ಆದಿಕಾಂಡ 42

ಅನಾಜ಼್‌ಲ್ಯಾವನ ಯೋಸೇಫ್‌ನ ಭೈಯೇ ಈಜಿಪ್ಟ್‌ಮ

1 ಈಜಿಪ್ಟ್‌ಮ ಅನಾಜ಼್ ಮಳಸ್ ಕರಿ ಖಬರ್‌ ಯಾಕೋಬ್‍ನ ಮಾಲುಮ್‌ಪಡೀನ್‌, ಇನೆ ಇನ ಲಡ್ಕಾವ್ನ, "ತುಮೆ ಮ್ಹೋಡುಮ್ಹೋಡು ಶನಾ ದೇಖೊಸ್‍? 2 ಈಜಿಪ್ಟ್‌ದೇಖ್ಹ್‌ಮ ಅನಾಜ಼್ ಮಳಸ್ ಕರಿ ಮೇ ಖ್ಹಮ್‌ಜ್ಯೊ; ಅಪ್ಣೆ ಭುಕ್‌ಥಿ ಮರ‍್ನುನಾತೆ ಬಚಾ಼ನಖ್ಹಾಜೆ ತುಮೆ ಹಿಜ್ಜಾ಼ ಜೈ಼ನ್ ಹೋಣುತೆ ಅನಾಜ಼್‌ನ ಮೋಲ್‌ಲೀನ್ ಆವೊ" ಕರಿ ಬೊಲ್ಯೊ. 3 ಯೋಸೇಫ್‌ನ ದಖ್ಹ್‌ಜ಼ಣ ಭೈಯೇ ಅನಾಜ಼್ ಲ್ಯಾವನಖ್ಹಾಜೆ ಈಜಿಪ್ಟ್ ದೇಖ್ಹ್‌ನ ನಿಕ್‌ಳ್ಯ. 4 ಕತೋಬಿ ಯೋಸೇಫ್‌ನ ಪೀಟ್‌ನ ಪೈದಹುಯೋತೆ ನ್ಹಾನೊ ಭೈ ಬೆನ್ಯಾಮೀನ್ನ ಯಾಕೋಬನೆ ಇವ್ಣಿಜೋ಼ಡ್ಮ ಮೋಕ್‌ಲ್ಯೊಕೊಯ್ನಿ. ಶನಕತೊ, ಇನ ಕಾಯ್‌ತೋಬಿ ಇವ್ಣೇಥಿ ಖತ್ರ ಹುಯಿಜಾ಼ಶೆಕರಿ ಇನ ಡರ್‌ಥೊ. 5 ಕಾನಾನ್‌ ದೇಖ್ಹ್‌ಮಾಬಿ ಕಾಳ್‌ದುಕಾಳ್‌ಥೂತೆ ಇನಖ್ಹಾಜೆ ಈಜಿಪ್ಟ್‌ದೇಖ್ಹ್‌ನ ಅನಾಜ಼್‌ಲ್ಯಾವನ ಆಯೂತೆ ಇವ್ಣಾಮ ಇಸ್ರಾಯೇಲ್ ಕತೊ ಯಾಕೋಬನ ಛಿಯ್ಯಾಬಿಥ. 6 ತದೆ ಈಜಿಪ್ಟ್‌ದೇಖ್ಹ್‌ಮ ಹುಕುಮ್ ಚ಼ಲವ಼್ ಕರ್ತೋಥೋತೆ ಅಜು಼ ಅದ್ಮೇವ್‌ನ ಅನಾಜ಼್ ವೇಚೂ಼ಕರ್‌ತೋಥೋತೆ ತದೆ ಯೋಸೇಫನ ಖ್ಹಾಮ್ಣೆ ಇನ ಭೈಯೇ಼ ಆಯಿನ್ ಆಡ್‌ಪಡ್ಯ. 7 ಯೋಸೇಫನೆ ಇವ್ಣುನ ದೇಕ್‌ತಾಸ್ನ ಖ್ಹಣೇದ್‌ಧರಿಲಿದೊ. ಕತೋಬಿ ಇವ್ಣುನ ಮಾಲುಮ್‌ಕೊಂತೆ ತಿಮ್ಮಸ್ ಗುರ್‌ಕೈನ್, "ತುಮೆ ಕಿಜ್ಜಾ಼ವಾಳ?" ಕರಿ ಪುಛಾ಼ಯೊ. ಇವ್ಣೆ, "ಹಮೆ ಅನಾಜ಼್ ಲ್ಯಾವನಖ್ಹಾಜೆ ಕಾನಾನ್ ದೇಖ್ಹ್‌ಥ ಆಯಿರ‍್ಹಾಸ್" ಕರಿ ಬೋಲ್ಯ. 8 ಮೋಟಭೈಯೇನು ಖ್ಹಣೇದ್ ಯೋಸೇಫನ ಮಾಲುಮ್‌ಪಡ್ಯುತೋಬಿ ಇನು ಖ್ಹಣೇದ್ ಇವ್ಣುನ ಮಾಲುಮ್‌ಪಡ್ಯೂಕೊಯ್ನಿ. 9 ಇವ್ಣಿಬಾರೇಮ ಇನೆ ದೇಖ್ಯೋತೆ ಖ್ಹೋಣ್ಯಾವ್‌ನ ಯೋಸೇಫನೆ ಯಾದ್‌ಕರಿಲಿನ್ ಇವ್ಣುನ, "ದೇಖೊ, ತುಮೆ ಪತ್ತೊದೇಖವಾಳ; ಹಮಾರ ದೇಖ್ಹ್‌ನು ಕಮ್‌ಜೋ಼ರಿ ಝ಼ಗೋನ ಪತ್ತೋಕರಾನ ಆಯಿರ‍್ಹಾಸ್" ಕರಿ ಬೊಲ್ಯೊ. 10 ಇನ ಇವ್ಣೆ "ಕಾಹೆಲ ಯಜಕ್, ತಾರ ಸೇವಕ್ ಹುಯಿರಾತೆ ಹಮೆ ಅನಾಜ಼್ ಲ್ಯಾವಾನಖ್ಹಾಜೆ ಆಯಿರ‍್ಹಾಸ್. 11 ಹಮೆ ಅಖ್ಖಾಜ಼ಣಾಬಿ ಎಕ್ಕಸ್ ಬಾನ ಛಿಯ್ಯಾ; ಹಮೆ ಖ್ಹಾಚಾಸ್‌ ಪಣ್ಕಿ ಪತ್ತೊದೇಖವಾಳ ಕಾಹೆ" ಕರಿ ಬೋಲ್ಯ. 12 ಯೋಸೇಫನೆ ಇವ್ಣುನ, "ಝೂ಼ಟಿ, ಹಮಾರ ದೇಖ್ಹ್‌ನು ಕಮ್‌ಜೋ಼ರಿ ಝ಼ಗೋನ ಮಾಲುಮ್‌ಕರಿಲ್ಯಾವಾನ ಖ್ಹಾಜೇಸ್ ಅಯಿರ‍್ಹಾಸ್‌, ಕರಿ ಬೊಲ್ಯೊ. 13 ಇನಖ್ಹಾಜೆ ಇವ್ಣೆ, "ತಾರ ಸೇವಕ್‌ಹುಯ್‌ರಾತೆ ಹಮೆ ಭಾರಜ಼ಣ ಭೈಯೇ; ಕಾನಾನ್ ದೇಖ್ಹ್‌ವಾಳ, ಎಕ್ಕಸ್ ಬಾನ ಲಡ್ಕಾವ್; ಹಮಾರಮ ನ್ಹಾನೊ ಭೈ ಬಾಕನ ಛಾ಼; ಏಕ್‌ಜ಼ಣೊಕೊಯ್ನಿ" ಕರಿ ಬೋಲ್ಯ. 14 ಯೋಸೇಫನೆ ಇವ್ಣುನ, "ಮೇ ಬೋಲ್ಯೋತೆ ತಿಮ್ಮಸ್ ತುಮೆ ಪತ್ತೊದೇಖಾವಳಸ್. 15 ಆ ಖ್ಹಾಚೀಕಿ ಝೂ಼ಟಿಕಿ ಕರಿ ಮಾಲುಮ್‌ಪಡ್‌ನುಕತೊ ತುಮೆ ತುಮಾರ ನ್ಹಾನ ಭೈನ ಬುಲೈಲ್ಯಾವ್ಣು. ಯೊ ನಾ ಆಯೋತೊ, ಫರೋಹನ ಖ್ಹಾಮ್‌ಬಿ, ತುಮೆ ಹಜ್ಜಾ಼ಥ ನಾಜಾ಼ವ್ಣು. 16 ಇನ ಬುಲೈಲೀನ್ ಆವಾನ ತುಮಾರಾಮಥ ಏಕ್‌ಜ಼ಣಾನ ಮೋಕ್‌ಲೊ. ಯೊ ಆವಾಲಗೂಬಿ ತುಮುನ ಖ್ಹಾರ್‌ಕೋಟ್‌ಮ ರಾಖುಸ್. ಅಮ್ ತುಮಾರಿ ಖ್ಹಾರಿವಾತೆನ ತರೀಪ್‌ಶ ಕರೀನ್ ತುಮೆ ಖ್ಹಾಚ಼ಕಿ ಕೊಯ್ನಿಕಿ ಕರಿ ಮಾಲುಮ್ ಕರಿಲೆವುಸ್‌. ತುಮಾರೊ ನ್ಹಾನೊಭೈ ಆಯೋನಾತೊ, ಫರೋಹನ ಜಾನ್ನಖ್ಹಾಮ್‌ಬಿ, ತುಮೆ ಪತ್ತೊದೇಖವಾಳೊಸ್" ಕರಿ ಬೋಲಿನ್‌, 17 ಇವ್ಣುನ ತೀನ್ ದನ್‌ಲಗು ಕಾವಲ್‌ಮ ರಾಖ್ಯೊ.

18 ತೀನ್ನರೋಜ಼್‌ಮ ಯೋಸೇಫ್‌ನೆ ಇವ್ಣುನ ಬುಲೈನ್, "ಮೇ ದೇವ್‌ಮ ಡರ್‌ಭಕ್ತಿಥಿರ‍್ಹಾವಾಳೊ; ತುಮುನ ಜಾನ್‌ಪರ್ ಹರಖ್ಹ್‌ಉಶೇತೊ ಮೇ ಬೋಲುತೆ ತಿಮ್ ಕರೊ; 19 ತುಮೆ ಖ್ಹಾಚಉಶೇತೊ ತುಮಾರಾಮ ಏಕ್‌ಜ಼ಣಾನ ಖಲಿ ಖ್ಹಾರ್‌ಕೋಟ್‌ಮ ರಾಖುಸ್. ಬಿಜಾ಼ಖ್ಹಾರ ತುಮಾರ ಕುಟುಂಬ್‌ವಾಳನ ಹೋಣುತೆ ಅನಾಜ಼್ ಲೀನ್‌ಜಾ಼ವೊ. 20 ಕತೋಬಿ ತುಮಾರ ನ್ಹಾನ ಭೈನ ಮಾರಾಕನ ಲೀನ್ ಆವ್ಣು, ಬುಲೈಲೀನ್ ಆಯಾತೊ, ತುಮಾರಿ ವಾತ್ ಖ್ಹಾಚಿಕರಿ ಮಾಲುಮ್‌ಕರಿಲೆವುಸ್‌, ತದೆ ತುಮೆ ಮರ್‌ಶುಕೊಂತೆ ಬಚ಼್‌ಶು" ಕರಿ ಬೊಲ್ಯೊ. ಇವ್ಣೆ ಇಮ್ಮಸ್ ಕರಾನ ಮಾನಿಲಿದ. 21 ತದೆ ಇವ್ಣ ಇವ್ಣಾಸ್‌ಮ, "ಅಪ್ಣೆ ಅಪ್ಣ ನ್ಹಾನ ಭೈನ ಕರ‍್ಯಾತೆ ಧೋಕಾನ ಬರೋಬರ್‌ನು ನಿಶತ್‌ಲೆವ್‌ ಕರಿಯೇಸ್. ಇನೆ ಅಪ್ಣುನ ಗಿಂಗೈಲಿದೊ. ಇನಿ ಜಾನ್ನಿ ವದೇಖ್ಹ್‌ನ ಮಾಲುಮ್ ಕರೀನ್‌ಬಿ ಅಪ್ಣೆ ಇನಿ ಬೋಲಿನ ಕಾನ್‌ ಕೋದಿದಾನಿ. ಇನಖ್ಹಾಜೇಸ್ ಆ ಖ್ಹತಾಪ್‌ಣಿಮ ಖ್ಹಪ್‌ಡಿಗಯ" ಕರಿ ಬೋಲಿಲಿದ. 22 ಇನಖ್ಹಾಜೆ ರೂಬೇನ್ನೆ, "ಯೊ ಛೋ಼ಕ್ರಾನ ಶನೂಬಿ ಕೇಡ್ ನಕೊ ಕರೊ ಕರಿ ಮೇ ಬೊಲ್ಯೊ. ತುಮೆ ಖ್ಹಮ್‌ಜ್ಯಾಕೊಯ್ನಿ, ಇನಖ್ಹಾಜೆ ಇನೊ ಜಾನ್‌ ಕಾಡಾನಿ ಬಾರೇಮ ಅಪ್ಣೆ ಹಮ್ಕೆ ಜ಼ವಾಬ್ ದೇವ್ಣು ಪಡ್ಯು" ಕರಿ ಬೊಲ್ಯೊ. 23 ಯೋಸೇಫನೆ ಬೇ ಬೋಲಿಮ ವಾತ್ ಬೋಲಖ್ಹರ್ಕ ಏಕ್‌ಜ಼ಣಾನಿ ಜೋ಼ಡ್ಮ ವಾತ್ ಬೋಲುಕರ್‌ತೊಥೋತೆ ಇನಖ್ಹಾಜೆ ಇನ ಅವ್ಣಿವಾತ್ ಮಾಲುಮ್ ಪಡುಕರಸ್ ಕರಿ ಅವ್ಣೆ ಲಾಝ್ಯಾಕೊಯ್ನಿ. 24 ಇನೆ ಇವ್ಣಕಂಥೊ ಓಠೆಜೈ಼ನ್ ರೊಯೊ. ಇನಕೇಡೇಥು ಇವ್ಣಕನ ಪಾಛೊ಼ಫರಿ ಆಯಿನ್, ಇವ್ಣಿ ಜೋ಼ಡ್ಮ ವಾತ್‌ಬೋಲಿನ್ ಸಿಮೆಯೋನ್ನ ಧರೈನ್ ಇವ್ಣ ಡೋಳಾನ ಖ್ಹಾಮ್ಣೇಸ್ ಇನ ಭಂದಾಯೊ.

ಯೋಸೇಫನ ಭೈಯೇ಼ ಕಾನಾನ್ ದೇಖ್ಹ್‌ನ ಪಾಛ಼ ಆಯಾತೆ

25 ಅನಾಪಾರ್ ಯೋಸೇಫನೆ ಇನ ಆಳ್‌ನ, "ಯೊ ಅದ್ಮೆವ್‌ನ ಕೋಥ್‌ಳಾವ್‌ಮ ಅನಾಜ಼್ ಭರೈನ್ ಏಕೇಕ್‌ ಜ಼ಣಾವ್ನ ಕೋಥ್‌ಳಾವ್‌ಮಾಸ್‌ ಇವ್ಣೆ ಲಾಯಥಾತೆ ಪೈಶಾನ ಘಾಲಿದೀನ್, ಇವ್ಣ ಚಾ಼ಲ್‍ಕುಚ಼್‍ನ ಹೋಣುತೆ ಖಾಣನ ದೆವ್ಣು" ಕರಿ ಹುಕುಮ್ ಕರಾಮ ಇವ್ಣೆ ಇಮ್ಮಸ್ ಕರ‍್ಯು. 26 ಆ ಅಖ್ಖು ಹುವಾನ ಬಾದ್ಮ ಇನ ಭೈಯೇವ್‌ನೆ ಇವ್ಣೆ ಲಿದಾತೆ ಅನಾಜ಼್‌ನ ಗಧೇಡವ್‌ಪರ್ ಢೊಯಿಲೀನ್‌ ನಿಕ್‌ಳ್ಯಾ. 27 ರಾತ್ಮ ಎಕ್ ಝ಼ಗೋಮ ರ‍್ಹಯ. ಇವ್ಣಾಮ ಏಕ್ಜ಼ಣಾನೆ ಇನ ಗಧೇಡಾನ ಚಾ಼ರೊ ನಾಕ್ಣುಕರಿ ಇನೊ ಕೋಥ್‌ಳೊ ಛೋ಼ಡ್ಯೊ. ಇನೆ ಲಾಯೊಥೋತೆ ಪೈಶಾ ಇನ ಮ್ಹೋಡಾಮಾಸ್‌ಥೂತೆ ದೇಖ್ಯೊ. 28 "ಮೇ ದಿದೋತೆ ಪೈಶಾ ಮನ ಪಾಛ಼ಮಳ್ಯಾ: ಹಂದೇಕ್, ಮಾರ ಕೋಥ್‌ಳಾಮ ಛಾ಼" ಕರಿ ಇನ ಭೈಯೇನ ಬೊಲ್ಯೊ. ಇವ್ಣೆ ಅಕ್‌ಬಕೈಜೈ಼ನ್, ಏಕ್‌ಥಿ ಏಕ್‌ಜ಼ಣ ಘಬ್‌ರೈ ದೇಕ್‌ತಹುಯಿನ್, "ಅಪ್ಣುನ ದೇವ್ನೆ ಅಮ್‌ ಶನ ಕರ‍್ಯೊ?" ಕರಿ ಬೋಲಿಲಿದ. 29 ತದೆ ಇವ್ಣೆ ಕಾನಾನ್ ದೇಖ್ಹ್‌ನ ಇವ್ಣೊ ಬಾ ಹುಯಿರೋತೆ ಯಾಕೋಬ್‌ಕನ ಆಯಿನ್ ಚಾ಼ಲ್ಯೂತೆ ಅಖ್ಖೀಸ್ ಬಾರೇಮ ಖ್ಹಮ್‌ಜಾ಼ಡ್‌ತ, 30 "ಯೊ ದೇಖ್ಹ್‌ನೊ ಮೋಟೊ ಹಮಾರಿ ಜೋ಼ಡ್ಮ ಕಠೋರ್‌ಥಿ ವಾತ್‌ಬೋಲಿನ್‌ ಹಮುನ ಪತ್ತೊದೇಖವಾಳೊ ಕರಿ ಲಾಝ್ಯೊ. 31 ಹಮೆ ಇನ, ‘ಹಮೆ ಖ್ಹಾಚಸ್ ಪಣ್ಕಿ ಪತ್ತೊದೇಖವಾಳ ಶಾತ್ಬಿಕಾಹೆ, 32 ಹಮೆ ಎಕ್ ಬಾನ ಪೈದಹುಯಾತೆ ಭಾರಜ಼ಣ ಭೈಯೇ; ಹಮಾರಮ ಏಕ್‌ಜ಼ಣೊಕೊಯ್ನಿ. ನ್ಹಾನೊ ಹಮ್ಕೆ ಕಾನಾನ್ ದೇಖ್ಹ್‌ಮ ಹಮಾರ ಬಾಕನ ಛಾ಼’ ಕರಿ ಬೋಲ್ಯ. 33 ಇನಾಖ್ಹಾಜೆ ದೇಖ್ಹ್‌ನೊ ಮೋಟೊ, ತುಮೆ ಖ್ಹಾಚಾಕಿ ಕೊಯ್ನಿಕಿ ಕರಿ ಮಾಲುಮ್ ಪಡಾನ ಖ್ಹಾಜೆ ತುಮಾರಾಮ ಏಕ್‌ಜ಼ಣಾನ ಹಮಾರಕನಾಸ್‌ ಮ್ಹೇಲಿನ್ ಜಾ಼ವೊ; ತುಮಾರ ಕುಟುಂಬ್‌ವಾಳನ ಭಾಡ್‌ನ ಖತಮ್‌ಕರಾನ ಹೋಣೂತೆತ್ಯೊ ಲೀನ್ ಜ಼ಯೇಜಾ಼ಯ್. 34 ಕತೋಬಿ ತುಮಾರ ನ್ಹಾನ ಭೈನ ಮಾರಾಕನ ಬುಲೈಲೀನ್ ಆವ್ಣು. ಬುಲೈಲೀನ್ ಆಯಾತೊ, ತುಮೆ ಪತ್ತೊದೇಖವಾಳ ಕಾಹೆತೆ ಖ್ಹಾಚಾ಼ಸ್‌ಕರಿ ಮಾಲುಮ್ ಕರಿಲೆವುಸ್‌; ತುಮಾರ ಮೋಟಭೈನ ಛುಟ್ಕಾರ್ ಕರುಸ್ ಅಜು಼ ತುಮೆ ಆ ದೇಖ್ಹ್‌ಮ ಹೋಣುತೆತಿಮ್ ರ‍್ಹಿಯೆಜಾ಼ಯ್ ಕರಿ ಬೊಲ್ಯೊ. 35 ಇವ್ಣೆ ಇವ್ಣ ಕೋಥ್‌ಳಾವ್ನ ಛೋ಼ಡಿ ದೇಖ್‌ತಾನ ಹರೇಕ್‌ಜ಼ಣಾನ ಕೋಥ್‌ಳಾಮಾಬಿ ಇವ್ಣ ಇವ್ಣ ಪೈಶಾನು ಗಂಟ್‌ಡು ಮಳ್ಯು. ಯೊ ಗಂಟ್‌ನ ಇವ್ಣೊ ಬಾಬಿ ಇವ್ಣೆ ದೇಖಿನ್ ಘಬ್‌ರೈಗಯ. 36 ತದೆ ಇವ್ಣೊ ಬಾ ಯಾಕೋಬನೆ ಇವ್ಣುನ, "ಮನ ಬಿಣ್‍ ಲಡ್ಕವಾಳನಿತರ ಕರಿನಾಖ್ಯ; ಯೋಸೇಫಬಿ ಕೊಯ್ನಿ, ಸಿಮೆಯೋನ್‌ಬಿಕೊಯ್ನಿ, ಬೆನ್ಯಾಮೀನನಾಬಿ ಬುಲೈಲೀನ್ ಜಾ಼ವ್ಣುಕರಿ ಛಾ಼. ಆ ಅಖ್ಖು ವದೇಖ್ಹ್‌ಬೀ ಮಾರಪರಸ್ ಆಯೂನಿ" ಕರಿ ಬೊಲ್ಯೊ 37 ತದೆ ರೂಬೇನನೆ, "ಮೇ ಆ ಛೋ಼ಕ್ರಾನ ಪಾಛೊ಼ ಲಯಿನ್ ತುನ ನಾದಿದೋತೊ ಮಾರ ಭೇ ಛಿಯ್ಯಾನ ಮಾರಿ ನಾಖೇಜಾ಼ಯ್. ಅನ ಮಾರ ಕಬ್‌ಜಾ಼ಮ ದಿದೋತೊ ಮೇ ಮ್ಹೇಲಿಶ್‌ಕೊಂತೆ ಅನ ತಾರಕನ ಬುಲೈಲೀನ್ ಆವುಸ್‌" ಕರಿ ಬೊಲ್ಯೊ. 38 ಕತೋಬಿ ಯಾಕೋಬನೆ ಇವ್ಣುನ, "ಮಾರೊ ಛಿಯ್ಯೊ ತುಮಾರಿ ಜೋ಼ಡ್ಮ ನಾ ಜಾ಼ವ್ಣು. ಅನಿ ಪಾಕ್ತಿನ ಪೈದಹುಯೊತೆ ಯೊ ಮರಿಗಯೊ, ಆ ಎಕ್ಕಸ್ಜ಼ಣೊ ಬಚಿರ‍್ಹೋಸ್‌, ವಾಟ್‌ಪರ್‌ ಕಾಯ್‌ತೋಬಿ ಅನ ಖತ್ರಹುಯುತೊ ಆ ಬುಢು ಮುಡ್‌ಕ್ಯು ತುಮಾರೇಥೀಸ್ ದುಕ್‌ನಿಜೋ಼ಡೆ ಮರಿಜೈ಼ಶ್" ಕರಿ ಬೊಲ್ಯೊ.