1 ಆ ಖ್ಹಾರು ಚಾ಼ಲಿ ಹುಯಿಜಾ಼ವನ ಪಾರ್ ಅಬ್ರಾಮ್‌ನ ದರ್ಶನ್‌ಮ ಯೆಹೋವ ದೇವ್ನು ವಚನ್‌ ಖ್ಹಮಜ಼್‌ಪಡ್ಯು, "ಅಬ್ರಾಮ್‌ ಡರ್‌ನಕೊ, ಮೇ ತುನ ಢಾಲ್‌ಹುಯಿರ‍್ಹೋಸ್ ಅಜು಼ ತುನ ಘಣುಖ್ಹು ಇನಾಮ್‌ ದೆವುಸ್‌" 2 ಇನ ಅಬ್ರಾಮನೆ, "ಪ್ರಭು ಯೆಹೋವ ದೇವ್‌, ಮನ ಶಾತ್‌ದಿದೋತೊ ಶನೊ ಫಾಯಿದೊ ಮನ ಲಡ್ಕಕೊಯ್ನಿ. ಅಜು಼ ಮಾರಿ ಶೊತ್‌ಖ್ಹಾರಿಸ್, ದಮಸ್ಕವಾಳೊ ಸೇವಕ್ ಎಲೀಯೆಜ಼ರನು ಪಾಲ್ಉಶೆಕರಿ ಬೊಲ್ಯೊ. 3 ಪಾಛೊ಼ ಅಬ್ರಾಮ್‌ನೆ, "ತೂ ಮನ ಲಡ್ಕ ದಿದೊಕೊಯ್ನಿ ಇನಖ್ಹಾಜೆ, ದೇಕ್‌, ಮಾರ ಘರ್ಮ ಪೈದಹುವವಾಳೊಸ್ ಮನ ಹಕ್‌ದಾರ್‌ ಹೋಣು" ಕರಿಬೋಲ್ಯೊ. 4 ಯೆಹೋವನಿ ವಚನ್‌ ಇನಿ ಜೋ಼ಡ್ಮ ವಾತ್‌ಬೋಲಿನ್, "ಆ ಸೇವಕ್ ತುನ ಹಕ್‌ದಾರ್‌ ಉಷೆಕೊಯ್ನಿ, ಕತೋಬಿ ತಾರಪೇಟೆ ಪೈದಹುವವಾಳೋಸ್ ತುನ ಹಕ್‌ದಾರ್‌ ಉಷೆ" ಕರಿ ಬೋಲಿನ್, 5 ಅಬ್ರಾಮ್‌ನ ಭಾರ್ ಬುಲೈಲಯಿನ್, "ಆಬ್‍ಭಣಿ ದೇಕ್, ಶುಕ್ಕರ್‌ನ ತಾರೇಥಿ ಗಣಾನು ಹೋತು ಉಶೇತೊ ಗಣ್ತಿಕರ್. ತಾರಿಪಿಳ್ಗಿ ಎತ್ರುಉಷೆ." ಕರಿ ಬೊಲ್ಯೊ. 6 ಅಬ್ರಾಮ್‌ ಯೆಹೋವನ ವಿಶ್ವಾಸ್ ಕರ‍್ಯೊ; ಯೆಹೋವ ದೇವ್ನೆ ಅಬ್ರಾಮ್‌ನಿ ವಿಶ್ವಾಸ್‌ನ ಇನಿ ಗಣ್ತಿಮ ನೀತಿಕರಿ ಮಾನಿಲಿದೊ. 7 ಇನವಾರ್ ದೇವ್ನೆ ಅಬ್ರಾಮ್‌ನ, "ಆ ದೇಖ್ಹ್‌ನ ತುನ ಹಕ್‌ದಾರ್‌ ಬಣೈನ್ ದ್ಯವಾನಖ್ಹಾಜೆ ಊರ್‌ ಕರಿ ಕಲ್ದಿಯವಾಳನು ಖ್ಹಯೇರ್‌ಥಿ ಬುಲೈಲಾಯೋತೆ ಯೆಹೋವ ಮೇಸ್." ಕರಿ ಬೊಲ್ಯೊ. 8 ಕತೋಬಿ "ಪ್ರಭು ಯೆಹೋವ ದೇವ್‌ ಮೇ ಅನ ಹಕ್‌ದಾರ್‌ ಹುಯಿರ‍್ಹಿಶ್‌ಕರಿ ಮಾಲುಮ್‌ಕರಾನು ಕಿಮ್?" ಕರಿ ಪುಛಾ಼ಯೊ. 9 ತದೆ ಯೆಹೋವ ದೇವ್ನೆ ತೂ ತೀನ್ ವರಖ್ಹ್‌ ಹುಯಿರ‍್ಹವನು ಏಕ್‌ ಗಾಯ್‌, ಏಕ್‌ ಬೋಕ್‌ಡೊ, ಏಕ್‌ ಮೇಂಢೊ, ಎಕ್ ಹರ‍್ಯಾಲ್, ಎಕ್ ಪರ‍್ಯಾವನ ಲೀನ್ಆವ್‌" ಕರಿಬೋಲ್ಯೊ. 10 ಇನೆ ಆ ಅಖ್ಖಾಸ್ನ ಜಾನ್ವರ್‌ನ ಲಯಿನ್ ಚೀರಿನ್, ಬೇಭಾಗ್‌ಕರೀನ್ ಏಕ್‌ಭಾಗ್‌ನ ಖ್ಹಾಮೆ ಬಿಜೇಕ್‌ನ ಮ್ಹೇಲ್ಯೊ; ಜಿನಾವರ್‌ನ ಚೀರ‍್ಯೊಕೊಯ್ನಿ. 11 ಯೊ ಜಾನ್ವರ್‌ಪರ್ ಗರದ್‌ ಪಡಾಲಗ್ಯೊತೆ ದೇಖಿನ್, ಅಬ್ರಾಮ್‌ನೆ ಯೊ ಅಖ್ಖಾನ ನಖ್ಹಾಡಿದಿದೊ. 12 ದನ್ ಡುಬಾನಿ ವಖ್ಹ್‌ತೆ ಅಬ್ರಾಮ್‌ನ ಭರ್‌ನಿಂದರ್‌ ಮಾರಿದಿದಿ. ತದೆ ಇನಾಪರ್ ಘಣು ಅಜು಼ ಭಯಾನಕ್‌ ಅಂಧಾರು ಮೂಚೈ಼ರ‍್ಹುಥು. 13 ತದೆ ಯೆಹೋವ ದೇವ್ನೆ ಅಬ್ರಾಮ್‌ನ, "ತೂ ಅಛ್ಛಿನಿತರ ಮಾಲುಮ್‌ ಕರಿಲ್ಯಾವಾನು ಶಾತ್‌ಕತೊ, ತಾರಿ ಪಿಳ್ಗಿವಾಳು ಪರ್‌ದೇಖ್ಹ್‌ಮ ವಶೇರೊ ಜೈ಼ರ‍್ಹೀನ್, ಯೊ ದೇಖ್ಹ್‌ವಾಳಾನ ಗುಲಾಮ್‌ ಹುಯಿಜಾ಼ಶೆ. ಚಾರ್‌ಖ್ಹೋ ವರಖ್ಹ್‌ ಯೊ ದೇಖ್ಹ್‌ವಾಳೇಥಿ ವದೇಖ್ಹೊ ಪಡ್‌ಶೆ. 14 ಇವ್ಣುನ ಗುಲಾಮ್‌ ಬಣೈಲಿದೂತೆ ಜಗ್‌ಜಾ಼ತ್‌ವಾಳಾನ ಮೇ ನಿಶತ್‌ ದೀನ್ ಹುಯಿಜಾ಼ವದಿನ್ ಇವ್ಣೆ ಘಣು ದೌಲತ್ತಿಹುಯಿನ್ ಯೊ ದೇಖ್ಹ್‌ಥು ಛುಟ್ಕಾರ್‌ ಹುಯಿನ್ ನಿಕ್ಳಿನ್ ಆವ್‌ಶೆ. 15 ತೂತೋಬಿ ಶಾಂತಿಥಿ ಗುರುಗುರಬ್‌ಲ್ಯಕನ ಜೈ಼ನ್ ಮಳೀಶ್. ಘಣೊ ಭುಡೊಹುಯಿನ್ ಕಾರೇಜ಼್‌ಬಿ ನಖೈಲಿಶ್. 16 ತಾರಿ ಪಿಳ್ಗಿನು ಚಾ಼ರ್‌ನಿ ಮುಂಡಿವಾಳು ಹಜ್ಜಾ಼ ಪಾಛು಼ ಆವ್‌ಶೆ. ಶನಕತೊ ಅಮೋರಿಯವಾಳನು ಅಪರಾದ್ ಅಜೂ಼ಬಿ ಪಾಪ್ನೊ ಘಡೊ ಭರಾಯುಕೊಯ್ನಿ" ಕರಿಬೋಲ್ಯೊ. 17 ದನ್ ಡುಬೀನ್ ಅಂಧಾರ್‌ಗಡಪ್‌ ಹುಯಿಜಾ಼ವದಿನ್, ಹಂದೇಕ್ ಧುವ್ವೊ ನಿಕ್ಳಾನು ಛು಼ಲ್ಲೋಬಿ ಅಜು಼ ಬಳಾನು ಏಕ್‌ ಢಿಟಂಬು ದೆಖೈನ್ ಯೊ ಜಾನ್ವರ್‌ನ ಟುಕ್ಡಾವ್‌ನ ಬೀಚ್‌ಮಕರಿ ಗಯು. 18 ಯೊ ದನ್ಮ ಯೆಹೋವ ದೇವ್ನೆ ಅಬ್ರಾಮ್‌ನಿ ಜೋಡ್ಮ ಒಪ್ಪಂದ ಕರಿಲೀನ್, "ಈಜಿಪ್ಟ್ ದೇಖ್ಹ್‌ನು ನದ್ದಿಥು ಯೂಫ್ರೇಟೀಸ್‌ ಮೋಟಿ ನದ್ದಿಲಗೂಬಿ ಛಾ಼ತೆ ಆ ದೇಖ್ಹ್‌ ಖ್ಹಾರುಸ್, 19 ಕೇನಿಯವಾಳುಬಿ, ಕೆನಿಜೀಯವಾಳುಬಿ, ಕದ್ಮೋನಿಯವಾಳುಬಿ, 20 ಹಿತ್ತಿಯವಾಳುಬಿ, ಪೆರಿಜೀಯವಾಳುಬಿ, ರೆಫಾಯವಾಳುಬಿ, 21 ಅಮೋರಿಯವಾಳುಬಿ, ಕಾನಾನ್ಯವಾಳುಬಿ, ಗಿರ್ಗಾಷಿಯವಾಳುಬಿ, ಯೆಬೂಸಿಯವಾಳು ಜಿವ್ಣು ಕರುಕರಸ್ತೆ ದೇಖ್ಹ್‌ನ ಮೇ ತಾರಿ ಪಿಳ್ಗಿನ ದೆವುಸ್" ಕರಿ ವಾಗ್ದಾನ್‌ ಕರ‍್ಯೊ.