ಎಸ್ತೇರ 8

ಯೆಹೂದ್ಯವಾಳನೆ ಶೊಂತ್‌ ಬಚೈಲ್ಯವಾನಖ್ಹಾಜೆ ಜಂಗ್‌ಭೀಡಾನ ಬುಲಾವ್ಣಿ

1 ಯೋಸ್ ದನ್ ರಾಜ಼ ಅಹಷ್ವೇರೋಷನೆ, ಯೆಹೂದ್ಯವಾಳನೊ ವಹೇರ‍್ಯೊ ಹಾಮಾನನ ಥೂತೆ ಘರ್‌ನ ರಾಣಿ ಎಸ್ತೇರ್‌ನ ದಿದೊ. ರಾಣಿನೆ, ಇನಾಬಿ ಮೊರ್ದೆಕೈನಾಬಿ ಥೂತೆ ಖ್ಹಾಚು಼ ಸಂಬಂದಾನಿ ಬಾರೇಮ ರಾಜ಼ನ ಖ್ಹಮ್‌ಜಾ಼ಡಿ. ತಪ್‌ಥೊ ಮೊರ್ದೆಕೈನ ರಾಜ಼ನಖ್ಹಾಮ್ಣೆ ಆವಾನಿ ಅವಕಾಶ್‌ ದೆವೈರುಥು. 2 ತದೆ ರಾಜ಼ನೆ ಮೊರ್ದೆಕೈನ ಮರ‍್ಯಾದಿದೀನ್ ಹಾಮಾನಥಿ ಕಡಾಯೋತೆ ಮುದ್ರಾನಿ ಅಂಗುಠಿ ಇನ ದಿದೊ; ಎಸ್ತೇರ್‌ನೆ ಹಾಮಾನನು ಘರ್‌ನು ಜಿಮ್ಮೆದಾರಿನ ಇನ ದಿದಿ. 3 ಎಸ್ತೇರ್ ಪಾಛಿ ರಾಜ಼ನ ಖ್ಹಾಮ್ಣೆ ಜೈ಼ನ್ ಇನ ಗೋಡಾಪರ್ ಪಡೀನ್, ರೋವ್ತಿಹುಯಿನ್, "ಅಗಾಗನಿ ಪಿಳ್ಗಿವಾಳೊ ಹಾಮಾನನೆ ಯೆಹೂದ್ಯವಾಳನಿ ಕೇಡ್ನಖ್ಹಾಜೆ‍ ಕರ‍್ಯೋತೆ ಖರಾಬ್‌ಖ್ಹೂಜ಼್‌ನ, ಖಾನೂಲ್‌ ಕಾಡಿನಾಕ್ಣುಕರಿ ಬಿಂತಿಕರಿಲಿದಿ. 4 ರಾಜ಼ ಇನೊ ಖ್ಹೊನ್ನಾನೊ ಡಂಡೊ ಇನಾಭಣಿ ವತಾಳ್‌ತಾನ, ಯೊ ರಾಜ಼ನ ಖ್ಹಾಮ್ಣೆ ಉಠಿಭೀರಿನ್, 5 "ತುಮೆ ಮರಾಪರ್ ಗೋರ್‌ಕರೀನ್, ಮನ ಪಸಂದ್‌ಕರೀನ್, ಮೇ ಬೋಲುತೆ ವಾತ್ ಅಛ್ಛು಼ಕರಿ ಗಣ್ತಿ ಕರೀನ್ ಇನ ಮಾನವಾಳೊ ಉಶೇತೊ, ರಾಜ಼ನ ಖ್ಹಾರಾಸ್ ತಬರ್ಖಾಮಛಾ಼ತೆ ಯೆಹೂದ್ಯವಾಳನ ಮಾರಿನಾಖನಖ್ಹಾಜೆ ಅಗಾಗನಿ ಪಿಳ್ಗಿವಾಳೊ ಹಮ್ಮೆದಾತನೊ ಛಿಯ್ಯೋಬಿ ಹುಯಿರೋತೆ ಹಾಮಾನನೆ ಲೀಖಾಯೋತೆ ಚಿಟ್ಟಿಯೇವ್ನ ವಜ಼ಾ ಕರಾನಖ್ಹಾಜೆ ಹುಕುಮ್‌ನ ಚ಼ಲಾವ್ಣು. 6 ಮಾರ ಶೊಂತ್ ಅದ್ಮೇವ್‌ನ ಕೇಡ್‌ಹುವಾನು ಡೋಳೇಖ್ಹು ದೇಖಿನ್ ಮೇ ಕಿಮ್‍ತೋಬಿ ಖ್ಹಮಾಳು? ಮಾರಿ ಖೂಮ್‌ನು ನಾಶನ ದೇಖಿನ್ ಖ್ಹೊಪೊರ‍್ಹವಾನೂಬಿ ಕಿಮ್?" ಕರಿ ಬಿಂತಿಕರಿಲಿದಿ. 7 ತದೆ ರಾಜ಼ನೆ, ರಾಣಿ ಎಸ್ತೇರ್‌ನಾಬಿ ಯೆಹೂದ್ಯವಾಳೊ ಮೊರ್ದೆಕೈನಾಬಿ, "ಹಾಮಾನನೆ ಯೆಹೂದ್ಯವಾಳನ ವಿರೋದ್‌ ಹಾತ್‌ಪಾಡ್ಯೋತೆ ಇನಾಖ್ಹಾಜೆ ಇನ ಗಳ್‌ಫಾಶಿದೀನ್ ಇನ ಘರ್‌ನ ಎಸ್ತೇರ್‌ನ ಧರಮ್ ದಿದೋನಿ. 8 ಕತೋಬಿ ರಾಜ಼ನ ನಾಮ್‌ಪರ್ ಲೀಖಾಯುತೆ ಅಜು಼ ರಾಜ಼ನೊ ಮುದ್ರೊ ನಖಾಯುಹುಯು ಲೀಖ್ಯಾನ ಕೋಣ್‌ಬಿ ವಜಾಕರಾನ ಹುವಾಕೊಯ್ನಿ. ಇನಾಖ್ಹಾಜೆ ಯೆಹೂದ್ಯವಾಳನಿ ಬಾರೇಮ ತುಮುನ ಕಿಮ್ ಬರೋಬರ್‌ ದೆಖಾವಸ್ಕಿ ಇಮ್ ರಾಜ಼ನ ನಾಮ್‌ಪರ್‌ ತುಮೇಬಿ ಚಿಟ್ಟಿ ಲೀಖಾವೊ. ಇನಾಪರ್ ರಾಜ಼ನೋ ಮುದ್ರೊ ನಾಖೊ." ಕರಿ ಬೊಲ್ಯೊ. 9 ತದೆ ರಾಜ಼ನು ಲೀಖಾಪಟ್‌ವಾಳನ ಬುಲೈಮಂಗಾಯು. ಅವ್ಣೆ ತೀನ್ನೊ ಮಹಿನೊಹುಯಿರೋತೆ ಜೇಷ್ಠ ಮಹಿನಾನೊ ತೀನ್ ಉಪ್ರೀಖ್ಹ್‌ನ ದನ್‌ಮ ಆಯಿನ್ ಮೊರ್ದೆಕೈನಿ ಹುಕುಮ್‌ನಿ ಘೋಣಿ, ಯೆಹೂದ್ಯವಾಳನಾಬಿ ಭಾರತಥು ಧರೀನ್ ಕೂಷ್‌ಲಗೂಬಿ ಫೈಲೈರ‍್ಹೂತೆ ಏಕ್‌ಖ್ಹೊ ಖ್ಹಾತ್ಉಪ್ರೀಖ್ಹ್‌ ತಬರ್‌ಖಾನು ರಾಜ್ಯಪಾಲವ್‌ನಾಬಿ, ದೇಖ್ಹ್‌ನ ಅಧಿಪತಿಯೇನಾಬಿ, ಅದಿಕಾರಿಯೇನಾಬಿ, ಯೋಯೋ ತಬರ್‌ಖಾವ್ನು ಲೀಖ್ಯಾವ್‌ಮಾಬಿ, ಯೋಯೋ ಜ಼ಗ್‌ಜಾ಼ತ್‌ನು ಬೋಲಿಮಾಬಿ, ಚಿಟ್ಟಿಯೇ ಲೀಖ್ಯು. 10 ರಾಜ಼ನ ನಾಮ್‌ಪರ್ ಲೀಖಾಯೂತೆ ಆ ಚಿಟ್ಟಿಯೆವ್‌ನ ಮೊರ್ದೆಕೈನೆ ರಾಜ಼ನೊ ಮುದ್ರೊನಾಖಿನ್, ಮಹೇಲ್‌ನು ಘೋಡಾನಿ ಕೊಟ್‌ಗೆಮ ಪೈದಹುಯಿನ್ ಪಳ್ಯಾತೆ ಘೋಡವ್‌ಪರ್ ಬೇಶಿನ್ ನಿಕ್‌ಳ್ಯಾತೆ ಚಿಟ್ಟಿದ್ಯಾವಾಳವ್‌ನ ಹಾತ್‌ಮ ದೀಮೋಕ್‌ಲ್ಯೊ 11 ರಾಜಾ಼ನೆ ಖಾನೂಲ್‌ ಅಮ್‌ ಲೀಖೈರಾಖ್ಯೋತೊಕಿ ಹರೇಕ್‌ ಖ್ಹಯೇರ್‌ಮಾಬಿ ಯೆಹೂದ್ಯರ್‌ನ ಎಕ್ಟುಕರಾನುಬಿ ಬಚೈ಼ಲ್ಯಾವನಿ ಹಕ್‌ನಾಬಿ ದಿದೊ ಖೆವ ಮುಲಕ್‌ಮಾಬಿ ಪರ್ಖ್ಹಾವ್ನ ನಾಶ್‌ಕರಾನಬಿ ಮಾರಿನಾಖನಾಬಿ ಅಜು಼ ಇವ್ಣಿ ತಯೇಡಾವ್ನ, ಲಡ್ಕಾವ್ನ ಮಾರೆಜಾ಼ಯ್‌ ಅಜು಼ ಇವ್ಣ ವಹೇರ‍್ಯಾನು ಶೊತ್‌ನ ಲೂಟಿಕರೆಜಾ಼ಯ್‌. 12 ಆ ರಾಜ಼ನಿ ತೀರ್ಪ್‌ ಪರ್ಷಿಯ ದೇಖ್ಹ್‌ನು ಯಹೂದಿವಾಳು ಖ್ಹತಾಪ್ಣಿಪಡ್ಯುತೆ ದನ್‌ಥು ಧರೀನ್ ಭಾರನೆ ಮಹಿನೊಹುಯಿರ‍್ಹೊತೆ ಆಧಾರ್‌ನು ಥೇರಾನ ದನ್‌ಮ ಚ಼ಲಾವ್ಣಿಲಾವ್ಣುಥು 13 ಯೊ ದನ್‌ಮ ಯೆಹೂದ್ಯವಾಳು ಇವ್ಣ ವಹೇರ‍್ಯಾವ್‌ಪರ್ ದಾವ್‌ಕಾಡಾನ ತಯಾರ್ ಹುಯಿರ‍್ಹೇವ್ಣು" ಕರಿ ಹುಕುಮ್ ಕರ‍್ಯೊ. ಅಜು಼ ಹರೇಕ್‌ ತಬರ್‌ಖಾಮ ಇನ ಮಾಲುಮ್‌ಕರಾವ್ಣು. 14 ರಾಜ಼ನಿ ಆ ಹುಕುಮ್ ಶೂಷನ್ ನಂಗರ್‌ಮ ಭಡ್ಕಾವನಿವಖ್ಹ್‌ತೆ ಇನೇಥಿ ಹುಮ್ಮಖ್ಹ್‌ ಲಿದುತೆ ಚಿಟ್ಟಿದ್ಯಾವಾಳು ಮಹೇಲ್‌ನು ಸವಾರಿನ ಘೋಡವ್‌ಪರ್ ಬೇಶಿನ್ ಘಣು ತುರಂಥಿ ನಿಕ್‌ಳ್ಯು. 15 ಮೊರ್ದೆಕೈತೊ ನೀಲು ಅಜು಼ ಧೋಳುಫಟ್ ರಾಜ಼ನು ಝ಼ಗ್ಗೊ ಫೇರಿಲೀನ್, ಖ್ಹೊನ್ನಾನು ಮೋಟಿ ಕಿರೀಟ್‌ನ ಘಾಲಿಲೀನ್, ಲಲೇಲಾಲ್‌ರಂಗ್‌ನು ಧಾಗಾನ ಝ಼ಗ್ಗಾನ ಹೋಡಿಲೀನ್ ರಾಜ಼ಕಂಥೊ ನಿಕ್‌ಳ್ಯೊ. ಶೂಷನ್ ಖ್ಹಯೇರ್‌ಮ ಖ್ಹುಶೀನ ಪೋಭಾರ ಹುಯು. 16 ಹಿಜ್ಜಾ಼ನು ಯೆಹೂದ್ಯವಾಳು ಶಂತೋಖ್ಹ್‌ ಅಜು಼ ಛುಟ್ಕಾರ್‌ನು ಜೀತ್‌ನಿ ಖ್ಹುಶಿಮ ಭರಾಯು. 17 ರಾಜ಼ನು ತೀರ್ಮಾನ್ ಭಡ್‌ಕ್ಯುತೆ ತಬರ್ಖಾವ್‌ಮಾಬಿ, ಖ್ಹಯೇರ್‌ಮಾಬಿ ಜಿವ್ಣು ಕರುಕರ್ತುಥೂತೆ ಯೆಹೂದ್ಯವಾಳ ಖ್ಹಾರಸ್ನ ಅಛ್ಛೊ಼ ದನ್ ಹುಯೊ; ಇವ್ಣೆ ಇನ ಖ್ಹುಶೀನೊ ಅಜು಼ ಶಂತೋಖ್ಹ್‌ನೊ ದನ್‌ಕರಿ ಮನಾಯು. ಅದ್ಮೇವ್‌ಮ ಕೈಯೇಕ್‌ಜ಼ಣು ಯೆಹೂದ್ಯವಾಳಥಿ ಡರೀನ್ ಇವ್ಣಿ ಜಾ಼ತ್‌ಮ ಮಳಿಗಯು.