1 ಧರ್ತಿಪರ್ ಅದ್ಮಿನು ಗಣ್ತಿ ಜಾ಼ಖ್ಹತ್ ಹುಯಿನ್ ಅವ್ಣುನ ಛೋ಼ಕ್ರಿಯೆ ಪೈದಹುಯೆ. 2 ಅದ್ಮಿವ್‌ನಿ ಛೋ಼ಕ್ರಿಯೇ ರಂಗ್‌ರೂಪ್‌ವಾಳಿಯೆ ಥಿಯೇತೆ ದೇಖಿನ್ ದೇವ್ನ ಛಿಯ್ಯಾವ್‌ನೆ ಇವ್ಣುನ ಪಸಂದ್‌ಹುವಾತೆ ತಯೇಡವ್‍ನ ವ್ಯಾಹ ಕರಿಲಿದು. 3 ತದೆ ಯೆಹೋವನೆ, "ಮಾರಿ ಆತ್ಮ ಅದ್ಮಿನ ಜೋ಼ಡೆ ಹಮೇಶ ರ‍್ಹವಾನ ಮ್ಹೇಲುಕೊಯ್ನಿ. ಶನಕತೊ ಲ್ಹೋಯಿಬಿ ಬೋಟಿಥಿ ಛಾ಼ತೆಇವ್ಣೆ ಮರವಾಳುಸ್. ಇವ್ಣೆ ಘಣಾದನ್‍ ಬಚಿರ‍್ಹಿಶೆಕೊಂತೆ ಏಖ್ಹೊವೀಖ್ಹ್ ವರಖ್ಹ್‌ಲಗು ಬಚಿರ‍್ಹಿಶೆ" ಕರಿ ಬೊಲ್ಯೊ. 4 ಇನವಾರ್‌, ದೇವ್ನಛಿಯ್ಯಾ ಅದ್ಮಿ‌ವ್‍ನಿ ಛೋ಼ರಿಯೇನ ಮಳೀನ್‍ ಇವ್ಣೇಥಿ ಲಡ್ಕ ಪೈದಹುಯು. ಯೊ ಹಗಾಮ್‌ಥು ಧರಿನ್‌ ಇಂಥಿವಾರ್‌ಲಗೂಬಿ ಜ಼ಗ್‌ಮ ಮಹಾಶರೀರ್‌ವಾಳು ಥು. ಅವ್ಣೇಸ್ ಜ಼ಮಾನಮ ನಾಮ್ ಕಮಾಯುತೆ ತಾಖತ್‍ವಾಳುಖ್ಹಾರು. 5 ಅದ್ಮಿನು ಖರಾಬ್ ಫನೈ ಧರ್ತಿಪರ್ ಜಾ಼ಖ್ಹತ್ ಹುಯಿಗುತೆ, ಇವ್ಣೆ ಮನ್‌ಮ ಸೋಚಾನುಖ್ಹಾರು ಕದೇಬಿ ಖರಾಬಸ್‍ ಹುಯಿರ‍್ಹಯೂತೆ ಯೆಹೋವನೆ ದೇಖಿನ್, 6 ಯೆಹೋವನೆ, ಧರ್ತಿಪರ್ ಅದ್ಮಿವ್‍ನ ಉಬ್‍ಜಾ಼ಯೊತೆ ಇನಖ್ಹಾಜೆ ಪಶ್‌ತೈನ್‌ ಇನ ದಿಲ್ಮ ದುಖ್‍ಕರ‍್ಯೊ. 7 ಅಜು಼ ಯೆಹೋವನೆ, ಅದ್ಮಿವ್‍ ನ ಮೇ ಉಬ್‍ಜಾ಼ಯೊತೆ ಅದಮ್ಜ಼ಮಾನನ ಧರ್ತಿಪರ್‌ಥು ನೂಛಿನಾಖುಸ್; ಅದ್ಮೆವ್ನಿ ಜೋ಼ಡ್ಮ ಹರೇಕ್ ಜೀನ್‌-ಜಿನಾವರ್‌ಬಿ ಜ಼ಮಿನ್‌ಪರ್ ಖ್ಹವ್‌ಳವಾಳು ಕೀಡ್‌ಕಮ್‌ಟವ್‍ನಾಬಿ ನೂಛಿನಾಖುಸ್. ಅನ ಅಖ್ಖಾನ ಉಬ್‍ಜಾ಼ಯೊತೆ ಇನಖ್ಹಾಜೆ ಮನ ದುಖ್‌ ಹುವ್‍ಕರಸ್; ಕರಿ ಬೋಲಿಲಿದೊ. 8 ಕತೋಬಿ ನೋಹ ಯೆಹೋವನ ಪಸಂದ್‌ಹುಯೊ.

9 ನೋಹಾನಿ ಖೇಣಿ; ನೋಹ ನೀತಿವಾಳೋಬಿ, ಅಖ್ಖ ಅದ್ಮಿವೋಮ ಖ್ಹಾಚೋ಼ಬಿ ಹುಯಿರ‍್ಹೋಥೊ. ಯೊ ದೇವ್‍ನಿಜೋ಼ಡ್ಮ ಗಳ್‍ಜೋ಼ಡ್‌ಥಿ ಚಾ಼ಲಿಲಿದೊ. 10 ನೋಹಾನ ಶೇಮ್‌, ಹಾಮ್‌, ಯೆಫೆತ್‌ ಕರಿ ತೀನ್ಜ಼ಣ ಲಡ್ಕ. 11 ಧರ್ತಿವಾಳು ದೇವ್ನಿ ನಜ಼ರ‍್ಮ ಖರಾಬ್‌ಥಿ ಚಾ಼ಲಿನ್ ಖೋಟ್ವಾಳು ಹುಯ್ಗುಥು. ಖ್ಹತಾಪ್ಣಿ ಅಜು಼ ಅನ್ಯಾಮ್‌ಬಿ ಧರ್ತಿಮ ಭರೈಗುಥು. 12 ದೇವ್ ಜಗತ್ನ ಅದ್ಮಿನ ದೇಖಾಖ್ಹತರ್ ಇವ್ಣಿ ಖರಾಬ್ ಚಾ಼ಲ್‌ನ ದೇಖ್ಯೊ. ಹಿಜ್ಜಾ಼ ಜಿವ್ಣುಕರವಾಳು ಅಖ್ಖಾ ಅದ್ಮಿನಿವಾಟ್ ಖರಾಬ್‌ಥೀಸ್ ಭರೈರ‍್ಹುಥು. 13 ತದೆ ದೇವ್ನೆ ನೋಹಾನ, "ಮೇ ಖ್ಹಾರಸ್ ಅದ್ಮೆವ್‍ನ ನೂಛಿನಾಖನ ತೀರ್ಮಾನ್ ಕರಿರಾಖ್ಯೊಸ್; ಶನಕತೊ ಅವ್ಣೇಥಿ ಧರ್ತಿ ಖರಾಬ್‌ಫನೈಥಿ ಭರೈರ‍್ಹೂಸ್‍ ಮೇ ಖ್ಹಾಚಮ ಇವ್ಣುನ ಧರ್ತಿನ ಜೋ಼ಡ್ಮ ನೂಛಿನಾಖುಸ್. 14 ತೂ ತಾರಖ್ಹಾಜೆ ಘಣಮೋಲ್‌ನ ಝ಼ಾಡ್‍ಥಿ ಜ಼ಹಾಜ಼್ ಬಣೈಲೆ. ಇನಾಮ ಘಣಾ ಕೋಣರ‍್ಹೇಣು; ಮಹಿಬಿ ಭಾರ್‌ಬಿ ಡಾಂಬರ್ ಲಗಾಡ್. 15 ತೂ ಇನ ಕಿಮ್ನಿ ಪರಕ್ಮ ಕರ‍್ನುಕತೊ ಯೊ ತೀನ್‍ಖ್ಹೊ ಹಾತ್ ಲಾಂಬುಬಿ, ಅಢೈಖ್ಹ್‌ ಹಾತ್ ಚೌ಼ಡುಬಿ, ಡೋಡಿಖ್ಹ್‌ ಹಾತ್ ಊಚು಼ಬಿ ಹುಯಿರೇವ್ಣು. 16 ಇನ ಛ಼ತ್‍ನ ಹೇಟ್ ಅಶ್‍ಪಿಶ್ ಎಕ್ ಹಾತ್ ಊಚು಼ ಖೀಂಡ್‌ ಬಣಾವ್ಣು; ಭೀಡೆ ಬಾಕಲ್‍ಮ್ಹೇಲ್‍ನು. ಜ಼ಹಾಜ಼್‍ಮ ಏಕ್‍ನಪರ್‌ ಏಕ್‍ ತೀನ್‍ಖನ್ ಬಣಾವ್‍ಣು. 17 ಮೇತೊ ಧರ್ತಿಪರ್ ಪಾಣಿನು ತೋಫಾನ್ ಆವಾನಿತರ ಕರೀನ್ ಆಬ್‍ನ ಹೇಟ್ ಛಾ಼ತೆ ಹರೇಕ್ ಜೀನ್‌ಜಿನಾವರ್‌ನಾಬಿ ನಾಶ್‌ಕರಿಷ್; ಧರ್ತಿಮ ಛಾ಼ತೆ ತಮಾಮಸ್ ಮಟಿಜಾ಼ಶೆ. 18 "ಕತೋಬಿ ತಾರಿಜೋ಼ಡ್ಮ ಮೇ ಎಕ್ ಒಪ್ಪಂದಾನ ಕರುಸ್. ತೂ ತಾರಿ ಬಾವಣ್, ಛಿಯ್ಯಾ ಅಜು ವ್ಹವೆ ಖ್ಹಮೇದ್ ಜ಼ಹಾಜ಼್‍ಮ ಪೇಶಿಜಾ಼ವ್ಣು. 19 ಆ ನಾಹುಯಿನ್ ಜೀನ್‌ಜಿನಾವರ್‌ಮ ಹರೇಕ್ ಜಾ಼ತ್‍ಮಾಬಿ ಏಕ್‍ ಪರ್ಖ್ಹೊ ಎಕ್ ತಯೇಡ ಅಮ್ ಬೆಬ್ಬೇನ ಜ಼ಹಾಜ಼್‍ಮ ಪೆಖ್ಹಾಡಿನ್, ತಾರಿಜೋ಼ಡ್ಮ ಬಚಾ಼ಡಿಲೆವ್ಣು. 20 ಜಾನ್ವರ್‌, ಜಿನಾವರ್‌, ಝಾ಼ಡಿನು ಜಾನ್ವರ್‌ ಕೀಡುಕಮ್‌ಟು ಇನಾಮನು ಹರೇಕ್ ಜಾ಼ತ್‍ಮಾಬಿ ಜೋ಼ಡುಜೋ಼ಡು ಬಚಾ಼ನಖ್ಹಾಜೆ ತಾರಕನ ಆವ್‌ಶೆ. 21 ತುನಾಬಿ ಯೊ ಅಖ್ಖಾನಬಿ ಪಳ್ವಾನಖ್ಹಾಜೆ ಹರೇಕ್ ಥರಾನು ಅನಾಜ಼್‌ನ ತಾರಕನ ಜ಼ಮಕರಿಲೆವ್ಣು" ಕರಿ ಬೊಲ್ಯೊ. 22 ದೇವ್ನೆ ಹುಕುಮ್ ಕರ‍್ಯೊತೆ ಪರಕ್ಮಾಸ್ ನೋಹಾನೆ ಕರ‍್ಯೊ.