Marcos 10

ಯೇಸುನೆ ತಲಾಕ್‌ನಿ ಬಾರೇಮ ಬೋಲಿವತಾಳ್ಯೋತೆ

1 ಯೇಸು ಹಿಜ್ಜಾ಼ಥೊ ನಿಕ್ಳಿನ್, ಯೂದಾಯ ತಬರ್‌ಖಾನ ಗಯೊ, ಅಜು಼ ಯೊರ್ದನ್‌ ನದ್ದಿನು ಬಿಜೇಕ್‌ ಆಡಿನು ತಬರ್‌ಖಭಣಿ ಆಯೊ. ಹಿಜ್ಜಾ಼ ಅದ್ಮಿನಿ ಝೂ಼ಂಡೆ ಇನಾಕನ ಐನ್ ಭರಾವಖ್ಹತರ್, ಯೋ ಕದೇಬಿ ಕರ್ತೊಥೋತೆ ಇಮ್ಮಸ್ ವಚನ್ ಬೋಲಿದಿದೊ.

2 ತದೆ ಫರಿಸಾಯರ್‌ವಾಳು ಯೇಸುಕನ ಆಯಿನ್‌ ಇನ ಫಖ್ಹಾವ್ಣು ಕರಿ ಕರ‍್ಯು. ತದೆ ಇವ್ಣೆ ಇನ, "ಅಪ್ಣಿ ಖಾನುಲ್‌ಮ, ಕೋಣ್‌ತೋಬಿ ಏಕ್‌ ಜ಼ಣೊ ಇನಿ ಬಾವಣ್ಣ ಮ್ಹೇಲಿದ್ಯವಾನು ಬರೊಬರ್‌ಕಿ ಶು? ಕರಿ ಪುಛಾ಼ಯು.

3 ಅನ ಖ್ಹಮ್‌ಜಿನ್‌ ಯೇಸುನೆ, "ಮೋಶೆನೆ ತುಮೂನ ಶಾತ್ ಹುಕುಮ್‌ ದೀರಾಖ್ಯೊಸ್?" ಕರಿ ಪುಛಾ಼ಯೊ.

4 ತದೆ ಇವ್ಣೆ, ತಲಾಕ್‌ನು ಕಾಗತ್‌ ಲೀಖಿದೀನ್‌, ಇನಿ ಬಾವಣ್ಣ ಮ್ಹೇಲಿದಿಯ್ಯೆಜಾ಼ಯ್ ಕರಿ ಮೋಶೇನೆ ಹುಕುಮ್‌ ದೀರಾಖ್ಯೊಸ್" ಕರಿ ಬೋಲ್ಯು.

5 ತದೆ ಯೇಸುನೆ ಇವ್ಣುನ, "ತುಮಾರ ಮೊಂಡಿದಿಲ್‌ನ ದೇಖಿನ್, ಮೋಶೆನೆ ಅಮ್ನಿ ಹುಕುಮ್ ದೀರಾಖ್ಯೋಸ್ತೆ. 6 ದೇವ್‌ನೇತೊ ಖ್ಹಾರು ಉಬ್‌ಜಾ಼ಯೋತೆ ತಪ್‌ಥೋಸ್‌, ‘ಅದ್ಮಿನ ಪರ್‌ಖ್ಹೊ ತಯೇಡಕರಿ ಬಣಾಯೊ, 7 ಅನಖ್ಹಾಜೆಸ್ ಪರ್ಖ್ಹೊ ಇನ ಆಯ-ಬಾನ ಮ್ಹೇಲಿನ್, ಇನಿ ಬಾವಣ್‍ಥಿ ಮಳಾಸ್, ಅಜು಼ ಇವ್ಣೆ ಭೇ ಜ಼ಣ ಎಕ್ಕಸ್ ಶರೀರ್ ಹುಯಿಜಾ಼ಸ್’ ಕರಿ ಲೀಖೈರ‍್ಹುಸ್. 8 ಅಮ್ ಬಿಜು಼ ಖ್ಹಾಮ್ಣೆ ಇವ್ಣೆ ಬೇಜ಼ಣ ಕಾಹೆ, ಎಕ್ಕಸ್ ಶರೀರ್‌ ಹುಯಿರ‍್ಹಾಸ್. 9 ಇನಾಖ್ಹಾಜೆ ದೇವ್ನೆ ಮಳಾಯಹುಯಾನ, ಅದ್ಮಿ ಅಲಕ್‌ನಾಸ್ ಕರ‍್ನು" ಕರಿ ಬೋಲ್ಯೊ.

10 ಇವ್ಣೆ ಘರ್‌ಮ ಆವಾದಿನ್, ಶಿಷ್ಯರ್‌ನೆ ಅನಿಸ್‌ ಬಾರೇಮ ಯೇಸುನ ಪುಛಾ಼ಯು. 11 ತದೆ ಯೇಸುನೆ ಇವ್ಣುನ, "ಕೋಣ್‌ತೋಬಿ ಏಕ್‌ ಜ಼ಣೊ ಇನಿ ಬಾವಣ್ಣ ಮ್ಹೇಲಿನ್, ಬಿಜೇಕ್‌ ಜ಼ಣಿನ ವ್ಯಹಾ ಕರೀಲಿದೊತೊ ಯೋ ಶೊಂತ್‌ ಬಾವಣ್ಣ ಧೋಕೊ ದ್ಯಾವಾಳೊ ಹುಯಿನ್, ವ್ಯಬಿಚಾರ್*10:11 ಕತೊ ಬಿಜಿ ತಯೇಡಾನ ರಾಖಾನು ಪಾಪ್ ಕರಾವಾಳೊ ಹುಯಿರ‍್ಹೋಸ್. 12 ಇಮ್ಮಸ್ ಏಕ್‌ ಬಾವಣ್ ಇನ ಬಾವ್ರಿನ ಮ್ಹೇಲಿನ್, ಬಿಜೇಕ್ ಜ಼ಣಾನ ಕರೀಲಿದೀತೊ ಯೋಬಿ ವ್ಯಬಿಚಾರ್*10:12 ಕತೊ ಬಿಜ಼ ಪರ್ಖ್ಹಾಕನ ಜಾ಼ವಾನು ಪಾಪ್ ಕರಾವಾಳಿ ಹುಯಿರ‍್ಹೀಸ್" ಕರಿ ಬೋಲ್ಯೊ.

ಯೇಸುನೆ ಅಡ್ಡಾಣಿ ಲಡ್ಕಾವ್ನ ಆಶೀರ್ವಾದ್‌ ಕರ‍್ಯೊತೆ

13 ಬಾದ್‌ಮ ಥೋಡು ಜ಼ಣು ಅಡ್ಡಾಣಿ ಲಾಡ್ಕಾವ್‍ಪರ್‌ ಯೇಸುನೊ ಹಾತ್ ಮ್ಹೆಲಾವ್ಣು ಕರಿ ಇನಾಕನ ಲಾಯು, ತದೆ ಇನ ಶಿಷ್ಯರ್‌ನೆ ಇವ್ಣುನ ಗುರ್‌ಕಾಯು. 14 ಯೇಸುನೆ ಅನ ದೇಖಿನ್‌, ಖೀಜ಼್ ಖೈನ್, ಇನ ಶಿಷ್ಯರ್‌ನ, "ಅಡ್ಡಾಣಿ ಲಡ್ಕಾವ್ನ*10:14 ಅಡ್ಡಾಣಿ ಲಡ್ಕಾ ಕತೊ ಪೈದಾ ಹುವಾತೆ ಲಡ್ಕಾಥು ಧರೀನ್ ತೇರ‍್ಹಾ (13) ವರಖ್ಹ್‌ನ ಮಹಿನು ಲಡ್ಕಾ ಕರಿ. ಮಾರ ಖನ್ನೆ ಆವಾನ ಮ್ಹೇಲೊ; ಇವ್ಣುನ ಭೀರಾಕೊ ನಕೊ, ಶನಕತೊ ದೇವ್‌ನು ರಾಜ್ಯ ಅಮ್‌ನಾಸ್‌ವಾಳಾನು. 15 ತುಮೂನ ಖ್ಹಾಚಮಾಬಿ ಬೋಲುಸ್ಕಿ ಕೋಣ್‌ತೋಬಿ ಅಡ್ಡಾಣಿ ಲಡ್ಕಾನಿ ಘೋಣಿ ದೇವ್ನಿ ರಾಜ್ಯನ ನಾ ಮಾನ್ಯೂತೊ, ಯೋ ದೇವ್ನಿ ರಾಜ್ಯಮ ಜಾ಼ಶೇಸ್ ಕೊಯ್ನಿ". 16 ಅಮ್ ಬೋಲೀನ್‌ ಯೋ ಲಡ್ಕಾವ್ನ ಬಥೈನ್, ಇವ್ಣಾಪರ್ ಹಾತ್‌ ಮ್ಹೇಲಿನ್, ಆಶೀರ್ವಾದ್‌ ಕರ‍್ಯೊ.

ಶೌಕಾರ್ ಅದ್ಮಿನಿ ಬಾರೇಮ

17 ಯೇಸು ನಿಕ್ಳಿನ್‌ ವಾಟ್‌ ಧರೀನ್ ಜಾ಼ವಾನಿ ವಖ್ಹತ್‌ಮ, ಏಕ್‌ ಜ಼ಣೊ ನಾಖ್ಹ್‌ತೊ ಐನ್, ಇನ ಖ್ಹಾಮೆ ಗುಡ್‍ಘ್ಯ ಟೇಕಿನ್, "ಅಛ್ಛೊ಼ ಗುರು, ಹಮೇಶಾನಿ ಜಿ಼ಂದ್‌ಗಿ ಮಳ್‌ಣುಕತೊ, ಮೇ ಶಾತ್‌ ಕರ‍್ನು?" ಕರಿ ಫುಛಾ಼ಯೊ.

18 ತದೆ ಯೇಸುನೆ ಇನ, "ಮನ ಅಛ್ಛೊ಼ಕರಿ ಶನ ಬೋಲಾಸ್ತೆ? ದೇವ್ನ ಮ್ಹೇಲೀನ್‌ ಬಿಜು಼ ಕೋಣ್‌ಬಿ ಅಛ್ಛು಼ ಕಾಹೆ. 19 ‘ಖೂನಿ ನಾಹೋಣು; ವ್ಯಬಿಚಾರ್ ನಾ ಕರ‍್ನು; ಚೋ಼ರಿ ನಾ ಕರ‍್ನು; ಬಿಜಾ಼ಪರ್ ಝೂ಼ಟಿ ಇಂಜಾ಼ಮ್ ನಾ ಲಗಾಡ್‌ಣು; ಕಿನಾಬಿ ಠಗಾವ಼್ಣು ನಾ; ಆಯ-ಬಾನ ಮರ್ಯಾದಿ ದೇವ್ಣು ಕರಿ ದೇವ್ನಿ ಹುಕುಮ್‌ ಖ್ಹಾರಿ ತುನ ಮಾಲುಮ್‌ ಛಾ಼ನಿ" ಕರಿ ಬೋಲ್ಯೊ.

20 ಇನೆ ಯೇಸುನ, "ಗುರು, ಮೇ ಅಡ್ಡಾಣಿಪರ್‌ಥೋಸ್‌, ಆ ಖ್ಹಾರಿ ವಾತೆನಿ ಘೋಣಿ ಚಾ಼ಲ್ತೊ ವಳ್ಯಾವ್‌ಸ್‌" ಕರಿ ಬೋಲ್ಯೊ.

21 ತದೆ ಯೇಸುನೆ ಇನ ಠರ್‌ಕೈ ದೇಖಿನ್‌ ಪ್ಯಾರ್‌ಥಿ ಇನ, "ತಾರಮ ಏಕ್‌ ಕಮ್ ಛಾ಼. ಜಾ಼ ತಾರಕನ ಛಾ಼ತೆ ಖ್ಹಾರು ವೇಚಿನಾಖಿದೀನ್‌ ಗರೀಬ್‌ನ ದೆ, ತದೆ ತುನ ಪರ್‌ಲೋಕ್‌ಮ ಶೊತ್‌ರ‍್ಹಿಶೆ ಅಜು಼ ತು ಐನ್ ಮಾರ ಪೀಠೆ ಆವ್" ಕರಿ ಬೋಲ್ಯೊ. 22 ಕತೋಬಿ ಯೋ ಅದ್ಮಿ ಘಣು ಧನ್‌-ದೌಲತ್‌ವಾಳು ಹುಯಿರ‍್ಹುಥೂತೆ ಇನಾಖ್ಹಾಜೆ, ಯೇಸುನೆ ಅಮ್ ಬೋಲ್ತಾನ ಖ್ಹಮ್‌ಜಿನ್‌, ಮ್ಹೋಡು ಮುರ್‌ಝೈ಼ಲೀನ್‌, ದುಖ್‌ಥಿ ಚ಼ಲೆಗಯೊ.

23 ತದೆ ಯೇಸುನೆ ಅಶ್‌ಪೀಶ್‌ ಇನ ಶಿಷ್ಯರ್‌ ಭಣಿ ದೇಖಿನ್ ಇವ್ಣುನ, "ಧನ್‌ದೌಲತ್‌ವಾಳು ದೇವ್ನಿ ರಾಜ್ಯಮ ಜಾ಼ವಾನು ಘಣು ಮುಶ್ಕಿಲ್!" ಕರಿ ಬೋಲ್ಯೊ.

24 ಶಿಷ್ಯರ್‌ನೆ ಆ ವಾತೆನ ಖ್ಹಮ್‌ಜಿನ್‌ ಆಶ್ಚರ್ಯಖಾದು, ಯೇಸುನೆ ಪಾಛೊ಼ ಇವ್ಣುನ, "ಮಾರ ಲಡ್ಕಾ, ದೇವ್ನಿ ರಾಜ್ಯಮ ಜಾ಼ವಾನು ಘಣು ಮುಶ್ಕಿಲ್! 25 ಶೌಕಾರ್ ಅದ್ಮಿ ದೇವ್ನಿ ರಾಜ್ಯಮ ಜಾ಼ವಾಥೀಬಿ ಊಟ್‍ ಖ್ಹುಯಿನ ಡೋಳವಾಟೆಕರಿ ಪೇಶಿಜಾ಼ವನು ಶುಲ್ಬ" ಕರಿ ಬೋಲ್ಯೊ.

26 ಅನ ಖ್ಹಮ್‌ಜಿನ್‌ ಶಿಷ್ಯರ್‌ನೆ ಬಿಜೂ಼ಬಿ ಆಶ್ಚರ್ಯಖೈನ್, "ಇಮ್‍ಕತೊ, ಕಿನ ರಕ್ಷಣೆ*10:26 ಕತೊ ನರಕ್‌ಥಿ ಬಚಿನ್ ಪರ್‌ಲೋಕ್ ಜಾ಼ವಾನು ಮಳ್‌ಶೆ?" ಕರಿ ಇವ್ಣ-ಇವ್ಣಾಮ ಬೋಲಿಲಿದು.

27 ತದೆ ಯೇಸುನೆ ಇವ್ಣುನ ಠರ್‌ಕೈ ದೇಖಿನ್, "ಆ ಅದ್ಮಿನ ಹಾಥ್ಥಿ ಕೋ ಹುವಾನಿ ಕತೋಬಿ ದೇವ್ನ ಹಾತೆ ಹುವ್ವಾಸ್‌; ದೇವ್‌ನೊ ಹಾತೆ ಕೋ ಹುವ್ವಾನಿತೆ ಏಕ್‌ಬಿ ಕೊಯ್ನಿ" ಕರಿ ಬೋಲ್ಯೊ.

28 ತದೆ ಪೇತ್ರನೆ ಯೇಸುನ, "ಹಂದೇಕ್‌! ಹಮೆ ಖ್ಹಾರು ಮ್ಹೆಂದಿನ್‌ ತಾರ ಪೀಠೆ ಐಗಯ" ಕರಿ ಬೋಲಾಲಗ್ಯೊ.

29 ತದೆ ಯೇಸುನೆ, "ತುಮೂನ ಖ್ಹಾಚ ಬೋಲುಸ್ಕಿ, ಕೋಣ್‌ತೋಬಿ ಮಾರಖ್ಹಾಜೆಬಿ ಅಜು಼ ದೇವ್ನಿ ಅಛ್ಛಿ ಖಬರ್‌ನಖ್ಹಾಜೆ ಇನ ಘರ್‌ನರ‍್ಹೆವೊ, ಭೈಯೇನ ರ‍್ಹವೊ, ಭೇನೇನ ರ‍್ಹವೊ, ಆಯಾನ ರ‍್ಹವೊ, ಬಾನ ರ‍್ಹವೊ, ಲಡ್ಕಾವ್ನ ರ‍್ಹವೊ, ಖೇತರ್‌ನ ರ‍್ಹವೊ ಮ್ಹೆಂದಿದೊ ಉಶೇತೊ, 30 ಇನ ಜ಼ಮೀನ್‌ಪರ್ ರ‍್ಹವಾನಿ ವಖ್ಹತ್‌ಮ ಖ್ಹೋ ಪಟ್‌ ಜಾ಼ಖ್ಹತ್ ಕೈಯೆಕ್ಕಿ ಘರ್, ಭೇನೆ, ಭೈಯೇ, ಆಯ, ಲಡ್ಕಾ, ಖೇತರ್‌ ಅಜು಼ ಅದ್ಮಿಥಿ ಲತಾಡಾಬಿ*10:30 ವದೇಖ್ಹೊ, ಖ್ಹತಾಪ್ಣಿ ಕರೀಬಿ ಹುವಾಸ್ ಮಳ್‌ಶೆಸ್‌ ಮಳ್‌ಶೆ. ಅಜು಼ ವಳ್ಯಾವಾತೆ ಜಂಗ್‌ಮ ಹರ್‌ಹಮೇಶ ರ‍್ಹವಾನಿ ಜಿ಼ಂದ್‌ಗಿ ಮಳ್‌ಶೆ. 31 ಕತೋಬಿ ಆಜ಼್ ಅಗಾಡಿ ರ‍್ಹವಾಳು ಕೈಯೆಕ್ಕಿ ಜ಼ಣು ಪಾಛ಼ಳ್ ಹುಯಿಜಾ಼ಶೆ, ಅಜು಼ ಆಜ಼್ ಪಾಛ಼ಳ್ ರ‍್ಹವಾಳು ಕೈಯೆಕ್ಕಿ ಜ಼ಣು ಖ್ಹಾಮ್ಣೆ ಹುಯಿಜಾ಼ಶೆ"*10:31 ಜ಼ಮೀನ್‌ಪರ್ ಪಹಿಲೆ ಝ಼ಗೋಪರ್ ರ‍್ಹವಾಳು ಪರಲೋಕ್‌ಮ‌ ಛೇಟುನಿ ಝ಼ಗೋಪರ್ ರ‍್ಹಿಶೆ ಕರಿ ಬೋಲ್ಯೊ.

ಯೇಸುನೆ ಇನಿ ಮರಣ್ಣಿ ಬಾರೇಮ ತೀನ್ನಿ ಹಲ್ಲ ಬೋಲ್ಯೊತೆ

32 ಯೇಸುಬಿ ಇನು ಶಿಷ್ಯರ್‌ ಯೆರೂಸಲೇಮ್‌ನಿ ವಾಟ್‌ ಧರೀನ್ ವಳ್ಯಜಾ಼ತಾಥ. ಯೇಸು ಇವ್ಣ ಖ್ಹಾಮ್ಣೆ-ಖ್ಹಾಮ್ಣೆ ವಳ್ಯೊಜಾ಼ತೋಥೊ, ಅನ ದೇಖಿನ್‌ ಶಿಷ್ಯರ್‌ನೆ ಘಣು ಧಡುಕೊ ಘಾಲಿಲಿದು; ಅಜು಼ ಇನ ಪೀಠೆ ಆವಾಳು ಖ್ಹಾರು ಡರಿಗಯು. ತದೆ ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಪಾಛೊ಼ ಬಾಜೂ಼ಮ ಬುಲೈಲಿಜೈ಼ನ್, ಖ್ಹಾಮ್ಣೆ ಇನ ಉಷೇತೆ ಇನಿ ಬಾರೇಮ ಬೋಲ್ಯೊ. 33 ಇನೆ ಇವ್ಣುನ, "ಹಂದೇಖೊ, ಅಪ್ಣೆ ಯೆರೂಸಲೇಮ್‌ನ ವಳ್ಯಾಜಯ್ಯೇಸ್‌, ಹಿಜ್ಜಾ಼ ಅದ್ಮಿನೊ ಛಿಯ್ಯಾನ ಗಲ್‌ಢಯಾಜಕರ್‌ನ ಅಜು಼ ಮೋಶೆನಿ ವಚನ್ ಶಿಕಾಡವಾಳ ಶಾಸ್ತ್ರಿಯೇನ ಹಾತ್‌ಮ ಧರಿದಿಶ್ಶೆ. ಇವ್ಣೆ ಇನ ಮಾರಿನಾಕ್ಣು ಕರಿ ಬೋಲಿದೀನ್‌ ಇನ ಪರೈ*10:33 ಅಲ್ಹಾವ್ ನಾತೊ ಪರೈ ಜಾ಼ತ್‌ವಾಳು ಕತೊ, ಯೆಹೂದ್ಯರ್‌ವಾಳು ಕಾಹೆತೆ ಬಿಜಿ ಜಾ಼ತ್‌ವಾಳು ಕರಿ ಮತ್‌ಲಬ್. ಜಾ಼ತ್‌ವಾಳ ಅದ್ಮಿನ ಹಾತ್‌ಮ ದಿನಾಕ್‌ಶೆ. 34 ಇವ್ಣೆ ಇನ ಚಿಂಘಾವ್‌ಶೆ, ಇನಾಪರ್‌ ಥೂಕ್‌ಶೆ, ಇನ ಮೇಕ್‌ನ ಕೊಳ್ಡೇಥಿ ಮಾರ್‌ಶೆ ಅಜು಼ ಇನ ಮಾರಿನಾಕ್‌ಶೆ; ಕತೋಬಿ ತೀನ್ ರೋಜ಼್‌ನ ಬಾದ್‌ಮ ಯೋ ಪಾಛೊ಼ ಜಿವ್ತೊಹುಯಿನ್ ಉಠಿ ಆವ್‌ಶೆ" ಕರಿ ಬೋಲ್ಯೊ.

ಯಾಕೋಬ್ ಅಜು಼ ಯೋಹಾನ್ನಿ ಬಿಂತಿ

35 ಬಾದ್‌ಮ ಜೆಬೆದಾಯನ ಛಿಯ್ಯಾ ಹುಯಿರ‍್ಹಾಥಾತೆ ಯಾಕೋಬಬಿ ಯೋಹಾನ, ಯೇಸುಕನ ಐನ್, "ಗುರು, ಹಮೆ ಏಕ್‌ ಬಿಂತಿಕರಿಲಿಯೇಸ್, ಇನ ತೂ ಹಮಾರಖ್ಹಾಜೆ ಚ಼ಲೈದೇಣು" ಕರಿ ಬೋಲ್ಯ.

36 ಯೇಸುನೆ ಇವ್ಣುನ, "ಶಾತ್ ಯೋ?" ಕರಿ ಪುಛಾ಼ಯೊ.

37 ತದೆ ಇವ್ಣೆ, "ತಾರಿ ಮಹಿಮೆನಿ ರಾಜ಼್‌ಮ ತು ಸಿಂಹಾಸನ್‌ಪರ್ ಬೇಖ್ಹಾನಿ ವಖ್ಹತ್‌ಮ, ಹಮೆ ಬೇ ಜ಼ಣಾಮ ಏಕ್‌ ಜ಼ಣೊ ತಾರಿ ಖಾವಿ ಬಾಜು಼ಮ, ಬಿಜ್ಜೇಕ್‌ ಜ಼ಣೊ ತಾರಿ ಡಾವಿ ಬಾಜು಼ಮ ಬೇಖ್ಹಾನಿ ಘೋಣಿ ಕರ‍್ನು" ಕರಿ ಬೋಲ್ಯ.

38 ಕತೋಬಿ ಯೇಸುನೆ ಇವ್ಣುನ, "ತುಮೆ ಶಾತ್‌ ಮಾಂಗಿಲಿದ ಕರಿ ತುಮುನ ಮಾಲುಮ್‌ ಕೊಯ್ನಿ. ಮೇ ಪೀಣುತೆ ವದೇಖ್ಹಾನ ರಾಛ಼ಮ ತುಮೆ ಪಿಯ್ಯಾನ ಉಶೇಕಿ ಶು? ಮನ ಉಷೇತೆ ಬ್ಯಾಪ್ತಿಸ್ಮ ಲ್ಯಾವಾನ ತುಮುನ ಉಶೇಕಿ ಶು?" ಕರಿ ಪುಛಾ಼ವಖ್ಹತರ್,

39 ಇವ್ಣೆ, "ಹಮಾರೇಥಿ ಹುವಾಸ್" ಕರಿ ಬೋಲ್ಯ.

ತದೆ ಯೇಸುನೆ ಇವ್ಣುನ, "ಮೇ ಪೀಣುತೆ ರಾಛ಼ಮ ತುಮೇಬಿ ಪೀಶು, ಮನ ಉಷೇತೆ ಬ್ಯಾಪ್ತಿಸ್ಮ ತುಮುನಾಬಿ ಉಶೆತೆ ಖ್ಹಾಚಸ್. 40 ಕತೋಬಿ ಮಾರಿ ಖಾವಿ ಬಾಜು಼ಮ ರ‍್ಹವೊ, ಡಾವಿ ಬಾಜು಼ಮ ರ‍್ಹವೊ ಬೇಖ್ಹಾನಿ*10:40 ದೇವ್ನಿ ರಾಜ಼್‌ಮ ಊಚಿ ಸ್ತಾನ್‌ಮ ಬೇಖ್ಹ್‌ಣು ಕರಿ ಘೋಣಿ ಚೂ಼ಣಾನು ಮಾರ ಹಾತ್‌ಮ ಕೊಯ್ನಿ. ಯೋ ಕಿನಾಖ್ಹಾಜೆ ಕರಿ ದೇವ್ನೆ ಬಣೈರಾಖ್ಯೋಸ್ಕಿ, ಇವ್ಣುನಾಸ್ ಮಳ್‌ಶೆ" ಕರಿ ಬೋಲ್ಯೊ.

41 ಉಬ್‌ರ‍್ಯಾತೆ ದಖ್ಹ್‌ ಜ಼ಣ ಶಿಷ್ಯರ್‌ನೆ ಅನ ಖ್ಹಮ್‌ಜಿನ್‌, ಯಾಕೋಬ್ ಅಜು಼ ಯೋಹಾನಪರ್‌ ಖೀಜ಼್‌ಖಾದು. 42 ತದೆ ಯೇಸುನೆ ಖ್ಹಾರಾನ ಎಕ್ಕದಮ್ ಬುಲೈನ್ ಇವ್ಣುನ, "ಯೆಹೂದ್ಯರ್‌ಕಾಹೆತೆ ಅದ್ಮಿಮ, ಅದಿಕಾರ್‌ಮ ರ‍್ಹವಾಳು ಇವ್ಣಾಪರ್ ಹಂಕಾರ್‌ಥಿ ಅದಿಕಾರ್ ಚ಼ಲಾವಸ್. ಅಜು಼ ಇವ್ಣಾಮ ಮೋಟು ಖ್ಹಾರು ಜು಼ಲಮ್ಜ಼ಸ್ತಿಥಿ ಅದಿಕಾರ್ ಚ಼ಲಾವಸ್ ಕರಿ ಬೋಲಾನು ತುಮುನ ಮಾಲುಮ್‌ ಛಾ಼.

43 ಕತೋಬಿ ತುಮಾರಮ ಇಮ್‌ ನಾರ‍್ಹೇವ್ಣು. ತುಮಾರಮ ಕೋಣ್‌ತೋಬಿ ಮೋಟು ಹೋಣುಕರಿ ಉಶೇತೊ; ಯೋ ಬಿಜ಼ ಖ್ಹಾರಾನಿ ಸೇವಕ್ ಹುಯಿರ‍್ಹೇವ್ಣು. 44 ತುಮಾರಾಮ ಕೋಣ್‌ತೋಬಿ ಅಖ್ಖೇಥಿ ಖ್ಹಾಮ್ಣೆ ರ‍್ಹೇವ್ಣುಕರಿ ಉಶೇತೊ, ಯೋ ಅಖ್ಖಾನೊ ಗುಲಾಮ್ ಹುಯಿರ‍್ಹೇಣು. 45 ಅದ್ಮಿನೊ ಛಿಯ್ಯೋಬಿ ಸೇವೆ ಕರೈಲ್ಯವಾನಖ್ಹಾಜೆ ಕೋ ಆಯೋನಿ; ಬಿಜಾ಼ನಿ ಸೇವೆ ಕರಾನ ಅಜು಼ ಇನೊ ಜಾನ್ನ ದೀನ್ ಕೈಯೆಕ್ಕಿ ಅದ್ಮಿನ ಛೋ಼ಡೈಲ್ಯವಾನಖ್ಹಾಜೆ ಆಯೊ" ಕರಿ ಬೋಲ್ಯೊ.

ಯೇಸುನೆ ಬಾರ್ತಿಮಾಯ ಕರಿ ಏಕ್‌ ಕಾಣಾನ ಡೋಳ ದಿದೋತೆ

46 ಬಾದ್‌ಮ ಇವ್ಣೆ ಯೆರಿಕೋನ ಆಯು. ತದೆ ಯೇಸು ಇನ ಶಿಷ್ಯರ್‌ನ ಜೋ಼ಡೆ ಹಿಜ್ಜಾ಼ಥೊ ನಿಕ್ಳಿನ್ ವಳ್ಯೊಜಾ಼ತೋಥೊ, ಅಜು಼ ಇನಜೋ಼ಡೆ ಅದ್ಮಿನಿ ಮೋಟಿ ಝೂ಼ಂಡ್‌ ಥಿ, ತದೆ ತಿಮಾಯನೊ ಛಿಯ್ಯೊ ಬಾರ್ತಿಮಾಯ ಕರಿ ಏಕ್‌ ಕಾಣೊ ಧರಮ್ ಮಾಂಗವಾಳೊ ಮಾರಗ್‌ನ ಶೇಡೆ ಬೆಠೋಥೊ. 47 ಆ ವಾಟೆ ವಳ್ಯೊಜಾ಼ಸ್ತೆ ನಜ಼ರೇತ್‌ನೊ ಯೇಸು ಕರಿ ಇನೆ ಖ್ಹಮ್‌ಜಿನ್‌, "ದಾವೀದ್‌ನ ಛಿಯ್ಯಾ, ಮಾರಪರ್ ಗೋರ್‌ಕರ್‌!" ಕರಿ ಜೋ಼ರೇಖ್ಹು ಚಿಕ್ರಾಲಗ್ಯೊ.

48 ಕೈಯೆಕ್ಕಿ ಅದ್ಮಿ, "ಖ್ಹೊಪೇಥಿ ರ‍್ಹೇ!" ಕರಿ ಇನ ಗುರ್‌ಕಾಯು. ತೋಬಿ ಯೋ, "ದಾವೀದ್‌ನ ಛಿಯ್ಯಾ, ಮಾರಪರ್ ಗೋರ್‌ಕರ್‌!" ಕರಿ ಬಿಜೂ಼ಬಿ ಜಾ಼ಖ್ಹತ್ ಚಿಕ್ರಿಲಿದೊ.

49 ತದೆ ಯೇಸುನೆ ಭೀರಿನ್, "ಇನ ಬುಲಾವೊ" ಕರಿ ಬೋಲ್ಯೊ.

ಅಮ್ ಬೋಲ್ತಾನ ಇವ್ಣೆ ಯೋ ಕಾಣಾನ ಬುಲೈನ್, "ಭಾಲಿಥಿರ‍್ಹೇ, ಉಟ್, ಯೇಸು ತುನ ಬುಲಾವ್‌ಕರಾಸ್‌" ಕರಿ ಬೋಲ್ಯು.

50 ತದೆ ಯೋ ಇನ ಝ಼ಗ್ಗಾನ*10:50 ಯೆಹೂದ್ಯರ್‌ನ ಲೋಗ್‌ಮ ಕೋಣ್‌ತೋಬಿ ಕಾಣು ಹುಯಿಗಯೂತೊ ಇನ ಯಾಜಕವ್‌ಕನ ಬುಲೈಲಿಜೈ಼ನ್ ಓತಾಳಸ್‍. ತದೆ ಯೋ ಯಾಜಕರ್‌ ಇನ ದೇಖಿನ್, ಯೋ ಕಾಣೂಸ್ ಕರಿ ಮಾಲುಮ್ ಪಡ್ಯೂತೊ, ಇನ ಧರಮ್ ಮಾಂಗಾನಖ್ಹಾಜೆ ಖ್ಹಣೇದ್‍ನು ಝ಼ಗ್ಗೊ ದೇಸ್. ಕಾಡಿ ಫೇಕಿನ್, ಭಶ್‌ಡಕ್ ಕರಿ ಉಠೀನ್, ಯೇಸುಕನ ಆಯೊ.

51 ಯೇಸುನೆ ಇನ, "ಮೇ ತುನ ಶಾತ್ ಕರ‍್ನು?" ಕರಿ ಪುಛಾ಼ಯೊ.

ತದೆ ಯೋ ಕಾಣಾನ, "ಗುರು, ಮನ ಡೋಳ ದೆಖಾವಾನಿ ಘೋಣಿ ಕರ್ಲಾ" ಕರಿ ಬೋಲ್ಯೊ.

52 ಯೇಸುನೆ ಇನ, "ಜಾ಼, ತಾರಿ ವಿಶ್ವಾಸ್‌ಥೀಸ್ ತುನ ಅಛ್ಛು಼ ಹುಯಿಗಯು" ಕರಿ ಬೋಲ್ಯೊ.

ಅಮ್ ಬೋಲ್ತಾಸ್‌ನ ಇನ ದೆಖಾವಲಗ್ಯು ಅಜು಼ ಯೋ ಮಾರಗ್‌ವಾಟೆ ಕರಿ ಯೇಸುನ ಪೀಠೆ ಗಯೊ.