ಎಸ್ತೇರ 6

ಮೊರ್ದೆಕೈನ ರಾಜ಼ನೆ ಮರ‍್ಯಾದಿ ಕರ‍್ಯೊತೆ

1 ಯೊ ರಾತ್ ರಾಜ಼ನ ನಿಂದರಸ್‌ ಕೋಆಯ್ನಿ, ಇನಖ್ಹಾಜೆ ಇನೆ ಯಾದ್‌ಕರಾಖ್ಹರ್ಕು ಇನಾಮ ರಾಜಾ಼ನಿ ರಾಜ಼್‌ಭಾರ್‌ನು ಜ಼ಮಾನನಿ ವಾತೆಖ್ಹಾರಿ ಲೀಖ್ಯುಹುಯು ದಪ್ತರ್‌ನ ಮಂಗೈನ್‌ ಇನ ಪಢಾವಖ್ಹತರ್‌, 2 ರಾಜ಼ನ ಮಾರಿನಾಕ್ಣುಕರಿ ದರ‍್ವಾಜ಼ನ ಕಾವ್ಲಿಕರವಾಳ ಬಿಗೆತಾನ್‌, ತೆರೆಷ್ ಕರಿ ಬೇಜ಼ಣ ರಾಜಾ಼ನ ಅದಿಕಾರಿ ಹಿಕ್‌ಮತ್‌ಕರ‍್ಯಾತೆ ವಾತೆ ಅಜು಼ ಯೊ ವಾತೆ ಮೊರ್ದೆಕೈಥಿ ಭಾರ್ ಭಡ್‌ಕ್ಯುತೆ ಇನಾಮ ಲಿಖೈರ‍್ಹುಥು. 3 ತದೆ ರಾಜ಼ನೆ, "ಯೊ ಅಛ಼್ಛ ಕಾಮ್ನಖ್ಹಾಜೆ ಮೊರ್ದೆಕೈನ ಖಿವಿ ಮರ‍್ಯಾದಿ ಮಳಿ?" ಕರಿ ಫುಛಾ಼ವಖ್ಹತರ್, ಇನ ಮಹೇಲ್‌ಮ ಕಾಮ್‌ಕರವಾಳು "ಖಿವೂಬಿ ಮಳ್ಯುಕೊಯ್ನಿ" ಕರಿಬೋಲ್ಯು. 4 ತದೆ ರಾಜ಼ನೆ, "ಕೋಣ್ ಹಿಜ್ಜಾ಼ ಮಹೇಲ್‌ಮ ಛಾ಼ತೆ ಮಾರ ಅದಿಕಾರಿಯೆ?" ಕರಿ ಬೊಲ್ಯೊ. ಎತ್ರಾಮ ಹಾಮಾನನೆಸ್‌ ತಯಾರ್ ಕರಿರಾಖ್ಯೊಥೊತೆ ಫಾಖ್ಹಾಮ ಮೊರ್ದೆಕೈನ ಠಂಗಾವನ ರಾಜ಼ನಿ ಹುಕುಮ್ ಲೀಲೆವ್ಣುಕರಿ ಮಹೇಲ್‌ನ ಬಲ್ಡಾಮ ಅಯಿನ್ ಭಿಯೋಥೊ. 5 ತದೆ ರಾಜ಼ನ ಸೇವಕರ‍್ನೆ, "ಹಂದೇಖೊ, ಬಲ್ಡಾಮ ಹಾಮಾನ ಭಿಯೋಸ್" ಕರಿ ಬೋಲ್ಯು. ತದೆ ರಾಜ಼ನೆ, "ಯೊ ಮಹಿ ಆವಾದೆ" ಕರಿಬೋಲ್ಯೊ. 6 ತದೆ ಹಾಮಾನ ಮಹಿ ಆವಖ್ಹತರ್, "ರಾಜ಼ನೆ ಕಿನಾತೋಬಿ ಮರ‍್ಯಾದಿ ಕರೈಲೇವ್ಣುಕರಿ ಆಖ್ಹ್‌ಕರ‍್ಯೂತೊ ಎಥ್ರಾನವಾಳನ ಕರ್ನುತೆ ಶಾತ್?" ಕರಿ ಇನ ಬೊಲ್ಯೊ. ಇನ ಹಮಾನನೆ, "ಹಮ್ಕೆ ರಾಜ಼ ಕೋಣ್? ಕಿನ ಮರ‍್ಯಾದಿದ್ಯಾವನ ಪಸಂದ್‌ಕರ್‌ಶೆ?" ಕರಿ ಬೊಲ್ಯೊ, 7 ಇನಖ್ಹಾಜೆ ಹಾಮಾನನೆ ರಾಜ಼ ಮರ‍್ಯಾದೆ ದ್ಯವಾನ ಪಸಂದ್‌ಕರಾಸ್ತೆ ಅದ್ಮಿನ ಅಮ್‌ ಕರ‍್ನು. 8 ಇನೆ ರಾಜ಼ನ, ಕಿನಾತೋಬಿ ಮರ‍್ಯಾದಿಕರ್ನುಕರಿ ಪಸಂದ್ ಉಷೇತೊ ರಾಜ಼ ಫೇರಾನು ಪೆರ್ವಾಖ್ಹ್‌ಬಿ ಅಜು಼ ಸವಾರಿಕರಾನು ಪಟ್ಟಾನೊ ಘೋಡಾನ ಮಂಗಾವ್ಣು. 9 ಯೊ ಪೆರ್ವಾಖ್ಹ್‌ನಾಬಿ ಘೋಡನಾಬಿ ಮುಖ್ಯ ರಾಜ಼ನ ಸರ್ದಾರ್‌ಮ ಏಕ್‌ಜ಼ಣಾನಿ ಕಬ್‌ಜಾ಼ಮ ದೀನ್, ರಾಜ಼ ಮರ‍್ಯಾದಿ ಕರ್ನುಕರಿಛಾ಼ತೆ ಅದ್ಮಿನ ಯೊ ರಾಜ಼ನ ಪೆರ್ವಾಖ್ಹ್‌ನ ಫೇರೈನ್, ಘೋಡಾನ ಉಪ್ಪರ್ ಬೆಖ್ಹಾಡಿನ್ ಖ್ಹಯೇರ್ನಿ ಚೌ಼ಕ್‌ಮ ಮೀರೊಂಗ್ಣಿ ಕರಾವ್ತುಹುಯಿನ್ ಇನಖ್ಹಾಮ್ಣೆ, ‘ರಾಜ಼ ಮರ‍್ಯಾದಿ ಕರ್ನುಕರಿಛಾ಼ತೆ ಇನ ಮರ‍್ಯಾದಿದ್ಯವಾನಿ ಪರಕ್ ಆಸ್’ ಕರಿ ಭಡ್ಕಾವ್ಣು" ಕರಿಬೋಲ್ಯೊ. 10 ತದೆ ರಾಜ಼ನೆ ಹಾಮಾನ್ನ, "ತುನೆ ಬೋಲ್ಯೊತೆ ಪೆರ್ವಾಖ್ಹ್‌ನಾಬಿ ಅಜು಼ ಘೋಡಾನಾಬಿ ಒಗ್ಗಿಸ್ ಮಂಗೈನ್ ಮಹೇಲ್ನ ದರ‍್ವಾಜ಼ಕನ ಬೆಠೋತೆ ಮೊರ್ದೆಕೈ ಕರಿ ಯೆಹೂದ್ಯನ ಇಮ್ಮಸ್ ಕರ್‌; ತುನೆ ಬೋಲ್ಯೊತೆ ಇನಾಮ ಖಿವು ಏಕ್‌ಬಿ ಮ್ಹೆಲಿಶ್‌ನಕೋತೆ ಕರ್ಜೊ" ಕರಿ ಹುಕುಮ್ ದಿದೊ. 11 ಹಾಮಾನನೆ ಯೊ ಪೆರ್ವಾಖ್ಹ್‌ನಾಬಿ ಅಜು಼ ಘೋಡಾನಾಬಿ ಲಯಿನ್, ಮೊರ್ದೆಕೈನ ಫೇರೈನ್, ಖ್ಹಯೇರ್ನಿ ಚೌ಼ಕ್‌ಮ ಮೀರೊಂಗ್ಣಿ ಕರೈನ್, ಇನಖ್ಹಾಮ್ಣೆ, "ರಾಜ಼ ಮರ‍್ಯಾದಿ ಕರ್ನುಕರಿಛಾ಼ತೆ ಇನ ಮರ‍್ಯಾದಿದ್ಯವಾನಿ ಪರಕ್ ಆಸ್" ಕರಿ ಭಡ್ಕಾಯೊ. 12 ಮೊರ್ದೆಕೈ, ಪಾಛೊ಼ ಮಹೇಲ್‌ನ ದರ‍್ವಾಜ಼ಕನ ಆಯೊ. ಹಾಮಾನಾತೊ ದುಖ್‌ಥಿ ಮ್ಹೋಡಾನ ಮೂಚಿಲೀನ್, 13 ಒಗ್ಗಿಸ್ ಘರೆಜೈನ್ ಇನಿ ಬಾವಣ್‌ಹುಯಿರೀತೆ ಜೆರೆಷನ ಅಜು಼ ಅಖ್ಖಾ ಮಾಯಮಾತ್ರನ ಖ್ಹಾಮ್ಣೆ ಹಿಜ಼್ಜಾ ಹುಯುತೆ ಇನ ಬೊಲ್ಯೊ. ತದೆ ಪೊಂಡಿತ್‌ಖ್ಹಾರು ಅಜು಼ ಬಾವಣ್ಣೆ ಹಾಮಾನನ, "ಕಿನ ಖ್ಹಾಮ್ಣೆ ತಾರಿ ಹಾರ್‌ ಶುರುಹುಯುಕಿ ಯೊ ಅದ್ಮಿ ಯೆಹೂದ್ಯವಾಳೊ ಹುಯಿರೊತೊ, ತೂ ಇನೇಥಿ ಜೂತಿಶ್ ಕೊಯ್ನಿ. ಇನ ಖ್ಹಾಮ್ಣೆಪಡೀನ್ ಬರ್‌ಬಾತ್‌ ಹುಯಿಜಿಶ್" ಕರಿ ಬೋಲ್ಯು.

ಹಾಮಾನನ ಗಳ್‌ಫಾಶಿ ಹುಯೂತೆ

14 ಇವ್ಣೆ ಅಜೂ಼ಬಿ ಇನಿ ಜೋ಼ಡ್ಮ ವಾತೆ ಬೋಲುಕರಾನಿ ವಖ್ಹ್‌ತೇಸ್ ರಾಜ಼ನ ಮಹೇಲ್‌ನು ಅದಿಕಾರಿಖ್ಹಾರು ಆಯಿನ್ ಎಸ್ತೇರ್ ಕರೈರಾಖಿತೆ ಮಿಝ಼್‌ವಾನ್ನ ಒಗ್ಗಿಸ್ ಆವ್ಣುಕರಿ ಹಾಮಾನನ ಬುಲೈಲೀಗು.