Lucas 6

ಸಬ್ಬತ್ ದನ್ನಿ ಬಾರೇಮ ಪುಛಾ಼ಯೂತೆ

1 ಸಬ್ಬತ್‌ ದನ್ಮ ಯೇಸು ಅನಾಜ಼್ ಪಿಕಿಹುಯು ಖೇತರ್‌ಮಾಕರಿ ಚಾ಼ಲಿ ಒಳೆಜಾ಼ತೊಥೊ. ತದೆ ಇನ ಶಿಷ್ಯರ್‌ನೆ ಬುಟ್ಟಾ ತೋಡಿನ್, ಹಾತ್‌ಮ ಮಖ್ಹ್‌ಳಿನ್ ಖಾವಾಲಗ್ಯಾಥ. 2 ಅನ ದೇಖಿನ್ ಫರಿಸಾಯರ್‌ವಾಳು ಥೋಡು ಜ಼ಣು, "ಧರ್ಮಶಾಸ್ತ್ರ*6:2 ಧರ್ಮೊಪದೇಶಕಾಂಡ 23.25 ಸಬ್ಬತ್‌ ದನ್ಮ ಕರ್ನುನಾತೆ ಕಾಮ್ನ ತುಮೆ ಶನ ಕರೋಸ್ತೆ?" ಕರಿ ಪುಛಾ಼ವಖ್ಹತರ್,

3 ಯೇಸುನೆ ಇವ್ಣುನ, "ದಾವೀದ್‌ನಾಬಿ*6:3 1ನು ಸಮುವೇಲ್ 21.1-6 ಇನ ಜೋ಼ಡ್ಮ ರ‍್ಹಾವಾಳನ ಭುಕ್ ಲಾಗಾನಿ ವಖ್ಹತ್‌ಮ, ದಾವೀದ್‌ನೆ ಶಾತ್‌ ಕರ‍್ಯೊ ಕರಿ ತುಮೆ ಪಢ್ಯಾಕೊಯ್ನಿಕಿಶು? 4 ಇನೆ ದೇವ್ನ ಘರ್‌ಮ ಜೈ಼ನ್, ಅಪ್ಣಿ ಖಾನುಲ್‌ಮ ಯಾಜಕವ್ನ ಮ್ಹೆಂದಿನ್ ಕೋಣ್‌ಬಿ ನಾ ಖಾಣುತೆ, ದೇವ್ನ ಖ್ಹಾಮ್ಣೆ ಮ್ಹೇಲಾತೆ ರೋಟಾನ ಪಾಡಿಖೈನ್, ಇನ ಜೋ಼ಡ್ಮ ರ‍್ಹಾವಾಳನಾಬಿ ದಿದೋನಿ" ಕರಿ ಜವಾಬ್‌ ದಿದೊ.

5 ಅಜು಼ ಯೇಸುನೆ, "ಅದ್ಮಿನೊ ಛಿಯ್ಯೊ ಸಬ್ಬತ್‌*6:5 ಕತೊ-ಅರಾಮ್‌ನೊ ದನ್ ದನ್ನ ಪ್ರಭು ಹುಯಿರ‍್ಹೋಸ್" ಕರಿ ಬೋಲ್ಯೊ.

ಯೇಸುನೆ ಹಾತ್ ಝೂ಼ಟೊ ಪಡ್ಯುಹುಯು ಏಕ್‌ ಅದ್ಮಿನ ಅಛ್ಛು಼ ಕರ‍್ಯೊತೆ

6 ಬಿಜೇಕ್ ಸಬ್ಬತ್‌ ದನ್ನೆ ಯೇಸು ಸಬೆ ಭರಾವಾನು ಮಂದಿರ್‌ಮ ಜೈ಼ನ್, ವಚನ್ ಬೋಲಿ ದೆವ್‍ಕರ್ತೋಥೊ. ಖಾವೊ ಹಾತ್‌ ಝೂ಼ಟೊ ಪಡೆಹುಯೊ ಏಕ್‌ ಜ಼ಣೊ ಹಿಜ್ಜಾ಼ ಥೊ. 7 ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಅಜು಼ ಫರಿಸಾಯರ್‌ವಾಳು ಯೇಸುಪರ್ ಗಲ್ತಿ ಲಗಾಡನಖ್ಹಾಜೆ ಶಾತ್‌ತೋಬಿ ಮಳಾದೆ ಕರಿ, ಯೇಸು ಸಬ್ಬತ್ ದನ್ಮ ಅಛ್ಛು಼ ಕರಾಸ್ಕಿ ಶುಕಿ ಕರಿ ಜ಼ಪೀನ್ ದೇಖುಕರ್ತುಥು. 8 ಕತೋಬಿ ಯೇಸುನೆ ಇವ್ಣಿ ಸೋಚ್ನ ಮಾಲುಮ್ ಕರಿಲೀನ್, ಹಾತ್‌ ಝೂ಼ಟೊ ಪಡ್ಯೊಹುಯೊ ಯೋ ಅದ್ಮಿನ, "ಉಠೀನ್, ಇಚ಼್‌ಮ ಐನ್ ಭೀರೆ" ಕರಿ ಬೋಲ್ಯೊ. ಯೋ ಅದ್ಮಿ ಉಠೀನ್ ಹಿಜ್ಜಾ಼ ಭೀರಿಗಯು. 9 ತದೆ ಯೇಸುನೆ ಇವ್ಣುನ, "ತುಮುನ ಏಕ್‌ ವಾತ್ ಪುಛಾ಼ವ್‍ಸ್: ಸಬ್ಬತ್‌ ದನ್ಮ ಖೆವು ಕರ್ನುಕರಿ ಅಪ್ಣಿ ಖಾನುಲ್‌ಮ ಛಾ಼? ಅಛ್ಛು಼ಕರಾನುಕಿ ಖರಾಬ್‌ಕರಾನು? ಜಾನ್‌ ಬಚಾ಼ಡಾನುಕಿ, ಜಾನ್‌ ಕಾಡಾನು? 10 ಅಜು಼ ಯೇಸುನೆ ಅಶ್‌ಪಿಶ್‍ ಥೂತೆ ಖ್ಹಾರಾವ್‌ನ ದೇಖಿನ್ ಯೋ ಅದ್ಮಿನ, "ತಾರೊ ಹಾತ್‌ ಖ್ಹಾಮ್ಣೆ ಕರ್‌" ಕರಿ ಬೋಲ್ಯೊ. ಇನೆ ಇಮ್ಮಸ್ ಕರ‍್ಯೊ, ತದೆ ಇನೊ ಹಾತ್‌ ಅಛ್ಛು಼ಹುಯಿಗಯು.

11 ಕತೋಬಿ ಪರಿಸಾಯರ್‌ಬಿ ಮೋಶೇನು ಧರ್ಮಶಾಸ್ತ್ರ ಶಿಕಾಡವಾಳು ಶಾಸ್ತ್ರಿಯೆ ಖೀಜ಼್ ಖೈನ್, "ಆ ಯೇಸುನ ಅಪ್ಣೆ ಶಾತ್‌ ಕರಿಯೆ?" ಕರಿ ಇವ್ಣ-ಇವ್ಣಾಮ ವಾತೆ ಬೋಲಾಲಗ್ಯು.

ಯೇಸುನೆ ಭಾರಜ಼ಣ ಅಪೊಸ್ತಲರ‍್ನ ಚೂ಼ಣ್ಯೋತೆ

12 ಬಾದ್‌ಮ ಏಕ್‌ ದನ್ನೆ ಯೇಸು ಪ್ರಾರ್ಥನೆ ಕರಾನಖ್ಹಾಜೆ ಪಹಡ್‌ಪರ್ ಜೈ಼ನ್, ಹಿಡಿ ರಾತ್‌ ಯೋ ದೇವ್ನ ಪ್ರಾರ್ಥನೆ ಕರಾಮಸ್ ಕಾಡ್ಯೊ. 13 ವ್ಹಾಣು ಹುವಾನ ಬಾದ್‌ಮ, ಇನ ಶಿಷ್ಯರ್‌ನ ಖನ್ನೆ ಬುಲೈನ್, ಇವ್ಣಾಮ ಭಾರ ಜ಼ಣಾನ ಚೂ಼ಣಿನ್ ಇವ್ಣುನ ಅಪೊಸ್ತಲರ್’*6:13 ಅಪೊಸ್ತಲರ್ ಕತೊ ಹಕ್ ದೀನ್ ಬೋಲಿ ಮೋಕ್ಲಿಹುಯು ಅದ್ಮಿ ಕರಿ ನಾಮ್ ಮ್ಹೇಲ್ಯೊ. 14 ಇವ್ಣೆ ಕೋಣ್-ಕೋಣ್‌ಕತೊ, ಯೇಸುನೆ ಪೇತ್ರ ಕರಿ ನಾಮ್ ಮ್ಹೇಲ್ಯೋತೆ ಸೀಮೋನ, ಇನೊ ನ್ಹಾನೊ ಭೈ ಅಂದ್ರೆಯ, ಯಾಕೋಬ ಅಜು಼ ಯೋಹಾನ, ಫಿಲಿಪ್ಪ, ಬಾರ್ತೊಲೊಮಾಯ, 15 ಮತ್ತಾಯ, ತೋಮ, ಅಲ್ಫಾಯನೊ ಛಿಯ್ಯೊ ಯಾಕೋಬ, ಅಜು಼ ಸೀಮೋನ (ದೇಖ್ಹ್‌ನಪ್ಯಾರ್ ಕರಾವಾಳೊ ಕರಿ ಬೋಲೈಲಿದೋತೆ), 16 ಯಾಕೋಬನೊ ಛಿಯ್ಯೊ ಯೂದ, ಯೇಸುನ ಧೋಕೇಥಿ ಧರಿದ್ಯಾವಾಳೊ ಇಸ್ಕರಿಯೋತ ಯೂದ ಅವ್ಣೇಸ್.

ಯೇಸುನೆ ವಚನ್ ಬೋಲಿದಿದೋತೆ ಅಜು಼ ಅಛ಼್ಛು ಕರ‍್ಯೊತೆ

17 ಅನ ಬಾದ್‌ಮ ಯೇಸುನೆ ಇನ ಅಪೊಸ್ತಲರ‍್ನ ಜೋ಼ಡೆ ಪಹಾಡ್ ಉತ್ರಿ ಹೇಟ್‌ ಆಯಿನ್, ಇನ ಬಿಜಾ಼ಖ್ಹಾರ ಶಿಷ್ಯರ್‌ನಿ ಮೋಟಿ ಝೂ಼ಂಡ್‌ನ ಜೋ಼ಡೆ ಶದ್ದರ್ ಜ಼ಮೀನ್‌ಪರ್ ಭೀರಿಗಯೊ. ಯೂದಾಯ ತಬರ್‌ಖಾಥು, ಯೆರೂಸಲೇಮ್‌ ಖ್ಹಯೇರ್‌ಭಣಿಥುಬಿ, ದರ‍್ಯಾವ್‍ನ ಖನ್ನೆ ಛಾ಼ತೆ ತೂರ್ ಅಜು಼ ಸೀದೋನ್ ಖ್ಹಯೇರ್‌ಥು ಆಯುಹುಯು ಅದ್ಮಿನಿ ಮೋಟಿ ಭೀಡ್ ಹಿಜ್ಜಾ಼ ಥೂ. 18 ಯೇಸು ಬೋಲಾತೆ ವಚನ್ನ ಖ್ಹಮ್‌ಜಾ಼ನ, ಅಜು಼ ರೋಗ್‌-ರಾಯೊ ಅಛ್ಛು಼ ಕರೈಲ್ಯವಾನಟೇಕೆ ಯೋ ಅದ್ಮಿಖ್ಹಾರು ಐರ‍್ಹುಥು. ಭೂತ್‌ ಧರಿರಾಖ್ಯುಹುಯು ಅದ್ಮಿ ಖ್ಹಾರುಬಿ ಆಯು, ಇವ್ಣಾಮಬಿ ಅಛ್ಛು಼ ಹುಯು. 19 ಅದ್ಮಿಖ್ಹಾರು ಯೇಸುನ ಛೀಮ್‌ಣು ಕರಿ ಕರ‍್ಯು, ಶನಕತೊ ಇನಾಮಾಥಿ ಶಕತ್‍ ನಿಕ್ಳಿನ್ ಖ್ಹಾರಾವ್‌ನ ಅಛ್ಛು಼ ಕರುಕರ್ತುಥು.

ಖ್ಹುಶಿ ಅಜು಼ ದುಖ್

20 ಯೇಸುನೆ ಇನ ಶಿಷ್ಯರ್‌ ಭಣಿ ದೇಖಿನ್ ಬೋಲ್ಯೋಕಿ,

"ಗರೀಬ್ ಹುಯಿರ‍್ಹವಾಳ ತುಮೆ ಖ್ಹುಶಾಲಿವಾಳು ಹುಯಿರ‍್ಹುಸ್,

ದೇವ್‌ನು ರಾಜ್ಯ ತುಮಾರುಸ್!

21 ಭುಕ್ಯ ಛಾ಼ತೆ ತುಮೆ ಧನ್ಯ ಹುಯಿರ‍್ಹಾಸ್;

ತುಮಾರು ಪೇಟ್ ಭರಾವ್‌ಶೆ!

ಹಮ್ಕೆ ರೊವವಾಳ ತುಮೆ ಧನ್ಯ ಹುಯಿರ‍್ಹುಸ್;

ತುಮೆ ಹಾಖ್ಹ್‌ಶು!

22 ಅದ್ಮಿನ ಛಿಯ್ಯಾನ ಖ್ಹಾಜೇಥಿ ಅದ್ಮಿಖ್ಹಾರು ತುಮೂನ ಖ್ಹರಮ್‌ ಕಾಡಿನ್, ದಾವೊ ಕರೀನ್, ಭಾರ್ ಕಾಡಿನಾಖಿನ್, ತುಮಾರು ನಾಮ್ ಬೋಲಾನುಬಿ ಖರಾಬ್‌ಕರಿ ಝಿಟ್ಕಾರ‍್ಯುತೊ, ತುಮೆ ಧನ್ಯ ಹುಯಿರ‍್ಹಾಸ್. 23 ಅಮ್ ಖ್ಹಾರು ಹುಯೂತೊ ಖ್ಹುಶಿಥಿ ಖೇಲ್‌ಕೂದ್ ಕರೊ, ಶನಕತೊ ಸೊರ್ಗಾಮ ತುಮೂನ ಘಣು ಇನಾಮ್ ಮಳ್‌ಶೆ. ಆ ಅದ್ಮಿನು ಗುರುಗುರಬ್‍ಲ್ಯಬಿ ಪ್ರವಾದಿನ ಖ್ಹಾರು ಅಮ್ಮಸ್ ಕರ‍್ಯುನಿ.

24 ಕತೋಬಿ ಹಮ್ಕೆ ಶೌಕಾರ್ ರ‍್ಹವಾಳ ತುಮಾರಿ ಹಾಲ್ನ ಶಾತ್‌ ಬೋಲು!

ತುಮೆ ಅರಾಮ್‍ನಿ*6:24 ಅಕ್ಲಾಶ್‌ನಿ ಜಿ಼ಂದ್‌ಗಿ ಕರಿ ಮತ್‌ಲಬ್. ಜಿ಼ಂದ್‌ಗಿ ಚ಼ಲೈಲಿದ!

25 ಹಮ್ಕೆ ಪೇಟ್ ಭರೈರ‍್ಹುತೆ ತುಮಾರಿ ಹಾಲ್ನ ಶಾತ್‌ ಬೋಲು!

ತುಮೆ ಭುಕ್ಯು ರ‍್ಹಿಶು!

ಹಮ್ಕೆ ಹಾಖ್ಹವಾಳ ತುಮಾರಿ ಹಾಲ್ನ ಶಾತ್‌ ಬೋಲು;

ತುಮೆ ಕುರ್‌ಲ್ಹಾವ್‌ಶು ಅಜು಼ ರೊವ್‌ಶು!

26 ಅದ್ಮಿಖ್ಹಾರು ತುಮೂನ ಖ್ಹರಾಯೂತೊ, ತುಮಾರಿ ಹಾಲ್ನ ಶಾತ್‌ ಬೋಲು! ಇವ್ಣ ಗುರುಗುರಬ್‍ಲ್ಯನೇಬಿ ಝೂ಼ಟಪ್ರವಾದಿ ಖ್ಹಾರಾನ ಇಮ್ಮಸ್ ಖ್ಹರಾಯು.

ದುಶ್‌ಮನ್ನ ಪ್ಯಾರ್ ಕರ‍್ನು

27 "ಕತೋಬಿ ಮಾರಿ ವಾತೇನ ಖ್ಹಮ್‌ಜಾ಼ವಾಳಾನ ಮೇ ಶಾತ್‌ ಬೊಲುಸ್‌ಕತೊ, ತುಮಾರ ದುಶ್‌ಮನ್ನ ಪ್ಯಾರ್ ಕರೊ, ತುಮಾರಪರ್ ದಾವೊ ಕರಾವಾಳಾನ ಅಛ್ಛು಼ಕರೊ. 28 ತುಮಾರಪರ್ ಶಾಪ್ನ-ಶಬರ್ ದ್ಯವಾಳಾನ ಆಶೀರ್ವಾದ್‌ ಕರೊ, ತುಮಾರಪರ್ ಶಬರ್‌*6:28 ತುಮಾರಪರ್ ನೀಕೊಯ್ನಿತೇಸ್‌ ಅಜು಼ ಖರಾಬ್-ಖರಾಬ್ ಗಾಳೆ ದೆವಾಳನ ಖ್ಹಾಜೆ ಕರಿ ಮತ್‌ಲಬ್. ದ್ಯವಾಳನಖ್ಹಾಜೆ ಪ್ರಾರ್ಥನೆ ಕರೊ. 29 ಕೋಣ್‌ತೋಬಿ ಏಕ್‌ಜ಼ಣು ತಾರ ಕಲ್ಲಪರ್ ಮಾರ‍್ಯುತೊ, ಇನ ಬಿಜೇಕ್ ಕಲ್ಲು ವತಾಳೊ. ತಾರು ಉಪ್ಪರ್‌ಲ್ಯು ಝ಼ಗ್ಗಾನ ಖೇಚಿ ಲ್ಯಾವಳಾನ ಮಹಿನು ಕುಡ್‌ತಾನಾಬಿ ದಿನಾಕ್. 30 ತಾರಕನ ಕೋಣ್‌ತೋಬಿ ಶಾತ್ತೋಬಿ ಮಾಂಗ್ಯುತೊ, ಇನ ದೇ, ತಾರು ಶೊತ್ ಛಿನೈಲ್ಯವಾಳಾನ, ಪಾಛು಼ ದೇ ಕರಿ ನಕೊ ಬೋಲ್. 31 ಅದ್ಮಿಖ್ಹಾರು ತುಮೂನ ಶಶ್ಯಾತ್‌ ಕರ‍್ನುಕರಿ ತುಮೆ ಆಖ್ಹ್ ಕರೋಸ್ಕಿ, ಯೋಸ್‌ ತುಮೆ ಇವ್ಣುನ ಕರೊ.

32 ತುಮೂನ ಪ್ಯಾರ್ ಕರಾವಾಳನಾಸ್‌ ತುಮೆ ಪ್ಯಾರ್ ವತಾಳ್ಯಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇವ್ಣುನ ಕೋಣ್ ಲಾಡ್‌ಪ್ರೀತ್‌ ಒತಾಳಸ್ಕಿ ಇವ್ಣುನಾಸ್ ಲಾಡ್‌ಪ್ರೀತ್‌ ಕರಾಸ್ನಿ. 33 ತುಮೂನ ಅಛ್ಛು಼ಕರಾವಾಳನಾಸ್‌ ತುಮೆ ಅಛ್ಛು಼ಕರ‍್ಯಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇಮ್ಮಸ್ ಕರಾಸ್ನಿ. 34 ತುಮೂನ ಕೋಣ್ ಉಧಾರ್ ಫೇಡಸ್ಕಿ, ಇವ್ಣುನಾಸ್ ಉಧಾರ್ ದಿದಾತೊ, ತುಮೂನ ಶಾತ್‌ ಖ್ಹರಾವ್ಣಿ ಮಳ್‌ಶೆ? ಪಾಪಿ ಅದ್ಮಿ ಖ್ಹಾರುಬಿ ಇವ್ಣೆ ದಿದೂತೆ ಎತ್ರು ಇವ್ಣುನ ಪಾಛು಼ ಮಳ್‌ಶೆ ಕರಿ ಪಾಪಿ ಅದ್ಮಿ ಖ್ಹಾರಾನ ಉಧಾರ್ ದೇಸ್‌ನಿ. 35 ಇನಖ್ಹಾಜೆ, ತುಮಾರ ದುಶ್‌ಮನ್ನ ಲಾಡ್‍ಪ್ರೀತ್ ಕರೊ ಅಜು಼ ಇವ್ಣುನ ಅಛ್ಛು಼ಕರೊ. ತುಮೆ ಇವ್ಣುನ ಉಧಾರ್ ದ್ಯವಾನಿ ವಖ್ಹತ್‌ಮ, ಫಾಛು಼ ಇವ್ಣೇಥಿ ಮಳ್‌ಶೆ ಕರಿ ಬೋಲಾನಿ ಆಖ್ಹ್‌ನ ಮ್ಹೆಂದಿನ್, ಉಧಾರ್ ದೆವೊ. ತದೆ ತುಮುನ ಘಣು ಇನಾಮ್ ಮಳ್‍ಶೆ ಅಜು಼ ತುಮೆ ಪರಮಂಡಲ್‌ನೊ ದೇವ್ನ ಲಡ್ಕಾಉಶು. ಯೋತೊ ಕರ್ಮಿಷ್ಟಿನಾಬಿ, ಖರಾಬ್‌ನಾಬಿ ಅಛ್ಛೊ಼ ಹುಯಿರ‍್ಹೋಸ್. 36 ಪರ್‌ಲೋಕ್‌ನೊ ತುಮಾರೊ ಬಾ ಗೋರ್‌ಕರಾವಾಳೊ ಹುಯಿರ‍್ಹೋತೆ ಇಮ್ಮಸ್, ತುಮೇಬಿ ಗೋರ್‌ ಕರಾವಾಳೊ ಹುಯಿರ‍್ಹೇವೊ.

ಬಿಜಾ಼ನ ತೀರ್ಪ್ ನಕೊ ಕರೊ

37 "ಕಿನಿ ಬಾರೇಮಾಬಿ ತೀರ್ಪ್‌ ನಕೊ ಕರೊ, ತದೆ ದೇವ್‌ಬಿ ತುಮೂನ ತೀರ್ಪ್ ಕರ್ಶೆ ಕೊಯ್ನಿ; ಕಿನಾಪರ್‌ಬಿ ಗಲತ್‌ ನಕೊ ಲಗಾಡೊ, ತದೆ ದೇವ್‌ಬಿ ತುಮಾರಪರ್ ಗಲತ್‌ ಕೋ ಲಗಾಡ್‌ಶೇನಿ. ಬಿಜಾ಼ನ ಮಾಪ್‌ ಕರೊ, ತದೆ ದೇವ್‌ಬಿ ತುಮುನ ಮಾಪ್‌ ಕರ್ಶೆ. 38 ಬಿಜಾ಼ನ ದೆವೊ, ತದೆ ದೇವ್‌ಬಿ ತುಮೂನ ದಿಶೆ. ದಾಬಿ ಹಲೈನ್, ಭಾರ್‌ ರಂಚಾ಼ವಖ್ಹರ್‌ಕು ಮಾಪಿನ್‌, ತುಮಾರಿ ಝೋ಼ಳಿಮ ನಾಕ್‌ಶೆ, ತುಮೆ ಬಿಜಾ಼ನ ಕಿಮ್ ಮಾಪಿನ್ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪ್‌ಶೆ.

39 ಅಜು಼ ಯೇಸುನೆ ಇವ್ಣುನ ಏಕ್‌ ಮತ್ಲಬ್‌ನಿ ಖೇಣಿನ ಬೋಲ್ಯೊ: ಯೋ ಶಾತ್‌ಕತೊ, "ಕಾಣೊ ಕಾಣಾನ ವಾಟ್‌ ವತಾಳನ ಕೋ ಹುವಾನಿ; ಇಮ್‌ ಕರ‍್ಯೂತೊ, ಭೇ ಜ಼ಣ ಖಾಡ್‌ಮ ಪಡಿಜಾ಼ಶೆ. 40 ಶಿಷ್ಯ ಇನ ಗುರುಥಿ ಮೋಟೊ ಕಾಹೆ, ಕತೋಬಿ ಶಿಷ್ಯ ತಮಾಮ್‌ ಶಿಕಾನ ಬಾದ್‌ಮ, ಇನ ಗುರುನಿಮತ್‌ ಹುಯಿಜಾ಼ಸ್.

41 ತಾರ ಡೋಳಾಮ ಛಾ಼ತೆ ಪೇದಡ್‌ನಿ ಬಾರೇಮ ಸೋಚ್ಯೊಕೊಂತೆ, ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿನಿ ಬಾರೇಮ ಶನ ಸೋಚಸ್ತೆ? 42 ತಾರ ಡೋಳಾಮ ಛಾ಼ತೆ ಪೇದಡಸ್‌ ತುನ ದೆಖಾವ ಕೊಯ್ನಿನಿ. ಅಮ್ ರ‍್ಹಾವಪರ್, ತೂ ತಾರ ಭೈನ, ‘ಭೈ ತಾರ ಡೋಳಾಮ ಛಾ಼ತೆ ಕಾಕ್ರಿನ ಕಾಡುಸ್‌ ಆವ್’ ಕರಿ ಕಿಮ್ ಬೋಲಾಸ್? ಅಲ ಠಗಾರು ಪಹಿಲೆ ತಾರ ಡೋಳಾಮಾನು ಪೇದಡ್‌ನ ಕಾಡ್, ಬಾದ್‌ಮ ತಾರ ಭೈನ ಡೋಳಾಮಾನು ಕಾಕ್ರಿನ ಕಾಡಾನ ತುನ ಅಛ್ಛಿನಿತರ ದೆಖಾವ್‌ಶೆ.

ಏಕ್‌ ಝಾ಼ಡು ಅಜು಼ ಇನು ಪಂಡು

43 ಅಛ್ಛು಼ ಝಾ಼ಡು ಖರಾಬ್ ಪಂಡು ದೇಯಿಕೊಯ್ನಿ, ಇಮ್ಮಸ್ ಖರಾಬ್ ಝಾ಼ಡು ಅಛ್ಛು಼ ಪಂಡು ದೇಯಿಕೊಯ್ನಿ. 44 ಹರೇಕ್ ಝಾ಼ಡು ಕಿಮ್ನು ಕರಿ ಬೋಲಾನು ಯೋ ಮ್ಹೇಲಾತೆ ಪಂಡಾಥೀಸ್‌ ಮಾಲುಮ್‌ ಪಡಾಸ್‌. ತುಮೆ ಕಾಟಾನಿಡಾಗ್‍ಮ ಅಂಜೀರ್‌ನು ಪಂಡು ತೋಡಾಕೊಯ್ನಿ ನತರ್‌ಕಿ ಕಾಟಾನಿ ಡಾಗೇಮ ದ್ರಾಕ್ಷಿನು ಪಂಡಾವ್‍ನ ಎಕ್ಟು ಕರಾಕೊಯ್ನಿ. 45 ಅಛ್ಛು಼ ಅದ್ಮಿ ಇನ ಮನ್‌ಮ ಜ಼ಮಕರಿರಾಖ್ಯೂತೆ ಅಛ್ಛಿ ಕಣ್ಗಿಮಾಥು ಅಛ್ಛಾ಼ನ ಭಾರ್‌ ಕಾಡಸ್‌; ಕತೋಬಿ ಖರಾಬ್ ಅದ್ಮಿ ಇನ ಮನ್‌ಮ ಜ಼ಮಕರಿರಾಖ್ಯೂತೆ ಖರಾಬ್ ಕಣ್ಗಿಮಾಥು ಖರಾಬ್‌ನ ಭಾರ್ ಕಾಡಸ್‌. ಮನ್‌ಮ ಶಾತ್‌ ಛಾ಼ಕಿ ಯೋಸ್‌ ಮ್ಹೋಡವಾಟೆ ನಿಕ್ಳಸ್‌.‌

ಘರ್ ಭಾಂದಾವಾಳು ಬೇ ಅದ್ಮಿನಿ ಬಾರೇಮ

46 "ತುಮೆ ಮನ, ‘ಪ್ರಭು, ಪ್ರಭು’ ಕರಿ ಚಿಕ್ರೀನ್‌ಬಿ, ಮೇ ಬೋಲುಸ್ತೆ ಇಮ್‌ ಶನ ಕೋ ಕರಾಂತೆ? 47 ಕೋಣ್ ಮಾರಕನ ಆಯಿನ್, ಮಾರಿ ವಾತೇನ ಖ್ಹಮ್‌ಜಿನ್‌, ಅನೀನಿಘೋಣಿ ಚಾ಼ಲವಾಳು, ಯೋ ಕಿಮ್ನೊ ಹುಯಿರ‍್ಹಿಶೆ ಕರಿ ತುಮೂನ ವತಾಳುಸ್‌. 48 ಯೋ ಅಛ್ಛಿನಿತರ ಖೋಂದೈನ್, ಬಂಡಾಪರ್ ಹದಿ ನಖೈನ್, ಘರ್ ಭಾಂದಾಸ್ತೆ ಅದ್ಮಿನಿಘೋಣಿ ಹುಯಿರ‍್ಹೊಸ್. ನದ್ದಿ ಭರೈನ್, ತೋಫಾನ್ ಯೋ ಘರ್‌ನ ಮಾರ್‌ಪಡ್ಯುತೋಬಿ, ಯೋ ಘರ್‌ನ ಹಲಾವಾನ ಇನ ಕೋಹುಯುನಿ. ಶನಕತೊ ಇನ ಬಂಡಾಪರ್ ಭಾಂದಿರಾಖ್ಯುಥು. 49 ಕತೋಬಿ ಮಾರಿ ವಾತೇನ ಖ್ಹಮ್‌ಜಿನ್‌ಬಿ, ಇನೀನಿಘೋಣಿ ಚಾ಼ಲಕೊಂತೆ ಅದ್ಮಿ ಹದಿಕೊಂತೆ ಜ಼ಮೀನ್‌ಪರ್ ಘರ್ ಭಾಂದಾವಾಳಾನಿ ಘೋಣಿ ಹುಯಿರ‍್ಹುಸ್. ತೋಫಾನ್‌ ಆಯಿನ್, ಯೋ ಘರ್‌ನ ಮಾರ್‌ಪಡ್‌ತಾನ, ಯೋ ಘರ್ ರಡ್ಕಿನ್, ಪೂರ ಬರ್ಬಾತ್ ಹುಯಿಗಯು.