1 ಅಬ್ರಹಾಮ್ ಮಮ್ರೆಥೊ ನಿಕ್ಳಿನ್ ಹಿಜ್ಜಾ಼ಥೊ ಕಾನಾನ್ ದೇಖ್ಹ್‌ನು ದಕ್ಷಿಣ್ ತಬರ್ಖಾನ ಚಾ಼ಲ್‌ಕುಚ಼್ ಕರ್ತೊಹುಯಿನ್ ಕಾದೇಶ್‌ನಾಬಿ ಶೂರ್‌ನಬಿ ಬೀಚ್ಮ ಜಿವ್ಣುಕರ‍್ಯೊ. ಥೋಡದನ್ ಗೆರಾರ್‌ಮಾಬಿ ರ‍್ಹಯೊ. 2 ಅಬ್ರಹಾಮ್ ಇನಿ ಬಾವಣ್ ಸಾರನ ನ್ಹಾನಿ ಭೇನ್‍ಕರಿ ಬೋಲಿಲಿದೋತೆ ಇನಖ್ಹಾಜೆ, ಗೆರಾರ್‌ನೊ ರಾಜ಼ ಅಬೀಮೆಲೆಕನೆ ಸಾರನ ಬುಲೈಮಂಗೈನ್‌ ಇನ ಘರ್‌ಮ ರಾಖಿಲಿದೊ. 3 ಕತೋಬಿ ಎಕ್ ರಾತ್ ದೇವ್ನೆ ಅಬೀಮೆಲೆಕನ ಖ್ಹೋಣ್ಯಾಮ ಆಯಿನ್, "ಯೊ ತಯೇಡನ ಮಳೈಲಿದೊತೆ ಇನಖ್ಹಾಜೆ ತೂ ಮರವಾಳೊ ಹುಯಿರ‍್ಹೋಸ್; ಯೊ ಬಿಜೇಕ್ ಪರ್ಖ್ಹಾನಿ ಬಾವಣ್ ಹುಯಿರ‍್ಹೀಸ್" ಕರಿ ಬೊಲ್ಯೊ. 4 ಕತೋಬಿ ಅಬೀಮೆಲೆಕ ಸಾರಥಿ ಮಳಿರ‍್ಹೋಥೊ ಕೊಯ್ನಿ. ಇನೆ, "ಪ್ರಭು, ನೀತಿವಾಳ ಹುಯಿರ‍್ಹಾತೆ ಅದ್ಮಿಖ್ಹಾರನಾಬಿ ನಾಶಕರೀಶ್‍ಕಿಶು? 5 ಯೊ ಅದ್ಮಿನೆ ಹೈರಿತೆ ಮಾರಿ ನ್ಹಾನಿ ಭೇನ್‍ಕರಿ ಬೊಲ್ಯೊ. ಇನೇಬಿ ಯೊ ಮನ ಮೋಟೊಭೈ ಹೋಣುಕರಿ ಬೋಲಿ. ಮೇಬಿ ಖ್ಹಾಚ಼ ದಿಲ್‌ಥಿ, ಅಮ್‍ಕರ‍್ಯೋತೆ" ಕರಿಬೋಲ್ಯೊ. 6 ಇನ ಖ್ಹೋಣ್ಯಮ ದೇವ್ನೆ, "ತೂ, ಖ್ಹಾಚ಼ದಿಲ್‍ಥಿ ಅಮ್‍ಕರ‍್ಯೋತೆ ಕರಿ ಮನ ಮಾಲುಮ್; ಇನಖ್ಹಾಜೆ ತೂ ಮಾರ ಖ್ಹಾಮ್ಣೆ ಪಾಪ್‍ ನಾಕರ‍್ನುತೆ ತಿಮ್ ಮೇ ತಾರ ಆಡೊ ಹುಯಿನ್ ಹೈರಿತೇನ ಛೀಮದಿದೊ ಕೊಯ್ನಿ. 7 ಅಮ್‍ರ್ಹಾವಪರ್ ಯೊ ಅದ್ಮಿನಿ ಬಾವಣ್ಣ ಇನ ದಿನಾಖಿದೆ. ಯೊ ಪ್ರವಾದಿ, ತಾರಖ್ಹಾಜೆ ಯೊ ಮನ ಬಿಂತಿ ಕರ್ಶೆ ಅಜು಼ ತೂ ಬಚಿಶ್. ಇನಿ ಬಾವಣ್ಣ ಇನ ನಾ ದಿನಾಖ್ಯೊತೊ ತೂಬಿ ತಾರಭಣಿನು ಖ್ಹಾರೂಸ್ ಮರಿಜಾ಼ಶುಕರಿ ಮಾಲುಮ್‍ ಕರಿಲೆ" ಕರಿ ಬೊಲ್ಯೊ. 8 ಇನವ್ಹಾಣೆ ಅಬೀಮೆಲೆಕನೆ ಇನ ಕಾಮ್‌ಗಿರಿ ಖ್ಹಾರಸ್ನ ಮಳೈನ್ ಆ ಖ್ಹಾರಿ ವಾತೆ ಖ್ಹಮ್‍ಜಾ಼ಡಖ್ಹತರ್ ಇವ್ಣೆ ಘಣು ಡರ‍್ಯು. 9 ಅಬೀಮೆಲೆಕನೆ ಅಬ್ರಹಾಮ್‍ನ ಬುಲೈನ್, "ತೂ ಹಮುನ ಕರ‍್ಯೋತೆ ಶಾತ್‌? ಮೇ ಶನು ಪಾಪ್ ಕರ‍್ಯೋತೆ ಇನಖ್ಹಾಜೆ ತೂ ಮನಾಬಿ ಮಾರ ರಾಜ್ಯನಾಬಿ ನಾಶನ್‌ಮ ಘಾಲಿದಿದೊ? ತೂ ನಾಕರ‍್ನುತೆ ಕಾಮ್‍ಕರಾನ ಮೇ ತುನ ಶಾತ್‌ ಕರ‍್ಯೋಥೊ" ಕರಿ ಬೊಲ್ಯೊ. 10 ಆನಾಹುಯಿನ್ "ತೂ ಖೆವಿ ಖ್ಹೂಜ಼್‌ಥಿ ಆ ಕಾಮ್ ಕರ‍್ಯೊತೆ?" ಕರಿ ಅಬೀಮೆಲೆಕನೆ ಅಬ್ರಹಾಮ್‍ನ ಪುಛಾ಼ಯೊ. 11 ಇನ ಅಬ್ರಹಾಮ್‌ನೆ, "ಆ ಝ಼ಗೊವಾಳು ದೇವ್‍ನೊ ಡರ್‌ಕೊಂತೆ ಮಾರಿ ಬಾವಣ್‍ನಖ್ಹಾಜೆ ಮನ ಮಾರಿನಾಖೆಜಾ಼ಯ್ನಿ ಕರಿ ಲಾಝ್ಯೊ. 12 ಯೊ ನಾಹುಯಿನ್ ಆ ಹೈರಿತೆ ಖ್ಹಾಚಾಮ ಮಾರಿ ನ್ಹಾನಿ ಭೇನ್, ಮಾರ ಬಾನಿಛೋ಼ರೀಸ್; ಕತೋಬಿ ಮಾರಿ ಆಯಾನಿ ಛೋ಼ರಿ ಕಾಹೇ ಇನಖ್ಹಾಜೇಸ್ ಮನ ಬಾವಣ್‍ಬಣಿ. 13 ಮೇ ದೇವ್ನಿ ಖ್ಹೂಜ಼್‍ಥಿ ಬಾನು ಘರ್ ಮ್ಹೇಲಿನ್ ದೇಖ್ಹ್‌ಪರ್ ಜಾ಼ವಾನ ನಿಕ್ಳಾನಿವಖ್ಹ್‌ತೆ ಮೇ ಇನ, ‘ಅಪ್ಣೆ ಜಾ಼ವನಿ ಖ್ಹಾರಿಸ್ ಝ಼ಗೋಮಾಬಿ ಮನ ತಾರೇಥಿ ಎಕ್ ಮದತ್ ಮಳ್‌ಣು. ಯೊ ಶಾತ್‍ಕತೊ ತೂ ಮನ ಮೋಟೊಭೈ ಕರಿಬೋಲ್ನು’ ಕರಿ ಖ್ಹಮ್‍ಜಾ಼ಡ್ಯೋಥೊ" ಕರಿಬೋಲ್ಯೊ. 14 ತದೆ ಅಬೀಮೆಲೆಕನೆ ಅಬ್ರಹಾಮ್‍ನ ಇನಿ ಬಾವಣ್‍ ಸಾರನ ದಿನಾಖ್ಯೊ, ಅಜು಼ ಇನಜೋ಼ಡೆ ಢಾಂಡ ಮೇಂಢನಾಬಿ ದಾಸ ದಾಸಿನಾಬಿ ದಿನಾಖ್ಯೊ. 15 "ಹಂದೇಕ್‌, ಆ ಮಾರೊ ದೇಖ್ಹ್‌; ಅನಾಮ ತುನ ಪಸಂದ್‌ಲಾಗಾತೆ ಬಾಜು಼ಮ ತೂ ಜಿವ್ಣುಕರೇಜಾ಼ಯ್" ಕರಿ ಅಬೀಮೆಲೆಕನೆ ಬೊಲ್ಯೊ. 16 ಆನಾಹುಯಿನ್ ಇನೆ ಸಾರನ, "ತಾರ ಮೋಟಭೈನ ಹಜಾ಼ರ್‌ ರೂಪಾನ ಪೈಶ ದೀರಾಖ್ಯೋಸ್; ಚಾ಼ಲ್ಯುತೆ ತಿನ ತಾರಭಣಿವಾಳು ಅನ ಖ್ಹಯಾಲ್ ನಾಕರ‍್ನುತೆ ತಿಮ್ ರ‍್ಹವಾನ ಆಹೈರುತೆ ಪ್ರಾಯಶ್ಚಿತ್ ಹುಯಿರ‍್ಹವಾದೆ; ತು ಇಜ಼್ಜತ್‌ವಾಳಿಕರಿ ಅನೇಥಿ ಖ್ಹಾರುಜ಼ಣು ಮಾಲುಮ್‌ಕರ್ಲಿಶೆ." ಕರಿಬೋಲ್ಯೊ. 17 ತದೆ ಅಬ್ರಹಾಮ್‌ನೆ ದೇವ್ನ ಬಿಂತಿಕರಾಮ ದೇವ್ನೆ ಅಬೀಮೆಲೆಕನಾಬಿ, ಇನಿ ಬಾವಣ್ಣಾಬಿ, ಅಜು಼ ದಾಸಿಯೇವ್‌ನಾಬಿ ಗುಣ್‌ಕರ‍್ಯೊತೆ ಇನಖ್ಹಾಜೆ ಇವ್ಣುನ ಲಡ್ಕಹುಯು. 18 ಅನೇಥಿ ಅಗ್ಗಳ್ ಅಬ್ರಹಾಮ್‌ನಿ ಬಾವಣ್‍ ಸಾರನಟೇಕೆ ಯೆಹೋವ ದೇವ್ನೆ ಅಬೀಮೆಲೆಕನ ಘರ್ಮಥಿಯೆತೆ ಖ್ಹಾರಿಸ್ ತಯೇಡಾವ್ನ ವಾಂಝ಼್‌ಣಿ ಬಣೈರಾಖ್ಯೊಥೊ.