1 ಯೆಹೋವ ದೇವ್‌ ಉಬ್‌ಜಾ಼ಯೋತೆ ಖ್ಹಾರುಸ್ ಜಾನ್ವರ್‌ಮ ಖ್ಹಾಪ್‌ ಘಣು ಠಗಾರು ಹುಯಿರ‍್ಹುಥು. ಖ್ಹಾಪ್‌ ಯೊ ತಯೇಡಾಕನ ಆಯಿನ್, "ಶಾತ್‌ಲಿಬಾಯಿ ಬಗೀಚಾ಼ಮ ಛಾ಼ತೆ ಖೆವಾ ಝಾ಼ಡ್‌ಣ ಫಲ್ನ ತುಮೆ ನಾ ಖಾವ್ಣುಕರಿ ದೇವ್‌ ಹುಕುಮ್‌ ದೀರಾಖ್ಯೊತೆ ಖ್ಹಾಚಿಸ್‌?" ಕರಿ ಬೋಲ್ಯು. 2 ಯೊ ತಯೇಡನೆ ಖ್ಹಾಪ್‌ನ, "ಬಗೀಚಾ಼ಮ ಛಾ಼ತೆ ಖ್ಹಾರಸ್ ಝಾ಼ಡ್ನ ಫಲ್ನ ಖಯೆಜಾ಼ಯ್‌; 3 ಕತೋಬಿ ಬಗೀಚಾ಼ನ ಇಚ಼್‌ಮ ಛಾ಼ತೆ ಯೊ ಝಾ಼ಡ್‌ಣ ಫಲ್‌ನಿ ಬಾರೇಮ, ‘ತುಮೆ ಇನ ಖಾವ್ಣುಬಿ ನಾ, ಛೀಮ್‌ಣೂಬಿ ನಾ, ಖಾದಾತೊ ಮರಿಜಾ಼ಶು’ ಕರಿ ದೇವ್‌ನೆ ಬೋಲಿರಾಖ್ಯೊಸ್" ಕರಿಬೋಲಿ. 4 ತದೆ ಖ್ಹಾಪ್‌ನೆ ತಯೇಡನ, "ತುಮೆ ಖ್ಹಚಂಬಿ ಮರ್‌ಶುಕೊಯ್ನಿ. 5 ತುಮೆ ಆ ಫಲ್ನ ಖಾದಾತೊ ತದ್ನುತದೆಸ್ ತುಮಾರ ಡೋಳ ಉಖ್‌ಡಾವ್‌ಶೆ. ತುಮೆ ದೇವ್‌ನಿತರ ಹುಯಿಜಾ಼ಶು ಅಜು಼ ಅಛ್ಛು಼ ಅಜು಼ ಖರಾಬ್‌ನು ಪರಕ್‌ನ ಮಾಲುಮ್‌ ಕರಿಲಿಶು, ಆ ದೇವ್ನ ಮಾಲುಮ್‌" ಕರಿಬೋಲ್ಯು. 6 ತದೆ ತಯೇಡನೆ ಯೊ ಝಾಡ್‌ನು ಫಲ್‌ ಖಾವಾನ ಅಛ಼್ಛುಬಿ, ದೇಖಾನ ಖ್ಹಾಜ಼್‌ನುಬಿ, ಅಕ್ಕಲ್ ಆವಾಖ್ಹರ್‌ಕುಬಿ ಛಾ಼ಕರಿ ಮಾಲುಮ್‌ಕರಿನ್ ಯೊ ಫಲ್ನ ಲೀನ್ ಖಾದಿ, ಅಜು಼ ಇನ ಬಾವ್ರಿನ ದ್ಯಾವಖ್ಹತರ್‌ ಇನೇಬಿ ಖಾದೊ. 7 ತದ್ನುತದೇಸ್ ಇವ್ಣೆ ಭೇಜ಼ಣ ಉಘಾಡ ಛಿಯ್ಯೆಕರಿ ಮಾಲುಮ್‌ಕರಿನ್ ಗುಲ್ಲರ್ನ ಪಾಲನ ವಣಿನ್ ಇನ ಕಂಬರ್‌ನ ಲಪೇಟಿಲಿದ. 8 ತದೆ ಯೆಹೋವ ದೇವ್‌ ಖ್ಹಾಂಜ಼್‌ನ ಠಂಡಾ ವಹಿರಾಮ ಬಗೀಚಾ಼ಮ ಚಾ಼ಲ್ಯೊಫಂಡಾನಿ ವಖ್ಹ್‌ತೆ ಯೊ ಅದ್ಮಿ ಅಜು಼ ತಯೇಡ ಇನು ಅವಾಜ಼್‌ನ ಖ್ಹಮ್‌ಜಿನ್ ಇನ ದೆಖಾವ್ಣು ನಾಕರಿ ಬಗೀಚಾ಼ನ ಝಾ಼ಡಾವ್‌ನ ಇಚ಼್‌ಮ ಲಪಿಗಯ. 9 ತದೆ ಯೆಹೋವ ದೇವ್ನೆ ಅದ್ಮಿನ ಚಿಕ್ರೀನ್, "ತೂ ಕಿಜ್ಜಾ಼ ಛಾ಼?" ಕರಿ ಪುಛಾ಼ಯೊ. 10 ಇನಖ್ಹಾಜೆ ಇನೆ, "ತೂ ಬಗೀಚಾ಼ಮ ಚಾ಼ಲ್ಯೊಫಂಡಾನಿ ಅವಾಜ಼್‌ ಖ್ಹಮ್‌ಜಿನ್, ಉಘಾಡೊ ಹುಯಿರ‍್ಹೊಥೋತೆ ಇನಖ್ಹಾಜೆ ಡರಿನ್‌ ಮೇ ಲಪಿಗಯೊ" ಕರಿ ಜ಼ವಾಬ್‌ದಿದೊ. 11 ತದೆ ದೇವ್‌ನೆ, "ತೂ ಉಘಾಡೊ ಛಾ಼ಕರಿ ತುನ ಖ್ಹಮ್‌ಜಾ಼ಡ್ಯುತೆ ಕೋಣ್‌? ಖಾವ್ಣುನಾಕರಿ ಮೇ ತುನ ಹುಕುಮ್‌ ಕರ‍್ಯೊತೆ ಝಾ಼ಡ್‌ಣ ಫಲ್ನ ಖಾದೊಕಿಶು?" ಕರಿ ಪುಛಾ಼ಯೊ. 12 ತದೆ ಯೊ ಅದ್ಮಿನೆ, "ಮಾರಿ ಜೋಡ್ಮ ರ‍್ಹಾವಾನಖ್ಹಾಜೆ ತುನೆ ದಿದೋತೆ ಆ ತಯೇಡನೆ, ಯೊ ಝಾ಼ಡ್‌ಣ ಫಲ್ನ ಮನ ದಿದಿ, ಮೇ ಖಾದೊ" ಕರಿ ಜ಼ವಾಬ್‌ದಿದೊ. 13 ಯೆಹೋವ ದೇವ್‌ನೆ ಯೊ ತಯೇಡನ, "ಆ ಶಾತ್ ತುನೆ ಕರೀತೆ?" ಕರಿ ಪುಛಾ಼ವದೀನ್, ಯೊ ತಯೇಡ, "ಖ್ಹಾಪ್‌ನೆ ಮನ ಠಗಾಯು, ಮೇಖಾದಿ ಕರಿ ಜ಼ವಾಬ್‍ದಿದಿ.

14 ತದೆ ಯೆಹೋವ ಹುಯಿರೋತೆ ದೇವ್‌ ಖ್ಹಾಪ್‌ನ "ತೂ ಆ ಕಾಮ್‌ ಕರ‍್ಯೋತೆಖ್ಹಾಜೆ ತುನ ನಿಶತ್ ಮಳ್‌ಶೆ. ಅಜು ಖ್ಹಾರಾಸ್ ಜಾನ್ವರ್‌ಮಾಬಿ, ಶಾಪ್‌ಲ್ಯವಾಳೊ ಹುಯಿರ‍್ಹಿನ್, ತೂ ಪೇಟ್‌ಥಿ ಘಶೀನ್‌ ತಾರು ಜಿಂದಗಿನು ದನ್‌ಖ್ಹಾರು ಧೂಳಸ್ ಖೈಷ್. 15 ತುನಾಬಿ, ಆ ತಯೇಡನಾಬಿ, ತಾರಿ ಪಿಳ್ಗಿನಾಬಿ ಆ ತಯೇಡಾನಿ ಪಿಳ್ಗಿನಾಬಿ, ದುಷ್‌ಮನ್ ರ‍್ಹವಾನಿಘೋಣಿ ಕರುಸ್. ಹೈರೀತೆನಿ ಪಿಳ್ಗಿ ತಾರ ಮುಡ್‌ಕ್ಯಾನ ಝ಼ಗದ್‌ಶೆ. ತೂ ಇನಿ ಏಡಿನ ಕಲ್ಡಿಶ್" ಕರಿ ಬೊಲ್ಯೊ. 16 ಇನಕೇಡೆಥು ಯೊ ತಯೇಡನ, "ಮೇತಾರಿ ಜ಼ಣತ್‌ನ ದರದ್‌ನ ಜಾ಼ಖ್ಹತ್ ಭಡೈಶ್. ತೂ ಅಜಾ಼ಥಿ ಲಡ್ಕಾವ್ನಬಿ ಜ಼ಣಿಶ್. ಬಾವ್ರಿಪರ್‌ ತುನ ಹರಖ್ಹ್‌ರ‍್ಹಿಶೆ, ಕತೋಬಿ ಇನಿ ದಾಬುಕ್‌ಮ ರ‍್ಹಿಶ್" ಕರಿ ಬೊಲ್ಯೊ. 17 ಯೊ ಹುವಾದಿನ್ ಯೊ ಪರ್ಖ್ಹಾನ, "ಖಾವ್ಣುನಾಕರಿ ಮೇ ತುನ ಹುಕುಮ್‌ ಕರ‍್ಯೊತೆ ಝಾ಼ಡ್ನ ಫಲ್ನ ತಾರಿ ಬಾವಣ್ಣಿ ವಾತೆ ಖ್ಹಮ್‌ಜಿನ್ ತೂ ಖಾದೋತೆ ಇನಖ್ಹಾಜೆ, ಧರ್ತಿಬಿ ಶಾಪ್‌ಮ ಪಡಿಗು. ತಾರಿ ಜಿಂದಗಿಪೂರ ವದೇಖ್ಹ್‌ಪಡೀನ್ ತಾರ ಪೇಟ್ನ ಜಿವ್‌ಣಾನ ಖ್ಹಾಜೆ ರಾಬಿನ್ ಧರ್ತಿನು ಪಿಕಾವ್ಣಿನ ಖಾವ್ಣು. 18 ಯೊ ಧರ್ತಿಮ ಕಾಟನಝಾ಼ಡಬಿ ಶತ್ತೆ ಘಣು ಫುಟ್‌ಶೆ, ಖೆತರ್‌ನು ಪಿಕಾವ್ಣಿಖ್ಹಾರು ತುನ ಖಾಣುಹುಯಿರ‍್ಹಿಶೆ. 19 ತೂ ಪಾಛೋ಼ ಮಾಟಿಮ ಮಳಾಲಗು ಪಶೂನೊ ರಂಚ಼್‌ತೊ ಹುಯಿನ್ ಹೋಣುತೆ ಖಾಣನ ಕಮಾವ್ಣು. ತೂ ಮಾಟಿಥಿ ತಯಾರ್ ಹುಯಿರ‍್ಹೋತೆ ಇನಖ್ಹಾಜೆ ತೂ ಪಾಛೊ಼ ಮಾಟಿಮಸ್ ಪೇಖ್ಹಿಷ್." ಕರಿಬೋಲ್ಯೊ. 20 ಆದಾಮ್‌ನೆ ಇನಿ ಬಾವಣ್ಣ "ಹವ್ವಕರಿ ನಾಮ್‌ ಮ್ಹೇಲ್ಯೊ. ಇನಖ್ಹಾಜೆ ಅದ್ಮಿ ಬಚಿರ‍್ಹಾವಾಳ ಯೋಸ್ ಶುರುವಾತ್ನಿ ಆಯ ಹುಯಿರ‍್ಹೀಸ್. 21 ಯೆಹೋವ ದೇವ್ನೆ ಆದಾಮ್‌ನಾಬಿ ಇನಿ ಬಾವಣ್ಣಾಬಿ ಜಾನ್‌ವಾರ್‌ನ ಚಾ಼ಂಬ್ಡಾನು ಪೆರ್ವಾಖ್ಹ್‌ ಬಣೈನ್ ಫೇರಾಯೊ.

22 ಯೆಹೋವ ದೇವ್ನೆ, "ಆ ಅದ್ಮಿ ಅಛ್ಛಾ಼ನು ಅಜು಼ ಖರಾಬ್‌ನು ಪರಕ್ ಮಾಲುಮ್‍ಕರ‍್ಲಿನ್ ಅಪ್ಣಾಮ ಎಕ್ ಹುಯಿಗೊ. ಅನಖ್ಹಾಜೆ ಆ ಜಾನ್ನಝಾ಼ಡ್‌ನು ಫಲ್ನ ಖೈನ್‍ ಜಿವವಾಳು ನಾಹೋಣು" ಕರಿ ಹುಕುಮ್‌ ಕರ‍್ಯೊ. 23 ಇನಖ್ಹಾಜೆ ಯೆಹೋವನೆ ಇನ ಉಬ್‌ಜಾ಼ಯೊತೆ ಮಾಟಿನಾಸ್ ನಾಗ್ರಾನಖ್ಹಾಜೆ ಇನ ಏದೆನ್ ಬಗೀಚಾ಼ಮಾಥು ಭಾರ್‌ ಮೋಕ್ಲಿದಿದೊ. 24 ಅಮ್‌ ಇನೆ ಅದ್ಮಿನ ಭಾರ್‌ ನಾಖಿನ್, ಜಾನ್ನ ಝಾ಼ಡ್‌ಕನ ಜಾ಼ವನಿ ವಾಟ್ನ ಕಾವ್ಲಿಕರಾನಖ್ಹಾಜೆ, ಏದೆನ್ ಬಗಿಚಾ಼ನು ಪೂರಬ್‌ ದಿಕ್ಮ ಕೆರೂಬಿಖ್ಹಾರನಬಿ, ಅಖ್ಖೀಸ್ ಬಾಜು಼ಮ ಧಗ್‌ಧಗ್‌ ಬಳಾನಿ ಝ಼ಲ್‌ಪಟ್‌ನಿ ತಲ್ವಾರ್‌ನ ಮ್ಹೇಲ್ಯೊ.