1 "ಅಪ್ಣ ಬಾನಿ ಶೊತ್‌ಖ್ಹಾರು ಯಾಕೋಬನು ಪಾಲ್‍ಹುಯ್ಗು, ಅಪ್ಣಬಾನಿ ಶೊತ್‍ಥೀಸ್ ಇನ ಅತ್ರೂ ಧನ್‍ದೌಲತ್ ಮಳ್ಯು" ಕರಿ ಲಾಬಾನನ ಛಿಯ್ಯಾವ್‌ನೆ ಬೋಲ್ಯುತೆ ಯಾಕೋಬನೆ ಖ್ಹಮ್‌ಜ್ಯೊ. 2 ಆನಾಹುಯಿನ್‌, ಯಾಕೋಬನೆ ಲಾಬಾನನು ಮ್ಹೋಡಾನು ಛೇರೊದೇಕ್ತಾನ ಇನು ಮ್ಹೋಡು ಅಗಾಡಿನಿತರ ದೆಖಾಯುಕೊಯ್ನಿ. 3 ಅಜು಼ ಯೆಹೋವನೆ ಯಾಕೋಬನ, "ತೂ ತಾರ ಬಾನ ದೇಖ್ಹ್‌ನಾಬಿ ತಾರ ಮಾಯಮಾತ್ರಕನಬಿ ಪಾಛೊ಼ ಫರಿನ್‌ ಜಾ಼, ಮೇ ತಾರಿ ಜೋ಼ಡ್ಮ ರ‍್ಹೆವುಸ್" ಕರಿ ಬೊಲ್ಯೊ. 4 ಅನಖ್ಹಾಜೆ ಯಾಕೋಬನೆ ರಾಹೇಲ್‍ನಾಬಿ, ಲೇಯನಾಬಿ, ಇನು ಬೋಕ್ಡ ಮೇಂಢಾನು ಮಂಧಾನ ಚ಼ರವ್‍ ಕರ್ತೋಥೋತೆ ಝಾ಼ಡಿನ ಬುಲೈಮಂಗಾಯೊ. 5 ಹಿಜ಼್ಜಾ ಇವ್ಣುನ, "ತುಮಾರ ಬಾನ ಮ್ಹೋಡಾನು ಛೇರೊ ಮಾರಿ ಬಾರೇಮ ಅಗಾಡಿ ಥೂತೆ ಇಮ್‌ಕೊಯ್ನಿ ಕರಿ ದೆಖಾಯು. ಕತೋಬಿ ಮಾರ ಬಾನು ದೇವ್ ಮಾರಿ ಜೋ಼ಡ್ಮ ಛಾ಼. 6 ಮೇ ತುಮಾರ ಬಾನಿ ಚಾ಼ಕ್ರಿ ಪೂರ ಶಕಥ್ಥಿ ಕರಿರಾಖ್ಯೋಸ್, ತುಮುನಾಬಿ ಯೊ ಮಾಲುಮ್‍ಛಾ಼. 7 ಕತೋಬಿ ತುಮಾರೊ ಬಾ ಮನ ಠಗೈನ್ ಮಾರಿ ಶಂಬ್ಳಾನ ದಖ್ಹ್‌ವಖ್ಹತ್ ಬದ್ಲಾಯೊ. ಮನ ಲುಕ್ಷಾನ್ ಕರಾನ ದೇವ್‌ನೆ ಇನ ಮ್ಹೆಲ್ಯೊಕೊಯ್ನಿ. 8 ತುಮಾರೊ ಬಾ ಮನ ‘ಟಿಪ್‌ಕ್ಯುರ‍್ಹಾವಾಳು ತಾರಿ ಶಂಬ್‌ಳ ಹುಯಿರ‍್ಹಾವದೆ’ ಕರಿ ಯೊ ಬೋಲಾನಿವಖ್ಹ್‌ತೆ ಮಂಧಾಮನು ಬೋಕ್ಡು ಮೇಂಢುಖ್ಹಾರುಬಿ ಟಿಪ್‌ಕ್ಯು ರ‍್ಹಾವಾಳೂಸ್ ಜ಼ಣ್ಯು. ಇನೆ ಬರಾಕೆ ರ‍್ಹಾವಾಳು ತಾರಿ ಶಂಬ್‌ಳ ಹುಯಿರ‍್ಹಾವದೆ’ ಕರಿ ಬೋಲಾನಿವಖ್ಹ್‌ತೆ ಬೋಕ್ಡುಮೇಂಢು ಖ್ಹಾರುಬಿ ಬರಾಕೆ ರ‍್ಹವಾಳೂಸ್ ಚೆಲ್ಕು ಜ಼ಣ್ಯು. 9 ಅಮ್ ದೇವ್ನೆ ತಾರ ಬಾನು ಬೋಕ್ಡಮೇಂಢಾವ್ನ, ಜಾನ್ವರ್‌ನ ಇನಕಂಥು ಕಾಡಿನ್ ಮನ ದಿದೊ. 10 ಮೇಂಢಿಯೆ ಗಾಬ್‍ಹುವಾನ ಹಗಾಮ್ಮ ಮೇ ಖ್ಹೋಣ್ಯಾಮ ಡೋಳ ಪಾಡಿನ್ ದೇಕ್‍ತಾನ ಮೇಂಢಾವ್ನಿ ಜೋ಼ಡ್ಮ ಮಳ್ವಾತೆ ಬೋಕ್ಡಖ್ಹಾರುಬಿ ಬರಾಕೆ, ಟಿಪ್‌ಕ್ಯು, ಮಚ಼್ಚವಾಳು ಹುವಾನು ದೆಖಾಯು. 11 ಯೊ ಖ್ಹೋಣ್ಯಾಮ ದೇವ್ನದೂತನೆ, ಮನ ‘ಯಾಕೋಬ’ ಕರಿ ಪುಕಾರಖ್ಹತರ್ ಮೇ, ‘ಹಂದೇಕ್ ಮೇ ಹಜ಼್ಜ ಛೂ಼’ ಕರಿ ಬೊಲ್ಯೊ. 12 ಇನೆ ಮನ, ‘ಲಾಬಾನನೆ ತಾರಿ ಬಾರೇಮ ಚಾ಼ಲಿಲಿದೋತೆ ಪರಕ್‍ ಮೇ ದೇಖಿರಾಖ್ಯೋಸ್, ಇನಾಖ್ಹಾಜೆ ತೂ ಡೋಳಪಾಡಿನ್ ಮೇಂಢಾವ್ನಿ ಜೋ಼ಡ್ಮ ಮಳ್ವಾತೆ ಬೋಕ್ಡಾವ್ನ ದೇಕ್. ಬರಾಕೆಬಿ ಟಿಪ್‌ಕ್ಯು, ಮಚ್ಚೊ಼ಬಿ ರ‍್ಹಾವಳು ಹುಯಿರ‍್ಹುಸ್. 13 ತೂ ಬಂಡಾಪರ್ ತೇಲ್‌ನಾಖಿನ್ ಅಶ್‍ನಾನ್ ಕರೀನ್ ಕಬೂಲ್ಯೊಥೋತೆ ಬೇತೇಲ್‌ನೊ ದೇವ್‌ ಮೇಸ್. ಹಮ್ಕೆ ತೂ ಉಠೀನ್ ಆ ದೇಖ್ಹ್‌ನ ಮ್ಹೇಲಿನ್ ತೂ ಪೈದಹುಯೋತೆ ಶೊಂತ್ ದೇಖ್ಹ್‌ನಾಬಿ ತಾರ ಮಾಯಮಾತ್ರಕನಬಿ ಪಾಛೊ಼ಫರಿನ್ ಜಾ಼" ಕರಿ ಬೊಲ್ಯೊ.

14 ಯಾಕೋಬನೆ ಆ ವಾತೆ ಬೋಲ್ಯೊತದೆ ರಾಹೇಲ್‍ಬಿ, ಅಜು಼ ಲೇಯಬಿ, "ಹಮಾರ ಬಾನ ಘರ್‌ಮ ಹಮುನ ಬಿಜು಼ ಶನು ವಾಟೊಭಾಗ್‌ಲೊ ಛಾ಼? 15 ಯೊ ಹಮುನ ಅಲ್ಹಾವ್‍ಕರಿ ಲಾಝ಼ಸ್‍ನಿ; ಯೊ ಹಮುನ ವೇಚಿನ್ ಹಮಾರೇಥಿ ಮಳ್ಯೂತೆ ರಪ್ಯಾನ ಇನೇಸ್‍ ಗಳಿಲಿದೋನಿ. 16 ಇನಖ್ಹಾಜೆ ದೇವ್ನೆ ಹಮಾರ ಬಾಥಿ ಮಳ್ಯುತೆ ಶೊತ್‌ಖ್ಹಾರುಸ್ ಅಪ್ಣುನಾಬಿ, ಅಪ್ಣ ಲಡ್ಕಾವ್‍ನಾಬಿ ದಿದೋನಿ, ದೇವ್‍ ತುನ ಬೋಲ್ಯೋತೆ ತಿಮ್ಮಸ್ ಕರ್‌" ಕರಿ ಜ಼ವಾಬ್ ದಿದಿಯೇ. 17 ತದೆ ಯಾಕೋಬನೆ ಇನ ಲಡ್ಕಾವ್‍ನಾಬಿ, ಬಾವ್ಣೇವ್‍ನಾಬಿ ಊಟೇವ್‌ಪರ್ ಬೆಖ್ಹಾಡ್ಯೊ. 18 ಇನೆ ಕಮಾಯೋಥೋತೆ ಖ್ಹಾರಿಸ್ ಶೊತ್‌ನಾಬಿ, ಪದ್ದನ್ಅರಾಮ್ ದೇಖ್ಹ್‌ಮ ಕಮಾಯೋತೆ ಖ್ಹಾರುಸ್ ಜಾನ್ವರ್‌ಬಿ ಲೀನ್ ಕಾನಾನ್ ದೇಖ್ಹ್‌ನ ಇನೊ ಬಾ ಇಸಾಕ್‍ಕನ ನಿಕ್‌ಳ್ಯೊ. 19 ತದೆ ಲಾಬಾನನೆ ಇನು ಮೇಂಢಾವ್ನ ರುಯಿ ಕತ್ರಾನಖ್ಹಾಜೆ ಜೈ಼ರ‍್ಹೋಥೊ. ತದೆ ರಾಹೇಲ್‍ನೆ ಇನ ಬಾನ ಘರ್ಮಥೂತೆ ಮೂರತ್ನ ಚೋ಼ರಿ ಕರಿಲಿದಿ. 20 ಅಜು಼ಬಿ ಯಾಕೋಬನೆ ಮೇ ವಳ್ಯೋಜ಼ವುಸ್ ಕರಿ ಅರಾಮ್ಯವಾಳ ಲಾಬಾನನ ಬೋಲ್ಯೊಸ್‌ಕೊಂತೆ ಇನ ಠಗೈನ್ ನಾಶಿಚ಼ಲಿಗಯೊ. 21 ಅಮ್‍ ಇನಿ ಶೊತ್‌ಖ್ಹಾರುಸ್ ಲೀನ್ ಯೂಫ್ರೇಟೀಸ್ ಮಹಾ ನದ್ದಿನ ಉಲಾಂಗಿನ್ ಗಿಲ್ಯಾದ್‌ಕರಿ ಪಹಾಡ್‌ಟೋಳ್‌ನು ತಬರ್‌ಖಾನಿ ವಾಟ್‌ ಧರ‍್ಯೊ.

22 ಯಾಕೋಬ ಚ಼ಲ್ಯೊಗಯೋತೆ ಖಬರ್ ತೀನ್ನ ರೋಜೆ ಲಾಬಾನನ ಮಾಲುಮ್‌ಪಡ್ಯು, 23 ಇನೆ ಮಾಯಮಾತ್ರನ ಎಕ್ಟು ಕರಿಲಿನ್, ಖ್ಹಾತ್‍ದನ್ ಚಾ಼ಲ್‍ಕುಚ಼್ ಕರೀನ್ ಯಾಕೋಬನ ಪೀಛೆಕರೀನ್ ಗಿಲ್ಯಾದ್‌ ಪಹಾಡ್‌ಟೋಳ್ನ ತಬರ್‌ಖಾಮ ಮಳ್ಯೊ. 24 ಕತೋಬಿ ರಾತ್‍ಮ ದೇವ್ನೆ ಅರಾಮ್ಯವಾಳೊ ಲಾಬಾನನ ಖ್ಹೋಣ್ಯಾಮ ಆಯಿನ್, "ತೂ ಯಾಕೋಬನಿ ಜೋ಼ಡ್ಮ ಅಛ್ಛು಼ರ‍್ಹೆವೊ ಖರಾಬ್‍ರ್ಹೆವೊ ವಾತ್ ನಾಬೋಲ್ನುತೆ ಹೊಶಾರ್‌ಥಿರ‍್ಹೆ" ಕರಿ ಬೊಲ್ಯೊ.

25 ಇನಕೇಡೆಥು ಲಾಬಾನನೆ ಯಾಕೋಬ್‍ನ ಮಳಾನಿವಖ್ಹ್‌ತೆ ಯಾಕೋಬನೆ ಪಹಾಡ್‌ಮ ಇನು ಡೇರೊ ನಾಖಿರಾಖ್ಯೊಥೊ. ಲಾಬಾನಬಿ ಇನ ಮಾಯಮಾತ್ರನಿ ಜೋ಼ಡ್ಮ ಯೋಸ್ ಗಿಲ್ಯಾದ್‌ ಪಹಾಡ್‌ಮ ಡೇರೊ ನಾಖಿರಾಖ್ಯೊಥೊ. 26 ಲಾಬಾನನೆ ಯಾಕೋಬ್‍ನ, "ಆ ಶಾತ್‍ ತೂ ಕರ‍್ಯೊತೆ? ತೂ ಮಾರಿ ತಯೇಡ ಛೋ಼ಕ್ರಿಯೇನ ಜಂಗ್‍ಮ ಕೋಂಡಿ ಧರಿಲಿನ್ ಜಾ಼ವಳನಿತರ ಮನ ಶಾತ್‌ಬಿ ಬೋಲ್ಯೊಕೊಂತೆ ನಿಕ್ಳಿಆಯೋನಿ. 27 ಶನಾ ತೂ ಮನ ಬೋಲ್ಯೊಕೊಂತೆ ಚೋ಼ರೇಖ್ಹು ನಿಕ್‌ಳಿ ಆಯೊ? ಮನ ಬೋಲ್ಯೊಹೋತ್ತೊ ಮೇ ಖ್ಹುಶೀಥಿ ಗೀದ್‌, ಖ್ಹಾರಂಗೊ, ತಂತೀನು ವಾಜ಼ವಜ಼ಂತ್ರಿಥಿ ತುನ ಮೋಕ್‌ಲ್ಯೊಹೋತ್‍. 28 ಕತೋಬಿ ತೂ ಮಾರಿ ತಯೇಡ ಛೋ಼ಕ್ರಿಯೇನಾಬಿ ನಾತಿಪೋತಿನ, ಬುಚ಼್ಚಾಕರಾನತೋಬಿ ನಾಹುವಾನಿತರ ಕರ‍್ಯೊ. ತೂ ಕರ‍್ಯೊತೆ ಪಾಗಲ್ ಕಾಮ್. 29 ತುಮುನ ಖರಾಬ್ ಕರಾನ ಮಾರಾಮ ತಾಖತ್ ಛಾ಼. ಕತೋಬಿ ಗೈತೆ ರಾತ್ ತಾರ ಬಾನ ದೇವ್‌ನೆ, ‘ಯಾಕೋಬನ ಅಛ್ಛು಼ರ‍್ಹೆವೊ ಖರಾಬ್‍ರ್ಹೆವೊ ನಾಬೋಲ್ನುತೆ ಹೊಶಾರ್‌ಥಿ ರ‍್ಹೆ’ ಕರಿ ಬೊಲ್ಯೊ. 30 ಕತೋಬಿ ಬಾನ ಘರೆ ಜಾ಼ವಾನ ತುನ ಘಣು ಆಖ್ಹ್‌ಛಾ಼ತೆ ಇನಾಖ್ಹಾಜೆಥಿ ಜಾ಼ವ್ಣುಪಡ್ಯು. ಕತೋಬಿ ತೂ ಮಾರು ದೇವ್ನ ಚೋ಼ರಿ ಕರ‍್ಯೊತೆ ಶನಖ್ಹಾಜೆ?" ಕರಿ ಬೊಲ್ಯೊ. 31 ಇನ ಯಾಕೋಬನೆ ಲಾಬಾನನ, "ತೂ ತಾರಿ ಛೋ಼ರಿಯೇನ ಜು಼ಲಮ್‌ಥಿ ಪಾಛೊ಼ ಛಿನೈಲೀಶ್‌ ಕರಿ ಡರಿನ್ ನಿಕ್ಳಿಆಯೊ. 32 ಕತೋಬಿ ತಾರು ದೇವ್‍ಖ್ಹಾರು ಕಿನಾಕನ ಮಳಸ್ಕಿ ಇವ್ಣೆ ಮರಿಜಾವದೆ. ಮಾರ ಮಾಯಮಾತ್ರನ ಖ್ಹಾಮೇಸ್ ಮಾರಿ ಶೊತ್ನ ತರೀಪ್‍ಶ ಕರೆಜಾ಼ಯ್. ಇನಾಮ ತಾರು ಶಾತ್‌ಬಿ ಮಳ್ಯುತೊ ಯೊ ಲೀಲೆ" ಕರಿ ಬೊಲ್ಯೊ. ರಾಹೇಲ್‍ನೆ ಯೊ ದೇವ್ನ ಮೂರತ್ ಅಖ್ಖಾನ ಚೋ಼ರಿ ಕರೀತೆ ಯಾಕೋಬ್‍ನ ಮಾಲುಮ್ ಕೋಥೂನಿ. 33 ಲಾಬಾನನೆ ಯಾಕೋಬಾನ ಡೇರಾಮಾಬಿ, ಲೇಯನ ಡೇರಾಮಾಬಿ, ಯೊ ಬೇಜ಼ಣಿ ದಾಸಿನ ಡೇರಾಮಾಬಿ ಢೂಂಡ್ಯೊ, ಕತೋಬಿ ಇನ ಶಾತ್‌ಬಿ ಮಳ್ಯುಕೊಯ್ನಿ. ಲೇಯನು ಡೇರೊ ಮ್ಹೇಲಿನ್ ರಾಹೇಲ್‍ನ ಡೇರಮ ಗಯೊ. 34 ರಾಹೇಲ್‍ ಯೊ ಮೂರತ್ ಖ್ಹಾರುಲೀನ್ ಊಟೆವ್‍ನು ಗೂಣೇಮ ಘಾಲಿನ್ ಇನಾಪರ್‌ ಬೆಠೀಥಿ. ಲಾಬಾನನೆ ಡೇರಾನ ಘರ್‌ಮ ಥೂತೆ ರಾಛ಼ವ್‍ನ ದೇಖ್ಯೊತೋಬಿ ಯೊ ಅಖ್ಖು ದೆಖಾಯುಕೊಯ್ನಿ. 35 ರಾಹೇಲ್‍ ಇನ ಬಾನ, "ಬಾ, ಮೇ ತಾರ ಖ್ಹಾಮ್ಣೆ ನಾಭೀರಿತೋಬಿ ಇರಾದೊ ನಕೊಕರ್ಲ ಗುರು, ಮೇ ಛೀಮಾನುಕೊಯ್ನಿ" ಕರಿ ಬೋಲಿ. ಇನೆ ಕೆತ್ರು ಢೂಂಡ್ಯೊತೋಬಿ ಯೊ ಮೂರತ್‍ಅಖ್ಖು ಇನ ಮಳ್ಯುಕೊಯ್ನಿ. 36 ತದೆ ಯಾಕೋಬ ಇರಾದೊ ಕರೀನ್ ಲಾಬಾನನ ಗುರ್‌ಕೈನ್, "ತೂ ಅತ್ರೆ ಉತ್ವಾಳಿಕರೀನ್ ಮನ ಪೀಛೆಕರೀನ್ ಆವಾನಿತರ ಮೇ ಶನು ಅಪರಾದ್‌ ಕರ‍್ಯೋಥೊ? 37 ಮಾರು ರಾಛು಼ಖ್ಹಾರು ತರೀಪ್‌ಶ ಕರೀನ್ ದೇಖಾನಿಘೋಣಿ ಮೇ ಶನು ಗಲತ್‌ ಕರ‍್ಯೊ? ತಾರಿ ಶೊತ್‍ ಮಾರಾಕನ ಶಾತ್ತೊಬಿ ಮಳ್ಯುಕಿ ಶು? ತಾರ ಮಾರ ಮಾಯಮಾತ್ರನ ಖ್ಹಾಮ್ಣೆಬಿ ಯೊ ಲಯಿನ್ ಮ್ಹೇಲ್. ಅವ್ಣೇಸ್ ಅಪ್ಣ ಭೇಜ಼ಣನು ನ್ಯಾವ್‍ ಫೇಡಾದೆ. 38 ಮೇ ವೀಖ್ಹ್‌ ವರಖ್ಹ್‌ ತಾರಿ ಜೋ಼ಡ್ಮ ರ‍್ಹಯೊ. ತಾರು ಮಂಧಾನು ಬೋಕ್ಡಿಯೆನು ಮೇಂಢಿಯೆವ್ನು ಪೇಟ್ ಪಡಾದಿದೊಕೊಯ್ನಿ. ತಾರ ಮಂಧಾನು ಮೇಂಢಾವ್ನ ಮೇ ಶಾತ್ ಖೈಲಿದೊಕೊಯ್ನಿ. 39 ಝಾ಼ಡಿನ ಜಾನ್ವಾರ್‌ಥಿ ಮರೈಗಯುತೆ ಮೇಂಢಾಬೋಕ್ಡಾವ್ನ ತಾರ ಭಾಗ್ನ ನಾಖ್ಯೊಕೊಯ್ನಿ, ಯೊ ಲುಕ್ಷಾನ್ನ ಮೇಸ್ ಢೊಯಿಲಿದೊ. ದನ್ನುರ‍್ಹವೊ, ರಾತ್ನು ರ‍್ಹವೊ ಗುಮೈಜಾ಼ಯ್‍ತೆ ಇನು ಗಣ್ತಿಮಾರೇಥಿ ಲೀಲಿದೊ. 40 ದನ್‌ಮ ತಡ್‌ಕಾಮಾಬಿ ರಾತ್‌ನಿ ಠಣ್‌ಮಾಬಿ ಲತಾಡಪಡ್ಯೊ; ನಿಂದರ್‌ ಕರಾನಿಬಿ ಫುರ್‌ಶತ್ ಮಳ್ಯುಕೊಯ್ನಿ, 41 ವೀಖ್ಹ್‌ ವರಖ್ಹ್‌ ತಾರ ಘರ್ಮ ಚಾ಼ಕ್ರಿ ಕರ್ಯೊ. ತಾರಿ ಬೇ ಛೋ಼ರಿಯೇನಖ್ಹಾಜೆ ಚೌ಼ಧ ವರಖ್ಹ್‌ಬಿ, ತಾರ ಬೋಕ್ಡ ಮೇಂಢಾನಖ್ಹಾಜೆ ಛೋ಼ ವರಖ್ಹ್‌ಬಿ ಚ಼ಾಕ್ರಿಕರ‍್ಯೊ. ಕತೋಬಿ ತೂ ಮಾರಿ ಶಂಬ್ಳಾನ ದಖ್ಹ್‌ ವಖ್ಹತ್ ಬದ್ಲಾಯೊ. 42 ಮಾರೊ ಬಾ ಹುಯಿರೋತೆ ದೇವ್‌ಬಿ, ಅಬ್ರಹಾಮ್‌ನೊ ದೇವ್‌, ಇಸಾಕ್‍ನೆ ಡರ್‌ಭಕ್ತಿಥಿ ಆರಾದನೆ ಕರ‍್ಯೊತೆ ದೇವ್‌ ಮಾರಿಜೋ಼ಡ್ಮ ನಾ ರ‍್ಹಯೋಹೊತ್ತೊ, ಖ್ಹಚಂಬಿ ತೂ ಮನ ಖಾಲಿ ಹಾತೆ ಮೋಕ್ಲಿದಿದೊಹೊತ್‌, ಕತೋಬಿ ದೇವ್‌ ಮಾರಿ ವದೇಖ್ಹ್‌ನಾಬಿ ಮೇ ಪಡ್ಯೋತೆ ಮ್ಹಿನತ್ ಮಾಲುಮ್‌ಥೂತೆ ಇನಖ್ಹಾಜೆ ಕಾಲ್‌ರಾತೆ ತುನ ಗುರ್ಕಾಯೊ" ಕರಿಬೋಲ್ಯೊ.

43 ಇನಾಖ್ಹಾಜೆ ಲಾಬಾನನೆ ಯಾಕೋಬನ, ಆ ಛೋ಼ರಿಯೇ ಮಾರಿ ಛೋ಼ರಿಯೇ ಕಾಹೆಕಿಶೂ, ಆ ಲಡ್ಕಾವ್ ಮಾರ ನಾತ್ಯ ಕಾಹೆಕಿಶೂ, ಆ ಮಂಧಾಬಿ ಮಾರೂಸ್, ತಾರ ಡೋಳಾನ ಖ್ಹಾಮ್ಣೆನು ಖ್ಹಾರುಬಿ ಮಾರೂಸ್. ಇಮ್‍ಕತೊ ಆ ಮಾರಿ ಛೋ಼ರಿಯೇನ ಖ್ಹಾಜೇಬಿ, ಅವ್ಣೆ ಜ಼ಣಿಯೇತೆ ಲಡ್ಕಾವ್‍ನ ಖ್ಹಾಜೇಬಿ ಹಮ್ಕೆ ಮೇ ಶಾತ್‍ಕರೂ? 44 ಇನಖ್ಹಾಜೆ ಅಪ್ಣೆ ಬೇಜ಼ಣ ಮಳಿನ್ ಎಕ್ ಒಪ್ಪಂದ ಕರಿಲಿಯೆ ಆವ್, ಯೊ ಮನಾಬಿ ತುನಾಬಿ ಇಚ಼್‌ಮ ಸಬೂತ್ ಹುಯಿರ‍್ಹವಾದೆ" ಕರಿ ಬೊಲ್ಯೊ. 45 ತದೆ ಯಾಕೋಬನೆ ಎಕ್ ಬಂಡಾನ ಲಯಿನ್ ಯಾದ್‌ನು ಖಂಬು ಕರೀನ್ ಭೀರಾಖ್ಯೊ. 46 ಯಾಕೋಬನೆ ಇನ ಭಣಿವಾಳನ, "ಬಂಡಾವ್ನ ಎಕ್ಟುಕರೊ" ಕರಿ ಬೋಲಖ್ಹತರ್ ಇವ್ಣೆ ಬಂಡೋಖ್ಹಾರು ಎಕ್ಟು ಕರೀನ್ ಗುಡ್ಡೊ ಕರ‍್ಯು. ಇವ್ಣೆ ಖ್ಹಾರು ಯೊ ಗುಡ್ಡಾಕನ ಖಾಣು ಖಾದು. 47 ಯೊ ಟಿಮ್ಮಾನ ಲಾಬಾನನೆ "ಯಗರಸಾಹದೂತ" ಕರೀಬಿ ಯಾಕೋಬನೆ "ಗಲೇದ್" ಕರೀಬಿ ನಾಮ್ ಮ್ಹೇಲ್ಯೊ. 48 ತದೆ ಲಾಬಾನನೆ, "ಆ ವಖ್ಹತ್ ತುನಾಬಿ ಮನಾಬಿ ಹುಯುತೆ ಒಪ್ಪಂದನ ಆ ಗುಡ್ಡೋಸ್ ಸಾಕ್ಷಿ" ಕರಿ ಬೋಲ್ಯೋತೆ ಇನಾಖ್ಹಾಜೆ ಇನ ‘ಗಲೇದ್’ ಕರಿ ನಾಮ್‌ಹುಯು. 49 ಆನಾಹುಯಿನ್‌ ಇನೆ, "ಅಪ್ಣೆ ಏಕ್‍ಥಿಏಕ್ಜ಼ಣ ಅಲಕ್ ಹುಯಿರ‍್ಹಾವಪರ್ ಯೆಹೋವಾಸ್ ಅಪ್ಣ ಬೇ ಜ಼ಣಾನಾಬಿ ದೇಖಿಲೆವುಕರಸ್" ಕರಿ ಬೋಲ್ಯೋತೆ ಇನಾಖ್ಹಾಜೆ ಇನ ಮಿಚ್ಚಾ ಕರಿ ನಾಮ್‌ಹುಯು. 50 ಅಜು಼ ಲಾಬಾನನೆ, "ತೂ ಮಾರಿ ಬೇ ಛೋ಼ರಿಯೇನ ದುಖ್ ದಿದೋತೊ ನತರ್ ಬಿಜಿ ತಯೇಡಾನ ವ್ಯಹಾಕರಿಲಿದೋತೊ ಪರ್ಖಿ ಬೋಲಾನ ಅದ್ಮಿಮ ಕೋಣ್ ನಾರ‍್ಹಯುತೋಬಿ ದೇವಸ್‌ ಅಪ್ಣಿ ಒಪ್ಪಂದನ ಸಾಕ್ಷಿ" ಕರಿ ಬೊಲ್ಯೊ. 51 ಆನಾಹುಯಿನ್ ಲಾಬಾನನೆ ಯಾಕೋಬನ, "ತಾರಮಾಬಿ ಮಾರಮಾಬಿ ಇಚ್ಮ಼ ಮೇ ಭೀರಾಖ್ಯೋತೆ ಆ ಖಂಬಾನ ದೇಕ್. ಆ ಗುಡ್ಡಾನಾಬಿ ದೇಕ್. 52 ಮೇ ಖರಾಬ್ ಕರಾನಖ್ಹಾಜೆ ಆ ಗುಡ್ಡಾನ ಉಲಾಂಗಿನ್ ತಾರಾಕನ ಆವ್‌ಕೊಯ್ನಿ. ಇಮ್ಮಸ್ ತೂಬಿನ್‌ ಆ ಖಂಬಾನಾಬಿ ಆ ಗುಡ್ಡಾನಾಬಿ ಉಲಾಂಗಿನ್ ಮಾರಾಕನ ನಾ ಆವ್ಣು. ಅನ, ಆ ಗುಡ್ಡೋಬಿ ಖಂಬೂಬಿ ಸಬೂತ್ ಹುಯಿರ‍್ಹವಾದೆ. 53 ಅಬ್ರಹಾಮ್‌ನೊ ದೇವ್,ನಾಹೋರನೊ ದೇವ್,ಇವ್ಣ ಬಾನೋ ದೇವ್ ತುನಾಬಿ ಮನಾಬಿ ನ್ಯಾವ್ ಫೇಡಾವಾದೆ" ಕರಿ ಬೊಲ್ಯೊ. ಇಮ್ನಿಸ್ ಪರಕ್ ಯಾಕೋಬನೆ ಇನೊ ಬಾ ಇಸಾಕ್ ಡರ್‌ ಭಕ್ತಿಥಿ ಆರಾದನೆ ಕರಾತೆ ದೇವ್‍ಪರ್ ಆಣ್‍ಕರಿನ್ ಪರ್‌ಮಾಣ್ ಕರ‍್ಯೊ. 54 ಯಾಕೋಬ ಯೊ ಪಹಾಡ್‍ಪರ್ ಬಲಿದೀನ್ ಇನ ಮಾಯ ಮಾತ್ರನ ಇನಿಜೋ಼ಡ್ಮ ಖಾಣು ಖಾವನ ಬುಲೈಮಂಗಾಯೊ. ಇವ್ಣೆ ಖಾಣು ಖೈನ್ ಯೊ ರಾತ್‌ ಪಹಾಡ್‌ಮಸ್ ರಹಿಗು. 55 ವ್ಹಾಣವೇಳಿ ಲಾಬಾನನೆ ಉಠೀನ್ ಇನಿ ಛೋ಼ರಿಯೇನಾಬಿ, ನಾತ್ಯಾವ್‍ನಾಬಿ ಬುಚ್ಚಾ಼ಕರೀನ್ ಇವ್ಣುನ ಆಶೀರ್ವಾದ್‌ಕರೀನ್ ಇನ ಘರೆ ಪಾಛೊ಼ ಫರೀನ್ ಗಯೊ.