1 ಅಬ್ರಹಾಮ್ ದನ್ ಭರಾಯೊಹುಯೊ ಭುಡೊ ಹುಯಿಗೊಥೊ. ಯೆಹೋವ ದೇವ್ನೆ ಇನ ಹರೇಕ್ ಬಾರೇಮ ಆಶೀರ್ವಾದ್‌ ಕರಿರಾಖ್ಯಥೊ. 2 ಅಮ್‌ರ‍್ಹಾವಪರ್ ಇನೆ ಇನಥೂತೆ ಶೊತ್ನಿ ಜಿಮ್ಮೇದಾರಿ ದೇಖವಾಳೊ ಗಲ್‌ಢೊ ಸೇವಕ್‌ನ ಅಬ್ರಹಾಮ್‌ನೆ, "ತೂ ಮಾರಿ ಮಾಂಡಿಹೇಟ್ ಹಾತ್ ಮ್ಹೇಲ್‌, 3 ಸೊರ್ಗಾನೊಬಿ ಧರ್ತಿನೊ ಬಾ ಯೆಹೋವ ದೇವ್‌ಪರ್‌ ಆಣ್‌ ಕರುಸ್ ಮೇ ಜಿವ್ಣು ಕರುಕರುತೆ ಆ ಕಾನಾನ್‌ವಾಳನಿ ಛೋ಼ರಿಯೆಮಾಥು ಮಾರ ಛಿಯ್ಯಾನ ಛೋ಼ಕ್ರಿ ಕೋ ಲ್ಯಾವ್‌ನಿ. 4 ಕತೋಬಿ ಮಾರೊ ಶೊಂತ್ ದೇಖ್ಹ್‌ನು ಮಾರು ಮಾಯಮಾತ್ರಮಾಥು ಇಸಾಕ್‌ನ ವ್ಯಾಹ ಕರಾನ ಛೋ಼ಕ್ರಿ ಲ್ಯಾವ್ಣು" ಕರಿಬೋಲ್ಯೊ. 5 ಕತೋಬಿ ಸೇವಕ್‌ನೆ, "ಏಕ್‌ವೇಳ್ ಮಾರಿ ಜೋ಼ಡ್ಮ ಆ ದೇಖ್ಹ್‌ನ ಆವಾನ ಯೊ ತಯೇಡಾನ ದಿಲ್‌ ನಾಲಾಗ್ಯೊತೊ ತೂ ಮ್ಹೇಲಿನ್ ಆಯೋತೆ ಯೊ ದೇಖ್ಹ್‌ನ ಮೇ ತಾರ ಛಿಯ್ಯಾನ ಪಾಛೋ಼ ಬುಲೈಲೀನ್ ಜಾ಼ವ್ಣುಕಿ?" ಕರಿ ಪೂಛಾ಼ಯೊ. 6 ತದೆ ಅಬ್ರಹಾಮ್‌ನೆ ಇನ, "ಹಿಜ್ಜಾ಼ ಮಾರ ಛಿಯ್ಯಾನ ಕದೇಬಿ ನಾಸ್ ಬುಲೈಲೀಜಾ಼ವ್ಣು. 7 ಶನಕತೊ ಪರಲೋಕ್ನೊ ದೇವ್ ಯೆಹೋವನೆ ಮಾರ ಬಾನ ಘರ್‌ಥುಬಿ ಮೇ ಪೈದಹುಯೋತೆ ಶೊಂತ್ ದೇಖ್ಹ್‌ಥೂಬಿ ಮನ ಬುಲೈಲೈನ್, ‘ತಾರಿ ಪಿಳ್ಗಿನ ಆ ದೇಖ್ಹ್‌ ದೇವುಸ್’ ಕರಿ ಜಿಭಾನ್ ದಿರಾಖ್ಯೊಸ್. ತಾರ ಖ್ಹಾಮ್ಣೆ ಇನ ದೂತನ ಮೋಕಲ್‌ಶೆ, ತೂ ಹಿಜ್ಜಾ಼ಥೊ ಮಾರ ಛಿಯ್ಯನಖ್ಹಾಜೆ ಛೋ಼ಕ್ರಿನ ಲೀನ್ ಆವ್ಣು. 8 ತಾರ ಪೀಠೆ ಆವಾನ ಯೊ ತಯೇಡನ ದಿಲ್‌ ನಾಲಾಗ್ಯೊತೊ ಮೇ ಕರಾಯೋತೆ ಆಣ್‌ಥಿ ತು ಛುಟ್ಕಾರ್‌ ಹುಯಿರ‍್ಹೀಶ್. ಕತೋಬಿ ಮಾರ ಛಿಯ್ಯಾನ ಪಾಛೊ಼ ಹಿಜ಼್ಜ ನಾ ಬುಲೈಲೀಜಾ಼ವ್ಣು" ಕರಿಬೋಲ್ಯೊ. 9 ತದೆ ಯೊ ಸೇವಕ್‌ನೆ ಇನೊ ಯಜಮಾನ್ ಅಬ್ರಹಾಮ್‌ನಿ ಮಾಂಡಿಹೇಟ್ ಹಾತ್‌ ಮ್ಹೇಲಿನ್ ಇನೆ ಬೋಲ್ಯೊತೆ ಇಮ್ಮಸ್ ಆಣ್‌ಕರ‍್ಯೊ. 10 ಇನಪಾರ್‌ ಯೊ ಸೇವಕ್‌ನೆ ಇನ ಯಜಮಾನ್ನು ಊಟ್‌ಮಾಥು ಅಖ್ಖಾಮಾಥು ದಖ್ಹ್‌ ಊಟೇವ್ನ ತಯಾರ್ ಕರಿನ್ ಇನಪರ್‌ ಘಣಮೋಲ್ನು ಖ್ಹೊನ್ನುಖ್ಹರಪ್‌ನ ಲೀನ್‌ ಹಿಜ಼್ಜಾಥು ನಿಕ್ಳಿನ್‌ ಉತ್ತರ್ ದಿಕ್‌ನು ಮೆಸಪಟೋಮಿಯಮ ನಾಹೋರ್ ಜಿವ್ಣು ಕರುಕರ್ತೊಥೋತೆ ಗಾಮ್ ಪೋಚ್ಯೊ. 11 ತದೆ ಇನೆ ನಂಗರ್‌ ಭಾರ್‌ ಬಾವ್ಡಿಕನ ಊಟ್‌ನ ಅಖ್ಖ ಊಟ್‌ನ ಘುಡ್‌ಗ್ಯ ಮೇಟೆ ಕರಾಯೊ, ಹಿಜ಼್ಜ ಖ್ಹಾಂಜ಼್‌ನು ತಯೇಡಾಖ್ಹಾರಿ ಪಾಣಿಭರಾನ ಆವಾನಿ ವಖ್ಹ್‌ತೆ. 12 ಇನೆ ಪ್ರಾರ್ಥನೆ ಕರ್ತೊಹುಯಿನ್, "ಯೆಹೋವ ದೇವ್‌, ಮಾರೊ ಯಜಮಾನ್‌ ಅಬ್ರಹಾಮ್‌ನೊ ದೇವ್‌, ಆ ವಖ್ಹತ್ ಮೇ ಆಯೋತೆ ಕಾಮ್ನ ತೂ ಚ಼ಲೈದೀನ್ ಮಾರೊ ಯಜಮಾನ್ನಿ ಭರೋಖ್ಹಾನ ದಯಕರ್‌. 13 ಹಂದೇಕ್‌, ಪಾಣಿನ ಚೇಜ಼್‌ಭಾರಕನ ಭಿಯೋಸ್: ಆ ನಂಗರ್‌ನಿ ಛೊ಼ಕ್ರಿಯೇ ಪಾಣಿನ ಆವ್‌ಶೆ. 14 ಮೇ ಖಿವಿ ಛೋ಼ಕ್ರಿನ, ‘ತೂ ದಯಾಕರಿನ್ ತಾರ ಘಡಾನ ಉತಾರಿನ್ ಮನ ಪಿಯ್ಯಾನ ಪಾಣಿದೇ’ ಕರಿ ಬೋಲಾನಿ ವಖ್ಹ್‌ತೆ, ‘ತೂ ಪಿಯೆಜಾ಼ಯ್‌ ಅಜು಼ ತಾರಿ ಊಟೆಯೇವ್ನಬಿ ಪಾಣಿ ದೇವುಸ್’ ಕರಿ ಬೋಲ್ಯುತೊ, ಯೋಸ್ ತಾರೊ ಸೇವಕ್ ಇಸಾಕ್‌ನ ತೂ ಚೂ಼ಣಿರಾಖ್ಯೋತೆ ಛೋ಼ಕ್ರಿ ಹುವಾದೆ. ಅಮ್‌ ಚಾ಼ಲ್ಯುತೊ ಮಾರ ಯಜಮಾನ್ನ ಕರ‍್ಯೊತೆ ಆಣ್‌ ಕರಿ ಮನ ಮಾಲುಮ್‌ ಪಡ್‌ಶೆ" ಕರಿ ಬೊಲ್ಯೊ.

15 ಇನೆ ಅಮ್‌ ಬೋಲಿಲೆವ್‌ಕರಾನಿ ವಖ್ಹ್‌ತೇಸ್ ಅಬ್ರಹಾಮ್‌ನೊ ಭೈ ನಾಹೋರ ಅಜು಼ ಮಿಲ್ಕನೊ ಛಿಯ್ಯೊ ಬೆತೂವೇಲನಿ ಛೋ಼ರಿ ರೆಬೆಕ್ಕ ಖಾಂದಪರ್‌ ಘಡೊ ಮ್ಹೇಲಿಲೀನ್‌ ನಂಗರ್‌ ಭಾರ್‌ ಆವನು ದೇಖ್ಯೊ. 16 ಯೊ ಛೋ಼ಕ್ರಿ ಘಣಿ ಶನ್‌ಗಾರ್ನಿ ಜ಼ವಾನಿ ಕವಾರಿ ಹುಯಿರ‍್ಹಿಥಿ ಅಜು಼ ಖೆವ ಪರ್ಖ್ಹಾನು ಮ್ಹೋಡು ಕೊ ದೇಖಿರಾಖಿಥಿನಿ. 17 ಇನೆ ಬಾವ್ಡಿಕನ ಜೈ಼ನ್ ಘಡಾಮ ಪಾಣಿಭರಿನ್ ಉಪ್ಪರ್‌ ಆವಾನಿ ವಖ್ಹ್‌ತೆ ಯೊ ಸೇವಕ್ ಖ್ಹಾಮೆ ಮಿಲೈಆಯಿನ್, "ಬಾಯಿ, ದಯಾಕರಿನ್ ತಾರ ಘಡಮಾಥು ಪಿಯ್ಯಾನ ಮನ ಥೋಡು ಪಾಣಿದೆ" ಕರಿ ಬೊಲ್ಯೊ, 18 ಇನೆ ತದ್ನುತದೇಸ್ ಘಡೋ ಉತಾರಿನ್ "ಪೀಲ ಗುರು" ಕರಿ ಇನ ಪಿಯ್ಯಾನ ಪಾಣಿ ದಿದಿ. 19 ಯೊ ಪೀನ್‌ ಹುಯಿಜಾ಼ವದೀನ್, "ಮೇ ತಾರಿ ಊಟೆವ್‍ನಾಬಿ ಬಶ್‌ಹುವಾಯೆತ್ರು ಪಾಣಿಲೈನ್ ದೆವುಸ್" ಕರಿ ಬೋಲಿನ್, 20 ಘಡಾಮಥೂತೆ ಪಾಣಿನ ಬಾನೆಮ ನಾಖಿನ್ ಪಾಛಿ ಲ್ಯಾವಾನ ಬಾವ್ಡಿಕನ ಜಲ್ದಿಗೈ. ಅಮ್‌ ಇನಿ ಖ್ಹಾರೀಸ್‍ ಊಟೇವ್‌ ಪಾಣಿ ಪಿಯಲಗುಬಿ ಲಯಿನ್ ನಾಖಿ. 21 ಎತ್ರಾಮ ಯೊ ಆದ್ಮಿ ಶಾತ್ ಬೋಲ್ಯೊಕೊಂತೆ ಇನಾಸ್ ಠರ್ಕಿ ದೇಕ್ತೊಹುಯಿನ್, ಯೆಹೋವನೆ ಇನಿ ಚಾ಼ಲ್‍ಕುಚ಼್‍ನ ಜೀತ್‍ದಿದೋಕಿ, ಕೊಯ್ನಿ ಕರಿ ಮಾಲುಮ್‌ ಕರಾನ ಟಿವೈರ‍್ಹೋಥೊ. 22 ಊಟೆಖ್ಹಾರು ಪಿಯ್ಯಾನ ಬಾದ್ಮ ರೆಬೆಕ್ಕನ ಇನೆ ಆಧೊ ತೋಲಾನಿ ಎಕ್ ಖ್ಹೊನ್ನಾನಿ ಟಿಕ್ಲಿನ, ಇನ ಹಾತ್‌ಮ ದಖ್ಹ್‌ ತೋಲಾನಿ ಬೇ ಖ್ಹೊನ್ನಾನಿ ಛು಼ಡಿಯೆ ಘಾಲ್ಯೊ. 23 ಅಜು಼ "ತಾರೊ ಬಾ ಕೋಣ್? ದಯಾಕರೀನ್ ಮನ ಬೋಲ್; ತಾರ ಬಾನ ಘರ್ಮ ಹಮೆ ಆ ರಾತೆ ರ‍್ಹವಾನ ಝ಼ಗೊ ಛಾ಼ಕಿಶು?" ಕರಿ ಬೊಲ್ಯೊ. 24 ಹೈರಿತೆನೆ ಇನ, "ಮೇ ನಾಹೋರನ ಮಿಲ್ಕಮ ಪೈದಹುಯೋತೆ ಬೆತೂವೇಲ ಮಾರೊ ಬಾ ಕರಿ ಜ಼ವಾಬ್‍ದಿದಿ. 25 ಆ ನಾಹುಯಿನ್ ರೆಬೆಕ್ಕನೆ ಇನ, "ಘಾಖ್ಹ್‌ಬಿ ಚಾ಼ರೊಬಿ ಹಮಾರಕನ ಹೋಣುತೆತ್ರು ಛಾ಼ ಅಜು಼ ತೂ ರ‍್ಹವಾನಬಿ ಝ಼ಗೊಛಾ಼" ಕರಿ ಬೋಲಿ. 26 ಅನ ಖ್ಹಮ್‍ಜ್ಯೊತೆ ಯೊ ಅದ್ಮಿನೆ ಯೆಹೋವದೇವ್ನ ಆಡ್‌ಪಡಿನ್ ಖ್ಹಲಾಮ್ ಕರ‍್ಯೊ. 27 "ಮಾರೊ ಯಜಮಾನ ಅಬ್ರಹಾಮ್‌ನೊ ದೇವ್‌ ಹುಯಿರ‍್ಹೋತೆ ಯೆಹೋವನ ಧನ್ಯವಾದ್‌ ಹುವಾದೆ. ಇನೆ ಮಾರ ಯಜಮಾನ್ನ ಉಪ್ಪರ್‌ಲಿ ಪ್ಯಾರ್‌ನಾಬಿ ಖ್ಹಾಚಿನ ಕಾಡಿನಾಖ್ಯೊಕೊಯ್ನಿ; ಮನ ಮಾರ ಯಜಮಾನ್ನ ಮಾಯಮಾತ್ರನ ಘರೆ ಖ್ಹೂದುಸ್ ಬುಲೈಲೀನ್ ಐರ‍್ಹೋಸ್" ಕರಿ ಬೊಲ್ಯೊ. 28 ತದೆ ಯೊ ಛೋ಼ಕ್ರಿ ನಾಶಿಜೈ಼ನ್ ಚಾ಼ಲಿತೆ ವಾತೆನ ಆಯಾನ ಘರ್‌ವಾಳಾನ ಖ್ಹಮ್‍ಜಾ಼ಡಿ. 29 ರೆಬೆಕ್ಕನ ಲಾಬಾನ ಕರಿ ಭೈಥೊ. ಯೊ ಅಬ್ರಹಾಮನ ಸೇವಕಥೋತೆ ಬಾವ್ಡಿಕನ ನಾಶಿಗಯೊ. 30 ಇನೆ ಇನಿ ಭೇನ್‍ಕನ ಥೂತೆ ಟಿಕ್ಲಿನಬಿ, ಚು಼ಢಿಯೇನಬಿ ದೇಖ್ಯೊ. ಯೊ ಅದ್ಮಿನೆ ಮಾರಿ ಜೋ಼ಡೆ ಕಿಮ್‍ ವಾತ್‌ಬೋಲ್ಯೊ ಕರಿ ರೆಬೆಕ್ಕಥಿಸ್ ಖ್ಹಮ್‍ಜಿನ್, ಬಾವ್ಡಿನ ಖನ್ನೆ ಊಟೆವ್‍ಕನ ಭೀಯೊಥೋತೆ ಯೊ ಅದ್ಮಿಕನ ಆಯೊ. 31 ಇನ, "ಅಲಾ, ಯೆಹೋವನಿ ಆಶೀರ್ವಾದ್‌ ಲೀರಾಖವಾಳ, ಮಹಿಆವ್; ಶನ ಭಾರ್ ಭಿಯೋಸ್? ತಾರಖ್ಹಾಜೆ ಮಾರ ಘರ್ಮ ಊಟೆವ್ನ ಹೋಣುತೆ ಝ಼ಗೋನಾಬಿ ತಯಾರ್ ಕರಿರಾಖ್ಯೋಸ್" ಕರಿ ಬೊಲ್ಯೊ. 32 ಯೊ ಅದ್ಮಿ ಘರ್‌ಭಣಿ ಆವಾದಿನ್ ಲಾಬಾನನೆ ಊಟೆವ್‍ಪರ‍್ನು ಭೋಜಾ಼ನ ಉತಾರಿನ್ ಯೊ ಅಖ್ಖಾನ ಘಾಖ್ಹ್‌ಬಿ ಚಾ಼ರೊಬಿ ನಖೈನ್ ಯೊ ಅದ್ಮಿ ಅಜು಼ ಇನ ಜೋ಼ಡ್ಮರ‍್ಹವಾಳನ ಗೋಡ ಧೊವಾನ ಪಾಣಿದಿದೊ. 33 ಇನವಾರ್ ಖಾಣುನಾಖಿದಿದು. ಕತೋಬಿ ಇನೆ, "ಮೇ ಆಯೋತೆ ಕಾಮ್ನ ಬೋಲ್ಯೊಕೊಂತೆ ಖಾಣು ಖವ್‌ಕೊಯ್ನಿ" ಕರಿ ಬೋಲಖ್ಹತರ್ ಲಾಬಾನನೆ, "ಯೊ ಶಾತ್‌ಬೋಲ್" ಕರಿ ಬೊಲ್ಯೊ. 34 ತದೆ ಇನೆ, "ಮೇ ಅಬ್ರಹಾಮ್‌ನೊ ಸೇವಕ್‌. 35 ಯೆಹೋವನೆ ಮಾರ ಯಜಮಾನ್ನ ಘಣು ಆಶೀರ್ವಾದ್‌ ಕರ‍್ಯೋತೆ ಇನಖ್ಹಾಜೆ ಢಾಂಡ ಬೋಕ್ಡಬಿ, ಖ್ಹೋನ್ನು ರೂಪುಬಿ, ದಾಸದಾಸಿನಬಿ, ಊಟೆವ್‍ನಾಬಿ, ಗಧೇಡವ್‍ಬಿ ದೀರಾಖ್ಯೋತೆ ಇನಖ್ಹಾಜೆ ಯೊ ದೌಲತ್ತಿಬಣ್ಯೊ. 36 ಮಾರೊ ಯಜಮಾನ್ನಿ ಬಾವಣ್ ಸಾರನೆ ಇನ ಬುಢ್‍ಪಣ್‌ಪರ್ ಛಿಯ್ಯೊ ಜ಼ಣಿ; ಯೊ ಛಿಯ್ಯಾನ ಮಾರೊ ಯಜಮಾನ್ನೆ ಇನಕನ ಥೂತೆ ಖ್ಹಾರುಸ್ ದೀರಾಖ್ಯೋಸ್. 37 ಆ ನಾಹುಯಿನ್ ಮಾರೊ ಯಜಮಾನ್ ಮಾರೇಥಿ ಆಣ್‌ಕರಿನ್ ಮೋಕ್ಲಿರಾಖ್ಯೊಸ್, ಮೇ ಛೂ಼ತೆ ಕಾನಾನ್ ದೇಖ್ಹ್‌ವಾಳಥಿ,ಮಾರ ಛಿಯ್ಯಾನ ಛೋ಼ಕ್ರಿ ನಾಲ್ಯಾವ್ಣು. 38 ಮಾರ ಬಾನ ಘರ್‌ಕನಾಬಿ ಮಾರ ಮಾಯಮಾತ್ರ ಕನಾಬಿ ಜೈ಼ನ್ ಇವ್ಣಕನಾಸ್ ಛೋ಼ಕ್ರಿನ ಚೂ಼ಣಿನ್‌ ಲ್ಯಾವ್ಣುಕರಿ ಬೋಲಿನ್ ಮಾರೇಥಿ ಕೋಲ್ ಲ್ಯವಾಡಿರಾಖ್ಯೊಸ್. 39 ಮೇ ಮಾರ ಯಜಮಾನ್ನ, ‘ಎಕ್ ವೇಳ್ ಮಾರ ಪೀಠೆ ಆವಾನ ಯೊ ಛೋ಼ಕ್ರಿನ ದಿಲ್‍ ನಾರ‍್ಹಯುತೊ" ಕರಿ ಬೋಲಖ್ಹತರ್, 40 ಮಾರ ಯಜಮಾನ್ನೆ ಮನ, "ಮೇ ಆರಾದನೆ ಕರ್ತೊ ಆಯೋತೆ ಮಾರೊ ದೇವ್ ಹುಯಿರೋತೆ ಯೆಹೋವನೆ ಇನ ದೂತನ ಮೋಕ್ಲಿನ್ ತೂ ಮಾರ ಬಾನ ಖಾನ್‍ಖೋಜ಼್‌ ಮಳ್ಯಹುಯ ಮಾಯಮಾತ್ರಾಮ ಮಾರ ಛಿಯ್ಯಾನ ಛೋ಼ಕ್ರಿ ಲ್ಯಾವನಿಘೋಣಿ ಮದತ್ ಕರ್ಷೆ. 41 ತದೆ ಮೇ ಕರಾಯೋತೆ ಆಣ್‍ಪರ್‌ ತೂ ಗಯೋತೊ ಮಾರ ಮಾಯಮಾತ್ರಾಮ ಇವ್ಣೆ ಛೋ಼ಕ್ರಿ ನಾದಿದುತೊ ಮೇ ಕರಾಯೋತೆ ಆಣ್‍ಥಿ ತೂ ಛುಟ್ಕಾರ್‌ ಹುಯಿರಿಶ್" ಕರಿ ಬೊಲ್ಯೊ. 42 ಮೇ ಆ ವಖ್ಹತ್ ಆ ಖ್ಹಯೇರ್‌ಕನ ಬಾವ್ಡಿಕನ ಆವಾದಿನ್, "ಮಾರೊ ಯಜಮಾನ್‌ ಅಬ್ರಹಾಮ್‌ನೊ ದೇವ್‍ಹುಯಿರ‍್ಹೋತೆ ಯೆಹೋವ, ಮೇತೊ ಪಾಣಿನ ಬಾವ್ಡಿಕನ ಭಿಯೋಸ್. ತೂ ಮಾರಿ ಚಾ಼ಲ್‍ಕುಚ಼್‍ನ ಜೀತ್ ದೀರಾಖ್ಯೊಸ್ ಉಶೇತೊ 43 ಪಾಣಿನ ಆವಾಳಿ ಖೆವಿ ಛೋ಼ಕ್ರಿನ, ‘ದಯಾಕರಿನ್, ತಾರ ಘಡಮಾಥು ಮನ ಥೋಡು ಪಾಣಿ ಪಿಯ್ಯಾನ ದೇ’ ಕರಿ ಮೇ ಬೋಲ್ಯೊತೊ, 44 ಇನೆ ಪೀ ಅಜು಼ ತಾರಿ ಊಟೆವ್‍ನಾಬಿ ಪಾಣಿಲೈನ್ ದೆವುಸ್ ಕರಿ ಬೋಲವಾಳಿ ಯೋಸ್ ಯೆಹೋವಥಿ ಮಾರ ಯಜಮಾನ್ನ ಛಿಯ್ಯಾನ ಚೂ಼ಣೈಹುಯಿ ಛೋ಼ಕ್ರಿ ಹುಯಿರಾವದೆ’ ಕರಿ, 45 ಮೇ ಮಾರ ದಿಲ್ಮ ಬೋಲಿಲ್ಯಾವನಿ ವಖ್ಹ್‌ತೇಸ್, ರೆಬೆಕ್ಕ ಖಾಂದಪರ್ನ ಘಡಾನ ಪಾಡಿಲೀನ್ ಆವಾನು ಮೇ ದೇಖ್ಯೊ. ಇನೆ ಬಾವ್ಡಿಕನ ಉತ್ರಿನ್ ಪಾಣಿ ಭರ್ಲಿನ್ ಆವಾನಿ ವಖ್ಹ್‌ತೆ ಮೇ ಇನ, ‘ಮನ ಪಿಯ್ಯಾನ ಪಾಣಿ ದೇ’ ಕರಿ ಬೊಲ್ಯೊ. 46 ತದ್ನುತದೇಸ್ ಇನೆ ಘಡಾನ ಉತಾರೀನ್, ‘ಪೀಯೊ, ತುಮಾರಿ ಊಟೆವ್‍ನಾಬಿ ಪಾಣಿ ಲೈನ್‌ ದೆವುಸ್’ ಕರಿ ಬೋಲಿ. ಮನಾಬಿ ಮಾರಿ ಊಟೆವ್‍ನಾಬಿ ಪಾಣಿಲೈನ್ ದಿದಿ. 47 ತೂ ಕಿನಿ ಛೋ಼ರಿ ಕರಿ ಮೇ ಬೋಲ್ತಾನ ಇನೆ, ‘ನಾಹೋರನ ಮಿಲ್ಕಮ ಪೈದಹುಯೊತೆ ಬೆತೂವೇಲನಿ ಛೋ಼ರಿ ಮೆ’ ಕರಿ ಬೋಲಿ. 48 ಯೊ ಖ್ಹಮ್‌ಜಿನ್ ಮೇ ಇನ ನಾಕ್ನ ಟಿಕ್ಲೀಬಿ ಹಾತ್ನ ಚು಼ಢಿಯ ಘಾಲೀನ್ ಮಾರೊ ಯಜಮಾನ್ ಅಬ್ರಹಾಮ್‌ನೊ ದೇವ್‍ ಹುಯಿರೋತೆ ಯೆಹೋವನ ಮುಡ್‌ಕ್ಯು ಝು಼ಕೈನ್ ಧನ್ಯವಾದ್‌ ಕರ‍್ಯೊ, ಇನೆ ಮಾರ ಯಜಮಾನ್ನ ಛಿಯ್ಯನಖ್ಹಾಜೆ ಇನ ನ್ಹಾನ ಭೈನಿ ಛೋ಼ರಿನಾಸ್ ಲೇವ್ಣುಕರಿ ಮನ ಖ್ಹಾಚಿ ವಾಟ್‍ಮ ಬುಲೈಲೀನ್ ಆಯೋತೆ ಇನಖ್ಹಾಜೆ ದೇವ್ನ ಖ್ಹರಾಯೊ. 49 ಹಮ್ಕೆ ತುಮೆ ಮಾರ ಯಜಮಾನ್ನಿ ಪ್ಯಾರ್‌ನಾಬಿ, ನಿಯ್ಯತ್‌ನಾಬಿ ಮಾನ್ಯತೊ ಒಹೊ ಬೋಲೊ; ನಾರ‍್ಹಯುತೊ ಕೊಯ್ನಿಕರಿ ಬೋಲೊ; ತದೆ ಮೇ ಶಾತ್‌ಕರ‍್ನು ಕರಿ ಮಾಲುಮ್ ಪಡ್‌ಶೆ" ಕರಿ ಬೋಲಿವತಾಳ್ಯೊ. 50 ಇನಖ್ಹಾಜೆ ಲಾಬಾನಬಿ, ಬೆತೂವೇಲಬಿ, "ಆ ಕಾಮ್ ಯೆಹೋವಥೀಸ್ ಹುಯು; ಹಮೆತೋಬಿ ಒಹೊ ಕರೀಬಿ, ಕೊಯ್ನಿ ಕರೀಬಿ ಬೋಲಾನ ಕೊಹೊಯ್ನಿಕರಿ ಲಾಬಾನ್ ಅಜು಼ ಬೇತೂವೇಲ್‌ನ ಬೋಲ್ಯ. 51 ರೆಬೆಕ್ಕನ ತಾರ ಹಾತ್ಮ ದಿಯೇಸ್; ಬುಲೈಲೀನ್ ಜ಼ಯೇಜಾ಼ಯ್; ಯೆಹೋವನೆ ಬೋಲ್ಯೊತೆ ತಿಮ್ಮಸ್ ರೆಬೆಕ್ಕ ತಾರ ಯಜಮಾನ್ನ ಛಿಯ್ಯಾನ ಬಾವಣ್‍ ಹುವಾದೆ" ಕರಿಬೋಲ್ಯ. 52 ಅಬ್ರಹಾಮ್‍ನ ಸೇವಕ್‌ನೆ ಇವ್ಣಿ ವಾತ್‍ಖ್ಹಮ್‍ಜಿನ್ ಯೆಹೋವನ ಆಡೊಪಡಿನ್ ಆರಾದನೆ ಕರ‍್ಯೊ. 53 ಇನಪಾರ್ ಇನೆ ಲೀನ್ ಆಯೋತೆ ಖ್ಹೊನ್ನು ರೂಪು ಅಜು಼ ಲುಂಗ್ಡಾವ್‌ಬಿ ಕಾಡಿನ್ ರೆಬೆಕ್ಕನ ದಿದೊ. ಇನ ಭೈನಾಬಿ ಆಯಾನಬಿ ಜಿನು ಘಣಮೋಲ್ನು ಚೀಜ಼್‌ಖ್ಹಾರುದಿದೊ. 54 ಅನಕೇಡೆಥು ಯೋಬಿ ಇನಿ ಜೋ಼ಡ್ನ ಆಯುತೆ ಚಾ಼ಕ್ರಿವಾಳುಬಿ ಖಾಣುಪಾಣಿ ಖೈಪೀಲಿನ್ ಯೊ ರಾತ್‍ಖ್ಹಾರು ಹಿಜ್ಜಾ಼ಸ್‍ ಕಾಡ್ಯು. ವ್ಹಾಣೆ ಉಠೀನ್ ಇನೆ, "ಮಾರ ಯಜಮಾನ್‍ಕನ ಜಾ಼ವನಖ್ಹಾಜೆ ಮನ ಹುಕುಮ್‌ ಮಳಾದೆ" ಕರಿ ಬೋಲಖ್ಹತರ್, 55 ರೆಬೆಕ್ಕನೊ ಭೈಬಿ ಆಯಾನೆಬಿ ಇನ, "ಛೋ಼ಕ್ರಿ ಬಿಜು಼ ದಖ್ಹ್‌ ರೋಜ಼್‌ತೋಬಿ ಹಮಾರಕನ ರ‍್ಹವಾದೆ ; ಇನಪಾರ್ ಯೊ ಜ಼ವಾದೆ" ಕರಿ ಬೋಲ್ಯ. 56 ಇನೆ ಇವ್ಣುನ, "ಯೆಹೋವನೆ ಮಾರಿ ಚಾ಼ಲ್‍ಕುಚ಼್‍ನ ಜೀತ್‍ ದೀರಾಖ್ಯೋಸ್; ಇನಖ್ಹಾಜೆ ಮನ ತಡಾ ನಕೋಕರೊ, ಮಾರ ಯಜಮಾನ್‍ಕನ ಜಾ಼ವಾನ ಮನ ಹುಕುಮ್‌ ದೆವೊ" ಕರಿ ಬೊಲ್ಯೊ. 57 ಇವ್ಣೆ, "ಹಮೆ ಛೋ಼ಕ್ರಿನ ಬುಲೈನ್ ಇನ ಮಾಯ್ನನ ಖ್ಹಮ್‌ಜಿ ಲಿಯೇಸ್" ಕರಿಬೋಲ್ಯ. 58 ಇವ್ಣೆ ರೆಬೆಕ್ಕನ ಬುಲೈನ್, "ಆ ಅದ್ಮಿನಿ ಜೋ಼ಡ್ಮ ತೂ ಜಾ಼ಸ್‍ಕಿಶು?" ಕರಿ ಬೋಲ್ಯ. ಇನೆ "ಜ಼ವುಸ್" ಕರಿಬೋಲಿ. 59 ತದೆ ಇವ್ಣೆ ಇವ್ಣಿ ನ್ಹಾನಿ ಭೇನ್ ರೆಬೆಕ್ಕನಾಬಿ ಇನಿ ಸೇವಕಿಯೇನಾಬಿ, ಅಬ್ರಹಾಮ್‍ನ ಸೇವಕ್‌ನ ಜೋ಼ಡ್ಮ ಮೋಕ್ಲಿದಿದು. 60 ಅಜು಼ ಇವ್ಣೆ ರೆಬೆಕ್ಕನ, ಆಶೀರ್ವಾದ್ ದೀನ್ "ಭೇನ್, ತಾರೇಥಿ ಲಾಖೊಲಾಕ್ ಪಿಳ್ಗಿಹುವಾದೆ; ತಾರಿ ಪಿಳ್ಗಿವಾಳು ಇನ ವಹೇರ‍್ಯಾವ್ನು ಶೊತ್‌ನ ಸೊಂತ್ ಕರಿಲ್ಯಾವಾದೆ" ಕರಿ ಬೋಲಿನ್ ವಾರ್ಖ್ಹೊದಿದು. 61 ರೆಬೆಕ್ಕಬಿ ಇನಿ ಸೇವಕಿಬಿ ಊಟೆವ್‍ಪರ್ ಚ಼ಢೀನ್ ಅಬ್ರಹಾಮ್‍ನ ಸೇವಕ್‌ನ ಪೀಠೆ ಗೈಯೇ. ಅಮ್ ಯೊ ಚಾ಼ಕ್ರಿವಾಳವ್‍ನೆ ರೆಬೆಕ್ಕನ ಬುಲೈಲಿನ್ ಗಯ. 62 ಎತ್ರಾಮ ಇಸಾಕ್ ಲಹೈರೋಯಿ* ಯೊ ಕಾನಾನ್ ದೇಖ್ಹ್‌ನು ದಕ್ಷಿಣ್ ತಬರ್‌ಖಾಮ ಜಿವ್ಣುಕರ್ತೋಥೊ. 63 ಇನೆ ಖ್ಹಾಂಜ಼್‌ನಿ ವೇಳ್ಮ ದೇವ್ನಿ ಧ್ಯಾನ್ ಕರಾನಖ್ಹಾಜೆ ಖೇತರ್‌ಕನ ಜೈ಼ರ‍್ಹೋಥೊ. ಹಿಜ಼್ಜ ಡೋಳ ಪಾಡಿದೇಖಾಖ್ಹತರ್ ಊಟೆವ್‍ಖ್ಹಾರು ಆವಾನು ದೇಖ್ಯೊ. 64 ರೆಬೆಕ್ಕನೆ ಡೋಳಪಾಡಿ ಇಸಾಕನ ದೇಖಿನ್ ಊಟ್‌ಥಿ ಹೇಟ್ಉತ್ರಿ. 65 ಇನೆ ಯೊ ಸೇವಕ್‌ನ, "ಅಪ್ಣ ಖ್ಹಾಮೆ ಖೇತರ್‌ಭಣಿಥು ವಳ್ಯಾವತೆ ಯೊ ಅದ್ಮಿ ಕೋಣ್?" ಕರಿ ಪುಛೈ಼. ಯೋಸ್ ಮಾರೊ ಯಜಮಾನ್ ಕರಿ ಯೊ ಬೋಲಖ್ಹತರ್ ಇನೆ ಘುಮ್‌ಟೊ ನಾಖಿಲಿದಿ. 66 ಯೊ ಸೇವಕ್‌ನೆ ಇನೆ ಕರ‍್ಯೊತೆ ಖ್ಹಾರ ಕಾಮ್ನ ಇಸಾಕನ ಬೊಲ್ಯೊ. 67 ಇಸಾಕ್‍ನೆ ರೆಬೆಕ್ಕನ ಇನಿ ಆಯಾ ಸಾರನು ಡೇರಾನ ಘರ್ಮ ಬುಲೈಲೀನ್‍ ಗಯೊ. ಅಮ್ನಿ ಪರಕ್ಮ ಇಸಾಕ್‍ನೆ ವ್ಯಾಹ ಕರ‍್ಯೊ. ರೆಬೆಕ್ಕ ಇನಿ ಬಾವಣ್‍ಹುಯಿ ಅಜು಼ ಪ್ಯಾರ್‌ಕರ‍್ಯೊ. ಇನೆ ರೆಬೆಕ್ಕನ ಪ್ಯಾರ್‌ಥಿ ಇನಿ ಆಯಾ ಸಾರ ಮರೀತೆ ದುಖ್‌ನ ಭೈಕಿಗಯೊ.