Mateus 10

ಭಾರ ಅಪೊಸ್ತಲರ್

1 ಯೇಸುನೆ ಇನ ಭಾರ ಜ಼ಣ ಶಿಷ್ಯರ್‌ನ ಎಕ್ಕದಮ್‌ ಬುಲೈನ್, ಭೂತ್‌ಖ್ಹಾರು ಕಾಡಾನ ಅಜು಼ ಖ್ಹಾರಿಸ್ ತರ‍್ಹಾನು ರೋಗ್‌-ರಾಯನ ಅಛ್ಛು಼ ಕರಾನ ಇವ್ಣುನ ಅದಿಕಾರ್ ದಿದೊ. 2 ಯೋ ಭಾರಜ಼ಣ ಅಪೊಸ್ತಲರ‍್ನು ನಾಮ್ ಕೆಹುಕತೊ: ಪಹಿಲೊ ಪೇತ್ರ ಕರಿ ಬೋಲೈಲಿದೋತೆ ಸೀಮೋನ, ಇನೊ ಭೈ ಅಂದ್ರೆಯ, ಜೆಬೆದಾಯನೊ ಛಿಯ್ಯೊ ಯಾಕೋಬ ಅಜು಼ ಇನೊ ಭೈ ಯೋಹಾನ. 3 ಫಿಲಿಪ್ಪ ಅಜು಼ ಬಾರ್ತೊಲೊಮಾಯ, ತೋಮ, ಶುಂಕವಾಳೊ ಮತ್ತಾಯ, ಅಲ್ಫಾಯನೊ ಛಿಯ್ಯೊ ಯಾಕೋಬ, ತದ್ದಾಯ, 4 ದೇಖ್ಹ್‌ನೊ ಭಕ್ತ ಕರಿ ಬೋಲೈಲಿದೋತೆ ಸೀಮೋನ, ಯೇಸುನ ಧೊಕೇಥಿ ಧರಿದಿದೋತೆ ಇಸ್ಕರಿಯೋತ ಯೂದ, ಅವ್ಣೇಸ್.

ಭಾರ ಜ಼ಣಾನಿ ಸೇವೇನಿ ಬಾರೇಮ

5 ಆ ಭಾರ ಜ಼ಣಾನ ಯೇಸು ಮೋಕ್ಲಾನಿ ವಖ್ಹತ್‌ಮ, ಇವ್ಣುನ ಶಾತ್‌ ಬೋಲಿನ್ ಮೋಕ್‌ಲ್ಯೊ ಕತೊ, "ಯೆಹೂದ್ಯರ್‌ಕಾಹೆತೆ ಅದ್ಮಿನ ಗಾಮ್‌ಭಣಿ ರ‍್ಹವೊ, ಸಮಾರಿಯಾನು ಖೆವುಸ್‌ ಗಾಮ್ಮ ರ‍್ಹವೊ ನಕೊಜಾ಼ಶು. 6 ಅನಬದಲ್ ಗುಮೈಗಯೂತೆ ಮೇಂಢನಿಘೋಣಿ ಛಾ಼ತೆ ಇಸ್ರಾಯೇಲ್‌ನ ಅದ್ಮಿಕನ ಜಾ಼ವೊ. 7 ಜೈ಼ನ್‌, ‘ಸೊರ್ಗನು ರಾಜ್ಯ ಖನ್ನೆ ಐಗು’ ಕರಿ ಬೋಲಿವತಾಳೊ. 8 ರೋಗ್‌ವಾಳಾನ ಅಛ್ಛು಼ಕರೊ, ಮರ‍್ಯಾಹುಯಾನ ಜಿವ್ತು ಕರೊ, ಖೋಡ್‍ ಲಗ್ಯಹುಯಾನ ಪಾಕ್‌ಕರೊ ಅಜು಼ ಭೂತ್‌ಖ್ಹಾರು ಕಾಡೊ. ತುಮೂನ ಫುಗಟ್‌ಮ ಮಳಿರ‍್ಹೂಸ್‌ ಇನಖ್ಹಾಜೆ ಫುಗಟ್‌ಮ ದೆವೊ. 9 ತುಮಾರಿ ಚ಼ಂಚಿಮ ಖ್ಹೊನ್ನು, ರೂಪು ನಾತೊ ತಾಂಬಾನು ಪೈಶಾ ರ‍್ಹವೊ, ನಕೊ ಲೀಜಾ಼ವೊ; 10 ಜಾ಼ವಾನಿ ವಖ್ಹತ್‌ಮ, ಝೋ಼ಳಿ ರ‍್ಹವೊ, ಬೇ ಕುಡ್‌ತಾ ರ‍್ಹವೊ, ಖೋಖ್ಹ್‌ಡು ರ‍್ಹವೊ, ಲಠ್ಠೊ ರ‍್ಹವೊ ನಕೊ ಲೀಜಾ಼ಶು. ಕಾಮ್ ಕರಾವಾಳ ಆಳ್‌ನ ಶಾತ್‌ ಜ಼ರೂರತ್ ಛಾ಼ಕಿ ಯೋ ಇನ ದೆವಾವ್‌ಶೆ.

11 ತುಮೆ ಖೆವತೋಬಿ ಖ್ಹಯೇರ್‌ಮ ನತರ್‌ಕಿ ಗಾಮ್ಮ ಗಯಾತೊ, ಹಿಜ್ಜಾ಼ ಕೋಣ್ ಅಛ್ಛು಼ಕರಿ ಪುಛೈ಼ಲೀನ್‌, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವಾತೋಡಿ ಯೋಸ್ ಝ಼ಗೋಮ ರ‍್ಹವೊ. 12 ತುಮೆ ಏಕ್‌ ಘರ್‌ಮ ಜಾ಼ವಾನಿ ವಖ್ಹತ್‌ಮ, ‘ತುಮೂನ ಸಮಾಧಾನ್ ಮಳಾದೆ’ ಕರಿ ಬೋಲೊ. 13 ಯೋ ಘರ್‌ಮಾನು ಅದ್ಮಿ ತುಮೂನ ಬುಲೈಲಿದುತೊ, ತುಮಾರಿ ಸಮಾಧಾನ್ ಇವ್ಣುನ ಮಳಾದೆ. ಕತೋಬಿ ಇವ್ಣೆ ತುಮೂನ ನಾ ಬುಲೈಲಿದುತೊ, ತುಮಾರಿ ಸಮಾಧಾನ್ ಪಾಛು಼ಫರಿ ತುಮುನಾಸ್ ಆವಾದೆ. 14 ಖೆವತೋಬಿ ಘರ್‌ವಾಳು ನತರ್‌ಕಿ ಗಾಮ್‌ವಾಳು ತುಮೂನ ನಾ ಬುಲೈಲಿದುತೊ, ನತರ್‌ಕಿ ತುಮಾರಿ ವಾತೆನ ನಾ ಖ್ಹಮ್‌ಜುತೊ, ಯೋ ಗಾಮ್‌ನ ಮ್ಹೆಂದಿನ್ ಜಾ಼ವಾನಿ ವಖ್ಹತ್‌ಮ, ತುಮಾರ ಗೋಡಾನ ಲಗ್ಯುತೆ ಧೂಳ್‌ನ ಝ಼ಟ್‌ಕಿ ದೆವೊ. 15 ನ್ಯಾವ್‍ನಿ ತೀರ್ಪ್‌ನ ದನ್ಮ ಇಮ್ನ ಗಾಮ್‌ನಿ ಹಾಲ್‌ ಸೊದೋಮ್ ಅಜು಼ ಗೊಮೋರ್‌ ತಬರ್‌ಖಾನಿ ಹಾಲ್‌ಥೀಬಿ ಖರಾಬ್ ರ‍್ಹಿಶೆ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್" ಕರಿ ಬೋಲ್ಯೊ.

ಆವ್‌ಶೇತೆ ಖ್ಹತಾಪ್ಣಿನಿ ಬಾರೇಮ

16 "ಖ್ಹಮ್‌ಜೊ಼! ಜ಼ರಕ್‌ನ ಮಹಿ ಮೇಂಢವ್‌ನ ಮೋಕ್ಲಾತೆ ಇಮ್‌ ಮೇ ತುಮೂನ ಮೋಕ್ಲುಕರುಸ್. ಇನಖ್ಹಾಜೇಸ್ ತುಮೆ ಖ್ಹಾಪ್‌ನಿತರ ಚಾ಼ತುರ್ ಅಜು಼ ಪರ‍್ಯಾವಾನಿಘೋಣಿ ಖೋಟ್‌ಕೊಂತೆ ಇಮ್‌ ರ‍್ಹವೊ. 17 ಅದ್ಮಿನಿ ಬಾರೇಮ ಜ಼ತನ್ ರ‍್ಹವೊ, ಶನಕತೊ ಇವ್ಣೆ ತುಮೂನ ಧರೀನ್, ನ್ಯಾವ್ ಕರಾನಿ ಸಭೆಮ ಖೇಚಿಲಿಜಾ಼ಶೆ, ಅಜು಼ ಇವ್ಣಿ ಸಬೆ ಭರಾವಾನು ಮಂದಿರ್‌ಮ ತುಮೂನ ಕೊಳ್ಡೇಥಿ ಮಾರ್‌ಶೆ. 18 ಮಾರಖ್ಹಾಜೆ ತುಮೂನ ಅದಿಕಾರಿ ಅಜು಼ ರಾಜಾ಼ವ್‌ನ ಖ್ಹಾಮ್ಣೆ ಲೀಜಾ಼ಶೆ; ಅಮ್ ಇವ್ಣುನಾಬಿ ಅಜು಼ ಯೆಹೂದ್ಯರ್‌ಕಾಹೆತೆ ಅದ್ಮಿವೋನಾಬಿ ತುಮೆ ಸಬೂತ್ ಹುಯಿರ‍್ಹಿಶು. 19 ಇವ್ಣೆ ತುಮೂನ ಧರಿದ್ಯವಾನಿ ವಖ್ಹತ್‌ಮ, ತುಮೆ ಶಾತ್‌ ವಾತೆ ಬೋಲ್‌ನು, ಕಿಮ್ ವಾತೆ ಬೋಲ್ನುಕರಿ ಸೋಚೊ ನಕೊ; ತುಮೆ ಶಾತ್‌ ಬೋಲ್ನುಕರಿ ಯೋ ವಖ್ಹತ್ ಆವಾದಿನ್, ತುಮೂನ ದೆವಾವ್‌ಶೆ. 20 ವಾತೆ ಬೋಲವಾಳ ತುಮೆ ಕಾಹೆ; ತುಮಾರೊ ಬಾನೊ ಪವಿತ್ರ ಆತ್ಮಾಸ್‌ ತುಮಾರ ಮ್ಹೋಡವಾಟೆ ವಾತೆ ಬೋಲ್‌ಶೆ.

21 ಭೈ ಉಠೀನ್ ಇನ ಶೊಂತ್‌ ಭೈಯೇನ, ಅಜು಼ ಬಾ ಉಠೀನ್ ಇನ ಶೊಂತ್‌ ಲಡ್ಕಾವ್‍ನ ಧರೀನ್, ಮರೈನಾಖಾನ ದಿನಾಕ್‌ಶೆ, ಲಡ್ಕಾ ಇವ್ಣ ಆಯ-ಬಾನಿ ವಿರೋದ್ ಉಠೀನ್, ಇವ್ಣುನ ಮರಾವ್‌ಶೆ. 22 ಮಾರ ಕಾಮ್ನಖ್ಹಾಜೆ ಹರೇಕ್ ಜ಼ಣು ತುಮೂನ ವಹೇರ್‌ ಕರ್ಶೆ. ಕತೋಬಿ ಖ್ಹರ್ತಿಲಗು ಖ್ಹಮಾಳಿಲ್ಯವಾಳು ರಕ್ಷಣೆ ಲಿಶೆ. 23 ಏಕ್‌ ಗಾಮ್ಮ ತುಮೂನ ಖ್ಹತಾಯೂತೊ, ಬಿಜ್ಜೇಕ್‌ ಗಾಮ್‌ನ ಮಿಲೈ ಜಾ಼ವೊ, ಅದ್ಮಿನೊ ಛಿಯ್ಯೊ ಆವಾನಮಹಿ ತುಮೆ ಇಸ್ರಾಯೇಲ್‌ ಅದ್ಮಿನು ಖ್ಹಾರಸ್ ಗಾಮ್ಮ ಫರೀನ್, ತುಮಾರು ಕಾಮ್ ಖತಮ್ ಕೊಕರಿರಾಕ್‌ಶುನಿ ಕರಿ ಮೇ ತುಮೂನ ಖ್ಹಾಚಾಮಬಿ ಬೋಲುಸ್.

24 ಶಿಷ್ಯ ಗುರುಥಿ ಮೋಟೊ ಕಾಹೆ; ಆಳ್‌ ಇನ ಯಜಮಾನ್‍ಥಿ ಮೋಟೊ ಕಾಹೆ. 25 ಶಿಷ್ಯ ಇನ ಗುರುನಿಮತ್‌ ಬಣ್ಯೋತೊ ಬಶ್‌, ಅಜು಼ ಆಳ್‌ ಇನ ಯಜಮಾನ್ನಿ ಮತ್‍ ಬಣ್ಯೋತೊ ಬಶ್‌. ಘರ್‌ನೊ ಯಜಮಾನ್ನಸ್‌, ಬೆಲ್ಜೆಬೂಲ್*10:25 ಕತೊ, ಭೂತ್‌ನೊ ಮೋಟೊ ಕರಿ ಮತ್‌ಲಬ್. ಕರಿ ಇವ್ಣೆ ಚಿಕ್‌ರ‍್ಯುತೊ, ಯೋ ಘರ್‌ನ ಬಿಜಾ಼ಖ್ಹಾರ ಅದ್ಮಿನ ಅಜು಼ಕೆತ್ರೆ ಖರಾಬ್ ನಾಮ್‍ಥಿ ಚಿಕರ್‌ಶೆ ಕೊಯ್ನಿಕಿಶು?

ಕಿನ ದೇಖಿನ್‌ ಡರ‍್ನು?

26 ಇನಖ್ಹಾಜೇಸ್ ಅದ್ಮಿನ ದೇಖಿನ್‌ ಡರೊನಕೊ, ಲಪೈರ‍್ಹೂತೆ ಖ್ಹಾರುಸ್‌ ಭಡಕಿಜಾಶೆ, ಅಜು಼ ಶಿಕಾಡಿ ಬೋಲಾಸ್ತೆ ಹರ್‌ವಾತೆ ಉಜಾ಼ಳಾಮ ಭಾರ್‌ ಮಾಲುಮ್‌ ಪಡ್‌ಶೆ. 27 ಮೇ ಅಂಧಾರಾಮ ತುಮೂನ ಬೋಲುಸ್ತೆ ಇನ ತುಮೆ ಉಜಾ಼ಳಾಮ ಬೋಲೊ. ಅಜು಼ ಕಾನ್‌ಮ ಬೋಲುಸ್ತೆ ಇನ ಘರ್‌ನ ಛ಼ತ್‍ಪರ್‌ಥು ಭೀರಿನ್‌ ಚಿಕ್ರಿನ್ ಬೋಲಿನ್ ಫೈಲಾವೊ. 28 ಅತ್ರೇಸ್ ಕಾಹೆತೆ, ಶರೀರ್‌ನ ಮರ್‌ನಾಖಿನ್ ಆತ್ಮನ ಮಾರಾನ ಕೋ ಹುವ್ವಾನಿತೆ ಅದ್ಮಿನ ದೇಖಿನ್‌ ನಕೊ ಡರೊ; ಕತೋಬಿ ಆತ್ಮಾನ ಅಜು಼ ಶರೀರ್‌ನ ಭೇನ ನರಕ್ಮ ನಾಖಿನ್ ಬರ್ಬಾತ್ ಕರಾವಾಳೊ ದೇವ್ನ ದೇಖಿನ್ ಡರೊ. 29 ಖಲಿ ಏಕ್ಕಾಖ್ಹ್‌ನ ಏಕ್‌ ಜೋ಼ಡು ಚು಼ರಕ್‌ಲಿಯೇನ ವೇಚಾ಼ಸ್ನಿ, ತೋಬಿ ಇನಾಮಾಥು ತುಮಾರೊ ಬಾನಿ ಮರ್ಜಿಕೊಂತೆ ಯೋ ಚು಼ರಕ್‌ಲೀಮ ಏಕ್‌ಬಿ ಜ಼ಮೀನ್‌ಪರ್ ಕೋ ಪಡಾನಿ. 30 ಕತೋಬಿ ತುಮೂನಾತೊ, ತುಮಾರೊ ಮುಡ್‌ಕ್ಯಾನೊ ಕೇಖ್ಹ್‌ ಜಿನ್‌ಕುಬಿ ಖ್ಹಾರುಸ್‌ ಗಣೈರ‍್ಹೂಸ್‌. 31 ಇನಖ್ಹಾಜೇಸ್ ಡರೊ ನಕೊ; ಕೈಏಕ್ಕಿ ಚು಼ರಕ್‌ಲಿಯೇಥೀಬಿ ತುಮೇಸ್ ಘಣ ಮೋಟ ಹುಯಿರ‍್ಹಾಸ್‌.

ಕ್ರಿಸ್ತನಿ ಕಬೂಲಾನು ಅಜು಼ ಕಾಡಿನಾಖನಿ ಬಾರೇಮ

32 "ಕೋಣ್ ಅದ್ಮಿನ ಖ್ಹಾಮ್ಣೆ ಯೋ ಮಾರವಾಳೊಕರಿ ಬೋಲಸ್ಕಿ, ಮೇಬಿ ಇನ ಸೊರ್ಗಾಮ ಛಾ಼ತೆ ಮಾರ ಬಾನ ಖ್ಹಾಮ್ಣೆ ಯೋ ಮಾರ ಭಣಿವಾಳೊ ಕರಿ ಬೋಲಿಶ್. 33 ಕತೋಬಿ ಕೋಣ್ ಅದ್ಮಿನ ಖ್ಹಾಮ್ಣೆ ಯೇಸುವಾಳೊ ಕಾಹೆ ಕರಿ ಬೋಲಸ್ಕಿ, ಮೇಬಿ ಇನ ಸೊರ್ಗಾಮ ಛಾ಼ತೆ ಮಾರ ಬಾನ ಖ್ಹಾಮ್ಣೆ ಯೋ ಮಾರ ಭಣಿವಾಳೊ ಕಾಹೆಕರಿ ಬೋಲಿಶ್.

ಶಾಂತಿ ದ್ಯವಾನ ಕಾಹೆ, ಭಾಗ್‌ ಕರಾನ ಆಯೊ

34 ಧರ್ತಿಪರ್ ಶಾಂತಿ ದ್ಯವಾನ ಮೇ ಆಯೊ ಕರಿ ನಕೊ ಸೋಚೊ, ಶಾಂತಿ ಪೈದಾಕರಾನ ಕಾಹೆ, ಪಣ್ಕಿ ತಲ್ವಾರ್‌ ಪಾಡಾನ ಆಯೋತೆ. 35 ಛಿಯ್ಯಾನ ಅಜು಼ ಬಾನ, ಛೋ಼ರಿನ ಅಜು಼ ಆಯನ, ವ್ಹವ್‌ನಾಬಿ ಅಜು಼ ಖ್ಹಾಖ್ಹುನ ಮಹಿ ವಿರೋದ್‌ ಪೈದಾ ಕರಾನಖ್ಹಾಜೆ ಮೇ ಆಯೋತೆ. 36 ಅಮ್ ಏಕ್‌ ಅದ್ಮಿನ ಇನು ಶೊಂತ್‌ ಘರ್‌ವಾಳುಸ್‌ ದುಶ್‌ಮನ್‌ ಉಶೆ.

37 ಬಾನ ರ‍್ಹವೊ, ಆಯಾನ ರ‍್ಹವೊ, ಮಾರೇಥಿಬಿ ಜಾ಼ಖ್ಹತ್ ಪ್ಯಾರ್‌ಕರ‍್ಯುತೊ ಮನ ಲ್ಹಾಯೇಕ್‌ನೊ ಕಾಹೆ. ಛಿಯ್ಯಾನ ರ‍್ಹವೊ, ಛೋ಼ರಿನ ರ‍್ಹವೊ ಮಾರೇಥಿಬಿ ಜಾ಼ಖ್ಹತ್ ಪ್ಯಾರ್‌ಕರ‍್ಯುತೊ ಮಾರೊ ಶಿಷ್ಯ ಹುವಾನ ಲ್ಹಾಯಕ್‌ ಕಾಹೆ. 38 ಕೋಣ್ ಇನಿ ಶಿಲ್‌ಬೇನ*10:38 ಶಿಲ್‌ಬೆ ಕತೊ, ಮರಾತೋಡಿ ಖ್ಹಮಾಳ್‌ಣು ಕರಿ ಮತ್‌ಲಬ್. ಪಳ್ಳಿನ್‌, ಮಾರ ಪೀಠೆ ಕೋ ಆವಾನಿಕಿ, ಯೋ ಮಾರೊ ಶಿಷ್ಯ ಹುವಾನ ಲ್ಹಾಯೇಕ್‌ನೊ ಕಾಹೆ. 39 ಇನು ಶೊಂತ್‌ ಜಾನ್ನ ಬಚಾ಼ಡಿಲೇವ್ಣು ಕರಿ ಕರಾವಾಳೊ ಇನ ಗುಮೈಲಿಶೆ; ಕತೋಬಿ ಮಾರಖ್ಹಾಜೆ ಇನು ಶೊಂತ್‌ ಜಾನ್ನ ಗುಮೈಲ್ಯವಾಳೊ ಇನ ಬಚಾ಼ಡಿಲಿಶೆ.

ಇನಾಮ್‌ನಿ ಬಾರೇಮ

40 "ಕೋಣ್‌ತೋಬಿ ತುಮೂನ ಬುಲೈಲಿದುತೊ, ಇವ್ಣೆ ಮನ ಬುಲೈಲೆವಾದಾಖ್ಹಲ್‌; ಮನ ಬುಲೈಲೆಸ್ತೆ ಇವ್ಣೆ ಮನ ಮೋಕ್‌ಲ್ಯೊತೆ ಇನಾಸ್ ಬುಲೈಲೆವಾದಾಖ್ಹಲ್‌, 41 ಪ್ರವಾದಿನ, ಆ ಪ್ರವಾದಿ ಕರಿ ಸ್ವಾಗತ್‍ಕರೀನ್ ಬುಲೈಲೆವಾಳಾನ, ಪ್ರವಾದಿನ ಆವ್‌ಶೇತೆ ಇನಾಮ್ ಲೀಲಿಶೆ. ಅಜು಼ ಧರ್ಮಿನ, ಯೋ ಏಕ್‌ ಧರ್ಮಿಕರಿ ಬುಲೈಲೆವಾಳಾನ, ಧರ್ಮಿನ ಆವ್‌ಶೇತೆ ಇನಾಮ್ ಮಳ್‌ಶೆ. 42 ಆ ನ್ಹಾನಾವ್‍ಮ ಏಕ್‌ ಜ಼ಣಾನ ಯೇಸುನೊ ಶಿಷ್ಯಕರಿ ಬೋಲಿನ್ ಕೋಣ್‌ತೋಬಿ ಏಕ್‌ ತಾಂಬ್ಯೊ ಪಾಣಿ ಪಿಯ್ಯಾನ ದಿದುತೋಬಿ, ಇನ ಆವ್‌ಶೇತೆ ಇನಾಮ್ ಛು಼ಕ್‌ಶೆಸ್‌ ಕೊಯ್ನಿ ಕರಿ ಮೇ ತುಮೂನ ಖ್ಹಾಚಮಾಬಿ ಬೋಲುಸ್" ಕರಿ ಬೋಲ್ಯೊ.