Lucas 14

ಯೇಸುನೆ ಜಾನ್ನ ಅರಾಮ್‌ಕೊಂತೆ ಏಕ್‌ ಜ಼ಣಾನ ಅಛ್ಛು಼ ಕರ‍್ಯೊತೆ

1 ಏಕ್‌ಹಲ್ಲ ಸಬ್ಬತ್‌ ದನ್ನೆ ಯೇಸು ಫರಿಸಾಯರ್‌ನು ಮೋಟಾವ್‍ಮ ಏಕ್‌ ಜ಼ಣಾನ ಘರೆ ಖಾಣನ ಗಯೊ. ಹಿಜ್ಜಾ಼ನು ಅದ್ಮಿಖ್ಹಾರು ಯೇಸುನ ನಿಘಾ ಲಗಾಡಿನ್ ದೇಖುಕರ್ತುಥು. 2 ಹಿಜ್ಜಾ಼ ಯೇಸುನ ಖ್ಹಾಮೆ ಪೆಶರ್‌ ರೋಗ್‌ ಥೋತೆ ಏಕ್‌ ಜ಼ಣೊ ಥೊ. 3 ತದೆ ಯೇಸುನೆ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ನ, "ಅಪ್ಣಿ ಖಾನುಲ್‌ಮ ಸಬ್ಬತ್‌ ದನ್ಮ ಅಛ್ಛು಼ ಕರಾನು ಬರಾಬರ್‌ಕಿ ಕೊಯ್ನಿ"? ಕರಿ ಪುಛಾ಼ಯೊ.

4 ಕತೋಬಿ ಇವ್ಣೆ ಶಾತ್ಬಿ ಫರೈನ್ ಬೋಲ್ಯು ಕೊಯ್ನಿ. ತದೆ ಯೇಸುನೆ ಯೋ ಅದ್ಮಿನು ಹಾತ್‌ ಧರೀನ್, ಇನ ಅಛ್ಛು಼ ಕರೀನ್ ಬೋಲಿಮೋಕ್ಲಿದಿದೊ. 5 ತದೆ ಯೇಸುನೆ ಇವ್ಣುನ, "ತುಮಾರಾಮ ಕಿನಾತೋಬಿ ಏಕ್‌ ಜ಼ಣಾನೊ ಛಿಯ್ಯೊ ನತರ್‌ಕಿ ಢಾಂಡೊ ಸಬ್ಬತ್‌ ದನ್ಮ ಬಾವ್ಡಿಮ ಪಡಿಗಯೂತೊ ಯೋ ಇನ ಸಬ್ಬತ್ ದನ್‌ಮಾಬಿ ಉಪ್ಪರ್ ಪಾಡಕೊಯ್ನಿಕಿಶು?" ಕರಿ ಬೋಲ್ಯೊ.

6 ಕತೋಬಿ ಇವ್ಣೆ ಅನಿ ಬಾರೇಮ ಶನೂಸ್ ಜವಾಬ್‌ ದ್ಯವಾನ ಕೋಹುಯುನಿ.

ತುನ ತೂ ನಕೊ ಭಡೈಲೀಶ್

7 ಖಾಣನ ಬುಲೈ ಮಂಗಾಯುತೆ ಅದ್ಮಿಖ್ಹಾರು, ಖಾಣಾನಿ ಪಹಿಲಿ ಶಾಲ್‌ಮಾನಿ ಅಛ್ಛಿ ಝ಼ಗೋಪರ್ ಬೇಖ್ಹ್‌ಣು ಕರಿ ಝ಼ಗೊ ಚೂ಼ಣುಕರ್ತುಥೂತೆ ದೇಖಿನ್, ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ. 8 ಯೋ ಶಾತ್‌ಕತೊ, "ಕೋಣ್‌ತೋಬಿ ಏಕ್‌ ಜ಼ಣು ತುನ ವ್ಯಹಾನು ಖಾಣು ಖವಾನ ಬುಲಾಯೂತೊ, ಪಂತಿಮ ಪಹಿಲೆಸ್ ನಕೊ ಬೇಶಿಶ್. ಏಕ್‌ ವೇಳ್ ತಾರೆಥೀಬಿ ಮಹಾನ್ ಅದ್ಮಿನ ಇನೆ ಬುಲೈರಾಖ್ಯೊ ಉಶೆ. 9 ಅಜು಼ ತುಮೂನ ಭೇ ಜ಼ಣಾನ ಬುಲಾಯೋತೆ ಯೋ ಐನ್, ‘ಆ ಝ಼ಗೊ ಅನ ಮ್ಹೆಂದೆ’ ಕರಿ ತುನ ಬೋಲಾನಿ ವಖ್ಹತ್‌ಮ, ತೂ ಖ್ಹರ್‌ಮೈನ್ ಖ್ಹಾರೇಥಿ ಛೇಟುನಿ ಝ಼ಗೋಪರ್ ಜೈ಼ನ್ ಬೇಖ್ಹ್‌ಣು ಪಡ್‌ಶೆ. 10 ಕತೋಬಿ ಕೋಣ್‌ತೋಬಿ ತುನ ಬುಲಾಯೂತೊ, ತೂ ಜೈ಼ನ್ ಖ್ಹಾರೇಥಿ ಛೇಟುನಿ ಝ಼ಗೋಪರ್ ಬೇಖ್ಹ್‌. ಅಮ್ ಕರ‍್ಯೋತೊ ತುನ ಬುಲಾಯೋತೆ ಯೋ ಐನ್, ‘ದೋಸ್, ಉಟ್ ಉಪ್ಪರ್‌ಲಿ ಝ಼ಗೋಪರ್ ಐನ್ ಬೇಖ್ಹ್‌’ ಕರಿ ಬೋಲ್‌ಶೆ. ತದೆ ತಾರ ಜೋ಼ಡ್ಮ ಬೆಠೂತೆ ಖ್ಹಾರಾನ ಖ್ಹಾಮೆ ತಾರಿ ಇಜ಼್ಜತ್‌ ಭಡ್‌ಶೆ. 11 ಶನಕತೊ ಕೋಣ್ ಇನುಯೋಸ್ ಮೋಟೊಕರಿ ಬೋಲೈಲ್ಯವಾಳೊ ಹರೇಕ್‌ಜ಼ಣೊ ಹೇಟು ಹುಯಿಜಾ಼ಶೆ, ಅಜು಼ ಇನುಯೋಸ್ ಹೇಟುಕರಿ ಬೋಲೈಲ್ಯವಾಳೊ ಯೋ ಮೋಟೊ ಹುಯಿಜಾ಼ಶೆ ಕರಿಬೋಲ್ಯೊ.

12 ಅಜು಼ ಯೇಸುನೆ ಇನ ಖಾಣನ ಬುಲಾಯೋತೆ ಇನಾಬಿ ಏಕ್‌ ವಾತ್ ಬೋಲ್ಯೊ. ಯೋ ಶಾತ್‌ಕತೊ, "ತೂ ಧೊಪಾರ್‌ನಿ ವಖ್ಹತ್‌ಮ ರ‍್ಹವೊ ನತರ್‌ಕಿ ಖ್ಹಾಂಜ಼್‌ನಿ ವಖ್ಹತ್‌ಮ ರ‍್ಹವೊ, ಖಾಣಾನಖ್ಹಾಜೆ ತಾರ ದೋಸ್ತ್‌ನ ರ‍್ಹವೊ, ಭೈಯೇನ ರ‍್ಹವೊ, ತಾರ ಮಾಯಮಾತ್ರಾನ ರ‍್ಹವೊ, ಧನ್‌ದೌಲತ್‌ವಾಳ ಖನ್ನೆವಾಳ ರ‍್ಹವೊ ನಕೊಬುಲೈಶ್. ಬುಲಾಯೋತೊ, ಇವ್ಣೇಬಿ ತುನ ಪಾಛು಼ ಖಾಣನ ಬುಲಾಯೇಜಾ಼ಯ್, ಅನೇಥಿ ತುನೆ ಕರ‍್ಯೊತೆ ಕರ್ನಿನ ಭರ್ನಿ ಮಳಿಜಾ಼ಶೆ. 13 ಕತೋಬಿ ತೂ ಮಿಝ಼್‌ವಾನ್ ಪಿಕಾವಾನಿ ವಖ್ಹತ್‌ಮ, ಗೋರ್‌-ಗರೀಬ್‌ನ, ಪಾಂಗ್‌ಳ್ಯಾವ್ನ, ಲಂಗ್ಡಾವ್‍ನ ಅಜು಼ ಕಾಣಾವ್ನ ಬುಲಾವ್. 14 ತದೆ ತೂ ಧನ್ಯ ಹುಯಿಶ್, ಇವ್ಣೆ ಪಾಛು಼ಫರಿ ಶಾತ್ಬಿ ಕರಾನಕೊಂತೆ ಇವ್ಣೆ, ನೀತಿವಾಳುಖ್ಹಾರು ಮರ್‌ಣ್‌ಮಾಥು ಪಾಛು಼ ಜಿವ್ತುಹುಯಿನ್‍ ಆವಾನಿ ವಖ್ಹತ್‌ಮ ದೇವ್ ತುನ ದೇವ್ಣುತೆ ಇನ ದಿಶೆ.

ಮಿಝ಼್‌ವಾನ್ನಿ ಬಾರೇಮಾನು ಮತ್ಲಬ್‌ನಿ ಖೇಣಿ

15 ಖಾಣನ ಬೆಠುಥೂತೆ ಇವ್ಣಾಮ ಏಕ್‌ ಜ಼ಣು ಆ ವಾತೇನ ಖ್ಹಮ್‌ಜಿನ್‌, ಯೇಸುನ, "ದೇವ್ನಿ ರಾಜ್ಯಮ ಮಿಝ಼್‌ವಾನ್ ಖಾವಾನ ಬೇಖ್ಹವಾಳೋಸ್ ಧನ್ಯ ಹುಯಿರ‍್ಹೊಸ್" ಕರಿ ಬೋಲ್ಯೊ.

16 ತದೆ ಯೇಸುನೆ ಇನ ಬೋಲ್ಯೋಕಿ, "ಏಕ್‌ ಅದ್ಮಿನೆ ಏಕ್‌ ಮೋಟಿ ಮಿಝ಼್‌ವಾನ್ ಪಿಕೈನ್, ಕೈಯೆಕ್ಕಿ ಅದ್ಮಿನ ಬುಲಾಯೊ. 17 ಮಿಝ಼್‌ವಾನ್ ಖಾವಾನಿ ವಖ್ಹತ್ ಆವಾದಿನ್, ಯೋ ಅದ್ಮಿನೆ, ‘ಆವೊ, ಖಾಣು ತೈಯಾರ್ ಛಾ಼!’ ಕರಿ, ಬುಲಾಯೊಥೋತೆ ತಮಾಮ್‌ ಅದ್ಮಿನ ಬುಲಾವಾನಟೇಕೆ ಆಳ್‌ನ ಮೋಕ್‌ಲ್ಯೊ. 18 ಕತೋಬಿ ಇವ್ಣೆ ಖ್ಹಾರೂಸ್, ಮಾಪ್‌ ಕರ‍್ನುಕರಿ ಎಕ್ಕಸ್‌ ದಿಲ್‌ಥಿ ಬೋಲಾಲಗ್ಯು. ಪಹಿಲೆವಾಳೊ ಯೋ ಆಳ್‌ನ ದೇಖಿನ್ ಬೋಲ್ಯೋಕಿ, ‘ಮೇ ಏಕ್‌ ಖೇತರ್‌ನ ಮೋಲ್ ಲೀರಾಖ್ಯೋಸ್, ಮೇ ಜೈ಼ನ್, ಯೋ ಖೇತರ್‌ನ ದೇಖಾನು ಜ಼ರೂರತ್ ಛಾ಼; ಮನ ಮಾಪ್‌ ಕರ್‌ ಕರಿ ಬೋಲಿಲಿದೊ ಕರಿ ಬೋಲ್.’ 19 ಬಿಜ್ಜೇಕ್‌ ಜ಼ಣಾನೆ ಬೋಲ್ಯೋಕಿ, ‘ಮೇ ಪಾಚ಼್ ಜೋ಼ಡಿ ಢಾಂಡಾವ್‍ನ ಲೀರಾಖ್ಯೋಸ್, ಇನ ದೇಖಿನ್ ಪರ್ಖಾನ ವಳ್ಯೊಜವುಸ್. ಮನ ಮಾಪ್‌ಕರ್‌ ಕರಿ ಬೋಲ್ಯೊ, ಕರಿ ಬೋಲ್.’ 20 ಅಜೇಕ್ ಜ಼ಣಾನೆ, ‘ಹಮ್ಕೇಸ್ ಮಾರೊ ವ್ಯಹಾ ಹುಯಿರ‍್ಹೋಸ್, ಇನಖ್ಹಾಜೆ ಮನ ಆವಾನ ಕೋ ಉಶೇನಿ’ ಕರಿ ಬೋಲ್ಯೊ.

21 ಯೋ ಆಳ್‌ ಪಾಛು಼ಫರಿನ್, ಇನ ಯಜಮಾನ್‍ಕನ ಐನ್, ಚಾ಼ಲ್ಯುತೆ ಇನಿ ಬಾರೇಮ ಬೋಲ್ಯು. ತದೆ ಯೋ ಘರ್‌ನ ಯಜಮಾನ್ನೆ ಖೀಜ಼್ ಖೈನ್, ಇನ ಆಳ್‌ನ, ‘ತೂ ಒಗ್ಗಿಸ್‌ಮ, ಆ ಗಾಮ್‌ನು ಗಲ್ಲಿಯೇಮಾಬಿ, ಓಣಿಯೇಮಾಬಿ ಜೈ಼ನ್, ಗೋರ್‌-ಗರೀಬ್‌ನ, ಪಾಂಗ್‌ಳ್ಯಾವ್ನ, ಲಂಗ್ಡಾವ್‍ನ, ಕಾಣಾವ್ನ ಖ್ಹಾರು ಹಜ್ಜಾ಼ ಬುಲೈಲ್ಯಾವ್’ ಕರಿ ಬೋಲ್ಯೊ. 22 ಒಗ್ಗಿಸ್‌ಮ ಯೋ ಆಳ್‌ನೆ, ‘ಯಜಮಾನ್ ತಾರಿ ಹುಕುಮ್ ಚಾ಼ಲಿಗಿ, ಕತೋಬಿ ಬಿಜೂ಼ಬಿ ಝ಼ಗೊ ಛಾ಼’ ಕರಿ ಬೋಲ್ಯು. 23 ತದೆ ಇನ ಯಜಮಾನ್ನೆ ಯೋ ಆಳ್‌ನ ಬೋಲ್ಯೋಕಿ, ‘ತೂ ಜೈ಼ನ್, ಖ್ಹಾರು ಖೇತರ್‌ನು ವಾಟ್‌ಪರ್ ಅಜು಼ ವಾಡ್‌ಗಿಯೆಕನ ಛಾ಼ತೆ ಹರೇಕ್ನ ಜು಼ಲಮ್‌ಥಿ ಮಹಿ ಬುಲೈಲ್ಯಾವ್. ಮಾರು ಘರ್ ಭರಾವಾದೆ’ ಕರಿ ಬೋಲ್ಯೊ. 24 ಕತೋಬಿ ಮೇ ತುಮೂನ ಬೋಲುಸ್ಕಿ, ‘ಮೇ ಅಗಾಡಿ ಬುಲಾಯೊಥೋತೆ ಇವ್ಣಾಮ ಏಕ್‌ ಜ಼ಣುಬಿ ಮೇ ಕರಾಯೋತೆ ಖಾಣಾನಿ ಲಜ಼ತ್‌ನ ಛಾ಼ಕಿಬಿ ನಾ ದೇಕ್ಣು!’ ಕರಿ ಬೋಲ್ಯೊ."

ಯೇಸುನ ಶಿಷ್ಯರ್‌ ಹುಯಿರ‍್ಹೇಣುಕತೊ ಕರ್ನುತೆ ಕಾಮ್

25 ಏಕ್‌ ಹಲ್ಲ ಘಣ ಅದ್ಮಿನಿ ಭೀಡ್ ಯೇಸುನ ಕೇಡೆ ಜ಼ವ್‍ಕರಾತೆ ವಖ್ಹತ್‌ಮ, ಯೇಸುನೆ ಫರಿನ್, ಇವ್ಣುನ ಅಮ್ ಬೋಲ್ಯೊ. 26 ಮಾರಕನ ಆವಾಳು ಮಾರೇಥಿ ಜಾ಼ಖ್ಹತ್, ಇನ ಆಯಬಾನ, ಬಾವಣ್‍, ಲಡ್ಕಾವ್‍ನ, ಮೋಟ ಭೈಯೆ ಭೇನೆ ಅಜು಼ ಇನ ಜಾನ್ನಬಿ ನಾ ವಹೇರ್‌ ಕರ‍್ಯೊತೊ ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೊಹುವಾನಿ. 27 ಕೋಣ್‌ತೋಬಿ ಇನಿ ಶಿಲ್‌ಬೇನ ಪಳ್ಳಿನ್‌, ಮಾರ ಪೀಠೆ ನಾ ಆಯೂತೆ, ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೋ ಹೊಯ್ನಿ.

28 ತುಮಾರಾಮ ಕೋಣ್‌ತೋಬಿ ಏಕ್‌ ಜ಼ಣು, ಏಕ್‌ ಊಚು಼ಗುಂಬಜ್‍ ಭಾಂದ್‌ಣು ಕರಿ ರ‍್ಹಯೂತೊ, ಇವ್ಣೆ ಪಹಿಲೆ ಬೇಶಿನ್, ಇನ ಭಂದಾವಾನ ಕೆತ್ರು ಖರ್ಚಿ ಉಶೆ ಕರಿ ಸೋಚ಼ಸ್‌. ಶನಕತೊ, ಯೋ ಕಾಮ್ ಪೂರ ಕರಾಯೆತ್ರೆ ಪೈಶಾ ಛಾ಼ಕಿ ಕೊಯ್ನಿ ಕರಿ ದೇಖಾನಟೇಕೆ. 29 ಅಮ್ ಇಶಾಬ್ ಕರ‍್ಯುಕೊಂತೆ, ಹದಿ ನಾಖಾನ ಬಾದ್‌ಮ, ಯೋ ಕಾಮ್ ಭೀರಿಗಯೂತೊ, 30 ದೇಖಾವಾಳು ಖ್ಹಾರು, ‘ಆ ಅದ್ಮಿ ಭಂದಾವಾನ ಶುರುಕರ‍್ಯು, ಕತೋಬಿ ಅನ ಪೂರ ಕರಾನ ಕೋಹುಯುನಿ!’ ಕರಿ ಬೋಲಿನ್, ಇನಿ ನಕ್ಲೆ ಕಾಡ್‌ಶೆ.

31 ಏಕ್‌ ರಾಜ಼ ಬಿಜೇಕ್ ರಾಜಾ಼ನ ಜೋ಼ಡೆ ಜಂಗ್ ಭೀಡಾನ ಜಾ಼ವಾನ ಅಗಾಡಿ, ವೀಖ್ಹ್‌ ಹಜಾ಼ರ್ ದಂಡ್‌-ದಳ್‌ವಾಯಿನ ಲೀನ್, ಜಂಗ್‌ನ ವಳ್ಯಾವಾತೆ ಯೋ ರಾಜಾ಼ನ ಜೋ಼ಡೆ, ದಖ್ಹ್‌ ಹಜಾ಼ರ್ ದಂಡ್‌-ದಳ್‌ವಾಯಿನ ಲೀಜೈ಼ನ್, ಹರಾವನ ಉಶೇಕಿ ಕೊಯ್ನಿ, ಕರಿ ಪಹಿಲೇಸ್ ಬೇಶಿನ್ ಸೋಚ಼ಸ್‌. 32 ಇಮ್‌ ಹರಾವನ ಕೋ ಉಶೇನಿ ಕರಿ ಮಾಲುಮ್ ಪಡ್ಯೂತೊ, ಯೋ ವಳ್ಯಾವಾತೆ ರಾಜ಼ ದೂರ್ ರ‍್ಹವಾನಿಸ್ ವಖ್ಹತ್‌ಮ, ಇನು ಖಬರ್ ದ್ಯವಾಳಾನ ಮೋಕ್ಲೀನ್, ಶಾಂತಿನು ಒಪ್ಪಂದ ಕರಿಲಿಯೆ, ಕರಿ ಬೋಲಿಲೇಸ್. 33 ಇಮ್ಮಸ್, ತುಮಾರಮ ಕೋಣ್‌ಬಿ ರ‍್ಹವೊ, ಇನಛಾ಼ತೆ ಖ್ಹಾರಸ್ನ ನಾ ಮ್ಹೇಲ್ಯೂತೊ, ಯೋ ಮಾರೊ ಶಿಷ್ಯ ಹುಯಿರ‍್ಹೇವಾನ ಕೋ ಹುವಾನಿ" ಕರಿ ಬೋಲ್ಯೊ.

ಫಾಯಿದೊಕೊಂತೆ ಮೀಟ್‌ನಿ ಬಾರೇಮ

34 ಮೀಟ್‌ ಏಕ್‌ ಅಛ್ಛು಼ ರಾಛು಼ಸ್. ಮೀಟಸ್‌ ಫಿಕ್ಕು ಹುಯಿಗುತೊ, ಇನ ಬಿಜು಼ಪಾಛು಼ ಶನೇಥಿ ರುಚ಼್‌ಲ್ಯಾವನು ಉಷೆ? 35 ಇಮ್ನು ಮೀಟ್‌ಥಿ ಜ಼ಮೀನ್ನ ರ‍್ಹವೊ, ಖಾತ್‌ನ ರ‍್ಹವೊ ಶನೂಸ್ ಫಾಯಿದೊ ಕೊಯ್ನಿ. ಇನ ಭಾರ್‌ ಫೇಕಿದೇಸ್. ಖ್ಹಮ್‌ಜಾ಼ನ ಕಾನ್‌ರ‍್ಹವಾಳು ಖ್ಹಮ್‌ಜಾ಼ದೆ!" ಕರಿ ಬೋಲ್ಯೊ