1 ಆಹುವಾದೀನ್‌ ರಾಜ ಅಹಷ್ವೇರೋಷನೆ ಅಗಾಗನೊ ಖೂಮ್‌ವಾಳೋಬಿ ಹಮ್ಮೆದಾತನೊ ಛಿಯ್ಯೊಬಿ ಹುಯಿರೋತೆ ಹಾಮಾನನಿ ಪದವಿನ ಪ್ರಧಾನ ಮಂತ್ರಿಕರಿ ಭಡೈನ್, ಇನಿ ಮಹೇಲ್‌ಮ ಖ್ಹಾರಾಸ್ ಅದಿಕಾರಿಯೇಥಿಬಿ ಇನ ಪಹಿಲಿಝ಼ಗೊ ದಿದೊ. 2 ರಾಜ಼ನಿ ಹುಕುಮ್‌ನಿಘೋಣಿ ಮಹೇಲ್‌ಮಥೂತೆ ಕಾಮ್‌ಕರವಾಳು ಖ್ಹಾರೂಸ್ ಹಾಮಾನನ ಘುಡ್‌ಗ್ಯಮೇಟೆಹುಯಿನ್ ಖ್ಹಲಾಮ್‌ಕರ್ತುಥು. ಕತೋಬಿ ಮೊರ್ದೆಕೈ ಇನ ಇಮ್ ಕೋಕರ್ತೊಥೋನಿ. 3 ಅನ ದೇಖ್ಯೂತೆ ದರ‍್ವಾಜ಼ನ ಕಾವಲ್‌ಕರಾವಾಳು, "ತೂ ರಾಜ಼ನಿಹುಕುಮ್‌ನ ಮೀರಸ್‌ಶನಾ"? ಕರಿ ಮೊರ್ದೆಕೈನ, ಝೇತಾವ್‌ತುಥು. 4 ಅಮ್‌ ಇವ್ಣೆ ಹರೇಕ್‌ರೋಜ಼್‌ ಇನ ಬೋಲ್ಯುತೋಬಿ ಇನೆ ಇವ್ಣಿ ವಾತ್ನ ಕಾನ್‌ದಿದೊಕೊಯ್ನಿ. ಮೇ ಯೆಹೂದ್ಯಕರಿ ಬೊಲಿಲೇತೋಥೊತೆ ಮೊರ್ದೆಕೈನಿ ಹಟ ಕಿಜ್ಜಾ಼ಲಗು ಚಾ಼ಲಸ್ಕಿ ದೇಖಿಸ್‌ ಲೇವ್ಣುಕರಿ ಇನಿ ಆ ಢಂಗ್‌ನಿ ಬಾರೇಮ ಹಾಮಾನನ ಬೋಲ್ಯು. 5 ಮೊರ್ದೆಕೈ ಇನ ಮುಡ್‌ಕ್ಯು ಝು಼ಕೈನ್ ಖ್ಹಲಾಮ್ ಕರ‍್ಯೊಕೊಂತೆ ದೇಖಿನ್ ಹಾಮಾನನೆ ಘಣುಇರಾದೊ ಕರ‍್ಯೊ. 6 ಯೊ ಮೊರ್ದೆಕೈ ಏಕ್ಜ಼ಣಾಪರ್‌ ಹಾತ್‌ಪಾಡಾನು ಬಶ್‌ಕೊಯ್ನಿಕರಿ, ಹೈರೊತೆ ಯೆಹೂದ್ಯನಿ ಖಾನ್‌ದಾನ್‌ವಾಳೊ ಕರಿ ಖ್ಹಮ್‌ಜಾ಼ಮ ಅಹಷ್ವೇರೋಷನು ರಾಜ್ಯಮಥೂತೆ ಮೊರ್ದೆಕೈನು ಮಾಯಮಾತ್ರನಾಬಿ ಕತೊ ಪರ್ಷಿಯಾನು ಖ್ಹಾರೂಸ್ ಯೆಹೂದ್ಯವಾಳನ ಮರ್‌ನಾಕ್‌ಣುಕರಿ ಖ್ಹೂಜ಼್‌ ಕರಿಲಿದೊ. 7 ರಾಜ಼ಹುಯಿರೋತೆ ಅಹಷ್ವೇರೋಷನು ಹುಕುಮ್ ಚ಼ಲಾಯೊಹುಯೊ ಭಾರನೊ ಮಹಿನನ ಚೇತ್ರಿನೊ ಮಹಿನಮ ಹಾಮಾನನ ಖ್ಹಾಮ್ಣೆ ಅಛ್ಛೊ಼ ಮಹಿನೊ ಅಜು಼ ಖರಾಬ್ ಮಹಿನೊ ಖೆವೂಕರಿ ಮಾಲುಮ್‌ ಕರಿಲ್ಯಾವಾನ ಖ್ಹಾಜೆ "ಪೂರ್" ಕತೊ ಚಿಟ್ಟಿ ನಾಖಾಮ ಯೊ ಚಿಟ್ಟಿ ಭಾರನೊ ಮಹಿನೊ ಹುಯಿರೋತೆ ನಿಸಾನ್ ಮಹಿನಾನು ಥೇರಾನ ರೋಜ಼್‌ಮ ಪಡ್ಯು. 8 ಹಾಮಾನನೆ ರಾಜ಼ ಅಹಷ್ವೇರೋಷನ ಅಮ್ ಬೊಲ್ಯೊ; ತುಮಾರ ರಾಜ್ಯಮನು ಖ್ಹಾರೂಸ್ ಇಟಾರಮ್ಮ ರ‍್ಹಾವಾಳು ಎಕ್ ಖಾನ್‌ದಾನ್‌ ಛಾ಼. ಯೊ ಬಿಜು಼ಖ್ಹಾರು ಖಾನ್‌ದಾನ್ನ ಇಚ಼್‌ಮ ಫೈಲೈರ‍್ಹುತೋಬಿ ಇನಿ ರೀತಿರಿವಾಜ಼್‌ಮ ಇವ್ಣೇಥಿ ಅಲಕ್ಕಸ್‌ರ‍್ಹೇಸ್. ರಾಜ಼ನಿ ಖಾನೂಲ್‌ನಾತೊ ಆ ಖಾನ್‌ದಾನ್‌ವಾಳು ಪಾಡಿಚಾ಼ಲಾಸ್‌ ಕೊಯ್ನಿ. ಅಥ್ರಾನವಾಳ ಖ್ಹಾರಾನ ರಾಜ಼ ಚುಪ್ಕೆ ಮ್ಹೇಲಾನು ಬರೋಬರ್‌ಕೊಯ್ನಿ. 9 ರಾಜ಼ನಿ ಖ್ಹೂಜ಼್‌ಹುಯಿತೊ ಇವ್ಣುನ ಮಾರಿನಾಕ್ಣುಕರಿ ಹುಕುಮ್‌ಕರಾದೆ; ಇಮ್ ಕರ‍್ಯೋತೊ ಮೇ ರಾಜ಼ನ ಖಜಿನೋಮ ದಖ್ಹ್‌ ಹಜಾ಼ರ್ ಕಿಲೋ ರೂಪಾನ ಪೈಶು ಟಜ್ರಿವಾಳಾನ ಹಾತ್‌ಮ ದೆವುಸ್‌" ಕರಿ ಬೊಲ್ಯೊ. 10 ತದೆ ರಾಜ಼ನೆ ಇನ ಹಾತ್‌ಮ ಥೂತೆ ಮುದ್ರಾನಿ ಅಂಗೂಠಿನ ಕಾಡಿನ್ ಆಗಾಗನಿ ಖೂಮ್‌ವಾಳೋಬಿ ಹಮ್ಮೆದಾತನೊ ಛಿಯ್ಯೊಬಿ ಯೆಹೂದ್ಯವಾಳನೊ ವಹೇರ‍್ಯೋಬಿ ಹುಯಿರೋತೆ ಹಾಮಾನನ ದಿನಾಖಿನ್, 11 "ಯೊ ರೂಪು ತಾರಾಕನಸ್‌ ರ‍್ಹಾವಾದೆ; ಯೊ ಅದ್ಮೇವ್‌ನಾತೊ ತುನ ಕಿಮ್ ಅಛ್ಛು಼ ದೆಖಾವಸ್ಕಿ ಯೊ ಪರಕ್ಮ ತೂ ಕರೆಜಾ಼ಯ್" ಕರಿ ರಾಜ಼ನೆ ಬೊಲ್ಯೊ. 12 ಪಹಿಲ ಮಹಿನಾನೊ ಥೇರಾನೊ ದನ್‌ಮ ರಾಜ಼ನಿ ಬೋಲೀನ ಲೀಖಾವಾಳನ ಬುಲೈಮಂಗಾಯು. ಇವ್ಣೆ ಹಾಮಾನನಿ ಹುಕುಮ್‌ನಿಘೋಣಿ ರಾಜ್ಯಪಾಲವ್‌ನಾಬಿ , ಯೋಯೋ ಇಟಾರಮ್ನು ಅದಿಕಾರಿಯೇನಾಬಿ, ಯೋಯೋ ಜ಼ಗ್‌ಜಾ಼ತ್‌ನು ಮೋಟವ್‌ನಾಬಿ ಇವ್ಣ ಇವ್ಣ ಶೊಂತ್‌ ದೇಖ್ಹ್‌ನು ಲೀಖ್ಯಾಮಾಬಿ, ಬೋಲಿಮಾಬಿ ಲೀಖ್ಯು. ರಾಜ಼ ಅಹಷ್ವೇರೋಷನ ನಾಮ್‌ಪರಸ್‌ ಚಿಟ್ಟಿ ಲೀಖೈರ‍್ಹೂಥು; ಯೊ ಚಿಟ್ಟಿಯೇ ಅಖ್ಖಾಪರ್ ರಾಜ಼ನು ಅಂಗುಠಿನೊ ಮುದ್ರೊ ನಖೈರ‍್ಹೂಥು. 13 ಚಿಟ್ಟಿಯೇನ ಚಿಟ್ಟಿಲೀಜ಼ಾವಾಳೇಥಿ ಖ್ಹಾರಾಸ್ ರಾಜ಼ನಿ ಅಖ್ಖ ತಬರ್‌ಖಾಮ ಮೋಕ್‌ಲಿದಿದು. ಯೊ ಅಖ್ಖಾಮ ಅಮ್ ಲೀಖೈರ‍್ಹೂಥು. "ಎಕ್ಕಸ್ ರೋಜ಼್‌ಮ, ಕತೊ, ಭಾರನೊ ಮಹಿನೊಹುಯಿರೋತೆ ಆದಾರ್* ಮಹಿನಾನು, ಥೇರಾನೊ ರೋಜ಼್‌ಮ ಶಾಣು, ಅಡ್ಡಾಣಿ, ಲಡ್ಕು, ತಯೇಡಕರಿ ನಾದೇಕ್ಣುತೆ ತುಮಾರ ಇಚ಼್ಮ ರ‍್ಹಾವಾಳ ಖ್ಹಾರಾಸ್ ಯೆಹೂದ್ಯವಾಳನ ಭೋಕಿನಾಖೊ, ಕತರ್‌ನಾಖೊ, ಖತಮ್‌ಕರಿನಾಖೊ. ಇವ್ಣಿ ಶೊತ್ನ ಲೂಟಿಕರಿಲೆವೊ" ಕರೀಬಿ ಲೀಖೈರ‍್ಹೂಥು. 14 ಎತ್ರೇಸ್ ಕಾಹೆತೆ, "ಆ ಚಿಟ್ಟಿನು ಏಕೇಕ್‌ ಹಾಳೇಬಿ ಹರೇಕ್ ತಬರ್‌ಖಾಮ ರಾಜ಼ನಿ ಹುಕುಮ್‌ನಿ ಘೋಣಿ ಬೋಲಿವತಾಳ್ಣು" ಕರಿ ಲೀಖೈರ‍್ಹೂಥು. ಅಖ್ಖುಜ಼ಣು ಯೊ ದನ್ಮ ತಯಾರ್‌ಹೋಣುಕರಿಬಿ ಹೈರುತೆ ಅಖ್ಖಾಸ್ನ ಮಾಲುಮ್‌ ಹುವಾದೆಕರಿ ಲೀಖೈರ‍್ಹುಥು. 15 ಆ ಹುಕುಮ್ ಶೂಷನ್ ಮಹೇಲ್‌ಮ ಮಾಲುಮ್‌ಪಡ್ತಾಸ್‌ನ ಚಿಟ್ಟಿದ್ಯವಾಳುಖ್ಹಾರು ರಾಜ಼ನಿ ಹುಕುಮ್‌ನಿ ಪರಕ್ಮ ಘಬ್‌ರೈನ್ ನಿಕ್‌ಳ್ಯು. ರಾಜ಼ತೋಬಿ ಹಾಮಾನನಿ ಜೋ಼ಡ್ಮ ಪಿಯಾನ ಬೇಶಿಗಯೊ. ಹಿಜ಼್ಜ ಶೂಷನ್ ಖ್ಹಯೇರ್‌ಮತೊ ಕಿಜ಼್ಜಕಿಜ್ಜಾ಼ಬಿ ಕಲಾವ್ಣಿ ಹುವಾಲಗ್ಯು.