1 ತೀನ್ನೊ ದನ್ ಎಸ್ತೇರ್‌ನೆ ರಾಣಿನು ಪೆರ್ವಾಖ್ಹ್‌ನ ಪೇರ‍್ಹಿಲೀನ್ ಮಹೇಲ್‌ನ ಮಹಿಜೈ಼ನ್, ರಾಜ಼ನ ಘರ್‌ನು ಬಲ್ಡಾನ ಖ್ಹಾಮ್ಣೆ ಭೀರಿಗೈ. ರಾಜ಼ ಯೊ ಘರ್‌ಮ ರಾಜ಼ ಸಿಂಹಾಸನ್‌ಪರ್‌ ದರ‍್ವಾಜ಼ನ ಮ್ಹೋರೆಹುಯಿನ್‌ ಬೇಠೋಥೊ. 2 ಯೊ ಭಾರ್‌ ಭಿಯಿಥೀತೆ ಎಸ್ತೇರ್ ರಾಣಿನ ದೇಕ್‌ತನಾಸ್‌ ಇನಾಪರ್ ವಾರ್ಖ್ಹೊ ಕರೀನ್ ಇನ ಹಾತ್‌ಮ ಥೂತೆ ಖ್ಹೊನ್ನಾನ ಡಂಡಾನ ಇನಾಭಣಿ ವತಾಳ್ಯೊ. ಎಸ್ತೇರ್ ಖನ್ನೆಆಯಿನ್ ರಾಜ಼ಡಂಡಾನಿ ನೋಕ್‌ನ ಛೀಮಿ. 3 ರಾಜ಼ನೆ ಇನ, "ಎಸ್ತೇರ್ ರಾಣಿ, ತುನ ಶಾತ್ ಹೋಣು?" ತಾರಿ ಬಿಂತಿ ಶಾತ್? ತೂ ಮಾರ ರಾಜ್ಯಮಾಥು ಆಧು ಭಾಗ್‌ ಮಾಂಗಿತೋಬಿ ಮೇ ತುನ ದೆವುಸ್‌" ಕರಿ ಬೊಲ್ಯೊ. 4 ಇನ ಎಸ್ತೇರ್‌ನೆ, "ರಾಜ಼ ಮಾನಿಲ್ಯಾವಾಳೊ ಉಶೇತೊ ಮೇ ಆ ವಖ್ಹತ್ ತುಮಾರಖ್ಹಾಜೆ ತಯಾರ್ ಕರಿರಾಖಿತೆ ಮಿಝ಼್‌ವಾನ್ನಖ್ಹಾಜೆ ಹಾಮಾನನಿ ಜೋ಼ಡ್ಮ ಆವ್ಣುಕರಿ" ಬಿಂತಿಕರಿಲಿದಿ. 5 ತದೇಸ್‌ ರಾಜ಼ನೆ, "ಎಸ್ತೇರ್‌ನಿ ಬಿಂತಿನ ಚ಼ಲೈದ್ಯವಾನಖ್ಹಾಜೆ ಹಾಮಾನನ ಬುಲೈಲಿನ್ ಆವೊ" ಕರಿ ಹುಕುಮ್‌ಕರೀನ್‌ ಎಸ್ತೇರ್‌ನೆ ಕರೈತೆ ಮಿಝ಼್‌ವಾನ್ನಖ್ಹಾಜೆ ಹಾಮಾನನ ಜೋ಼ಡ್ಮ ಗಯೊ. 6 ದ್ರಾಕ್ಷಿನೊ ರಖ್ಹ್ ಪಿಯ್ಯಾನಿ ವಖ್ಹ್‌ತೆ ರಾಜ಼ನೆ ಬಿಜೇಕ್‌ಹಲ್ಲ ಎಸ್ತೇರ್‌ನ, "ತಾರಿ ಬಿಂತಿ ಶಾತ್ ಬೋಲ್; ಮೇ ಇನ ಚ಼ಲೈದೆವುಸ್‌. ತೂ ಮಾರ ರಾಜ್ಯಮಾಥು ಆಧು ಭಾಗ್‌ ಮಾಂಗಿತೋಬಿ ಮೇ ಯೊ ತುನಾ ದೆವುಸ್‌" ಕರಿಬೋಲ್ಯೊ. 7 ಇನ ಎಸ್ತೇರ್‌ನೆ, "ರಾಜ಼ ಮಾರಪರ್ ವಾರ್ಖ್ಹೊಕರಿನ್ ಮೇ ಬೋಲುಸ್ತೆ ದ್ಯವಾನಾಬಿ ಮಾರಿ ಬಿಂತಿನ ಚ಼ಲೈದ್ಯವಾನ ಮನ್‌ರ‍್ಹಯೂತೊ, 8 ಮೇ ತುಮಾರಖ್ಹಾಜೆ ತಯಾರ್‌ಕರೈಶ್ತೆ ಮಿಝ಼್‌ವಾನ್ನಖ್ಹಾಜೆ ಕಾಲ್‌ಬಿ ಹಾಮಾನ್ನಿ ಜೋ಼ಡ್ಮ ಆವ್ಣು; ತದೆ ರಾಜ಼ ಬೋಲನಿತರಾಸ್ ಮೇ ಕರೀಶ್, ಆಸ್‌ ಮಾರಿ ಬಿಂತಿ.

9 ಯೊ ದನ್ ಹಾಮಾನ ಖ್ಹುಶಿನಪೋಭಾರಮ ಘರೆ ಜಾ಼ವಾನಿ ವಖ್ಹ್‌ತೆ ಮೊರ್ದೆಕೈ ಇನೇಥಿ ಡರ‍್ಯೊಬಿಕೊಯ್ನಿ, ಇನ ಖ್ಹಾಮ್ಣೆ ಉಠ್ಯೋಬಿಕೊಂತೆ ಮಹೇಲ್‌ನ ದರ‍್ವಾಜ಼ಕನ ಬೆಠೊರ‍್ಹವಾನು ದೇಖಿನ್ ಇನಾಪರ್ ಘಣು ಇರಾದೊ ಕರ‍್ಯೊ. 10 ರ‍್ಹೀನ್‌ಬಿ ಹಾಮಾನನೆ ಇನ ಇರಾದನ ಖ್ಹಮಾಳಿಲೀನ್ ಘರೆ ಜೈ಼ನ್ ಇನ ದೋಸ್ತಿಯೆನಾಬಿ, ಇನಿ ಬಾವಣ್ ಜೆರೆಷನಾಬಿ ಬುಲೈಮಂಗಾಯೊ. 11 ಇವ್ಣಖ್ಹಾಮ್ಣೆ ಇನು ಧನ್‍ದೌಲತ್ನಾಬಿ, ಛಿಯ್ಯಾವ್ನಿ ಬಾರೇಮಬಿ, ರಾಜ಼ನೆ ಇನ ಖ್ಹರಾವ್ಣಿ ಇಜ಼್ಜತ್‌ ಕರ‍್ಯೋತೇಬಿ ಖ್ಹಾರಾಸ್ ಅದಿಕಾರಿಯೆಮಾಬಿ, ರಾಜನ ಸೇವಕರ್‌ಥೀಬಿ ಇನ ಊಚಿಝ಼಼ಗೊನ ದಿದೋತೇಬಿ ಖ್ಹರಾಯೊ. 12 ಆ ನಾಹುಯಿನ್‌ ಎಸ್ತೇರ್‌ ರಾಣಿಸ್ ಖ್ಹುದ್ ತಯ್ಯಾರ್‌ಕರೀತೆ ಮಿಝ಼್‌ವಾನ್ನ ಮನಾಬಿ ರಾಜ಼ನ ಕಾಹೆತೆ ಬಿಜು಼ಕಿನಾಬಿ ಬುಲೈಕೊಯ್ನಿ. ಕಾಲ್‌ಬಿ ಇನೆ ಬುಲೈರಾಖಿಸ್ ಕರೀಬಿ ಹಾಮಾನನೆ ಖ್ಹಮ್‌ಜಾ಼ಡ್ಯೊ. 13 ಕತೋಬಿ ಯೆಹೂದ್ಯವಾಳೊ ಹುಯಿರೋತೆ ಮೊರ್ದೆಕೈ ಮಹೇಲ್‌ನ ದರ‍್ವಾಜ಼ಕನ ಮಾರ ಡೋಳಾನ ಖ್ಹಾಮ್ಣೆ ಬೆಠೊರ‍್ಹವಾಲಗೂಬಿ ಆ ಅಖ್ಖೇಥಿ ಮನ ಹಕ್ಲಾಲ್ ಕೋಉಶೇನಿ" ಕರಿ ಬೊಲ್ಯೊ. 14 ಇನಾಖ್ಹಾಜೆ ಇನಿ ಬಾವಣ್ ಜೆರೆಷಬೀ ಅಜು಼ ಇನ ದೋಸ್ತಿಯೇಬಿ ಇನ, "ಅಢೈವೀಖ್ಹ್ ಹಾತ್ ಊಚು಼ರ‍್ಹಾವಾನು ಏಕ್‌ ಗಳ್‌ಫಾಶಿನು ಖಂಬಾನ ತಯಾರ್‌ಕರೈನ್ ಕಾಲ್ ಕುಶಿಖ್ಹು ರಾಜ಼ನಿ ಹುಕುಮ್‌ಲೀನ್‌ ಮೊರ್ದೆಕೈನ ಖಂಬಾಪರ್‌ ಠಂಗಾವ್ಣು; ಇನಾಪಾರ್ ತೂ ಖ್ಹುಶೀಥಿ ರಾಜ಼ನಿ ಜೋ಼ಡ್ಮ ಮಿಝ಼್‌ವಾನ್ನ ಜ಼ಯೇಜಾ಼ಯ್." ಕರಿ ಬೊಲ್ಯೊ. ಹಾಮಾನನೆ ಆ ವಾತ್ನ ಮಾನಿನ್‌ ಇಮ್ಮಸ್‌ ಗಳ್‌ಫಾಶಿನ ತಯಾರ್ ಕರಾಯೊ.