1 ಭಾರತ ದೇಖ್ಹ್‌ಥು ಧರೀನ್ *ಇಥಿಯೋಪಿಯ ದೇಖ್ಹ್‌ಲಗೂಬಿ ಥೂತೆ ಏಕ್‌ಖ್ಹೊ ಖ್ಹಾತ್‌ಉಪ್ರೀಖ್ಹ್‌ ದೇಖ್ಹ್‌ನ ಅಹಷ್ವೇರೋಷ ರಾಜ಼ ರಾಜ಼್‌ಭಾರ್‌ ಚ಼ಲವ್‌ಕರ್ತೊಥೊ. 2 ಅಹಷ್ವೇರೋಷ ರಾಜ಼ ಇನು ರಾಜ಼ಧಾನಿ ಹುಯಿರೂಥೂತೆ ಶೂಷನ್ ಖ್ಹಯೇರ್‌ಮ ರಾಜ಼ನು ಸಿಂಹಾಸನ್‌ಪರ್ ಬೇಶಿನ್ ಹುಕುಮ್ ಚ಼ಲವ್‌ಕರ್ತೊಥೊ. 3 ಇನು ತೀನ್ನ ವರಖ್ಹ್‌ಮ ಇನು ಖ್ಹಾರೂಸ್ ಮೋಟ ಅಧಿಕಾರಿಯೇನ ಅಜು಼ ಪರಿವಾರ್‌ವಾಳನಾಬಿ ಎಕ್ ಮಿಝ಼್‌ವಾನ್‌ ಪಿಕಾಯೊ. ಪರ್ಷಿಯ ಅಜು಼ ಮೇದ್ಯ ದೇಖ್ಹ್‌ನು ಸೈನ್ಯಾದಿಕಾರಿಖ್ಹಾರುಬಿ ರಾಜ್ಯಪಾಲಬಿ ರಾಜಧಾನಿನು ಅದಿಕಾರಿಯೇಬಿ ಖ್ಹಾರೂಸ್ ರಾಜ಼ನ ಖ್ಹಾಮ್ಣೆ ಆಯಿರ‍್ಹುಥು. 4 ರಾಜ಼ನೆ ಛೋ಼ ಮಹಿನಲಗೂಬಿ ಇನು ಮಹಾನ್ ರಾಜ್ಯನು ಧನ್‍ದೌಲತ್‌ನಾಬಿ, ರಾಜ಼್‌ಭೋಗ್‌ನಾಬಿ, ಅಲೇಲ್‌ಥಲೇಲ್‌ನಾಬಿ ಇವ್ಣಖ್ಹಾರಾಸ್‌ನ ಖ್ಹಾಮ್ಣೆ, ವತಾಳ್ಯೊ. 5 ಇನಾಪಾರ್ ರಾಜ಼ನೆ ಶೂಷನ್ ಖ್ಹಯೇರ್‌ಮಾನು ಅದ್ಮೇವ್‌ನ ಶೌಕಾರ್, ಗರೀಬ್‌ಕರಿ ಶನೂ ಕಚ಼್ಚರಸ್‌ ಕರ‍್ಯೊಕೊಂತೆ ಖ್ಹಾರಸ್ನ ಮಹೇಲ್‌ನ ಬಗೀಚಾ಼ಮ ಖ್ಹಾತ್‌ದನ್‌ಲಗೂಬಿ ಮೊಟು ಮಿಝ಼್‌ವಾನ್ ಪಿಕಾಯೊ. 6 ಯೊ ಬಗೀಚ಼ಾನ ಖ್ಹಾಮ್ಣೆ ಧೋಳು, ಹರ‍್ಯು, ರಾಯಿಜಾ಼ಮಣ್ಣೊ ರಂಗ್‌ನು ಪಡ್‌ದಖ್ಹಾರುಬಿ, ಲಲೇಲಾಲ್‌ರಂಗ್‌ನು ವಣ್ಕರ್‌ನಿ ಡೋರಿಥಿಬಿ ನರ್ವರಿನಬಂಡಾನ ಖಂಬಾವ್‌ನ ರೂಪಾನಿ ಅಂಗುಠಿಯೇಥಿ ಶನ್‌ಗಾರ್‌ಹುಯಿರ‍್ಹುಥು. ರೇಖ್ಹಮ್‌ನ ಧಾಗೇಥಿ ವಣಿನ್‌ ಬಣಾಯುಹುಯು ರೂಪಾನಿ, ಖ್ಹೊನ್ನಾನಿ ಆರಾಮ್ನಿಖುಡ್‌ಶಿಯೆ, ಲಾಲ್, ಧೋಳು, ಪೀಳು ಅಜು಼ ಕಾಳರಂಗ್‌ನು ನರ್‌ವರಿನ ಬಂಡಾಥಿ ಬಣಾಯುಹುಯು ಬಿಛಾ಼ವ್ಣಪರ್ ಮ್ಹೇಲಿರಾಖ್ಯೂಥು. 7 ದ್ರಾಕ್ಷಿನೊರಖ್ಹ್‌ ಪೀಯಾನ ಖ್ಹೊನ್ನಾನು ರಾಛು಼ಖ್ಹಾರು ಅಲಕ್‌ಅಲಕ್ ರೂಪ್ಮ ಬಣೈರಾಖ್ಯೂಥು. ರಾಜ಼ನೊ ಮೋಟೊ ದಿಲ್‌ ಕಿಮ್ಕಿ, ಇನ ಬರೋಬರ್‌ನಿ ಪರಕ್ಮ ಕೆತ್ರುಹೋಣುಕಿ ತೆತ್ರು ಪಿಯ್ಯಾನಖ್ಹಾಜೆ ಮಿಛಾ಼ಣ್ಯುಥು. 8 ಪೀಯಾಮ ಹರೇಕ್ ಜ಼ಣಾನಾಬಿ ಇವ್ಣಿ ಪಸಂದ್‌ನಿ ಪರಕ್ ದೇವ್ಣುಕರೀಬಿ ಇವ್ಣುನ ಕೆತ್ರು ಹೋಣುಕಿ ಎತ್ರು ದೇವ್ಣುಕರೀಬಿ ಮಹೇಲ್‌ನ ಆಳ್‌ಖ್ಹಾರಾನ ರಾಜಾ಼ನೆ ಹುಕುಮ್‌ ದೀರಾಖ್ಯೋಥೊ. 9 ವಷ್ಟಿ ರಾಣಿನೆ, ಅಹಷ್ವೇರೋಷ ರಾಜ಼ನಿ ಮಹೇಲ್‌ಮ ತಯೇಡವ್‌ನಖ್ಹಾಜೆ ಮಿಝ಼್‌ವಾನ್ ಕರೈರಾಖಿಥಿ. 10 ಖ್ಹಾತ್‌ನ ದನ್‌ಮ ಅಹಷ್ವೇರೋಷ ರಾಜ಼ನೆ ದ್ರಾಕ್ಷೀನೊರಖ್ಹ್‌ ಪೀನ್ ಖ್ಹುಷೀನ ಪೋಭಾರಮ ರ‍್ಹಾವಾನಿವಖ್ಹ್‌ತೆ ಘಣಿ ಶನ್‌ಗಾರ್‌ನಿ ಹುಯಿರೀತೆ ಇನಿ ರಾಣಿನು ಶನ್‌ಗಾರ್‌ನ ಅದ್ಮೆವ್‌ನಾಬಿ, ಮಹೇಲ್‌ನ ಅದಿಕಾರಿಯೇನಾಬಿ ವತಾಳ್‌ನುಕರಿ ಆಖ್ಹ್‌ಕರ‍್ಯೊ. ಯೊ ಇನ ಜೋ಼ಡ್ಮರ‍್ಹಾವಾಳು ಆಳ್‌ಹುಯಿರುತೆ, ಮೆಹೂಮಾನ್, ಬಿಜೆತಾ, ಹರ್ಬೋನಾ, ಬಿಗೆತಾ, ಅಬಗೆತಾ, ಜೇತರ್, ಕರ್ಕಸ್‌ ಕರಿ ಖ್ಹಾತ್ ಸೇವಕವ್‌ನ, 11 "ವಷ್ಟಿ ರಾಣಿ ಕಿರೀಟ್ ಘಾಲಿಲೀನ್‌ ರಾಜ಼ಕನ ಆವ್ಣುಕರಿ ಬೋಲ್ನು" ಕರಿ ಹುಕುಮ್‌ಕರ‍್ಯೊ. ಯೊ ಘಣಿ ರಂಗ್‌ರೂಪ್ನಿಥಿ. ಅಜು಼ ರಾಜಾ಼ನೆ ಇನಿ ಶನ್‌ಗಾರ್‌ನ ಅದಿಕಾರಿಯೆನಾಬಿ ಮಾಯಮಾತ್ರವ್ನಾಬಿ ವತಾಳ್ಣುಕರಿ ಆಖ್ಹ್‌ಕರ‍್ಯೊ. 12 ಕತೋಬಿ ಮಹೇಲ್‌ನು ಅದಿಕಾರಿ ಖ್ಹಮ್‌ಜ಼ಾಡ್ಯುತೆ ರಾಜಾ಼ನಿ ಹುಕುಮ್‌ನ ವಷ್ಟಿರಾಣಿನೆ, "ಆವ್‌ಕೊಯ್ನಿ" ಕರಿ ಫೇಡ್‌ದಿದಿ. ಅನಾಖ್ಹಾಜೆ ರಾಜ಼ ಘಣು ಇರಾದೊ ಕರೀನ್ ಚ಼ಂಢಾಳ್ ಕರ‍್ಯೊ. 13 ರೀತಿರಿವಾಜ಼್‌ನು ಸವಾಲ್‌ನ ವಾತೇವ್ನ ಬೋಲಾನು ರಾಜಾ಼ನಿ ಪದತ್ತಿ ಥಿ. ಇನಖ್ಹಾಜೆ ಇನ ಮದತ್‌ಕರವಾಳನ ಬುಲಾಯೊ ಅಜು಼ ಕೋಣ್‌ ಶಾತ್‌ ಕರ‍್ನುಕರಿ ಖ್ಹಮ್‌ಜಾ಼ಡ್ನುಥು. 14 ರಾಜ಼ ಹುಯಿರೋತೆ ಅಹಷ್ವೇರೋಷನ ಮಹೇಲ್‌ಮ ರಾಜ಼ಕನ ರ‍್ಹಾವಾಳು ಆಳ್‌ಖ್ಹಾರುಬಿ ರಾಜ್ಯಸಬೆನು ಅದಿಕಾರಿಖ್ಹಾರೂಬಿ ಹುಯಿರುಥೂತೆ ಕರ್ಷೇನಾ, ಶೇತಾರ್, ಅದ್ಮಾತಾ, ತರ್ಷೀಷ್, ಮೆರೆಸ್ ಮರ್ಸೆನಾ, ಮೆಮೂಕಾನ್‌ ಕರಿ ಖ್ಹಾತ್ಜ಼ಣ ಪರ್ಷಿಯ ಅಜು಼ ಮೇದ್ಯ ದೇಖ್ಹ್‌ನ ರಾಜ಼ವ್‌ನ ಗಲ್‌ಢಾಖ್ಹಾರುಥು. ಪುರಗುಲ್‌ಖ್ಹಾರು ಹುಯಿರ‍್ಹುತೆ ಅವ್ಣುನ ರಾಜ಼ನೆ, ಆ ಬಾರೇಮ ಪುಛಾ಼ಯೊ. 15 "ಮಹೇಲ್‌ನ ಅದಿಕಾರಿಥಿ ಖ್ಹಮ್‌ಜಾ಼ಡ್ಯೋತೆ ರಾಜ಼ನಿಹುಕುಮ್‌ನ ಕರ್‌ಹೈಯಕಾಡೀತೆ ವಷ್ಟಿರಾಣಿನ ಖಾನೂಲ್‌ನಿ ಪರಕ್ಮ ಶಾತ್‌ಕರ‍್ನು?" ಕರಿ ಪುಛಾ಼ಯೊ. 16 ತದೆ ಮೆಮೂಕಾನನೆ ರಾಜ಼ ಅಜು಼ ಸಬೆನ ಅದಿಕಾರಿನ ಖ್ಹಾಮ್ಣೆ, "ವಷ್ಟಿರಾಣಿನು ಅಪರಾದ್‌ ರಾಜ಼ ಎಕ್ಕಸ್‌ಜ಼ಣಾನ ನಿಶ್‌ಟೂರ ಕರಾನಿತರ ಕಾಹೆ. 17 ರಾಣಿನು ಚಾ಼ಲ್ ಖ್ಹಾರೀಸ್‍ ತಯೇಡವ್‌ನಾಬಿ ಮಾಲುಮ್‌ಪಡೀನ್ ಇವ್ಣೇಬಿ ಇವ್ಣ ಬಾವ್ರಿನಿ ವಾತ್ನ ಝಿ಼ಟ್ಕಾರಲಗ್‌ಶೆ. ಇವ್ಣೆ, ‘ಅಹಷ್ವೇರೋಷ ರಾಜ಼ನೆ ವಷ್ಟಿರಾಣಿನ ಮಾರಕನ ಆವ್ಣುಕರಿ ಬೋಲಿಮೋಕ್‌ಲ್ಯೊತೋಬಿ ಯೊ ಕೋಗೈನಿನಿ’ ಕರಿ ನಕ್ಲೆಕಾಡ್‌ಶೆ. 18 ಆನಾಹುಯಿನ್, ರಾಣಿನಿ ಆ ಢಂಗ್‌ನಿ ಬಾರೇಮ ಖ್ಹಮ್‌ಜ್ಯೂತೆ ಪರ್ಷಿಯ, ಮೇದ್ಯ ದೇಖ್ಹ್‌ನಿ ಶವ್‌ಕಾಲ್ಡಿಯೆ ಅಮ್ನಿಸ್‌ಪರಕ್ ರಾಜ಼ನ ಅದಿಕಾರಿಯೇವ್‌ನಿ ಜೋ಼ಡ್ಮ ಢಂಗ್‌ಕರಿ ವತಾಳ್‌ಶೆ. ಅಮ್ ಕೆತ್ರೂಕಿ ಇರಾದೊಬಿ , ಅಜು಼ ಝಿ಼ಟ್ಕಾರನೂಬಿಖ್ಹಾರು ಉಶೆ. 19 ರಾಜ಼ ಮಾನಿಲ್ಯಾವಾನು ರ‍್ಹಯೂತೊ , ವಷ್ಟಿ ರಾಣಿ ಬಿಜು಼ ಕದೇಬಿ ರಾಜ಼ನ ಖ್ಹಾಮ್ಣೆ ಆವ್ಣೂಸ್‌ನಾಕರಿ ರಾಜ಼ನಿ ಹುಕುಮ್ ಹುಯಿನ್ ಯೊ ಕದೇಬಿ ನಾ ಮಟಾವ್‌ನೂತೆತಿಮ್ ಪರ್ಷಿಯ ಅಜು಼ ಮೇದ್ಯ ದೇಖ್ಹ್‌ನಿ ಖಾನೂಲ್‌ಮ ಲೀಖೈಜಾ಼ವಾದೆ; ರಾಜ಼ ಇನಿ ರಾಣಿನು ಪಟ್ಟಾನ ಇನೇಥೀಬಿ ಘಣಿಅಛ್ಛಿನ ದ್ಯಾವಾದೆ. 20 ರಾಜ಼ನಿ ಆ ತಿರ್ಮಾನ್ನ ಅಶಿಲ್‌ಥಿಧರಿನ್ ಕಮ್‌ಶಿಲ್‌ರ‍್ಹವಾಳಿ ಖ್ಹಾರೀಸ್‍ ತಯೇಡ ಇವ್ಣ ಬಾವ್ರಿಯೇನ ಜೋ಼ಡ್ಮ ಬರೋಬರ್ ಇಜ಼್ಜತ್‌ ದಿಶೆ". ಕರಿ ಬೊಲ್ಯೊ. 21 ಮೆಮೂಕಾನನೆ ಬೋಲ್ಯೋತೆ ಆವಾತ್‌ ರಾಜ಼ನಾಬಿ, ಸಬೆನ ಅದಿಕಾರಿನಾಬಿ ಬರೋಬರ್ ದೆಖಾಯು. ಇನಾಖ್ಹಾಜೆ ರಾಜ಼ನೆ ಇಮ್ಮಸ್‌ಕರ‍್ಯೊ. 22 ಇನೆ, "ಹರೇಕ್ ಕುಟುಂಬ್‌ಮ ಪರ್ಖ್ಹೋಸ್‌ ಯಜಮಾನ್ ಹುಯಿರ‍್ಹೇವ್ಣು ಅಜು಼ ಯೊ ಶೊಂತ್ ಅದ್ಮೇವ್‌ನಿ ಬೋಲಿಮಾಸ್‌ ಕಾಮ್‌ಧಂದೊಕರ‍್ನು" ಕರಿ ಖ್ಹಾರಾಸ್ ರಾಜ಼ವ್‌ನು ಮಹೇಲ್‌ಮ ಚಿಟ್ಟಿಲೀಖಿನ್‌ ಬೋಲಿವತಾಳ್ಯೊ. ಆ ಚಿಟ್ಟಿ ತ್ಯೊತ್ಯೊ ತಬರ್‌ಖಾವ್‌ಮ ಅಜು಼ ಜ಼ಗ್‌ಜಾ಼ತ್‌ನಿ ಬೋಲಿಮಾಬಿ ಲೀಖಾಯು.