1 ಯೋಸೇಫನೆ ಇನಪಾರ್ ಇನು ಘರ್‌ ದೇಖಿಲ್ಯಾವಾಳನ ಬುಲೈನ್, "ಯೊ ಅದ್ಮೆವ್ ಕೋಥ್‌ಳಾಮ ಢೊವಾಯೆತ್ರೆ ಅನಾಜ಼್ ಭರೈನ್, ಏಕೇಕ್‌ ಜ಼ಣಾನ ಕೋಥ್‌ಳಾನ ಮ್ಹೋಡಾಮ ಇವ್ಣ ಇವ್ಣ ಪೈಶಾನು ಗಾಟ್‌ಡು ಮ್ಹೇಲೊ. 2 ನ್ಹಾನನ ಕೋಥ್‌ಳಾಮ ಇನೆ ಅನಾಜ಼್‌ನ ಲಾಯೋತೆ ಪೈಶಾ ಕಾಹೆತೆ, ಮೇ ಪೀಯಾನು ರೂಪಾನು ಕಟೋರೊಬಿ ಘಾಲ್ನು" ಕರಿ ಹುಕುಮ್‌ದಿದೊ. ಘರ್‌ದೇಖಿಲ್ಯವಾಳನೆ ಇಮ್ಮಸ್‌ಕರ‍್ಯೊ. 3 ವ್ಹಾಣೆ ವೇಳಿಸ್, ಇವ್ಣ ಭಯ್ಯೇನ ಗಧೇಡವ್‌ನ ಜೋ಼ಡೆ ಮೋಕ್‌ಲ್ಯೊ. 4 ಇವ್ಣೆ ಖ್ಹಯೇರ್ ಮ್ಹೇಲಿನ್ ಥೋಡಿದೂರ್‌ ಜಾ಼ವಾನ ಮಹಿಮ, ಯೋಸೇಫನೆ ಇನು ಘರ್‌ ದೇಖಿಲ್ಯಾವಾಳನ, "ತೂ ಉಠಿ ಜೈ಼ನ್ ಇವ್ಣುನ ಪೀಛೆಕರಿ ಧರಿಲಿನ್‌ ಇವ್ಣುನ, ‘ತುಮೆ ಅಛ಼್ಛುಕರಾನ ಬದಲ್‌ ಧೋಕ ಶನ ದಿದ? 5 ಯೊ ಕಟೋರಾಮ ಮಾರೊ ಯಜಮಾನ್‌ ಪೀಯಾಸ್ ಕಾಹೇಕಿಶೂ? ಇನಾಸ್‌ ದೇಖಿನ್ ಅಗಾಡಿ ಚಾ಼ಲ್‌ಶೇತೆ ಬೋಲಾಸ್ ಕಾಹೇಕಿಶೂ? ತುಮೆ ಅಮ್ ಕರ‍್ಯಾತೆ ಖರಾಬ್ ಕಾಮ್‌’ ಕರಿ ಇವ್ಣುನ ಬೋಲ್ ಕರಿ ಬೊಲ್ಯೊ. 6 ಘರ್‌ ದೇಖಿಲ್ಯಾವಾಳನೆ ಇವ್ಣ ಪೀಠೆ ಜೈ಼ನ್ ಇವ್ಣುನ ಆ ವಾತೆ ಬೋಲಾನಿ ವಖ್ಹ್‌ತೆ 7 ಇವ್ಣೆ ಇನ, "ಅಲಾ ಮಾಲಿಕ್, ತೂ ಅಥ್ರಾನಿವಾತ್ ಬೋಲೆಜಾ಼ಯ್‌? ತಾರ ಆಳ್‌ ಹುಯಿರಾತೆ ಹಮೆ ಅಥ್ರಾನು ಕಾಮ್ ಕದೇಬಿ ಕರವಾಳ ಕಾಹೆ. 8 ಪಹಿಲೆ ಹಮಾರ ಕೋಥ್‌ಳಾನ ಮ್ಹೋಡಾಮ ಹಮುನ ಮಳ್ಯುತೆ ಪೈಶಾನ ಹಮೆ ಕಾನಾನ್ ದೇಖ್ಹ್‌ಥ ಪಾಛ಼ಲೈನ್ ತುಮುನ ದಿದ. ಅಮ್‌ರ‍್ಹಾವಪರ್ ಹಮೆ ತಾರ ಯಜಮಾನ್ನ ಘರ್‌ಮಾಥು ಖ್ಹೊನ್ನ ರೂಪಾನ ಶನ ಚೋ಼ರಿಕರಿಲಿಶು? 9 ಯೊ ಕಟೋರಿ ತುಮಾರ ಆಳ್‌ಹುಯಿರಾತೆ ಹಮಾರಮ ಕಿನಾಕನ ತೋಬಿ ಮಳ್ಯುತೊ, ಇನ ಮರಣ್ ದಂಡ್‌ಹುವಾದೆ. ಎತ್ರೇಸ್ ಕಾಹೆತೆ, ಹಮೆ ಖ್ಹಾರೂಸ್ ಹಮಾರ ಯಜಮಾನ್ನ ಆಳ್‌ಹುಯ್‌ರಿಶು" ಕರಿ ಬೋಲ್ಯ. 10 ಇನಖ್ಹಾಜೆ ಇನೆ, "ಅಛ್ಛೂ಼ಸ್, ತುಮೆ ಬೋಲ್ಯಾತೆ ಇಮ್ಮಸ್‌ ಹುವಾದೆ. ಯೊ ಕಟೋರಿ ಕಿನಾಕನ ಮಳಸ್ಕಿ, ಯೊ ಮನ ಆಳ್‌ಹುಯಿಜಾ಼ವ್ಣು. ಬಿಜು಼ಜ಼ಣು ಇನ ಗಲ್‌ತಿಕಾಹೆ" ಕರಿ ಬೋಲಾನಿ ವಖ್ಹ್‌ತೆ, 11 ಇವ್ಣೆ ಫಟ್‌ಕರಿ, ಹರೇಕ್ ಜ಼ಣೂಬಿ ಇವ್ಣ ಇವ್ಣ ಕೋಥ್‌ಳಾನ ಜ಼ಮೀನ್‌ಪರ್‌ ಉತಾರೀನ್ ಯೊ ಅಖ್ಖಾನ ಛೋ಼ಡ್ಯಾ. 12 ಇನೆ ಶಾಣೇಥಿ ಧರೀನ್ ಅಡ್ಡಾಣಿಲಗು ತರೀಪ್‌ಶ ಕರೀನ್ ದೇಖ್ಯೊ. ಯೊ ಕಟೋರೊ ಬೆನ್ಯಾಮೀನ್ನ ಕೋಥ್‌ಳಾಮ ಮಳ್ಯು. 13 ತದೆ ಇವ್ಣೆ ಇವ್ಣ ಲುಂಗ್ಡಾನ ಫಾಡಿಲೀನ್ ಇವ್ಣ ದುಖ್‌ನ ವತಾಳ್ಯ; ಕೋಥ್‌ಳಾವ್ನ ಗಧೇಡವ್‌ಪರ್ ಢೊಯಿಲೀನ್‌ ಪಾಛ಼ ಖ್ಹಯೇರ್‌ನ ಆಯ. 14 ಯೆಹೂದಬಿ ಅಜು಼ ಇನ ಭೈಯೇಬಿ ಯೋಸೇಫನ ಘರೆ ಆಯ. ಯೊ ಅಜೂ಼ಬಿ ಹಿಜ್ಜಾ಼ಸ್ ಥೊ. ಇವ್ಣೆ ಇನ ಖ್ಹಾಮ್ಣೆ ಆಡ್‌ಪಡ್ಯ. 15 ಯೋಸೇಫನೆ ಇವ್ಣುನ, "ತುಮೆ ಅಮ್‌ ಶನ ಕರ‍್ಯ? ಮಾರಿನಿತರಾನು ಅದ್ಮಿ ದೇವ್ನಿ ವಾತ್‌ಖ್ಹಾರಿ ಮಾಲುಮ್‌ ಕರಿಲಿಷ್ ಕರಿ ತುಮುನ ಮಾಲುಮ್‌ಥುನಿ?" ಕರಿ ಪುಛಾ಼ವಖ್ಹತರ್, 16 ಯೆಹೂದನೆ, "ಹಮೆ ಹಮಾರ ಯಜಮಾನ್ನ ಶಾತ್‌ಬೋಲಿಯೆ? ಹಮೆ ಶಾತ್ ಫೇಡೈಯೆ? ಹಮೆ ನೀತಿವಾಳಹುಯಿನ್ ವತಾಳ್ನುಕತೊ ಶಾತ್‌ಕರ‍್ನು? ತಾರ ಆಳ್‌ನ ಪಾಪ್ನು ಕಾಮ್ನ ದೇವ್ನೆ ಭಡ್‌ಕೈರಾಖ್ಯೋಸ್‌. ಆ ಕಟೋರಿ ಕಿನಾಕನ ಮಳ್ಯುಕಿ ಯೊ ಖಲಿ ಕಾಹೆತೆ ಹಮೆ ಖ್ಹಾರೂಬಿ ಹಮಾರ ಯಜಮಾನ್ನ ಗುಲಾಮ್‌ಹುಯಿಗ" ಕರಿ ಬೊಲ್ಯೊ. 17 ಯೋಸೇಫನೆ, "ಇಮ್‌ಕದೇಬಿ ನಾಹೋಣು ಆ ಕಟೋರಿ ಕಿನಾಕನ ಮಳ್ಯೂಕಿ ಯೊ ಖಲಿ ಮನ ಗುಲಾಮ್‌ ಹುಯಿರಾವದೆ. ಬಿಜು಼ಖ್ಹಾರು ಸಮಾಧಾನ್‌ಥಿ ತುಮಾರ ಬಾಕನ ಜಾ಼ವೊ" ಕರಿ ಬೊಲ್ಯೊ.

18 ತದೆ ಯೆಹೂದ ಖನ್ನೆ ಆಯಿನ್, "ಮಾರೊ ಒಡೆಯ, ತಾರೊ ಆಳ್‌ಹುಯಿರೋತೆ ಮೇ ಎಕ್ ವಾತ್ ಮಾರ ಮಾಲಿಕ್‌ನ ಛೋ಼ಡಿ ಬೋಲಾನ ಹುಕುಮ್‌ಹೋಣು. ತಾರ ದಾಸನ ಉಪ್ಪರ್ ಇರಾದೊ ನಾಕರ‍್ನು ಶನಕತೊ ತೂ ಫರೋಹನಿ ಬರೋಬರ್‌ಕರಿ ಮನ ಮಾಲುಮ್. 19 ಮಾರ ಮಾಲಿಕ್ ಹುಯಿರೋತೆ ತೂ ಆಳ್‌ಹುಯಿರಾತೆ ಹಮಾರಿ ಬಾರೇಮ, ‘ತುಮುನ ಬಾ ಹುಯಿರ‍್ಹವೊ, ನ್ಹಾನೊ ಭೈ ಹುಯಿರ‍್ಹವೊ ಛಾ಼ಕಿಶೂ?’ ಕರಿ ಬೋಲಾಖ್ಹತರ್, 20 ಹಮೆ, ‘ಹಮುನ ಬುಢೋ ಬಾ ಛಾ಼, ಇನ ಬುಢಾಪರ್ ಪೈದಹುಯೋತೆ ಏಕ್‌ನ್ಹಾನೊ ಛಿಯ್ಯೊಬಿ ಛಾ಼, ಇನಿ ಪಾಕ್ತಿನೊ ಪೈದಹುಯೋತೆ ಮರಿಗಯೊ. ಇನಾಖ್ಹಾಜೆ ಇನಿ ಆಯಾಮ ಪೈದಹುವವಾಳಮ ಯೊ ಎಕ್ಕಸ್‌ಜ಼ಣೊ ಬಚಿರ‍್ಹೋಸ್. ಇನಾಪರ್ ಬಾನ ಘಣಿ ಪ್ಯಾರ್‌ ಛಾ಼’ ಕರಿ ಬೋಲ್ಯ. 21 ತದೆ ತುಮೆ, ‘ಮೇ ಯೊ ಛೋ಼ಕ್ರಾನ ದೇಕ್ಣು ಇನ ಮಾರಕನ ಬುಲೈಲೀನ್ ಆವೊ’ ಕರಿ ಹುಕುಮ್ ತುನೆ ದಿದೊ. 22 ಹಮೆ, ‘ಆ ಛೋ಼ಕ್ರು ಬಾನ ಮ್ಹೇಲಿನ್ ರ‍್ಹಾವಾನ ಹೋಯಿಕೊಯ್ನಿ; ಯೊ ಅಲಕ್ ಹುಯಿಗುತೊ ಬಾ ಮರಿಸ್‌ಜಾ಼ಶೆ’ ಕರಿ ಯಜಮಾನ್ ಹುಯಿರೋತೆ ತುನ ಹಮೆ ಬೋಲ್ಯ. 23 ಇನಾಖ್ಹಾಜೆ ತುನೆ, ‘ತುಮಾರೊ ನ್ಹಾನೊ ಭೈ ತುಮಾರಿ ಜೋ಼ಡ್ಮ ನಾ ಆಯೋತೊ ಬಿಜೇಕ್‌ ವಖ್ಹತ್ ತುಮೆ ಮಾರುಮ್ಹೋಡು ನಾದೇಕ್ಣು’ ಕರಿ ಬೋಲ್ಯೊನಿ, 24 "ತುಮಾರೊ ಆಳ್‌ಹುಯಿರಾತೆ ಹಮೆ ಹಮಾರ ಬಾಕನ ಜೈ಼ನ್ ಯಜಮಾನ್‌ ಹುಯಿರೋತೆ ತಾರಿ ವಾತ್ ಖ್ಹಮ್‌ಜಾ಼ಡ್ಯ. 25 ಹಮಾರೊ ಬಾ, ‘ತುಮೆ ಬಿಜೇಕ್‌ ವಖ್ಹತ್ ಜೈ಼ನ್ ಅನಾಜ಼್ ಲೀನ್‌ಆವೊ’ ಕರಿ ಬೋಲಖ್ಹತರ್, 26 ಹಮೆ ಇನ, ‘ಕಿಮ್ ಜಾ಼ವಾನು, ನ್ಹಾನೊ ಭೈ ಹಮಾರಿ ಜೋ಼ಡ್ಮ ರ‍್ಹಯೋತೋಸ್ ಹಮೆ ಜೈ಼ಯೇಸ್. ನಾ ಹುಯುತೊ ಹಮೆ ಯೊ ಅದ್ಮಿನು ಮ್ಹೋಡು ದೇಖಾನ ಕೋಹುವಾನಿ’ ಕರಿ ಬೋಲ್ಯ. 27 ಇನಖ್ಹಾಜೆ ತಾರೊ ಸೇವಕ್‌ ಹಮಾರೊ ಬಾನೆ, ‘ಮಾರಿ ಬಾವಣ್‌ಮ ಮನ ಬೇಸ್ ಪರ್ಖ್ಹ ಲಡ್ಕ ಪೈದಹುಯಕರಿ ತುಮುನ ಮಾಲುಮ್ ಛಾ಼ತೆ ವಾತೆ. 28 ಇವ್ಣಾಮ ಏಕ್ಜ಼ಣೊ ಮನ ಮ್ಹೇಲಿನ್ ಚ಼ಲೇಗಯೊ; ಯೊ ಝಾ಼ಡೀನ ಜಾನ್‌ವಾರ್‌ಥಿ ಚೀರೈಜಾ಼ವಾಮ ಶನು ಗುಮಾನೀಸ್‌ ಕೊಯ್ನಿಕರಿ ಮೇ ಮಾಲುಮ್ ಕರ್‌ಲಿದೊ. ತಪ್‌ಥೊ ಮೇ ಇನ ದೇಖ್ಯೋಕೊಯ್ನಿ. 29 ಹಮ್ಕೆ ಛಾ಼ತೆ ಅನಾಬಿ ಮಾರಕಂಥು ಲೀಜಾ಼ವ್ಣುಕರಿ ಛಾ಼. ಅನಾಬಿ ಕಾಯ್‌ತೋಬಿ ಖತ್ರಹುಯಿಗುತೊ, ಆ ಬುಢು ಮುಡ್‌ಕ್ಯು ಕುಢಾಪಥಿ ಮರಿಜೈ಼ಶ್ ಕರಿಬೋಲ್ಯೊ. 30 "ತುಮಾರೊ ಆಳ್‌ಹುಯಿರೋತೆ ಹಮಾರ ಬಾಕನ ಗಯಾತೊ, ಇನೋ ಜಾನ್ನೊ ಜಾನ್‌ಹುಯಿರೋತೆ ಆ ಛೋ಼ಕ್ರು ಹಮಾರಿಜೋ಼ಡ್ಮ ನಾರ‍್ಹಯುತೊ, 31 ಯೊ ಛೋ಼ಕ್ರು ಹಮಾರಿ ಜೋ಼ಡ್ಮ ಕೊಯ್ನಿಕರಿ ಮಾಲುಮ್‌ ಪಡ್ತಸ್‌ ಮರಿ ಜಾ಼ಶೆ. ತದೆ ತುಮಾರ ಆಳ್‌ಹುಯಿರಾತೆ ಹಮೇಸ್, ಬುಢೊ ಹುಯಿರೋತೆ ಹಮಾರೊ ಬಾನ ಕುಢಾಪೇಥೀಸ್ ಮರಿಜಾ಼ವನ ಕಾರಣ್ಉಶು. 32 ಸೇವಕ್‌ ಹುಯಿರೋತೆ ಮೇ ಮಾರ ಬಾಕನ ಆ ಛೋ಼ಕ್ರಾನಿ ಜಿಮ್ಮೇದಾರಿಲೀನ್, ‘ಮೇ ಅನ ಬುಲೈಲಿನ್ ನಾ ಆಯೋಹೋತ್ತೊ, ಕದೆಕದೇಬಿ ಬಾನ ಧೋಕೊ ದ್ಯವಾಳೊಹುಯಿರೀಶ್‌’ ಕರಿ ವಾತ್ ದೀರಾಖ್ಯೋಸ್. 33 "ಅಮ್‌ರ‍್ಹವಾಪರ್ ಮೇ ಆ ಛೋ಼ಕ್ರಾನ ಬದಲ್ ಯಜಮಾನ್ ಹುಯಿರೋತೆ ತುನ ಗುಲಾಮ್‌ ಹುವಾನಿಘೋಣಿಬಿ ಆ ಹೈರೋತೆ ಇನ ಭೈಯೇನಿ ಜೋ಼ಡ್ಮ ಜಾ಼ವಾನಿತರಾಬಿ ಕರ್‌ ಕರಿ ಗಿಂಗೈಲೆವುಸ್‌. 34 ಆ ಛೋ಼ಕ್ರಾನ ಮ್ಹೇಲಿನ್ ಮಾರ ಬಾಕನ ಮೇ ಕಿಮ್ ಜ಼ವ್? ಗಯೋತೊ, ಮಾರ ಬಾನ ಉಶೇತೆ ಕುಢಾಪ, ದುಖ್ ಮಾರೇಥಿ ದೇಖಾನ ಕೊಹೋಯ್ನಿ". ಕರಿ ಬೊಲ್ಯೊ.