಣು ಹುಯಿರ‍್ಹುಥೂತೆ ಯೋ ಅದ್ಮಿನ ಫರಿಸಾಯರ್‌ಕನ ಬುಲೈಲಿ ಗಯು. 14 ಯೇಸುನೆ ಚಿಕ್ಕಡ್‌ ಕರೀನ್, ಇನ ಡೋಳಾನ ಅಛ್ಛು಼ ಕರ‍್ಯೊತೆ ದನ್ ಸಬ್ಬತ್‌ ದನ್ ಹುಯಿರ‍್ಹುಥು. 15 ತದೆ ಫರಿಸಾಯರ್‌ನೆ ಪಾಛು಼ ಯೋ ಅದ್ಮಿನ, "ತುನ ಡೋಳಾ ಕಿಮ್ ದೆಖಾಯ?" ಕರಿ ಪುಛಾ಼ಯು. ಇನೆ ಇವ್ಣುನ, "ಇನೆ ಚಿಕ್ಕಡ್‌ನ ಮಾರ ಡೋಳಾಪರ್‌ ಲಗಾಡ್ಯೊ, ಅಜು಼ ಮೇ ಧೊಯಿಲಿದೊ, ಹಮ್ಕೆ ಮನ ದೆಖವ್‌ಕರಾಸ್‌" ಕರಿ ಜವಾಬ್‌ ದಿದೊ.

16 ಫರಿಸಾಯರ್‌ಮ ಥೋಡಾನೆ, "ಆ ಅದ್ಮಿ ದೇವ್‍ಥಿ ಆಯೊಹುಯೊ ಕಾಹೆ, ಶನಕತೊ ಅನೆ ಸಬ್ಬತ್‌ದನ್ನು ಪಾಲನ್‍ ಕೊ ಕರಾನಿ" ಕರಿ ಬೋಲ್ಯು.

ಬಿಜು಼ ಥೋಡಾನೆ, "ಖಿವು ಪಾಪಿ ಅಮ್ನಿ ಅದ್ಭುತ್ ಕಾಮ್‌ಖ್ಹಾರು ಕರಾಸ್?" ಕರಿ ಬೋಲ್ಯು. ಅಮ್ ಇವ್ಣ-ಇವ್ಣಾಸ್‍ಮ ಬೇ ಭಾಗ್‌ ಹುಯಿಗಯು.

17 ಡೋಳ ದೆಖಾವಲಗ್ಯುತೆ ಯೊ ಅದ್ಮಿನ ಫರಿಸಾಯರ್‌ನೆ ಬಿಜೇಕ್‌ಹಲ್ಲ ಪುಛಾ಼ಯು. ತದೆ ಯೋ ಅದ್ಮಿನೆ,

"ಯೋ ಏಕ್‌ ಪ್ರವಾದಿ" ಕರಿ ಬೋಲ್ಯು.

18 ತೋಬಿ ಯೋ ಯೆಹೂದ್ಯವಾಳು, ಯೋ ಅದ್ಮಿನ ಆಯ-ಬಾನ ಬುಲಾಯು.ತಬ್‍ಲಗು ಕಾಣು ಥೂ ಕರಿ ಬೋಲಾನಿ ವಾತೇನ ಕೋ ನಂಬ್ಯುನಿ, 19 ಇವ್ಣೆ ಇನ ಆಯ-ಬಾನ, "ಆ ತುಮಾರೊ ಛಿಯ್ಯೋಕಿ ಶು? ಆ ಪೈದಾಖ್ಹ್‌ಥೋಸ್‌ ಕಾಣೊ ಕರಿ ತುಮೆ ಬೋಲಾಸ್ತೆ; ಇಮ್‍ಕತೊ, ಹಮ್ಕೆ ಅನ ಡೋಳಾ ಕಿಮ್ ದೆಖವ್‌ಕರಾಸ್ತೆ?" ಕರಿ ಪುಛಾ಼ಯು.

20 ಇನ ಆಯ-ಬಾನೆ, "ಆ ಹಮಾರೊ ಛಿಯ್ಯೊ ಕರಿ ಹಮೂನ ಮಾಲುಮ್ ಅಜು಼ ಆ ಪೈದಾಖ್ಹ್‌ಥೋಸ್‌ ಕಾಣೊ ಕರೀಬಿ ಹಮೂನ ಮಾಲುಮ್‌. 21 ಕತೋಬಿ ಹಮ್ಕೆ ಅನ ಡೋಳಾ ಕಿಮ್ ದೆಖವ್‌ಕರಾಸ್‌ ಕರಿ ರ‍್ಹವೊ, ಅನ ಅಛ್ಛು಼ ಕರ‍್ಯುತೆ ಕಿನೆ ಕರಿ ರ‍್ಹವೊ ಹಮೂನ ಮಾಲುಮ್‌ ಕೊಯ್ನಿ. ಅನಾಸ್ ಪುಛಾ಼ವೊ, ಆ ಜಾ಼ನ್‌ಜ಼ಮಾನ್ನಿ, ಆಸ್ ಇನಿ ಬಾರೇಮ ಬೋಲ್‌ಶೆ" ಕರಿ ಜವಾಬ್‌ ದಿದು. 22 ಇನ ಆಯ-ಬಾನೆ ಯೆಹೂದ್ಯರ್‌ನ ಅದಿಕಾರಿ ಡರಿನ್, ಅಮ್ನಿ ವಾತೇನ ಬೋಲ್ಯುತೆ, ಶನಕತೊ ಯೇಸುನ ಕ್ರಿಸ್ತ ಕರಿ ಕೋಣ್ ವಿಶ್ವಾಸ್ ಕರಾಸ್ಕಿ, ಇವ್ಣುನ ಯೆಹೂದ್ಯರ‍್ನು ಸಬಾ ಮಂದಿರ್‌ಮಾಥು ಭಾರ್‌ ನಾಕ್‌ಶು ಕರಿ ಇವ್ಣೆ ಬೋಲಿರಾಖ್ಯುಥು. 23 ಇನಖ್ಹಾಜೇಸ್ ಇನ ಆಯ-ಬಾನೆ, "ಯೋ ಜಾ಼ನ್ಜ಼ಮಾನ್ ಹುಯಿರ‍್ಹೋಸ್‌ನಿ, ಇನಾಸ್ ಪುಛಾ಼ವೊ" ಕರಿ ಬೋಲ್ಯೂತೆ.

24 ತದೆ ಯೆಹೂದ್ಯರ್‌ನ ಅದಿಕಾರಿ ಪಾಛು಼ ಭೇನೆಹಲ್ಲ, ಅಗಾಡಿ ಕಾಣೊ ಹುಯಿರ‍್ಹೊಥೋತೆ ಯೋ ಅದ್ಮಿನ ಬುಲೈನ್, "ತೂ ಖ್ಹಾಚಿ ಬೋಲಿನ್ ದೇವ್ನ ಮರ್ಯಾದಿದೆ, ತುನ ಅಛ್ಛು಼ ಕರ‍್ಯೊತೆ ಯೋ ಅದ್ಮಿ ಪಾಪಿಕರಿ ಹಮೂನ ಮಾಲುಮ್‌" ಕರಿಬೋಲ್ಯು.

25 ತದೆ ಯೋ ಅದ್ಮಿನೆ, "ಯೋ ಅದ್ಮಿ ಪಾಪಿಕಿ, ಕೊಯ್ನಿಕಿ ಮನ ಮಾಲುಮ್‌ಕೊಯ್ನಿ, ಕತೋಬಿ ಮೇ ಕಾಣೊ ಥೊ, ಹಮ್ಕೆ ಮನ ದೆಖವ್‌ಕರಾಸ್‌ ಕರಿ ಬೋಲಾನು ಮನ ಮಾಲುಮ್‌" ಕರಿ ಬೋಲ್ಯೊ.

26 ತದೆ ಯೆಹೂದ್ಯರ್‌ನೆ ಇನ, "ಇನೆ ತುನ ಶಾತ್‌ ಕರ‍್ಯೊ? ಇನೆ ತಾರ ಡೋಳಾನ ಕಿಮ್ ಅಛ್ಛು಼ ಕರ‍್ಯೊ?" ಕರಿ ಪುಛಾ಼ಯು.

27 ಯೋ ಅದ್ಮಿನೆ, "ಮೇ ತುಮೂನ ಅಗಾಡಿಸ್ ಬೋಲ್ಯೊನಿ, ತುಮೆ ಖ್ಹಮ್‌ಜ್ಯಾಕೊಯ್ನಿ, ಬಿಜು಼ ಪಾಛು಼ ಶನ ಖ್ಹಮಜ಼್‌ಣು ಕರಿ ಛಾ಼ತೆ? ತುಮೇಬಿ ಇನ ಶಿಷ್ಯರ್‌ ಹೋಣು ಕರಿ ಛಾ಼ಕಿ ಶು? ಕರಿ ಜವಾಬ್‌ ದಿದೊ.

28 ತದೆ ಇವ್ಣೆ ಯೋ ಅದ್ಮಿನ ಖ್ಹರಮ್‌ ಕಾಡಿನ್, "ತೂ ಯೋ ಅದ್ಮಿನೊ ಶಿಷ್ಯ; ಕತೋಬಿ ಹಮೆ ಮೋಶೆನ ಪೀಠೆ ಜಾ಼ವವಾಳ ಹುಯಿರ‍್ಹಾಸ್. 29 ಮೋಶೆನ ಜೋ಼ಡೆ ದೇವ್ನೆ ವಾತೆ ಬೋಲ್ಯೊ ಕರಿ ಹಮೂನ ಮಾಲುಮ್‌; ಕತೋಬಿ ಆ ಅದ್ಮಿ ಕಿಜ್ಜಾ಼ನೊ ಕರೀಬಿ ಹಮೂನ ಮಾಲುಮ್‌ ಕೊಯ್ನಿ!" ಕರಿ ಬೋಲ್ಯೊ.

30 ತದೆ ಯೋ ಅದ್ಮಿನೆ, "ಇನೆ ಮನ ಡೋಳಾ ದಿದೊತೋಬಿ, ಯೋ ಕಿಜ್ಗಾ಼ನೊ ಕರಿ ತುಮೂನ ಬಿಜೂ಼ಬಿ ಮಾಲುಮ್‌ಕೊಂತೆ ಆಶ್ಚರ್ಯ ಕಾಹೆಕಿ ಶು? 31 ಹಮೂನ ಮಾಲುಮ್‌ ಪಾಪಿನು ಪ್ರಾರ್ಥನೇನ ದೇವ್ ಖ್ಹಮ್‌ಜಾ಼ಕೊಯ್ನಿ, ಕತೋಬಿ ಕೋಣ್ ದೇವ್ನಿ ಮರ್ಜಿನಿಘೋಣಿ ಚಾ಼ಲಾಸ್ಕಿ ಇನಿ ಪ್ರಾರ್ಥನೆ ಖ್ಹಮ್‌ಜಾ಼ಸ್‌ ಕರಿ. 32 ಪೈದಾಖ್ಹ್‌ಥೂಸ್‌ ಕಾಣು ಹುಯಿರ‍್ಹೂತೆ ಏಕ್‌ ಅದ್ಮಿನ ಕೋಣ್‌ತೋಬಿ ಅಛ್ಛು಼ ಕರ‍್ಯುತೆ ಬಾರೇಮ ಜಗತ್‌ ಶುರುವಾತ್‌ಥು ಏಕ್‌ನೇಬಿ ಖ್ಹಮ್‌ಜಿರಾಖ್ಯು ಕೊಯ್ನಿ. 33 ಆ ಅದ್ಮಿ ದೇವ್‍ಥಿ ಆಯೊಹುಯೊ ನಾ ರ‍್ಹಯೊಹೋತ್ತೊ, ಅನೇಥಿ ಶಾತ್ಬಿ ಕರಾನ ಕೋ ಹುಯು ಹೋತ್‌ನಿ" ಕರಿ ಬೋಲ್ಯೊ.

34 ಆ ವಾತೆನ ಖ್ಹಮ್‌ಜಿನ್‌ ಇವ್ಣೆ, "ತೂ ಖಲಿ ಪಾಪ್‌ಮ ಪೈದಾ ಹುಯೊತೆ, ಹಮೂನ ಬೋಲಿವತಳಾಸ್ಕಿ ಶು?" ಕರಿಬೋಲಿನ್‌, ಸಬೇನು ಮಂದಿರ್‌ಮಾಥು ಇನ ಧಕೇಲಿ ಭಾರ್‌ ಕಾಡಿನಾಖ್ಯು.

ಆತ್ಮಮ ಕಾಣು

35 ಯೋ ಅದ್ಮಿನ ಭಾರ್‌ನಾಖ್ಯುಕರಿ ಯೇಸುನೆ ಖ್ಹಮ್‌ಜಿನ್‌, ಇನ ಮಳಿನ್, "ತೂ ಅದ್ಮಿನೊ ಛಿಯ್ಯಾನ ನಂಬಾಸ್ಕಿ ಶು? ಕರಿಪುಛಾ಼ಯೊ.

36 ತದೆ ಇನೆ, ಪ್ರಭು ಯೋ ಅದ್ಮಿನೊ ಛಿಯ್ಯೊ ಕೋಣ್? ತೂ ಕಿನ ನಂಬ್‍ಣುಕರಿ ಬೋಲಸ್ಕಿ, ಮನ ಬೋಲ್, ಮೇ ಇನ ನಂಬುಸ್‌" ಕರಿ ಬೋಲ್ಯೊ.

37 ಯೇಸುನೆ ಇನ, "ತೂ ಇನ ಅಗಾಡಿಸ್ ದೇಖಿರಾಕ್ಯೋಸ್‌, ತಾರ ಜೋ಼ಡೆ ವಾತೆ ಬೋಲುಕರಾತೆ ಮೇಸ್ ಯೋ" ಕರಿ ಬೋಲ್ಯೊ.

38 ಯೋ ಅದ್ಮಿನೆ, "ಒಹೊ ನಂಬುಸ್‍ಲಾ ಗುರು!" ಕರಿಬೋಲಿನ್‌, ಯೇಸುನ ಖ್ಹಾಮ್ಣೆ ಢುಕ್‌ಣ್ಯಟೇಕಿನ್ ಖ್ಹಲಾಮ್ ಕರ‍್ಯೊ. ಅಡ್‌ಪಡ್ಯೊ

39 ಯೇಸುನೆ ಬೋಲ್ಯೊ, "ಮೇ ನ್ಯಾಯತೀರ್ಪ್‌ನ ಖ್ಹಾಜೆ ಆ ಜಗತ್‌ಮ ಐರ‍್ಹೋಸ್ತೆ, ಇನಖ್ಹಾಜೆ ಡೋಳಾಕೊಂತೆ ಇವ್ಣೆ ದೇಕ್‌ಶೆ, ಅಜು಼ ಕಿನ ಡೋಳಾ ಛಾ಼ಕಿ ಇವ್ಣೆ ಕಾಣು ಉಶೆ" ಕರಿಬೋಲ್ಯೊ.

40 ಯೇಸುನ ಜೋ಼ಡ್ಮ ಥಾತೆ ಥೋಡ ಫರಿಸಾಯರ್‌ನೆ ಅನ ಖ್ಹಮ್‌ಜಿನ್‌ ಬೋಲ್ಯು, "ಹಮೇಬಿ ಕಾಣಕರಿ ಬೋಲುಕರಾಸ್ಕಿ ಶು?" ಕರಿ ಯೇಸುನ ಪುಛಾ಼ಯು.

41 ಯೇಸುನೆ ಇವ್ಣುನ, "ತುಮೆ ಕಾಣ ಹುಯಿರ‍್ಹಾಹೋತ್ತೊ, ತುಮೂನ ಪಾಪ್ ಕೋ ರ‍್ಹಯುಹೋತ್ನಿ; ಕತೋಬಿ ಹಮೂನ ಡೋಳಾ ದೆಖವ್‌ಕರಾಸ್‌ ಕರಿ ಬೋಲೋಸ್‌ನಿ, ಇನಖ್ಹಾಜೆ ತುಮೆ ಪಾಪಿ ಹುಯಿರಾಸ್" ಕರಿ ಜವಾಬ್‌ ದಿದೊ.