1 ಯೆಹೋವದೇವ್‌ ಇನೆ ವಾಗ್ದಾನ್‌ ಕರ‍್ಯೊತೆ ತಿಮ್ಮಸ್‌ ಸಾರನ ಉಪ್ಪರ್‌ ಗೋರ್‌ಕರೀನ್ ಇನೆ ದಿದೋತೆ ವಾತ್ನ ಅನುಗ್ರಹಥಿ ಚಲಾಯೊ. 2 ಇಮ್ಮಸ್‌ ಸಾರ ಬೇಜೂನಿಹುಯಿನ್, ದೇವ್ನೆ ಫೈಲೆಸ್‌ ಖ್ಹಣೇದ್ ಕರ‍್ಯೊತೆ ದನ್ಮಾಸ್ ಅಬ್ರಹಾಮಥಿ ಇನ ಭುಡ್‌ಪಣ್‌ಮಾಸ್ ಇನ ಏಕ್‌ ಛಿಯ್ಯೊಜ಼ಣಿ. 3 ಅಬ್ರಹಾಮನೆ ಸಾರಥಿ ಪೈದಹುಯೊತೆ ಛಿಯ್ಯಾನ "ಇಸಾಕ" ಕರಿ ನಾಮ್‌ಮ್ಹೆಲ್ಯೊ. 4 ಇಸಾಕ್‌ ಪೈದಹುಯಿನ್ ಆಟ್ನ ದನ್ಮ ದೇವ್ ಆಣ್ ಕರ‍್ಯೊತೆ ತಿಮ್ಮಸ್ ಅಬ್ರಹಾಮ್‌ನೆ ಇಸಾಕನ *ಖ್ಹತ್ನ ಕರ‍್ಯೊ. 5 ಇಸಾಕ ಪೈದಹುಯೊ ತದೆ ಅಬ್ರಹಾಮ್‌ನ ಖ್ಹೊ ವರಖ್ಹ್‌ನೊ ಹುಯಿರ‍್ಹೋಥೊ. 6 ಸಾರನೆ, "ದೇವ್‌ ಮನ ಖ್ಹುಷಿ ಕರೈನ್‌ ಹಾಖ್ಹನಿಘೊಣಿ ಕರ‍್ಯೊ; ಹಮ್ಕೆಲಗೂಬಿ ಆ ಬಾರೇಮ ಖ್ಹಮ್‌ಜ಼ವಾಳು ಖ್ಹಾರುಸ್ ಮಾರಿಜೋ಼ಡ್ಮ ಹಾಖ್ಹ್‌ಶೆ. 7 ಆಸ್ ಕಾಹೆತೆ ಸಾರಬಿ ಲಡ್ಕಾವ್ನ ದೂದ್ ಪಿಡಾವ್‌ಷೆಕರಿ ಕೋಣ್‌ತೋಬಿ ಅಬ್ರಹಾಮನ ಬೋಲಾನ ಹುಯುಹೋತ್ಕಿ ಶು? ಕತೋಬಿ ಇನಿ ಭುಡಿ ಉಂಬರ್‌ಮಾಬಿ ಇನ ಛಿಯ್ಯೊ ಜ಼ಣಿದಿದಿನಿ" ಕರಿ ಬೋಲಿಲಿದಿ. 8 ಯೊ ಲಡ್ಕು ಮೋಟುಹುಯಿನ್ ದೂದ್ ಪಿಯಾನು ಮ್ಹೇಲ್‌ದಿದು. ಇಸಾಕ್‌ ದೂದ್ ಮ್ಹೇಲ್ಯೊತೆ ದನ್ಮ ಅಬ್ರಹಾಮನೆ ಮೊಟು ಮಿಝ಼್‌ವಾನ್ ಕರಾಯೊ.

9 ಏಕ್‌ದನ್ ಈಜಿಪ್ಟ್‌ನಿ ಹಾಗರ್‌ಥಿ ಅಬ್ರಹಾಮನ ಪೈದಹುಯೊತೆ ಛಿಯ್ಯಾನೆ ಇಸಾಕನಿ ಬಾರೇಮ ನಕ್ಲೆಕಾಡಾನು ದೇಖಿನ್ ಸಾರನೆ, 10 ಅಬ್ರಹಾಮನ, "ಆ ದಾಸಿನಾಬಿ ಇನ ಛಿಯ್ಯಾನಾಬಿ ಭಾರ್‌ಕಾಡ್‌; ಆ ದಾಸಿನೊ ಛಿಯ್ಯೊ ಮಾರ ಛಿಯ್ಯೊ ಇಸಾಕನಿ ಜೋಡ್ಮ ಹಕ್‌ದಾರ್‌ ನಾಬಣ್ಣು" ಕರಿಬೋಲಿ. 11 ಆ ವಾತೆ ಖ್ಹಮ್‌ಜಿನ್ ಅಬ್ರಹಾಮನ ಘಣು ದುಖ್‍ಹುಯು. ಶನಕತೊ ಇಷ್ಮಾಯೇಲ್‌ಬಿ ಇನೊ ಛಿಯ್ಯೊಸ್ ಹುಯಿರ‍್ಹೋಥೊ. 12 ಕತೋಬಿ ದೇವ್ನೆ ಅಬ್ರಹಾಮ್‌ನ, "ತಾರ ಛಿಯ್ಯಾನ ಅಜು಼ ದಾಸಿನಖ್ಹಾಜೆ ಇನ ವೇಚ಼್‌ಣೆ ನಾಹೊಣು; ಸಾರನೆ ಬೋಲಿತೆ ತಿಮ್ಮಸ್‌ಕರ್‌; ಇಸಾಕಥಿ ಪೈದಹುವವಾಳೂಸ್ ತಾರಿ ಪಿಳ್ಗಿ ಕರಿ ಬೋಲೈಲಿಶೆ; 13 ಆ ದಾಸಿನೊ ಛಿಯ್ಯೊ ತಾರೇಥಿ ಪೈದಹುಯೋತೆ ಇನಖ್ಹಾಜೆ ಇನೇಥಿಬಿ ಘಣು ಜ಼ಗ್‌ಜಾ಼ತ್‌ಹುವಾನಿತರ ಆಶೀರ್ವಾದ್‌ ಕರುಸ್" ಕರಿಬೋಲ್ಯೊ. 14 ಇನವ್ಹಾಣೆ ಅಬ್ರಹಾಮನೆ ಉಠೀನ್‌ ಹಾಗರನ ಥೋಡು ಖಾಣಾನು ಬುತ್ತುಬಿ, ಚಾ಼ಂಬ್‌ಡಾನಿ ತಿತ್ತೀಮ ಪಾಣಿ ಭರಿದೀನ್, ಲಡ್ಕಾನ ಇನ ಖಾಂದೆ ಬೆಖ್ಹಾಡಿ ಮೋಕಲ್‌ದಿದೊ. ಯೊ ನಿಕ್ಳಿನ್‌ ಬೇರ್ಷೆಬನಿ ಝಾ಼ಡಿಮ ಡುಂಡ್ವಾತಿಫಂಡ್ತಿಥಿ. 15 ತಿತ್ತಿಮಥೂತೆ ಪಾಣಿ ಖ್ಹತಮ್ ಹುವಾನಪಾರ್ ಇನೆ ಲಡ್ಕಾನ ಡಾಗ್ನ ಛಾ಼ಳಾಮ ಖ್ಹುಡೈನ್, 16 ಬಂಡೊಫೇಕ ಎತ್ರೆ ದೂರ್‌ ಜೈ಼ನ್ ಬೇಶಿನ್, "ಲಡ್ಕು ಮರಾನು ಮನ ಖ್ಹಮಾಳನ ಕೋಹೊಯ್ನಿ" ಕರಿ ಬೋಲಿನ್ ಖ್ಹಡ್‌ಕ್ಯಭರಿ ರದನ್‌ಕರಿ. 17 ಯೊ ಛೋ಼ಕ್ರು ರೋವಾನು ದೇವ್ನ ಖ್ಹಮಜ಼್‌ಪಡ್ಯು; ದೇವ್ನ ದೂತನೆ ಸೊರ್ಗಥೊ ಹಾಗರನ ಚಿಕ್ರಿನ್ ಇನ, "ಹಾಗರ್‌ ತುನ ಶಾತ್‌ಹುಯು? ಡರ್‌ನಕೊ; ಯೊ ಲಡ್ಕಾನಿ ಚಿಕ್ರಾಣ್ ದೇವ್ನ ಖ್ಹಮಜ಼್‌ಪಡ್ಯು 18 ತೂ ಉಠಿಜೈನ್ ಛೋ಼ಕ್ರಾನ ಪಾಡಿಲೆ, ಶನಕತೊ ಇನೇಥಿ ಮೋಟಿ ಜ಼ಗ್‌ಜಾ಼ತ್‌ ಹುವಾನಿಘೋಣಿ ಕರುಸ್" ಕರಿಬೋಲ್ಯೊ. 19 ಆ ನಾಹುಯಿನ್ ದೇವ್ನೆ ಇನ ಡೋಳಾನ ಉಖ್‍ಡ್ಯೊ, ಇನೆ ಹಿಜ಼್ಜ ಪಾಣಿನಿ ಬಾವ್ಡಿನದೇಖಿ ತಿತ್ತಿಮ ಪಾಣಿಭರಿ ಲಯಿನ್ ಛಿಯ್ಯಾನ ಪಿಡೈ. 20 ದೇವ್ ಯೊ ಛೋ಼ಕ್ರಾನಿ ಜೋ಼ಡ್ಮ ಥೊ; ಯೊ ಮೋಟೊಹುಯಿನ್‌ ಝಾ಼ಡಿಮ ರ‍್ಹೇತೊಹುಯಿನ್ ಶಿಕಾರಿಬಣ್ಯೊ. 21 ಯೊ ಪಾರಾನ್ನಿ ಝಾ಼ಡಿಮ ಜಿವ್ಣು ಕರ‍್ಯೊ. ಇನಿ ಆಯಾನೆ ಈಜಿಪ್ಟ್ ದೇಖ್ಹ್‌ಥು ಛೋ಼ಕ್ರಿ ಲಾಯಿ.

22 ಯೊ ಹಗಾಮ್ಮ ಅಬೀಮೆಲೆಕನೆ ಇನೊ ಶಿಪಾಯಿನ ಮೋಟೊ ಫೀಕೋಲನ ಜೋ಼ಡ್ಮ ಅಬ್ರಹಾಮಕನ ಜೈ಼ನ್, "ತೂ ಕರಾತೆ ಖ್ಹಾರಾಸ್ ಕಾಮ್ಮ ದೇವ್ ತಾರ ಜೋ಼ಡ್ಮ ಛಾ಼. 23 ಇನಖ್ಹಾಜೆ ತೂ ಮನಾಬಿ, ಮಾರ ಲಡ್ಕಾವ್‍ನಾಬಿ, ಮಾರಿ ಪಿಳ್ಗಿನಾಬಿ ಅನ್ಯಾಮ್ ನಾಕರ‍್ನುತೆ, ಮೇ ತುನ ದಯ ಕರ‍್ಯೊತೆ ತಿಮ್ಮಸ್, ಮನಾಬಿ, ತೂ ಜಿವ್ಣುಕರ‍್ಯೊತೆ ಆ ದೇಖ್ಹ್‌ನಾಬಿ ಅಛ್ಛು಼ ಕರೀಶ್‍ಕರಿ ದೇವ್ನ ಉಪ್ಪರ್ ಆಣ್ ಕರ‍್ನು." ಕರಿ ಬೊಲ್ಯೊ. 24 ಇನಖ್ಹಾಜೆ ಅಬ್ರಹಾಮನೆ "ಇಮ್ಮಸ್ ಮೇ ಆಣ್ ಕರುಸ್‌" ಕರಿ ಬೊಲ್ಯೊ. 25 ಅಬೀಮೆಲೆಕನ ಆಳ್‌ನೆ ಎಕ್ ಬಾವ್ಡಿನ ಜು಼ಲಮ್‌ಥಿ ಕಬ್‍ಜಾ಼ ಕರಿಲಿದುತೆ ಇನಖ್ಹಾಜೆ ಅಬ್ರಹಾಮನೆ ಅಬೀಮೆಲೆಕನ ಉಪ್ಪರ್ ಗಲತ್‌ ನಾಖ್ಯೊ, 26 ಅಬೀಮೆಲೆಕನೆ" ಆ ಕಾಮ್ ಕೋಣ್ ಕರ‍್ಯೂಕಿ ಮನ ಮಾಲುಮ್‍ಕೊಯ್ನಿ; ತೂ ಮನ ಬೋಲ್ಯೊಬಿಕೊಯ್ನಿ , ಹಮ್ಕೆಲಗು ಮೇ ಆ ವಾತೆನ ಖ್ಹಮ್‍ಜ್ಯೊಬಿ ಕೊಯ್ನಿ" ಕರಿ ಬೊಲ್ಯೊ. 27 ತದೆ ಅಬ್ರಹಾಮ್‌ನೆ ಢಾಂಡ ಬೋಕ್ಡಾವ್ನ ಅಬೀಮೆಲೆಕನ ಧರಮ್‍ ದಿದೊ. ಇಮ್ ಕರಾಥಿ ಭೇಜ಼ಣಾನ ಇಚ಼್‌ಮ ಒಪ್ಪಂದ ಹುಯು. 28 ಅನಕೇಡೆಥು ಅಬ್ರಹಾಮನೆ ಮಂಧಮಾನು ಖ್ಹಾತ್ ಮೇಂಢಿನ ಅಲಕ್‍ ರಾಖಖ್ಹತರ್, 29 ಅಜು಼ ಅಬೀಮೆಲೆಕನೆ ಅಬ್ರಹಾಮ್‍ನ, "ತೂ ಆ ಖ್ಹಾತ್ ಮೇಂಢಿನ ಅಲಕ್‍ ರಾಖಾನೊ ಮಾಯ್ನೊ ಶಾತ್?" ಕರಿ ಬೊಲ್ಯೊ. 30 ಇನ ಅಬ್ರಹಾಮ್‌ನೆ, "ಆ ಬಾವ್ಡಿನ ಖೋಂದಾಯೊತೆ ಮೇಸ್ ಕರಿ ಬೋಲಾನ ಸಬೂತ್‌ಹುಯಿನ್ ತೂ ಆ ಖ್ಹಾತ್ ಮೇಂಢಿನ ಮಾರ ಹಾತೇಥಿ ಮಾಂಗಿಲೇವ್ಣು" ಕರಿ ಬೋಲಿನ್, ಇವ್ಣೆ ಬೇಜ಼ಣಾಬಿ ಒಪ್ಪಂದಾನ ಕರಿಲಿದ. 31 ಇವ್ಣೆ ಭೇಜ಼ಣ ಹಿಜ಼್ಜ ಆಣ್‍ಕರ‍್ಯಾತೆ ಇನಖ್ಹಾಜೆ ಯೊ ಝ಼ಗೋನ "ಬೇರ್ಷೆಬ" ಕರಿ ನಾಮ್‌ಆಯು. 32 ಬೇರ್ಷೆಬಮ ಇವ್ಣೆ ಒಪ್ಪಂದ ಕರಿ ಹುಯಿಜಾ಼ವದಿನ್ ಅಬೀಮೆಲೆಕಬಿ ಇನೊ ಶಿಪಾಯಿ ಫೀಕೋಲಬಿ ಫಿಲಿಷ್ಟಿಯವಾಳನ ದೇಖ್ಹ್‌ನ ಪಾಛ಼ ಚ಼ಲೇಗಯ. 33 ಅಬ್ರಹಾಮ್ ಬೇರ್ಷೆಬಮ ತಮರಿಸ್ಕ್ ನಾಮ್ನು ಝಾ಼ಡ್ನ ಗಾಡಿನ್ ಹಿಜ಼್ಜ ಹಮೇಶನೊ ದೇವ್‍ ಯೆಹೋವನ ನಾಮ್ನ ಬೋಲಿನ್ ಅರಾದನೆಕರ‍್ಯೊ. 34 ಅಬ್ರಹಾಮನೆ ಫಿಲಿಷ್ಟಿಯವಾಳನ ದೇಖ್ಹ್‌ಮ ಘಣದನ್‍ಲಗು ಜಿವ್ಣುಕರ‍್ಯೊ.