1 ಯಾಕೋಬನ ಲೇಯಮ ಪೈದ ಹುಯಿತೆ ಛೋ಼ರಿ ದೀನ ಏಕ್‌ ದನ್ ಕಾನಾನ್‌ ದೇಖ್ಹ್‌ನಿ ತಯೇಡಾವ್ನ ಮಳಾನಖ್ಹಾಜೆ ಭಾರ್‌ ಆಯಿ. 2 ಹಿವ್ವಿಯವಾಳೊ ಹಮೋರನೊ ಛಿಯ್ಯೊಬಿ ಯೊ ಮುಲಕ್‌ನೊ ಅಧಿಪತಿಥೋತೆ ಶೆಕೆಮ್‌ನೆ ದೀನನ ದೇಖಿನ್, ಪಾಡಿಲಿಜೈ಼ನ್, ಇನ ಮಾನಭಂಗ ಕರ‍್ಯೊ. 3 ಇನೊ ದಿಲ್‌ ಯಾಕೋಬನಿ ಛೋ಼ರಿ ದೀನಪರಸ್ ಥು. ಯೊ ಛೋ಼ಕ್ರಿನ ಪ್ಯಾರ್‌ಕರೀನ್ ಇನೊ ದಿಲ್ನ ಫೊಖ್ಹ್‌ಲಾವನಿ ವಾತ್‌ಬೋಲ್ಯೊ. 4 ಶೆಕೆಮ್‌ನೆ ಇನೊ ಬಾ ಹಮೋರನ, "ತೂ ಯೊ ಛೋ಼ಕ್ರಿನ ಮನ ಬಾವಣ್‍ ಕರಿದೇವ್ಣು" ಕರಿ ಬೋಲಿಲಿದೊ. 5 ಯಾಕೋಬನೆ ಇನಿ ಛೋ಼ರಿ ದೀನನ ಶೆಕೆಮ್‌ಥಿ ಮಾನಭಂಗ ಹುಯುತೆ ಖಬರ್‌ ಖ್ಹಮ್‌ಜಿನ್‌ ಇನ ಛಿಯ್ಯಾ ಖೇತರ್‌ಮ ಢಾಂಡ ಚ಼ರವ್‌ಕರ್ತಾಥ. ಇವ್ಣೆ ಆವಾಲಗು ಯೊ ಖ್ಹೊಪ್‌ತಿಥೊ. 6 ಎತ್ರಾಮ ಶೆಕೆಮ್‌ನೊ ಬಾ ಹಮೋರ ಯಾಕೋಬನಿ ಜೋ಼ಡ್ಮ ವಾತ್ ಬೋಲಾನ ಆಯೊ. 7 ಯಾಕೋಬನ ಪರ್ಖ್ಹಾ ಛಿಯ್ಯಾ ನ್ಹಾನಿ ಭೇನ್ನಿ ಖಬರ್‌ನ ಖ್ಹಮ್‌ಜಿನ್ ಖೇತರ್‌ಥ ಆಯಿನ್ ತದೇಸ್‌ ಕರೀನ್ ಘಣು ಇರಾದೊಕರ‍್ಯಾ. ಶೆಕೆಮ್‌ನೆ ಯಾಕೋಬನಿ ಛೋ಼ರಿನ ಮಾನಭಂಗ ಕರೀನ್, ಇಸ್ರಾಯೇಲ್‌ವಾಳಮ ಘಣು ಖ್ಹರಮ್‌ಜಾ಼ವನು ಕಾಮ್ ಕರ‍್ಯೊ. 8 ಕತೋಬಿ ಹಮೋರನೆ ಇವ್ಣುನ, "ಮಾರೊ ಛಿಯ್ಯೊ ಶೆಕೆಮ್‌ನೆ ತುಮಾರಿ ಛೋ಼ಕ್ರಿನ ಘಣು ಆಖ್ಹ್‌ಥಿ ಮೊಹಬತ್ ಕರಿರಾಖ್ಯೊಸ್, ದಯಾಕರಿನ್ ಯೊ ಛೋ಼ಕ್ರಿನ ಇನ ದೇವ್ಣುಕರಿ ತುಮುನ ಬೋಲಿಲೆವುಸ್. 9 ಆ ನಾಹುಯಿನ್‌ ತುಮೆ ಹಮಾರಕನಾಸ್‌ ಜಿವ್ಣುಕರೀನ್ ತುಮಾರಿ ಛೋ಼ಕ್ರಿಯೇನ ಹಮುನ ದೀನ್ ಹಮಾರಿ ಛೋ಼ಕ್ರಿಯೇನ ತುಮೆ ಲೇತಹುಯಿನ್ ಹಮಾರಿ ಜೋ಼ಡ್ಮ ಒಪ್ಪಂದಾನ ಬಣೊ. 10 ದೇಖ್ಹ್‌ ಖ್ಹಾರು ತುಮಾರ ಖ್ಹಾಮ್ಣೆ ಛಾ಼. ಹಿಜ್ಜಾ಼ ಜಿವ್ಣುಕರೀನ್ ಬೇಪಾರ್ ಕರಿನ್ ಶೊತ್ನ ಕಮೈಲಿಯೇಜಾ಼ಯ್." ಕರಿ ಬೊಲ್ಯೊ. 11 ತದೆ ಶೆಕೆಮ್‌ನೆ ದೀನನ ಬಾನಾಬಿ ಭೈಯೇನಾಬಿ, "ತುಮಾರಿ ದಯ ಮಾರಪರ್ ರ‍್ಹಾವಾದೆ, ತುಮೆ ಬೋಲಾಯೆತ್ರು ದೆವುಸ್. 12 ತುಮೆ ಬೋಲಾತೆ ತಿಮ್‌ ಕೆತ್ರು ಮಹಾರ್‌ಬಿ ಕಾಣ್ಕೆಬಿ ಛೋ಼ಕ್ರಿನಖ್ಹಾಜೆ ದೆವುಸ್‌. ಕತೋಬಿ ಯೊ ಛೋ಼ಕ್ರಿನ ಮನ ವ್ಯಹಾಕರಿ ದೆವೊ" ಕರಿ ಬೊಲ್ಯೊ. 13 ಯಾಕೋಬನ ಛಿಯ್ಯಾವ್‌ನೆ ಇವ್ಣಿ ನ್ಹಾನಿ ಭೇನ್ ದೀನನ ಶೆಕೆಮ್‌ನೆ ಮಾನಭಂಗ ಕರ‍್ಯೊತೆ ಇನಾಖ್ಹಾಜೆ ಇನಾಬಿ ಇನೊ ಬಾ ಹಮೋರನಾಬಿ ಠಗಾವ್ಣಿನು ಜ಼ವಾಬ್‌ದಿದ. 14 ಯಾಕೋಬನ ಛಿಯ್ಯಾವ್‌ನೆ ಇವ್ಣುನ, "ಹಮೆ ಯೊ ಕಾಮ್ ಕರಿಯೆಕೊಯ್ನಿ. ಖ್ಹತ್ನ ಹುಯುಕೊಂತೆ ಇನ ಹಮಾರಿ ಭೇನ್ನ ದ್ಯಾವಾನ ಕೋ ಹೋಯ್ನಿ, ಇಮ್ ದ್ಯಾವಾಥಿ ಹಮಾರಿ ಖ್ಹರಮ್‌ ಜಾಷೆ. 15 ಹಮೇ ತುಮಾರೇಥಿ ಒಪ್ಪಂದ ಕರಿಲಿಯೇಸ್ ತುಮಾರಮಾನು ಪರ್ಖ್ಹೊ ಖ್ಹಾರುಬಿ ಹಮಾರಿನಿತರ ಖ್ಹತ್ನಕರೈಲಿದಾತೊ ಹಮಾರಿನಿಘೊಣಿ ಉಶು. ಅಮ್ ಹುಯುತೊ ಹಮೆ ತುಮಾರಿ ವಾತ್ನ ಮಾನಿಲಿಯೇಸ್. 16 ಹಮಾರಿ ಛೋ಼ಕ್ರಿಯೇನ ತುಮುನ ದೇತಾಹುಯಿನ್‌ ತುಮಾರಿ ಛೋ಼ಕ್ರಿಯೇನ ಹಮೆ ಲೇತಹುಯಿನ್ ತುಮಾರಕನ ಜಿವ್ಣುಕರೀನ್ ತುಮಾರಿ ಜೋ಼ಡ್ಮ ಎಕ್ಕಸ್ ಖೂಮ್‌ವಾಳ ಹುಯಿರ‍್ಹಯೇಸ್. 17 ಕತೋಬಿ ತುಮೆ ಹಮಾರಿ ವಾತ್ನ ನಾಮಾನಿನ್ ಖ್ಹತ್ನ ನಾಕರಾಯತೊ ಹಮೆ ಹಮಾರಿ ಛೋ಼ಕ್ರಿನ ಬುಲೈಜಿಯೇಸ್" ಕರಿ ಬೋಲ್ಯ. 18 ಇವ್ಣಿ ವಾತೆ ಹಮೋರನಾಬಿ, ಇನೊ ಛಿಯ್ಯೊ ಶೆಕೆಮ್‌ನಾಬಿ ಅಛ್ಛು಼ ಕರಿ ದೆಖಾಯು. 19 ಯೊ ಜ಼ವಾನಿನೆ ಯಾಕೋಬನಿ ಛೋ಼ರಿನ ಪಸಂದ್ ಕರಿರಾಖ್ಯೊತೆ ಇನಖ್ಹಾಜೆ ಇವ್ಣೆ ಬೋಲ್ಯಾತೆ ತಿಮ್ ಕರಾನ ದೇರ್‌ ಕರ‍್ಯೊಕೊಯ್ನಿ. ಯೊ ಇನ ಬಾನ ಘರ್‌ವಾಳನ ಖ್ಹಾರೇಥೀಸ್ ಇಜ಼್ಜತ್‌ವಾಳೊ ಹುಯಿರೋಥೊ. 20 ಇನಖ್ಹಾಜೆ ಹಮೋರಬಿ ಇನೊ ಅಜು ಇನೊ ಛಿಯ್ಯೊ ಶೆಕೆಮ್‌ಬಿ ಇವ್ಣ ಖ್ಹಯೇರ್‌ವಾಳನಿ ಜೋಡ್ಮ ವಾತೆ ಬೋಲಾನ ಖ್ಹಯೇರ‍್ನ ದರ್ವಾಜಕನ ಆಯ. 21 "ಆ ಅದ್ಮಿಖ್ಹಾರು ಹಮಾರಿ ಜೋ಼ಡ್ಮ ಸಮಾಧಾನ್ ಹುಯಿರ‍್ಹುಸ್. ಇನಖ್ಹಾಜೆ ಇವ್ಣೆ ಅಪ್ಣ ದೇಖ್ಹ್‌ಮಾಸ್ ಜಿವ್ಣು ಕರೀನ್ ಬೇಪಾರ್ ಕರಾದೆ. ಆ ದೇಖ್ಹ್‌ ಅಪ್ಣುನಾಬಿ ಇವ್ಣುನಾಬಿ ಹೋಣುತೆಯೆತ್ರು ಜ಼ಮೀನ್ ಛಾ಼. ಅಪ್ಣೆ ಇವ್ಣಿ ಛೋ಼ಕ್ರಿಯೇನ ವ್ಯಾಹ ಕರಿಲಿಯೇ ಅಪ್ಣಿ ಛೋ಼ಕ್ರಿಯೇನ ಇವ್ಣುನ ದಿಯೇ. 22 ಕತೋಬಿ ಇವ್ಣೆ ಖ್ಹತ್ನ ಕರೈರಾಖವಾಳು ಹುಯಿರೂಸ್ತೆ ಇನಖ್ಹಾಜೆ ಅಪ್ಣಮಾಬಿ ಪರ್ಖ್ಹೊಖ್ಹಾರು ಖ್ಹತ್ನ ಕರಿಲೇವ್ಣುಕರಿ ಬೋಲಸ್. ಅಮ್ ಹುಯೂತೊ ಇವ್ಣೆ ಅಪ್ಣಾಮ ಜಿವ್ಣುಕರನಾಬಿ ಅಪ್ಣ ಜೋ಼ಡ್ಮ ಎಕ್ಕಸ್ ಖೂಮ್‌ವಾಳು ಹುವನಾಬಿ ಮಾನಿಲಿಶೆ. 23 ಇವ್ಣು ಮೇಂಢು ಢಾಂಡುಬಿ, ಇವ್ಣಿ ಶೊತ್‌ಬಿ ಇವ್ಣು ಖ್ಹಾರುಸ್ ಜಾನ್ವರ್‌ಖ್ಹಾರು ಅಪ್ಣೂಸ್ ಉಶೇಕೊಯ್ನಿಕಿಶೂ? ಇನಖ್ಹಾಜೆ ಅಪ್ಣೆ ಇವ್ಣಾಮ ಜಿವ್ಣು ಕರಾನಖ್ಹಾಜೆ ಇವ್ಣಿವಾತ್ನ ಮಾನಿಲಿಯೇ" ಕರಿ ಬೊಲ್ಯೊ. 24 ತದೆ ಖ್ಹಯೇರ್‌ನು ದರ್ವಾಜನಿ ವಾಟೆ ಜಾ಼ವಾಳು ಖ್ಹಾರೂಸ್, ಹಮೋರನೊ ಛಿಯ್ಯೊ ಶೆಕೆಮ್‌ನೆ ಬೋಲ್ಯೋತೆ ವಾತ್ನ ಗಾಮ್‌ವಾಳು ಖ್ಹಾರೂಸ್ ಮಾನಿಲಿದುತೆ ದೇಖಿನ್ ಇವ್ಣಾಮಥೂತೆ ಪರ್ಖ್ಹೊ ಖ್ಹಾರುಬಿ ಖ್ಹತ್ನ ಕರೈಲಿದು. 25 ತೀನ್ನ ದನ್ಮ ಇವ್ಣೆ ಖ್ಹತ್ನನ ಘಾವ್‌ಥಿ ಘಣು ಖ್ಹತುಕರಾನಿ ವಖ್ಹ್‌ತೆ ಯಾಕೋಬನ ಛಿಯ್ಯಾಬಿ, ದೀನನ ಭೈಯೇ ಸಿಮೆಯೋನ್‌ಬಿ ಲೇವಿ ಕರಿ ಭೇಜ಼ಣ ಹಾತ್ಮ ತಲ್ವಾರ್‌ ಲೀನ್ ಡರ‍್ಯಕೊಂತೆ ಖ್ಹಯೇರ್‌ಮ ಆಯಿನ್‌ ಖ್ಹಾರಾಸ್ ಪರ್ಖ್ಹಾನ ಮಾರಿನಾಖ್ಯ. 26 ಗಾಮ್‌ವಾಳಪರ್ ಪಡೀನ್ ಹಮೋರ ಅಜು಼ ಇನೊ ಛಿಯ್ಯೊ ಶೆಕೆಮ್‌ಖ್ಹಮೇದ್ ಖ್ಹಾರಾಸ್ ಪರ್ಖ್ಹಾನ ಮುಲಾಜ್‌ಕೊಂತೆ ತಲ್ವಾರ್‌ಥಿ ಮರ್‌ನಾಖಿನ್ ಶೆಕೆಮ್‌ನ ಘರ್‌ಥು ದೀನನ ಬುಲೈಲೀನ್ ಚ಼ಲೇಗಯ. 27 ಇನವಾರ್‌ ಯಾಕೋಬನೆಬಿ ಅಲಕ್ ಛಿಯ್ಯಾಬಿ ಆಯಿನ್, ಭೇನ್ನ ಮಾನಭಂಗ ಹುಯಿಗುತೆ ದಾವೊ ಕಾಡನಖ್ಹಾಜೆ ಖ್ಹಯೇರ್‌ನಾಸ್ ಲೂಟಿಕರಿನಾಖ್ಯ. 28 ಇವ್ಣ ಮೇಂಢಾವ್ನ, ಢಾಂಡವ್ನ, ಅಜು಼ ಗಧೇಡವ್‌ನ ಖ್ಹಯೇರ್‌ಮಾಬಿ ಖೇತರ್‌ಮಾಬಿ ಥೂತೆ ಇವ್ಣಿ ಶೊತ್‍ಖ್ಹಾರುಬಿ ಲೂಟಿಲಿದು. 29 ಇವ್ಣ ಲಡ್ಕಾವ್‌ನಬಿ ಬಾವ್ಣೆನಾಬಿ ಕೋಂಡಿನ್ ಮೋಲ್ನು ಖ್ಹಾರು ಜಿನಖ್ಹ್‌ಬಿ ಘರ್‌ಮಥೂತೆ ಖ್ಹಾರುಸ್ ಲೂಟಿಲಿದ. 30 ತದೆ ಯಾಕೋಬನೆ ಸಿಮೆಯೋನ್‌ನಾಬಿ ಅಜು಼ ಲೇವಿನ, "ತುಮೆ ಮನ ಖತ್ರಾಮ ಖ್ಹಪ್‌ಡೈನಾಖಿದಿದ. ಹಮ್ಕೆ ಆ ದೇಖ್ಹ್‌ನು ಕಾನಾನ್ಯವಾಳು, ಪೆರಿಜೀಯವಾಳು, ಮನ ವಹೇರ್‌ ಕರುಕರಸ್. ಮನ ಜಾ಼ಖ್ಹತ್ ಪರ್ಖ್ಹಾ ಅದ್ಮಿ ಕೊಯ್ನಿ. ಆ ದೇಖ್ಹ್‌ವಾಳು ಎಕ್ಟುಹುಯಿನ್‌ ಮಾರಪರ್ ಜಂಗ್‌ನ ಆಯಿನ್ ಮನ ಮಾರ‍್ಯೂತೊ ಮೇಬಿ ಮಾರ ಘರ್‌ವಾಳುಬಿ ನಾಶಹುಯಿಜಾ಼ಶು" ಕರಿ ಬೊಲ್ಯೊ. 31 ಕತೋಬಿ ಇವ್ಣೆ, "ಹಮಾರಿ ಭೇನ್ನ ಶೂಳೇನಿ ಘೋಣಿ ರಾಖಿಲಿದುತೆ ಬರೋಬರ್‌ಕಿಶು?" ಕರಿ ಬೋಲ್ಯು.