ಆದಿಕಾಂಡ 8

ಪಾಣಿನು ತೋಫಾನ್ನಿ ಖ್ಹರ್ತಿ

1 ಇನವಾರ್ ದೇವ್ನೆ ನೋಹನಾಬಿ ಇನಜೋ಼ಡೆ ಜ಼ಹಾಜ಼್‍ಮಥೂತೆ ಖ್ಹಾರುಸ್ ಜೀನ್‌ಜಿನಾವರ್ ಅಜು಼ ಜಾನ್ವರ್‌ನಬಿ ಯಾದ್‌ಕರಿನ್ ಧರ್ತಿಪರ್ ವಹಿರೊ ವಾಗನಿಘೋಣಿ ಕರಾಖ್ಹತರ್ ಪಾಣಿ ಖ್ಹರ್‌ತುಆಯು. 2 ಧರ್ತಿನ ಹೇಟ್‌ಥೂತೆ ದರ‍್ಯಾವ್‍ನು ವಾಟೆಖ್ಹಾರುಬಿ ಆಬ್‍ನು ತೂಬ್‌ಖ್ಹಾರು ಮೂಚೈ಼ಗಯು. ಆಬ್‍ಥು ರಂಚ಼ವ್‌ಕರ್ತುಥೂತೆ ವರ್ಖ್ಹಾತ್ ಭೀರಿಗಯು. ಧರ್ತಿಪರ್‌ಥೂತೆ ಪಾಣಿ ಥೋಡು ಥೋಡು ಖ್ಹರ್ತುಹುಯಿನ್‍ ಆಯು. 3 ಅಮ್ ಏಕ್‌ಖ್ಹೊ ಅಢೈವೀಖ್ಹ್ ದನ್ ಹುವಾನ ಪಾರ್ ಪಾಣಿ ಕಮ್‍ಹೋತು ನಿಕ್‌ಳ್ಯು. 4 ಖ್ಹಾತ್‍ನ ಮಹಿನಾನೊ ಖ್ಹತ್ರಾನೊ ರೋಜ಼್‍ಮ ಜ಼ಹಾಜ಼್ ಅರಾರಾಟ್ ತಬರ್‌ಖಾನು ಪಹಾಡ್‍ಕನ ಭೀರಿಗು. 5 ದಖ್ಹ್‌ನ ಮಹಿನಲಗೂಬಿ ಪಾಣಿ ಕಿಮ್ ಕಮ್‍ಹೋತು ಆಯುಕಿ ದಖ್ಹ್‌ನ ಮಹಿನಾನೊ ಪಹಿಲದನ್ನೆ ಪಹಾಡ್‍ನಿ ನೋಕೆ ದೆಖಾವಲಗ್ಯು. 6 ಚಾ಼ಳಿಖ್ಹ್‌ದನ್‌ ಹುವಾನ ಪಾರ್ ನೋಹಾನೆ ಇನೆ ಕರ‍್ಯೊತೆ ಜ಼ಹಾಜ಼್‍ನಿ ಕಿಟ್‌ಕೆನ ಕಾಡಿನ್ ಎಕ್ ಕಾಂಗಣ್ಣಾ ಭಾರ್ ಮ್ಹೇಲ್ಯೊ. 7 ಧರ್ತಿಪರ್‌ಥೂತೆ ಪಾಣಿ ಖ್ಹುಕಾವಲಗು ಯೊ ಕಾಂಗಣ್‌ ಆವಣ್ ಜಾ಼ವಣ್ ಕರುಕರ್ತುಥು. 8 ಅಮ್‍ರ್ಹಾವಪರ್ ಪಾಣಿ ಕಮ್‌ಹುಯುಕಿ ಕೊಯ್ನಿಕರಿ ಮಾಲುಮ್‍ ಕರಿಲ್ಯಾವನಖ್ಹಾಜೆ ನೋಹಾನೆ ಎಕ್ ಪರ‍್ಯಾವನ ಭಾರ್ ಮ್ಹೇಲ್ಯೊ. 9 ಕತೋಬಿ ಜ಼ಮೀನ್‌ಪರ್‌ ಪಾಣಿ ಥೂತೆ ಇನಖ್ಹಾಜೆ ಪರ‍್ಯಾವೊ, ಗೋಡೊಮ್ಹೇಲಾನ ಝ಼ಗೊ ದೆಖಾಯುಕೊಂತೆ ಫರೀನ್ ಪಾಛು಼ ಜ಼ಹಾಜ಼್‍ಕನ ಆಯು. ನೋಹಾನೆ ಹಾತ್ ಪೂರೈನ್‌ ಇನ ಧರೀನ್ ಜ಼ಹಾಜ಼್‍ಮ ಘಾಲಿಲಿದೊ. 10 ಇನೆ ಬಿಜು಼ ಖ್ಹಾತ್ ರೋಜ಼್‍ನ ಪಾರ್ ಪರ‍್ಯಾವನ ಪಾಛೊ಼ ಭಾರ್ ಮ್ಹೇಲ್ಯೊ. 11 ಖ್ಹಾಂಜೆ ಯೊ ಪರ‍್ಯಾವೊ ಪಾಛು಼ಫರಿನ್ ನೋಹಕನ ಆವಖ್ಹತರ್, ಇನ ಚೋ಼ಚ಼್‌ಮ ಒಲಿವ್ ತೇಲ್‍ನ ಝಾ಼ಡ್‍ನು ನವು ಚಿಗುರ್‌ಥು. ತದೆ ಇನೆ ಇನ ದೇಖಿನ್ ಪಾಣಿ ಧರ್ತಿಪರ್‌ಥು ಖ್ಹರಿಗಯುಕರಿ ಮಾಲುಮ್ ಕರಿಲಿದೊ. 12 ಪಾಛೊ಼ ಖ್ಹಾತ್ ರೋಜ಼್‌ನ ಪಾರ್ ಪರ‍್ಯಾವನ ಮ್ಹೇಲಾಖ್ಹತರ್ ಯೊ ಪಾಛು಼ಫರಿ ಇನಾಕನ ಆಯುಸ್ ಕೊಯ್ನಿ. 13 ನೋಹಾನ ಛೊ಼ಖ್ಹೊ ಎಕ್ ವರಖ್ಹ್‌ ಹುಯಿನ್ ಪಹಿಲ ಮಹಿನಾನೊ ಪಹಿಲೊ ರೋಜ಼್‌ ಧರ್ತಿಪರ್ ಥೂತೆ ಪಾಣಿ ಖ್ಹರಿಗಯುಥು. ನೋಹಾನೆ ಜ಼ಹಾಜ಼್‌ನು ಕಿಟ್‌ಕೆನ ಕಾಡಿನ್ ದೇಖಾಖ್ಹತರ್, ಧರ್ತಿ ಪೂರ ಖ್ಹುಕೈರ‍್ಹೂಥು. 14 ಬೇನ ಮಹಿನಾನೊ ಖ್ಹಾತ್‌ಉಪ್ರಿಖ್ಹ್‌ನೊ ರೋಜ಼್‌ಮ ಧರ್ತಿ ಖ್ಹುಕೈಗಯುಥು. 15 ತದೆ ದೇವ್ನೆ ನೋಹಾನ, 16 "ತೂ ತಾರಿ ಬಾವಣ್, ಲಡ್ಕಾವ್ ವ್ಹವೆಖ್ಹಮೇದ್ ಜ಼ಹಾಜ಼್‍ನ ಮ್ಹೇಲಿನ್ ಭಾರ್ ಆವ್; 17 ತಾರಕನ ಛಾ಼ತೆ ಜೀನ್‌-ಜಿನಾವರ್‌, ಕೀಡುಕಮ್‍ಟು, ಖ್ಹಾರುಸ್ ಜೀವಿಬಿ ಭಾರ್‌ಆವಾದೆ; ಯೊ ಅಖ್ಖಾನ ಧರ್ತಿಪರ್ ಘಣುಹುಯಿನ್‌ ಫುಟಾದೆ; ಯೊ ಭಡೀನ್ ಜಾ಼ಖ್ಹತ್ ಹುವಾದೆ" ಕರಿ ಬೊಲ್ಯೊ. 18 ನೋಹ ಇನಿ ಬಾವಣ್‍ ಛಿಯ್ಯಾ ವ್ಹವೆಖ್ಹಮೇದ್ ಭಾರ್ ಆಯೊ. 19 ಖ್ಹಾರುಸ್ ಜೀನ್‌ಜಿನಾವರ್, ಜಿನಾವರ್‌ ಅಜು ಕೀಡುಕಮ್‌ಟು ಖ್ಹಮೇದ್ ತಿನಿ ತಿನಿ ಜಾತ್ನಿ ಪರಕ್ ಜ಼ಹಾಜ಼್‍ಥಿ ಭಾರ್ ಆಯು.

ನೋಹಾನೆ ಬಲಿ ದಿದೋತೆ

20 ತದೆ ನೋಹ ಯೆಹೋವನಖ್ಹಾಜೆ ಚಾ಼ಚ಼ರ್‌ನ ಭಾಂದಿನ್‌, ಇನಾಪರ್ ಶುದ್ಧಂ ವಳು ಹರೇಕ್ ಜೀನ್‌-ಜಿನಾವರ್‌ ಮಾಥು ಚೂ಼ಣಿಲೀನ್ ಅಖ್ಖಾಸ್‍ ಏಕ್‍ನ ಭುಂಜಿನ್ ಢಪ್ಕಾರದಿದೊ. 21 ಇನು ಮಹಿಕಾವನು ವಾಖ್ಹ್‌ ಯೆಹೋವನ ಮಹಿಕಾವಖ್ಹತರ್‌ ಇನ ಪಸಂದ್ ಹುಯು, "ಅದ್ಮೆವ್‌ನಿ ದಿಲ್ನಿ ಖ್ಹೂಜ಼್‌ ಅಡ್ಡಾಣಿಪರ್‌ಥುಸ್ ಖರಾಬ್‌, ಕತೋಬಿ ಮೇ ಅನಪಾರ್‌ ಇವ್ಣಖ್ಹಾಜೇಥಿ ಧರ್ತಿನ ಶಾಪ ದೇವ್‌ಕೊಯ್ನಿ, ಮೇ ಖ್ಹಾರುಸ್ ಜೀವಿನಾಬಿ ಹಮ್ಕೆ ನಾಶ್‌ಕರ‍್ಯೊತೆ ತಿಮ್‌ ಅನಪಾರ್‌ ಕರೀಶ್‌ಕೊಯ್ನಿ.

22 ಧರ್ತಿರ‍್ಹವಾಲಗು ಬಿತ್‌ಕರಾನು ಹಗಾಮ್‌ಬಿ, ವ್ಹಾಡ್ಣಿನ ಹಗಾಮ್‌ಬಿ, ಠಣ್, ಗರಮ್, ಠಣ್ಣಾ ಹಗಾಮ್‌ಬಿ, ತಡ್ಕಾನ ಹಗಾಮ್‌ಬಿ, ದನ್‌ಬಿ, ರಾತ್‌ಬಿ, ಆ ಅಖ್ಖಾನು ತರಿಕಾ ಭೀರಿಶೆಕೊಯ್ನಿ" ಕರಿಬೋಲ್ಯೊ.