Marcos 5

ಯೇಸುನೆ ಭೂತ್‌ನಿ ದಂಡ್‌ ಧರಿರಾಖ್ಯುಥೂತೆ ಅದ್ಮಿನ ಗುಣ್‌ಕರ‍್ಯೋತೆ

1 ಬಾದ್‌ಮ ಯೇಸುಬಿ ಇನು ಶಿಷ್ಯರ್‌ ಗಲಿಲಾಯ ದರ‍್ಯಾವ್‍ನ ಪಾರ್ಲಿ ಬಾಜೂ಼ಮ ಥೂತೆ, ಗೆರಸೇನವಾಳನ ತಬರ್‌ಖಾಮ ಗಯ. 2 ಯೇಸು ಡೋಣ್‌ಮಾಥು ಭಾರ್‌ ಉತ್‌ರ‍್ಯೋತೆ ತದೇಸ್‌, ಭೂತ್‌ ಧರಿರಾಖ್ಯುಥೂತೆ ಏಕ್‌ ಜ಼ಣೊ ಮಖ್ಹಾಣ್ಯನು ಘವಿಮಾಥೊ ನಿಕ್ಳಿನ್‌ ಇನ ಖ್ಹಾಮೆ ಆಯು. 3,4 ಯೋ ಅದ್ಮಿ ಮಖ್ಹಾಣ್ಯನಿ ಘವಿಯೇನಿ ಝ಼ಗೋಮಸ್‌ ರ‍್ಹೇತುಥು. ಘಣಿ ಹಲ್ಲ ಇನ ಬೇಡಿಥೀಬಿ, ಲ್ಹೋಡಾನಿ ಖ್ಹಂಕ್‌ಳಿಥೀಬಿ ಭಾಂದ್ಯುತೋಬಿ ಯೋ ಖ್ಹಂಕ್‌ಳಿನ ತೋಡಿನ್, ಬೇಡಿನ ಕಾಡಿನಾಖಿದೇತೂಥು. ಬಿಜು಼ ಕೋಣ್‌ಬಿ ಇನ ಖ್ಹಂಕ್‌ಳಿಥೀಬಿ ಭಾಂದಾನ ಕೋ ಹುಯುನಿ. ಯೋ ಭೂತ್‌ ಧರಿರಾಖವಾಳನ ದಾಬುಕ್ಮ ಲ್ಯಾವಾನ ಕಿನೊ ಹಾತ್‌ಬಿ ಕೋ ಹುಯುನಿ. 5 ಯೋ ಕದೇಬಿ ರಾತ್‌-ದನ್ ಮಖ್ಹಾಣ್ಯನಿ ಘವಿಯೆ಼ಮಾಬಿ, ಪಹಾಡ್‌ಮಾಬಿ ಚಿಕ್ರಾಣ್ ಮ್ಹೇಲ್ತುಹುಯಿನ್, ಬಂಡಾಥಿ ಇನು ಯೋಸ್‌ ವ್ಹಾಡಿಲೇತುಥು.

6 ಯೋ ದೂರ್‌ಥೊ ಯೇಸುನ ದೇಖಿನ್‌; ನಾಶಿ ಐನ್, ಇನ ಢುಕ್‌ಣ್ಯಟೇಕಿನ್, 7 ಊಚಿ ಆವಾಜ಼್‌ಮ ಚಿಕ್ರಿನ್, "ಪರಮಂಡಲ್‌ನೊ ದೇವ್ನ ಛಿಯ್ಯಾ ಯೇಸು, ಮಾರೇಥಿ ತುನ ಶಾತ್‌ ಛಾ಼? ದೇವ್ನ ಖ್ಹಾಮ್‌ಬಿ, ಮನ ಖ್ಹತಾವ್ ನಕೊ" ಕರಿ ಬೋಲ್ಯು. 8 ಶನಕತೊ, "ಏ ಭೂತ್‌, ಅನ ಮ್ಹೆಂದಿನ್ ಭಾರ್‌ ನಿಕಳ್" ಕರಿ ಯೇಸುನೆ ಅಗಾಡಿಸ್ ಬೋಲಿರಾಖ್ಯೊಥೊ, ಇನಾಖ್ಹಾಜೆ ಇನೆ ಇಮ್‌ ಬೋಲ್ಯುತೆ.

9 ಅಜು಼ ಯೇಸುನೆ ಇನ, "ತಾರು ನಾಮ್ ಶಾತ್?" ಕರಿ ಪುಛಾ಼ವಖ್ಹತರ್, "ಮಾರು ನಾಮ್ ಝೂ಼ಂಡ್‌, ಶನಕತೊ ಹಮೆ ಢಿಂಡ್‌ಪಾಳಸ್ ಛಿಯ್ಯೆ಼!" ಕರಿ ಬೋಲ್ಯು. 10 ಅಜು಼, "ಹಮೂನ ಆ ತಬರ್‌ಖಾಮಾಥು ನಕೊ ನಖ್ಹಾಡ್" ಕರಿ ಯೋ ಭೂತ್ ಧರೀರಾಖ್ಯುಥೂತೆ ಅದ್ಮಿನೆ ಯೇಸುನ ಘಣು ಗಿಂಗೈಲಿದು.

11 ಹಿಜ್ಜಾ಼ ಖನ್ನೆಸ್‌ ಥೂತೆ ಪಹಾಡ್‌ಮ ಡೂಕರ್‌ನಿ ಮೋಟಿ ಝೂ಼ಂಡ್‌ ಚ಼ರೂಕರ್‌ತೂಥು. 12 ತದೆ ಯೋ ಭೂತ್‌ಖ್ಹಾರು ಯೇಸುನ, "ಡೂಕರ್‌ನಿ ಝೂ಼ಂಡ್‌ನ ಮಹಿ ಪೇಖ್ಹಾನ ಹಮೂನ ಬೋಲಿಮೋಕಲ್‌" ಕರಿ ಗಿಂಗೈಲಿದು. 13 ತದೆ ಯೇಸುನೆ ಇಮ್ಮಸ್ ಹುವಾದೆ, ಕರಿ ಹುಕುಮ್‌ ದೇತಾಖ್ಹತರ್‌ ಯೋ ಭೂತ್‌ ಖ್ಹಾರು ಯೋ ಅದ್ಮಿನ ಮ್ಹೆಂದಿನ್ ಭಾರ್ ನಿಕ್ಳಿನ್, ಡೂಕರ್‌ನಿ ಝೂ಼ಂಡ್‌ಮ ಪೇಶಿಗಯು. ತದೆ ಯೋ ಡೂಕರ್‌ಖ್ಹಾರು ನಾಶಿನ್, ಪಹಡ್‌ನಿ ಕಥಾರ್‌ಪರ್‌ಥು ದರ‍್ಯಾವ್‌ಮ ಪಡೀನ್ ದಮ್‌ ಘೋಟೈನ್‌ ಮರಿಗಯು. ಕಮ್‍ಶಿಕಮ್ ಬೇ ಹಜಾ಼ರ್‌ ಡೂಕರ್‌ ಥೂ.

14 ಡೂಕರ್‌ ಚ಼ರಾವವಾಳು ಖ್ಹಾರು ನಾಶಿಜೈ಼ನ್ ಯೋ ಖ್ಹಯೇರ್‌ಮಾಬಿ, ಗಾಮ್ಮಾಬಿ ಇನಿ ಬಾರೇಮ ಬೋಲ್ತಖ್ಹತರ್‌ ಇನ ದೇಖಾನಖ್ಹಾಜೆ ಅದ್ಮಿಖ್ಹಾರು ಯೇಸು ಥೋತೆ ಹಿಜ್ಜಾ಼ ಆಯು. 15 ಯೇಸು ಹಿಜ್ಜಾ಼ ಆಯೊ ತದೆ ಯೋ ಭೂತ್‌ನಿ ಝೂ಼ಂಡ್‌ ಧರಿರಾಖ್ಯುಥೂತೆ ಅದ್ಮಿ ಲುಂಗ್ಡಾವ್‍ನ ಪೇರ‍್ಹಿಲಿನ್, ಅಛ್ಛಿ ಖ್ಹಯಾಲ್‌ಥಿ, ಬೆಠುಥೂತೆ ದೇಖಿನ್, ಅದ್ಮಿಖ್ಹಾರು ಡರಿಗಯು. 16 ಚಾ಼ಲ್ಯುತೆ ಇನಿ ಬಾರೇಮ ದೇಖಿರಾಖ್ಯುಥುತೆ ಇವ್ಣೆ, ಯೋ ಭೂತ್ ಧರಿರಾಖ್ಯುಥೂತೆ ಇನ ಅಮ್-ಅಮ್ ಹುಯುತೇಬಿ, ಬಿಜು಼ ಡೂಕರ್‌ನಿ ಬಾರೇಮಾಬಿ,

17 ಯೋ ಐರ‍್ಹೂಥೂತೆ ಅದ್ಮಿನ ಬೋಲಾಖ್ಹತರ್ ಇವ್ಣೆ, ಇವ್ಣ ತಬರ್‌ಖಾನ ಮ್ಹೆಂದಿನ್ ಜಾ಼ ಕರಿ ಯೇಸುನ ಗಿಂಗೈಲಿದು.

18 ಯೇಸು ಡೋಣ್‌ ಚ಼ಢಾನಿ ವಖ್ಹತ್‌ಮ, ಯೋ ಭೂತ್‌ಖ್ಹಾರು ನಿಕ್ಳಿಗಯೂತೆ ಅದ್ಮಿ, "ಮೇಬಿ ತಾರ ಕೇಡೆಸ್ ರ‍್ಹವುಸ್" ಕರಿ ಯೇಸುನ ಗಿಂಗೈಲಿದೊ. 19 ಕತೋಬಿ ಯೇಸುನೆ ಇನ ರ‍್ಹವಾದಿದೊ ಕೊಯ್ನಿ. ಯೋ ಅದ್ಮಿನ, "ತೂ ತಾರ ಘರೇಬಿ, ತಾರ ಅದ್ಮಿಕನಾಬಿ ಜೈ಼ನ್‌, ಪ್ರಭುನೆ ತಾರಪರ್ ಗೋರ್‌ಕರೀನ್, ತುನ ಕೆತ್ರೆ ಮದತ್ ಕರ‍್ಯೊ ಕರಿ ಯೋ ಖ್ಹಾರಾನ ಇವ್ಣುನ ಬೋಲ್" ಕರಿ ಬೋಲ್ಯೊ.

20 ಇಮ್ಮಸ್ ಯೋ ಅದ್ಮಿ ಹಿಜ್ಜಾ಼ಥು ನಿಕ್ಳಿನ್ ದೆಕಪೊಲಿ*5:20 ದೆಕಪೊಲಿ ಕತೊ, ‘ದಖ್ಹ್‌ ಗಾಮ್‌ನೊ ತಬರ್‌ಖೊ’ ಕರಿ ಕರಿ ತಬರ್‌ಖಾಮ ಜೈ಼ನ್, ಯೇಸುನೆ ಇನ ಕರ‍್ಯೋತೊ ಖ್ಹಾರಿ ಮದತ್‍ನ ಬೋಲಾನ ಶುರುಕರ‍್ಯು. ಅನ ಖ್ಹಮ್‌ಜಾ಼ವಾಳು ಖ್ಹಾರು ಆಶ್ಚರ್ಯಖಾದು.

ಯಾಯಿರನಿ ಛೋ಼ರಿ ಅಜು಼ ಯೇಸುನು ಲುಂಗ್ಡು ಛೀಮೀತೆ ತಯೇಡಾನಿ ಬಾರೇಮ

21 ಯೇಸು ಪಾಛೊ಼ ಫರೀನ್ ಡೋಣ್‌ಮ ದರ‍್ಯಾವ್‌ಮ ಹೈಕಡ್‌ಳಿ ಬಾಜು಼ಮ ಆಯೊ. ಹಿಜ್ಜಾ಼ ದರ‍್ಯಾವ್‍ನ ಕನಾರೆ ಅದ್ಮಿನಿ ಘಣಿ ಮೋಟಿ ಝೂ಼ಂಡ್‌ ಯೇಸುನ ಅಶ್‌ಪಿಶ್ ಐನ್ ಭರಾಯು. 22 ತದೆ ಸಬಾಮಂದಿರ್‌ನೊ ಅದಿಕಾರಿ ಏಕ್‌ ಜ಼ಣೊ ಹಿಜ್ಜಾ಼ ಆಯೊ. ಇನು ನಾಮ್ ಯಾಯಿರ ಕರಿ. ಯೋ ಯೇಸುನ ದೇಖಿನ್, ಇನ ಗೋಡಾಪರ್ ಪಡಿನ್, 23 "ಮಾರಿ ಅಡ್ಡಾಣಿ ಛೋ಼ಕ್ರಿ ಮರ್‌ವಾನ ಆಯಿ; ಯೊ ಅಛ್ಛಿಹುಯಿನ್ ಬಚಾ಼ನಖ್ಹಾಜೆ ದಯಕರಿನ್ ತೂ ಐನ್‌ ಇನಾಪರ್‌ ಹಾತ್‌ ಮ್ಹೇಲ್‌, ಕರಿ ಯೇಸುನ ಘಣು ಗಿಂಗೈಲಿದೊ.

24 ತದೆ ಯೇಸು ಇನಜೋ಼ಡೆ ಗಯೊ, ಬಿಜು಼ ಅದ್ಮಿನಿ ಭೀಡ್‌ ಇನ ಅಶ್‌ಪಿಶ್ ಭರೈನ್ ಧಕೇಲ್‌ತುಹುಯಿನ್ ಇನ ಪೀಠೆ ಗಯು.

25 ಹಿಜ್ಜಾ಼ ಭಾರ ವರಖ್ಹ್‌ಥು ಮುಟ್ನು ರೋಗ್‌ಥೀತೆ ಏಕ್‌ ತಯೇಡ ಥಿ. 26 ಯೋ ಕೈಯೆಕ್ಕಿ ವೈದ್ಯಕನ ದೆಖಾಡಿತೋಬಿ ಘಣು ಲತಾಡ ಪಡಿರ‍್ಹೀಥಿ. ಥೂತೆ ಖ್ಹಾರು ಇನೆ ಖರ್ಚಿ ಕರಿತೋಬಿ ರೋಗ್‌ ಜಾ಼ಖ್ಹತ್ ಹುಯು ಪಣ್ಕಿ ಶಾತ್ಬಿ ಫಾಯಿದೊ ಕೋ ಹುಯುಥೂನಿ. 27,28 ಯೋ ತಯೇಡ ಯೇಸುನಿ ಬಾರೇಮ ಖ್ಹಮ್‌ಜಿನ್‌, "ಮೇ ಯೇಸುನ ಲುಂಗ್ಡಾನ ಛೀಮೀತೊ ಬಶ್‌, ಮನ ಅಛ್ಛು಼ ಹುಯಿಜಾ಼ಶೆ" ಕರಿ ಸೋಚಿನ್, ಝೂ಼ಂಡ್‌ಮ ಪೀಠೇಥು ಐನ್ ಇನ ಲುಂಗ್ಡಾನ ಛೀಮಿ.

29 ಛೀಮ್‌ತಾಸ್‌ ಇನ ಲ್ಹೊಯಿ ಝ಼ರಾನು ಭೀರಿಗಯು; ತದೆ ಇನೆ, ಇನ ಖ್ಹತವ್‌ಕರ್ತುಥೂತೆ ರೋಗ್‌ ನಿಕ್ಳಿಜೈ಼ನ್ ಅಛ್ಛು಼ ಹುಯಿಗಯು, ಕರಿ ಇನು ಯೋಸ್‌ ಮಾಲುಮ್‌ ಕರೀಲಿದಿ. 30 ತದ್‌ನು ತದೇಸ್‌ ಯೇಸುನೆ ಇನಾಮಾಥು ಶಕತ್ ಗೈತೆ ಮಾಲುಮ್‌ ಕರಿಲೀನ್, ಝೂ಼ಂಡ್‌ಮ ಪೀಠೆ ಫರೀನ್, "ಮಾರ ಲುಂಗ್ಡಾನ ಛೀಮ್ಯೂತೆ ಕೋಣ್?" ಕರಿ ಪುಛಾ಼ಯೊ.

31 ತದೆ ಇನ ಶಿಷ್ಯರ್‌ನೆ ಇನ, "ಅದ್ಮಿನಿ ಝೂ಼ಂಡಸ್ ತಾರಾಪರ್ ಪಡುಕರಾಸ್ ತೋಬಿ, ‘ಮನ ಛೀಮ್ಯೂತೆ ಕೋಣ್ ಕರಿ ಪುಛಾ಼ವಸ್ತೆ ಕಿಮ್?" ಕರಿ ಬೋಲ್ಯು.

32 ಕತೋಬಿ ಯೇಸು ಇನ ಛೀಮ್ಯೂತೆ ಕೋಣ್ ಕರಿ ಅಶ್‌ಪಿಶ್ ದೇಖೂಸ್ ಕರ್ತೊಥೊ. 33 ಯೋ ತಯೇಡ ಇನ ಹುಯೂತೆ ಮಾಲುಮ್‌ ಕರೀಲಿನ್‌, ಡರ್‌ಥಿ ಕಾಪ್ತಿಹುಯಿನ್‌ ಐನ್, ಯೇಸುನ ಗೋಡಾಪರ್ ಪಡೀನ್, ಖ್ಹಾರಿಸ್ ಖ್ಹಾಚಿನ ಬೋಲಿ. 34 ತದೆ ಯೇಸುನೆ ಇನ, "ಛೋ಼ರಿ, ತಾರಿ ವಿಶ್ವಾಸ್‌ಥೀಸ್ ತುನ ಅಛ್ಛು಼ ಹುಯೂತೆ. ಸಮಾಧಾನ್‌ಥಿ ಜಾ಼, ತುನ ಬಿಜು಼ ಪಾಛು಼ ಯೋ ರೋಗ್ ಖ್ಹತಾವ್‌ಶೆ ಕೊಯ್ನಿ" ಕರಿ ಬೋಲ್ಯೊ. 35 ಯೇಸು ಹಿಜ್ಜಾ಼ ಬಿಜೂ಼ಬಿ ವಾತೆ ಬೋಲುಕರ್ತೊಥೋತೆ, ಎತ್ರಾಮ ಮಂದಿರ್‌ನು ಅದಿಕಾರಿ ಭಣಿವಾಳು ಹಿಜ್ಜಾ಼ ಐನ್, "ತಾರಿ ಛೋ಼ರಿ ಮರಿಗೈ. ಅಜು಼ ಗುರುನ ಖ್ಹತಾವ್ ನಕೊ?" ಕರಿ ಬೋಲ್ಯು.

36 ಇವ್ಣೆ ಬೋಲ್ಯುತೆ ವಾತೆನ ಯೇಸುನೆ ಮಜು಼ರಸ್ ಕರ‍್ಯೊಕೊಂತೆ ಮಂದಿರ್‌ನು ಅದಿಕಾರಿನ, "ಡರ್‌ನಕೊ, ಖಲಿ ವಿಶ್ವಾಸ್ ರ‍್ಹವಾದೆ" ಕರಿ ಬೋಲ್ಯೊ. 37 ಬಿಜು಼ ಯೇಸುನೆ ಪೇತ್ರ, ಯಾಕೋಬ್ ಅಜು಼ ಯಾಕೋಬನೊ ನ್ಹಾನೊ ಭೈ ಯೋಹಾನ ಅವ್ಣುನ ಮ್ಹೆಂದಿನ್ ಕಿನಾಬಿ ಇನ ಕೇಡೆ ಆವಾದಿದೊ ಕೊಯ್ನಿ. 38 ಇವ್ಣೆ ಅದಿಕಾರಿನ ಘರೆ ಆಯತದೆ, ಹಿಜ್ಜಾ಼ ಅದ್ಮಿಖ್ಹಾರು ಚಿಕ್ರಾಣ್ ಮ್ಹೇಲುಕರಾತೆ ಬಿಜು಼ ಥೋಡು ಅದ್ಮಿ ರೊವಣ್‌ಝೋ಼ವಣ್ ಕರುಕರಾತೆ ಯೇಸುನೆ ದೇಖ್ಯೊ. 39 ಯೇಸು ಮಹಿ ಜೈ಼ನ್‌, "ಶನ ತುಮೆ ಚಿಕ್ರಾಣ್ ಮ್ಹೇಲುಕರಾಸ್ತೆ, ರೋವ್‌ಕರಾಸ್ತೆ? ಛೋ಼ಕ್ರಿ ಮರಿಕೊಯ್ನಿ, ಖ್ಹುತೀಸ್!" ಕರಿ ಬೋಲ್ಯೊ.

40 ಇವ್ಣೆ ಯೇಸುನ ದೇಖಿನ್ ನಕ್ಲೆ ಕರ‍್ಯು, ಇನಾಖ್ಹಾಜೆ ಯೇಸುನೆ ಖ್ಹಾರಾನ ಭಾರ್‌ ಮೋಕ್ಲೀನ್, ಯೋ ಛೋ಼ಕ್ರಿನ ಆಯ-ಬಾನ ಬಿಜು಼ ಇನ ತೀನ್ ಜ಼ಣ ಶಿಷ್ಯರ್‌ನ ಬುಲೈಲಿನ್ ಛೋ಼ಕ್ರಿ ಥೀತೆ ಹಿಜ್ಜಾ಼ಗಯೊ. 41 ಯೇಸುನೆ ಯೋ ಛೋ಼ಕ್ರಿನೊ ಹಾತ್ ಧರೀನ್, "ತಲಿಥಾಕೂಮ್" ಕರಿ ಬೋಲ್ಯೊ. ಇಮ್‌ ಕತೊ "ಅಡ್ಡಾಣಿ ಛೋ಼ಕ್ರಿ, ಮೇ ತುನ ಬೋಲುಕರುಸ್ ಉಪ್ಪರ್ ಉಟ್" ಕರಿ.

42 ತದ್‌ನು ತದೇಸ್‌ ಯೋ ಛೋ಼ಕ್ರಿ ಉಠೀನ್ ಹೈಕಡ್‌ ಹೀಕಡ್‌ ಚಾ಼ಲಾಲಗಿ. ಯೋ ಭಾರ ವರಖ್ಹ್‌ನಿ ಹುಯಿರ‍್ಹೀಥಿ. ಅಮ್ ಹುವಾನು ದೇಖಿನ್ ಇವ್ಣೆ ಘಣು ಆಶ್ಚರ್ಯಖಾದು. 43 ಯೇಸುನೆ ಇವ್ಣುನ, ಆ ಕಿನಾಬಿ ನಾ ಮಾಲುಮ್ ಪಡ್ಣು ಕರಿ ಘಣು ಝೇತೈನ್‌, "ಆ ಛೋ಼ಕ್ರಿನ ಖಾಣು ಖಡಾವೊ" ಕರಿ ಬೋಲ್ಯೊ.