1 ರಾಹೇಲ್‍ ಯಾಕೋಬಥಿ ಲಡ್ಕ ಜ಼ಣಿಕೊಂತೆ ಇನಾಖ್ಹಾಜೆ ಇನಿ ಮೋಟಿ ಭೇನ್‌ಪರ್ ಪೇಟ್ನೊಬಳಾಪೊಕರಿ. ಅತ್ರೇಸ್ ಕಾಹೆತೆ ಯಾಕೋಬನ, "ಮನ ಲಡ್ಕದೇ, ನಾಹುಯುತೊ ಮರಿಜೈ಼ಶ್" ಕರಿ ಬೋಲಿ. 2 ಯಾಕೋಬ ರಾಹೇಲ್‍ಪರ್ ಇರಾದೊ ಕರೀನ್, "ಮೇ ಶಾತ್‌ ದೇವ್‍ಕಿ ಶು? ಯೋಸ್ ಕಾಹೇಕಿಶೂ ತುನ ಲಡ್ಕದಿದೊ ಕೊಂತೆ?" ಕರಿ ಬೊಲ್ಯೊ. 3 ಇನಖ್ಹಾಜೆ ರಾಹೇಲ್‍ನೆ, "ಮಾರಿ ದಾಸಿಹುಯಿರೀತೆ ಬಿಲ್ಹಾ ಛಾ಼ನಿ, ಇನಾಕನ ತೂ ಖ್ಹೂ, ಯೊ ಬೇಜೂನಿ ಹುಯಿತೊ ಯೊ ಲಡ್ಕಾನ ಮಾರ ಖೋಳಾಮ ನಾಖಾದೆ. ತದೆ ಇನೇಥಿ ಮನಾಬಿ ಪಿಳ್ಗಿಉಶೆ" ಕರಿ ಬೋಲಿನ್‌, 4 ಇನಿ ದಾಸಿಹುಯಿರೀತೆ ಬಿಲ್ಹಾನ ಯಾಕೋಬನ ದಿನಾಖಿ. ಯಾಕೋಬ ಇನ ಮಳ್ಯೊ. 5 ಬಿಲ್ಹಾ ಬೇಜೂನಿಹುಯಿನ್‌ ಪರ್ಖ್ಹೋ ಲಡ್ಕು ಜ಼ಣಿ. 6 ತದೆ ರಾಹೇಲ್‍ನೆ, "ದೇವ್‍ ಮಾರಭಣಿ ನ್ಯಾವ್ ಕರಿರಾಖ್ಯೋಸ್, ಯೊ ಮಾರಿ ಬಿಂತಿನ ಖ್ಹಮ್‌ಜಿನ್ ಮನ ಛಿಯ್ಯಾನ ದೀರಾಖ್ಯೋಸ್" ಕರಿ ಇನ *"ದಾನ್‌" ಕರಿ ನಾಮ್‌ಮ್ಹೇಲಿ. 7 ರಾಹೇಲ್‌ನಿ ದಾಸಿ ಬಿಲ್ಹಾನೆ ಪಾಛಿ ಬೇಜೂನಿಹುಯಿನ್‌ ಯಾಕೋಬನ ಬೇನೊ ಛಿಯ್ಯೊ ಜ಼ಣಿ. 8 ತದೆ ರಾಹೇಲ್‍ನೆ, "ಮಾರಿ ಮೋಟಿ ಭೇನ್ನಜೋ಼ಡ್ಮ ಘಣೇಥಿ ಹೊಜ಼್ಜತ್‌ಕರಿನ್‌ ಜೂತಿರ‍್ಹೀಸ್‍" ಕರಿ ಇನ, "ನಫ್ತಾಲಿ" ಕರಿ ನಾಮ್‌ಮ್ಹೇಲಿ. 9 ಲೇಯ ಇನ ಜ಼ಣತ್‍ ಬಂದ್‍ಹುಯ್ಗುತೆ ಮಾಲುಮ್ ಕರ್ಲಿನ್‌ ಇನಿ ದಾಸಿ ಜಿಲ್ಪನ ಯಾಕೋಬನಿ ಬಾವಣ್‍ ಹುವಾನಖ್ಹಾಜೆ ದಿನಾಖಿ. 10 ಲೇಯನಿ ದಾಸಿ ಜಿಲ್ಪನೆ ಯಾಕೋಬನ ಪರ್ಖ್ಹೊ ಲಡ್ಕು ಜ಼ಣಿ. 11 ಲೇಯನೆ, "ಮನ ಅಛ಼್ಛು ಹುಯು" ಕರಿ ಬೋಲಿನ್ ಇನ "ಗಾದ್" ಕರಿ ನಾಮ್‌ಮ್ಹೇಲಿ. 12 ಲೇಯನಿ ದಾಸಿ ಜಿಲ್ಪನೆ ಯಾಕೋಬಥಿ ಬೇನು ಪರ್ಖ್ಹೊಲಡ್ಕು ಜ಼ಣಿ 13 ತದೆ ಲೇಯನೆ, "ಮೇ ಧನ್ಯಹುಯಿ, ತಯೇಡವ್‍ಖ್ಹಾರು ಮನ ಧನ್ಯ ಕರಿ ಖ್ಹರಾವ್‌ಶೆ" ಕರಿ ಇನ "ಆಶೇರ್" ಕರಿ ನಾಮ್‌ಮ್ಹೇಲಿ. 14 ಘವ್‍ನೊ ಖ್ಹುಗ್ಗೀನ ಹಗಾಮ್ಮ ರೂಬೇನ್ ಝಾ಼ಡಿಮ ಜೈ಼ರ‍್ಹಾವಾನಿವಖ್ಹ್‌ತೆ ಹೋಶ್‌ನ ಫಲ್‍ನ ದೇಖಿನ್ ಇನಿ ಆಯಾ ಲೇಯನ ಲಯಿನ್ ದಿದೊ, ಇನ ದೇಖಿನ್ ರಾಹೇಲ್‍ನೆ, "ತಾರೊ ಛಿಯ್ಯೊ ಲಾಯಿರಾಖ್ಯೋತೆ ಹೋಶ್‌ನ ಫಲ್‍ಮ ಥೋಡು ಮನಾಬಿ ದೇ" ಕರಿ ಗಿಂಗೈಲಿದಿ. 15 ಇನ, ಲೇಯನೆ, "ತೂ ಮಾರ ಬಾವ್ರಿನ ಮಾಂಗಿಲಿದಿತೆ ಬಶ್‌ಕೊಯ್ನಿ? ಮಾರೊ ಛಿಯ್ಯೊ ಲಾಯೋತೆ *ಹೋಶ್‌ನ ಫಲ್‍ನಾಬಿ ಮಾಂಗಿಲೇವ್ಣುಕರಿ ಆಖ್ಹ್‌ಕರಸ್‍ಕಿಶೂ?" ಕರಿ ಬೋಲ್‍ತಾನ ರಾಹೇಲ್‍ನೆ, "ಅಛ಼್ಛುಸ್‌, ತೂ ತಾರೊ ಛಿಯ್ಯೊ ಲಾಯೋತೆ ಫಲ್‍ನ ಮನ ದಿದೀತೊ ಮಾರ ಬಾವ್ರಿನ ಆ ರಾತ್ ತಾರಕನಾಸ್‍ ರಾಖೀಲೆ" ಕರಿ ಬೋಲಿ. 16 ಖ್ಹಾಂಜ಼್‌ನೊ ಯಾಕೋಬ ಝಾ಼ಡಿಥೊ ಆವಾನಿ ವಖ್ಹ್‌ತೆ ಲೇಯ ಇನ ಖ್ಹಾಮ್ಣೆಜೈ಼ನ್, "ತೂ ಮಾರಾಕನ ಖ್ಹೂಣು, ಮೇ ಮಾರೊ ಛಿಯ್ಯೊ ಲಾಯೊತೆ ಹೋಶ್‌ನು ಫಲ್‍ಖ್ಹಾರು ದೀನ್ ತುನ ಕಮೈರಾಖಿಸ್" ಕರಿ ಬೋಲಿ. ಯೊ ರಾತ್ ಯಾಕೋಬ ಇನಿ ಜೋ಼ಡ್ಮಮಳ್ಯೊ. 17 ದೇವ್ನೆ ಲೇಯನಿ ಪ್ರಾರ್ಥನೆನ ಖ್ಹಮ್‍ಜ್ಯೊ. ಯೊ ಬೇಜೂನಿ ಹುಯಿನ್ ಯಾಕೋಬನ ಪಾಚ಼್‍ನು ಪರ್ಖ್ಹೊಲಡ್ಕು ಜ಼ಣಿ. 18 ಲೇಯನೆ, "ಮಾರಿ ದಾಸಿನ ಮೇ, ಮಾರ ಬಾವ್ರಿಕನ ದಿನಾಖಿತೆ ಇನಖ್ಹಾಜೆ ದೇವ್‍ಥಿ ಮನ ಇನಾಮ್‌ ಮಳ್ಯು" ಕರಿ ಯೊ ಲಡ್ಕಾನ "ಇಸ್ಸಾಕಾರ್" ಕರಿ ನಾಮ್‌ಮ್ಹೇಲಿ. 19 ಲೇಯನೆ ಪಾಛು಼ ಬೇಜೂನಿ ಹುಯಿನ್ ಯಾಕೋಬನ ಛೋ಼ನು ಪರ್ಖ್ಹೊಲಡ್ಕು ಜ಼ಣಿ. 20 ಲೇಯನೆ, "ದೇವ್ ಮನ ಅಛ಼್ಛು ಇನಾಮ್ ದೀರಾಖ್ಯೋಸ್. ಮೇ ಮಾರೊ ಬಾವ್ರಿನ ಛೋ಼ಜ಼ಣ ಪರ್ಖ್ಹಾ ಲಡ್ಕಾವ್ನ ಜ಼ಣಿತೆ ಇನಖ್ಹಾಜೆ ಯೊ ಮಾರಿಜೋ಼ಡ್ಮಾಸ್ ಜಿವ್ಣು ಕರ್‌ಶೆ" ಕರಿ ಬೋಲಿನ್ ಯೊ ಲಡ್ಕಾನ "ಜೆಬುಲೂನ್" ಕರಿ ನಾಮ್‌ಮ್ಹೇಲಿ. 21 ಇನಾಪಾರ್ ಇನೆ ತಯೇಡ ಲಡ್ಕಾನ ಜ಼ಣೀನ್ ಇನ, "ದೀನಾ" ಕರಿ ನಾಮ್‌ಮ್ಹೇಲಿ. 22 ಅನಾಪಾರ್ ದೇವ್ನೆ ರಾಹೇಲ್‍ನ ಯಾದ್‌ಕರಿಲಿನ್ ಇನಿ ಬಿಂತಿನ ಖ್ಹಮ್‍ಜಿನ್ ಇನ ಲಡ್ಕ ಹುವಾನಿತರ ಕರ‍್ಯೊ. 23 ಯೊ ಬೇಜೂನಿ ಹುಯಿನ್ ಪರ್ಖ್ಹೊ ಲಡ್ಕು ಜ಼ಣಿನ್, "ದೇವ್ನೆ ಮನಥೂತೆ ಖ್ಹರಮ್‌ನ ಪರಿಹಾರ್‌ ಕರ‍್ಯೊ" ಕರಿ ಬೋಲಿ. 24 ಆನಾಹುಯಿನ್ ಇನೆ, "ಯೆಹೋವ ಮನ ಬಿಜೇಕ್ ಪರ್ಖ್ಹೊಲಡ್ಕು ದಿಶೆ" ಕರಿ ಬೋಲಿನ್ ಇನ, "ಯೋಸೇಫ್" ಕರಿ ನಾಮ್‌ಮ್ಹೇಲಿ.

25 ರಾಹೇಲ್‍ನೆ ಯೋಸೇಫನ ಜ಼ಣೀತೆ ಇನವಾರ್ ಯಾಕೋಬನೆ ಲಾಬಾನನ, "ಮೇ ಮಾರ ದೇಖ್ಹ್‌ಮ ಛಾ಼ತೆ ಶೊಂತ್‍ ಝ಼ಗೊನ ಜಾ಼ವನ ಮನ ಹುಕುಮ್‍ದೆ. 26 ಮೇ ಚಾ಼ಕ್ರಿ ಕರೀನ್ ಲೀಲಿದೋತೆ ಬಾವ್ಣೆನಾಬಿ ಮಾರ ಲಡ್ಕಾವ್‍ನಾಬಿ ಮಾರಿ ಜೋ಼ಡ್ಮ ಮೋಕಲ್ನು. ಮೇ ತುನ ಕರ‍್ಯೊತೆ ಚ಼ಾಕ್ರಿ ತುನ ಮಲುಮ್‌ಛಾ಼" ಕರಿ ಬೊಲ್ಯೊ. 27 ಲಾಬಾನನೆ ಇನ, "ಮಾರಪರ್ ಗೋರ್‌ಕರೀನ್ ಹಜ಼್ಜಾಸ್ ರ‍್ಹೆ. ಯೆಹೋವನೆ ತಾರಖ್ಹಾಜೇಥಿ ಮನ ಆಶೀರ್ವಾದ್‌ ಕರಿರಾಖ್ಯೋಸ್ ಕರಿ ಅಛ್ಛಿನಿತರ ಮಾಲುಮ್‍ ಕರಿರಾಖ್ಯೋಸ್. 28 ಮೇ ತುನ ಶಾತ್ ಶಂಬ್‌ಳ ದೇವ್ಣು ಬೋಲ್ ದೆವುಸ್" ಕರಿ ಬೊಲ್ಯೊ. 29 ಇನ ಯಾಕೋಬನೆ, "ಮೇ ತುನ ಕರ‍್ಯೊತೆ ಚಾ಼ಕ್ರಿನಾಬಿ ಮಾರ ಕಬ್‌ಜಾ಼ಮ ಥೂತೆ ತಾರು ಜೀನ್‌ಜಿನಾವರ್ ಖ್ಹಾರು ಭಡ್ತುಗಯೂತೇಬಿ ತುನ ಮಾಲುಮ್. 30 ಮೇ ಆವಾನ ಅಗಾಡಿ ತುನ ಥೂತೆ ಥೋಡುಸ್. ಹಮ್ಕೆ ಯೊ ಘಣುಜಾ಼ಖ್ಹತ್‌ ಹುಯಿರ‍್ಹುಸ್. ಮೇ ಹಾತ್‌ಘಾಲುತೆ ಖ್ಹಾರಾಸ್‍ಕಾಮ್ಮಾಬಿ ಯೆಹೋವನೆ ತುನ ಆಶೀರ್ವಾದ್‌ರಾಖ್ಯೋಸ್. ಕತೋಬಿ ಮೇ ಮಾರ ಶೊಂತ್ ಘರ‍್ನಾಖ್ಹಾಜೆ ಕದೆ ಕಮೈಲೀಶ್?" ಕರಿ ಬೊಲ್ಯೊ. 31 ಇನ, ಲಾಬಾನನೆ, "ತುನ ಮೇ ಶಾತ್ ದೆವ್ಣು ಬೋಲ್" ಕರಿ ಬೋಲಖ್ಹತರ್ ಯಾಕೋಬನೆ, "ಮನ ಶಾತ್‌ಬಿ ನಕೋದೆ, ತೂ ಮನ ಆ ಎಕ್ ಕಾಮ್ ಖಲಿ ಕರ‍್ಯೋತೊ ಬಶ್, ಮೇ ಪಾಛೊ಼ ತಾರ ಮಂಧಾನ ಚ಼ರೈನ್ ಕಾವಲ್ ಕರುಸ್" 32 ಯೊ ಶಾತ್‌ಕತೊ, "ಹಮ್ಕೆ ಮೇ ತಾರ ಮಂಧಾಮ ಜೈ಼ನ್, ಮೇಂಢಾವ್‌ಮ ಟಿಪ್‌ಕ್ಯು ಅಜು಼ ಮಚ್ಚೊ಼ರ‍್ಹಾವಾಳನಾಬಿ, ಕಾಳುರ‍್ಹಾವಳುಬಿ, ಬೋಕ್ಡಾವ್‍ಮ ಟಿಪ್‌ಕ್ಯು ಅಜು ಮಚ಼್ಚೊರ‍್ಹವಾಳನ, ಅಲಕ್‍ ಕರುಸ್. ಯೋಸ್ ಮಾರು ಶಂಬ್‌ಳ ಹುಯಿರ‍್ಹಾವದೆ. 33 ಅಮ್‌ರ‍್ಹಯುತೊ ಆವ್‌ಶೇತೆ ಹಗಾಮ್ಮ ಮಾರಿ ಶಂಬ್‌ಳನಖ್ಹಾಜೆ ಮೇ ತಾರಕನ ಆವಾನಿ ವಖ್ಹ್‌ತೆ ಮಾರೊಖ್ಹಾಚೊ಼ ದಿಲ್ಲಸ್ ಮನ ಸಾಕ್ಷಿದಿಶೆ. ಬೋಕ್ಡಾವ್‍ಮ ಟಿಪ್‌ಕ್ಯು ಕೊಂತೊ ಮಚ಼್ಚೊ ನಾರ‍್ಹವಾಳು, ಮೇಂಢಾವ್‌ಮ ಕಾಳು ನಾರ‍್ಹವಾಳು, ಮಾರಕನ ಮಳ್ಯುತೊ ಇನ ಚೋ಼ರಿ ಕರ‍್ಯುಹುಯುಕರಿ ಬೋಲೆಜಾ಼ಯ್" ಕರಿ ಬೊಲ್ಯೊ. 34 ತದೆ ಲಾಬಾನನೆ, "ಅಛ಼್ಛೂಸ್, ತೂ ಬೋಲ್ಯೊತೆ ಇಮ್ಮಸ್ ಹುವಾದೆ" ಕರಿ ಬೊಲ್ಯೊ. 35 ಯೋಸ್ ದನ್ ಲಾಬಾನನೆ ಬೋಕ್ಡಾವ್‍ಮ ಬರಾಕ್ ಅಜು಼ ಮಚ್ಚೊ಼ರ‍್ಹಾವಾಳುಬೀ, ಬೋಕ್ಡಿಯೇಮ ಟಿಪ್‌ಕ್ಯು ಮಚ್ಚೊ಼ರ‍್ಹಾಳನಾಬಿ, ಕತೊ ಜ಼ರ ಧೋಳುರಂಗ್ ದೆಖಾವತೆ ಆಖ್ಖಾಸ್‍ನಾಬಿ, ಮೇಂಢಾವ್‌ಮ ಕಾಳುರ‍್ಹಾವಳನಾಬಿ ಅಲಕ್ ಕರೀನ್ ಇನ ಲಡ್ಕಾವ್ನ ದಿನಾಖ್ಯೊ. 36 ಲಾಬಾನನೆ ಇನಾಬಿ, ಯಾಕೋಬನಾಬಿ ತೀನ್ ದನ್ನು ಚಾಲ್‌ಕುಚ಼್ ಕರಾಯೆತ್ರೆ ಅಂತರ್‌ ದೂರ್ ಮ್ಹೇಲ್ಯೊ. ಯಾಕೋಬನೆ ಲಾಬಾನನು ಮಂಧಾಮ ಉಭ್‌ರ‍್ಯಾಹುಯಾನ ಚ಼ರಾಯೊ. 37 ಅಮ್‍ರ್ಹಾವಪರ್ ಯಾಕೋಬನೆ ಚಿನಾರು, ಬಾದಾಮ್‌, ಅರ್ಮೋನ್ ಕರಿ ಝಾ಼ಡವ್‍ನು ಕಚ್ಚಾ಼ ಲಠ್ಠಾವ್ನ ಲಯಿನ್ ಲಾಂಬೆ ಲಾಂಬೇಥಿ ಛ಼ಾಲ್ನ ಛೀಲ್ಯೊ. 38 ಇನಾಮನು ಧೋಳು ರಂಗ್ ದೆಖಾವನಿತರ ಕರ‍್ಯೊ. ಯೊ ಲಠ್ಠಾವ್ನ ಬೋಕ್ಡಮೇಂಢಾವ್ನು ಮಂಧಾ ಪಾಣಿ ಪೀಯಾನು ಟೊಟ್ಟಿಯೇಮ ಮ್ಹೇಲ್ಯೊ. ಬೋಕ್ಡಮೇಂಢ ಪಾಣಿ ಪಿಯಾನಿ ವಖ್ಹ್‌ತೇಸ್, ಮಳ್‌ತುಥು. 39 ಬೋಕ್ಡ ಮೇಂಢ ಯೊ ಲಠ್ಠಾವ್ನ ದೇಖಿನ್ ಏಕ್‌ಥಿಏಕ್ ಮಳ್ವಾತೆ ಇನಖ್ಹಾಜೆ ಬರಾಕೆ, ಟಿಪ್‌ಕ್ಯು, ಮಚ್ಚೊ಼ರ‍್ಹಾವಳು ಚೆಲ್ಕಾವ್ನ ಜ಼ಣ್‌ತುಥು. 40 ಯಾಕೋಬ ಯೊ ಚೆಲ್ಕಾವ್ನ ಲಾಬಾನನ ಮಂಧಾವ್‌ಮ ಮಳಾಯೊಕೊಂತೆ ಮಾರು ಕರಿ ಅಲಕ್ ಕರಿಲಿದೊ. ಅಜು಼ ಲಾಬಾನನು ಬೋಕ್ಡ ಮೇಂಢಾವ್ನು ಮ್ಹೋಡು ಬರಾಕೆರ‍್ಹಾವಳು ಯೊ ಬೋಕ್ಡಾವ್‍ನು ಅಜು಼ ಕಾಳು ಮೇಂಢಾವ್‌ ಭಣಿ ಫರಾಯೊ. 41 ಆನಾಹುಯಿನ್‌ ಘಣು ತಾಖತ್‌ನು ಬೋಕ್ಡು ಮೇಂಢು ಮಳ್ವಾನಿ ವಖ್ಹ್‌ತೆ ಯೊ ಲಠ್ಠಾವ್‍ನ ದೇಖಿನ್ ಮಳ್ವಾದೆ ಕರಿ ಯಾಕೋಬನೆ ಲಠ್ಠಾವ್‍ನ ಟೊಟ್ಟಿಯೇಮ ಮ್ಹೇಲ್ಯೊ. 42 ಕತೋಬಿ ಬೋಕ್ಡ ಮೇಂಢ ಕಮ್‍ಜೋ಼ರಿ ರ‍್ಹವಾನಿವಖ್ಹ್‌ತೆ ಯೊ ಲಠ್ಠಾವ್ನ ಟೊಟ್ಟಿಯೇಮ ಮ್ಹೇಲ್ತೊಥೊಕೊಯ್ನಿ. ಅಮ್ನಿ ಪರಕ್ಮ ಕಮ್‍ಜೋ಼ರಿನು ಮಂಧು ಲಾಬಾನನು ಪಾಲ್‍ಹುಯು. ತಾಖತ್‍ರ‍್ಹಾವಳು ಯಾಕೋಬನು ಪಾಲ್ನ ಆಯು. 43 ಆ ಪರಕ್ಮ ಯಾಕೋಬನೆ ಘಣು ಧನ್‍ದೌಲತ್ತಿ ಬಣ್ಯೊ ಇನ ಮೇಂಢಾವ್ನು ಮಂಧು, ಚಾ಼ಕ್ರಿಕರಾವಾಳು. ಊಟ್, ಗಧೇಡು, ಜಾ಼ಖ್ಹತ್‌ಥು.