1 ಯಾಕೋಬನೆ ಇನೊ ಬಾ ಜಿವ್ಣು ಕರುಕರ್ತೊಥೋತೆ ಕಾನಾನ್ ದೇಖ್ಹ್‌ಮ ಜಿವ್ಣು ಕರುಕರ್ತೊಥೊ. 2 ಯಕೋಬ್‍ನಿ ಖಾನ್‌ದಾನ್ನಿ ಖೇಣಿ: ತದೆ ಯೋಸೇಫ್‌ನ ಖ್ಹತ್ರಾವರಖ್ಹ್‌ ಹುಯಿರ‍್ಹಾಥ. ಯೊ ಇನ ಮೋಟಭೈಯೇನ ಜೋ಼ಡ್ಮ, ಕತೊ ಇನಿ ಬಾನಿ ಬಿಜೇಕ್‌ ಬಾವಣ್‍, ಬಿಲ್ಹಾ ಅಜು ಜಿಲ್ಪಾ ಕರಿ ಇವ್ಣ ಲಡ್ಕಾವ್ನ ಜೋ಼ಡ್ಮ, ಮೇಂಢ ಬೋಕ್ಡ ಚ಼ರಾವ್‌ತೋಥೊ. ಇವ್ಣೆ ಕಾಯಿತೋಬಿ ಖರಾಬ್ ಕಾಮ್ ಕರ‍್ಯಾತೊ ಯೊ ಬಾನ ಬೋಲ್‌ತೋಥೊ. 3 ಯೋಸೇಫ್ ಯಾಕೋಬನ ಬುಡ್‌ಪಣ್‌ಪರ್‌ ಪೈದಹುಯೋತೆ ಇನಾಖ್ಹಾಜೆ ಯಾಕೋಬನೆ ಇನ ಖ್ಹಾರಾಸ್‌ಲಡ್ಕೆಥೀಬಿ ಯೋಸೇಫ್‌ನ ಘಣು ಪ್ಯಾರ್‌ಕರೀನ್ ಇನ ರಂಗೇಲು ಲಾಂಬಾ ಭಾಯನು ಝ಼ಗ್ಗೋ ಕರೈನ್‌ ದೀರಾಖ್ಯೋಥೊ. 4 ಬಾ ಇನ ಖ್ಹಾರಾಸ್ ಲಡ್ಕೇಥೀಬಿ ಅನಾಸ್ ಘಣು ಪ್ಯಾರ್‌ ಕರಾತೆ ದೇಖಿನ್, ಯೋಸೇಫ್‌ನ ಮೋಟಭೈಯೇ ಇನ ವಹೇರ್‌ ಕರೀನ್‌. ಇನಿ ಜೋ಼ಡ್ಮ ಖುಶಾಲಿಥಿ ವಾತ್ ಬೋಲಾನು ಮ್ಹೇಲಿದಿದ.

5 ಎಕ್ ದನ್ ಯೋಸೇಫ್ ಖ್ಹೋಣ್ಯು ದೇಖಿನ್ ಯೊ ಇನ ಭೈಯೇನ ಖ್ಹಾಮ್ಣೆ ಬೊಲ್ಯೊ. 6 ಇನೆ ಇವ್ಣುನ "ಮೇ ಖ್ಹೋಣ್ಯಾಮ ದೇಖ್ಯೋತೆ ಇನ ಬೋಲುಸ್, ಖ್ಹಮ್‌ಜೋ಼, 7 ಯೊ ಖ್ಹೋಣ್ಯಾಮ ಅಪ್ಣೆ ಖೇತರ್‌ಮ ಕಂಥಿ ಭಾಂದುಕರ್ತಾಥ; ತದೆ ಮಾರಿ ಕಂಥಿ ಉಠಿ ಭೀರಾವಖ್ಹತರ್ ತುಮಾರಿ ಕಂಥಿಯೆ ಅಶ್‌ಪಿಶ್‌ ಆಯಿನ್ ಮಾರಿ ಕಂಥಿನ ಆಡ್‌ಪಡಾನು ದೇಖ್ಯೊ" ಕರಿ ಬೊಲ್ಯೊ.

8 ತದೆ ಇನ ಭೈಯೇ, "ತೂ ಖ್ಹಾಚಮ ಹಮಾರಪರ್ ಹುಕುಮ್ ಚ಼ಲೈಶ್‌ಕಿಶೂ? ತೂ ಹಮಾರಪರ್ ರಾಜ಼್ ಚ಼ಲೈಶ್‌ಕಿಶೂ?" ಕರೀ ಬೋಲಿನ್ ಇನ ಖ್ಹೋಣ್ಯನಾಬಿ, ವಾತ್‌ನಖ್ಹಾಜೆಬಿ ಬಿಜೂ಼ಬಿ ವಹೇರ್‌ಕರ‍್ಯಾ. 9 ಯೊ ಬಿಜೇಕ್ ಖ್ಹೋಣ್ಯು ದೇಖಿನ್ ಯೋಬಿ ಇನ ಭೈಯೇನ ಖ್ಹಮ್‌ಜಾ಼ಡ್ಯೊ. ಇನೆ ಇವ್ಣುನ, "ಮೇ ಬಿಜೇಕ್ ಖ್ಹೋಣ್ಯು ದೇಖ್ಯೊ, ಇನಾಮ ಚಾ಼ಂದ್ ಚ಼ಂದರ್‌ಮೋಬಿ ಗ್ಯಾರ‍್ಹ ಶುಕ್ಕರ್‌ಬಿ ಮನ ಆಡ್‌ಪಡ್ಯು" ಕರಿ ಬೊಲ್ಯೊ. 10 ಅಜು಼ ಇನೆ ಆ ಖ್ಹೋಣ್ಯಾನ ಇನ ಬಾನಬಿ ಇನ ಭೈಯೆನಾಬಿ ಖ್ಹಮ್‌ಜಾ಼ಡ್‌ತಾನ ಬಾನೆ ಇನ "ಆ ಕೆಥ್ರಾನು ಖ್ಹೋಣ್ಯು ತೂ ದೇಖ್ಯೋತೆ? ಮೇಬಿ ತಾರಿ ಆಯಾಬಿ ಭೈಯೇಬಿ ತಾರ ಖ್ಹಾಮ್ಣೆ ಆಡ್‌ಪಡಾನ ಆವ್‌ಶೂಕಿಶೂ?" ಕರಿಬೋಲಿನ್ ಗುರ್‌ಕಾಯೊ. 11 ಯೋಸೇಫನ ಭಯ್ಯೆ ಇನಾಪರ್ ಪೇಟ್ನೊಬಳಾಪೊ ಕರ‍್ಯಾ; ಕತೋಬಿ ಇನೊ ಬಾ ಇನಿ ವಾತೆನ ದಿಲ್‌ಮಾಸ್ ರಾಖಿಲಿದೊ.

12 ಏಕ್‌ವಖ್ಹತ್ ಇನ ಭೈಯೆ ಬಾನು ಬೋಕ್ಡ ಮೇಂಢಾವ್ನ ಮಂಧಾವ್ನ ಚ಼ರಾವಾನಖ್ಹಾಜೆ ಶೆಕೆಮ್ಮ ಜೈ಼ರ‍್ಹಾವಾನಿ ವಖ್ಹ್‌ತೆ, 13 ಯಾಕೋಬನೆ ಯೋಸೇಫ್‌ನ, "ತಾರ ಭೈಯೇ ಶೆಕೆಮ್ಮ ಬೋಕ್ಡ ಮೇಂಢ ಚ಼ರವ್‌ಕರಸ್‌ನಿ ಇನಖ್ಹಾಜೆ; ಇವ್ಣಕನ ತುನ ಮೋಕ್ಲೂಸ್, ಕರಿ ಬೋಲಖ್ಹತರ್ ಇನೆ, "ಮೇ ತಯಾರ್‌ಛೂ಼, ಕರಿಬೋಲ್ಯೊ. 14 ಯಾಕೋಬನೆ ಇನ, "ತೂಜೈ಼ನ್ ತಾರ ಭೈಯೆ ಅಛ್ಛೊ ಛಾಕಿಶೂ ಕರೀಬಿ ಬೋಕ್ಡ ಮೇಂಢ ಅಛ್ಛೊ ಛಾಕಿಶೂ ಕರೀಬಿ ಪುಛೈನ್ ಆವ್" ಕರಿ ಹುಕುಮ್‌ದೀನ್ ಹೆಬ್ರೋನ್ ಝ಼ರುಕಾಥು ಬೋಲಿ ಮೋಕ್‌ಲ್ಯೊ. ಯೋಸೇಫ್ ನಿಕ್ಳಿನ್ ಶೆಕೆಮ್‌ನ ಆಯೊ. 15 ಹಿಜ್ಜಾ಼ ಝಾ಼ಡಿಮ ಫರ್‌ತೋಫಂಡಾನಿ ವಖ್ಹ್‌ತೆ ಎಕ್ ಅದ್ಮಿ ಅನ ದೇಖಿನ್, "ಶಾತ್‌ ಢೂಂಡ್ತೊಫಂಡಸ್?" ಕರಿಪುಛಾ಼ಯೊ. 16 ಯೋಸೇಫ್‌ನೆ, "ಮಾರ ಭೈಯೇನ ಢೂಂಡುಕರೂಸ್; ಇವ್ಣೆ ಬೋಕ್ಡ ಮೇಂಢಾವ್‌ ಕಿಜ್ಜಾ಼ ಚ಼ರವ್‌ಕರಸ್? ಕರಿ ಬೋಲ್" ಕರಿ ಬೊಲ್ಯೊ. 17 ತದೆ ಯೊ ಅದ್ಮಿನೆ, "ಇವ್ಣೆ ಹಜ್ಜಾ಼ಥು ಚ಼ಲ್ಯುಗಯು ‘ದೋತಾನ್ನ ಜೈ಼ಯೇ’ ಕರಿ ಬೋಲಾನು ಖ್ಹಮ್‌ಜ್ಯೊ, ಕರಿ ಬೋಲಾಖ್ಹತರ್ ಯೋಸೇಫ್‌ನೆ ಇವ್ಣುನ ಢೂಂಡ್ತೊಹುಯಿನ್ ದೋತಾನ್‌ಮ ಇವ್ಣುನ ದೇಖ್ಯೊ. 18 ಇನ ಭೈಯೆವ್‌ನೆ ಇನ ದೂರ್‌ಥಾಸ್ ದೇಖ್ಯ. ಯೊ ಇವ್ಣಕನ ಆವಾನ ಮಹಿಮ ಇನ ಮಾರಿನಾಖಾನಖ್ಹಾಜೆ ಮಶ್ಲತ್‌ಭಂದಾಯ. 19 ಅಜು಼ ಇವ್ಣೆ ಏಕ್‌ಥಿಏಕ್ "ಹಂದೇಖೊ ಯೊ ಖ್ಹೋಣ್ಯುದೇಖವಾಳೊ ವಳ್ಯೋಆವಸ್! ಕರಿಬೋಲಿಲಿದ 20 ಅಪ್ಣೆ ಇನ ಮಾರಿನಾಖಿನ್ ಆ ಪಾಳ್ ಬಾವ್ಡಿಮ ನಾಖಿದಿಯೆ. ‘ಝಾ಼ಡಿನು ಜಾನ್ವರ್‌ ಇನ ಖೈಲಿದು, ಕರಿಬೋಲ್ಯೂತೊ ಹುಯಿಗು, ಆವೊ; ತದೆ ಇನು ಖ್ಹೋಣ್ಯುಖ್ಹಾರು ಶಾತ್‌ಹುವಾಸ್ಕಿ ದೇಖ್ಯೆ" ಕರಿ ಇವ್ಣೆ ವಾತ್‌ಬೋಲಿಲಿದ. 21 ರೂಬೇನನೆ ಆ ವಾತೆ ಖ್ಹಮ್‌ಜಿನ್, "ಅಪ್ಣೆ ಇನ ಜಾನ್ನ ನಾಕಾಡ್ನು" ಕರಿ ಬೋಲಿನ್ ಇನ ಇವ್ಣ ಹಾತ್‌ಮಾಥು ಛು಼ಕಾವನ ಕೋಶಿಶ್ ಕರ‍್ಯೊ. 22 ರೂಬೇನನೆ ಇನ ಇವ್ಣಹಾತ್‌ಮಾಥೊ ಛು಼ಕೈನ್ ಬಾಕನ ಪಾಛೊ಼ ಲೀಜಾ಼ವ್ಣುಕರಿ ಇವ್ಣುನ, "ಜಾನ್‌ ನಕೊಕಾಡೊ, ಇನ ಜ಼ಂಗಳ್‌ಮ ಛಾ಼ತೆ ಆ ಬಾವ್ಡಿಮ ನಾಖಿದೆವೊ" ಇನಾಪರ್ ಹಾತ್‌ ನಕೊನಾಖೊ. ಕರಿ ಬೊಲ್ಯೊ. 23 ಯೋಸೇಫ ಇನ ಭೈಯೆಕನ ಆವಾನಿವಖ್ಹ್‌ತೆ ಇವ್ಣೆ ಇನಾಪರ್‌ಥೂತೆ ಝ಼ಗ್ಗಾನ ಕಾಡಿನ್ ಛಿನೈಲಿದು, 24 ಇನಧರೀನ್ ಯೊ ಪಾಳ್ ಬಾವ್ಡಿಮ ಫೇಕಿದಿದ. 25 ಇನಾಪಾರ್‌ ಇವ್ಣೆ ಖಾಣನ ಬೇಶಿಗಯ. ಎತ್ರಾಮ, ಇಷ್ಮಾಯೇಲ್ಯವಾಳನು ಎಕ್ ಝೂ಼ಂಡ್ ಗಿಲ್ಯಾದ್‌ಥು ಆವಾನು ತದೇಸ್‌ ಇವ್ಣಡೋಳಮ ದೆಖಾಯು. ಇವ್ಣೆ ಇವ್ಣಿ ಊಟೆವ್‍ಪರ್ ಮಸಾಲನು ರಾಛು಼, ವಾಖ್ಹ್‌ನು ಮುಲಾಮ್‌, ವಾನುರಖ್ಹ್‌, ವಾಖ್ಹ್‌ನುತೇಲ್‌, ಆ ಅಖ್ಖು ರಾಛು಼ ಢೊಯಿಲೀನ್, ಗಿಲ್ಯಾದ್‌ಥು ಈಜಿಪ್ಟ್‌ನ ಚಾ಼ಲಿವಳ್ಯವ್ತುಥು. 26 ತದೆ ಯೆಹೂದನೆ ಇನ ನ್ಹಾನ ಮೋಟಭೈಯೇನ, "ಅಪ್ಣೆ ಅಪ್ಣ ನ್ಹಾನ ಭೈನ ಮಾರಿನ್ ಖೂನ್‌ಕರ‍್ಯಾತೊ ಶನೊ ಫಾಯಿದೊ? 27 ಇನ ಆ ಇಷ್ಮಾಯೇಲ್ಯವಾಳನ ವೇಚಿನಾಖ್ಯೆ ಆವೊ, ಅಪ್ಣೆ ಇನಾಪರ್ ಹಾತ್ ನಾ ನಾಕ್ಣು. ಯೊ ಅಪ್ಣಜೋ಼ಡ್ಮ ಹುಯೋತೆ ನ್ಹಾನೊ ಭೈ ಕಾಹೆಕಿಶೂ?" ಕರಿ ಬೊಲ್ಯೊ. ಯೊ ವಾತ್ನ ಇನ ಭೈಯೆ ಮಾನಿಲಿದ. 28 ಎತ್ರಾಮ, ಮಿದ್ಯಾನ್ಯವಾಳು ಬೇಪಾರಿಯೆ ಹಿಜ್ಜಾ಼ಕರಿ ವಳ್ಯುಜಾ಼ತೂಥು. ಇವ್ಣೆ ಯೋಸೇಫ್‌ನ ಬಾವ್ಡಿಮಾಥು ಪಾಡಿನ್ ಯೊ ಇಷ್ಮಾಯೇಲ್ಯವಾಳನ ವೀಖ್ಹ್‌ ರೂಪಾನ ಕಾಖ್ಹ್‌ನ ವೇಚಿನಾಖ್ಯು. ಇವ್ಣೆ ಇನ ಈಜಿಪ್ಟ್ ದೇಖ್ಹ್‌ನ ಲೀನ್‌ಗಯು. 29 ರೂಬೇನನೆ ಪಾಛೊ಼ ಯೊ ಬಾವ್ಡಿಕನ ಆಯಿನ್ ದೇಖ್ಯೊಇನಾಮ ಯೋಸೇಫ ಕೋಥೊಂತೆ ದೇಖಿನ್ ದುಖ್ ಖ್ಹಂಬ್‌ಳಾವಕೊಂತೆ ಇನ ಲುಂಗ್ಡಾನ ಫಾಡಿಲಿದೊ. 30 ಇನ ನ್ಹಾನ ಭೈಯೆಕನ ಆಯಿನ್, "ಯೊ ಛೋ಼ಕ್ರು ಕೊಯ್ನಿನಿ, ಅಯ್ಯೋ, ಮೇ ಶಾತ್‌ಕರು?" 31 ಇನಕೇಡೆಥು ಇವ್ಣೆ ಎಕ್ ಬೋಕ್ಡಾನ ರ‍್ಹೇಶಿನ್, ಇನ ಲ್ಹೊಯಿಮ ಯೋಸೇಫನು ಝ಼ಗ್ಗಾನ ಭಿಜೈ಼ನ್‌, 32 ಯೊ ಝ಼ಗ್ಗಾನ ಇನ ಬಾಕನ ಮೋಕ್‌ಲ್ಯು. "ಆ ಹಮುನ ಮಳ್ಯು; ಆ ತಾರ ಛಿಯ್ಯಾನು ಝ಼ಗ್ಗೊ ಕಾಹೇಕಿಶು ದೇಕ್?" ಕರಿ ಬೋಲ್ಯ. 33 ತದೆ ಯಾಕೋಬನೆ ಇನು ಖ್ಹಣೇದ್ ಧರೀನ್, "ಆ ಝ಼ಗ್ಗೋ ಮಾರ ಛಿಯ್ಯಾನೂಸ್, ಝಾ಼ಡಿನು ಜಾನ್ವರ್‌ ಇನ ಮಾರಿ ಖಾದು ಹೋಣು, ಯೋಸೇಫನ ಯೊ ಚೀರಿನಾಖಾಮ ಗುಮಾನೀಸ್‌ ಕೊಯ್ನಿ" ಕರಿ ಬೋಲಿನ್, 34 ಯೊ ದುಖ್ ಖ್ಹಮಾಳನ ಕೋಹುಯುನಿತೆ ಇನ ಲುಂಗ್ಡಾನ ಫಾಡಿಲೀನ್ ಕಂಬರ್‌ಪರ್ ಛೈ಼ನೊ ಕೋಥ್‌ಳೊ ಲಪೇಟಿಲೀನ್‌ ಇನ ಛಿಯ್ಯನಖ್ಹಾಜೆ ಘಣಾ ದನ್‌ಲಗೂಬಿ ಕರ‍್ಹವ್‌ಕರ್ತೊಥೊ. 35 ಇನ ದುಖ್ ಭೈಕಾನ ಛಿಯ್ಯಾ ಛೋ಼ರಿಯೇ ಕೆತ್ರು ಕೋಶಿಶ್‌ ಕರ‍್ಯೂತೋಬಿ ಯೊ ಸಮಾಧಾನ್ ಹುಯೋಕೊಯ್ನಿ, "ಮೇ ಅಮ್ಮಸ್ ಕರ‍್ಹಾವ್‌ತೊ ಹುಯಿನ್ ಮಾರೊ ಛಿಯ್ಯೊಛಾ಼ತೆ ಮರಣ್ಣಲೋಕ್‌ನ ಮಳೀಜ಼ವುಸ್". ಅಮ್ ಬಾ ಛಿಯ್ಯನಖ್ಹಾಜೆ ರೊವ್‌ಕರ್ತೊಥೊ. 36 ಮಿದ್ಯಾನ್ಯವಾಳು ಯೋಸೇಫನ ಈಜಿಪ್ಟ್ ದೇಖ್ಹ್‌ನ ಲೀಜೈ಼ನ್ ಫರೋಹಕನ ಆಸ್ಥಾನ್‌ಮಥೋತೆ ಪೋಟೀಫರನ ವೇಚಿನಾಖ್ಯು. ಯೊ ರಾಜ಼ನ ಕಾವ್ಲಿಕರವಾಳ ಶಿಪಾಯಿನೊ ಮೋಟೊಹುಯಿರೋಥೊ.