ಆದಿಕಾಂಡ 49

ಯಾಕೋಬನಿ ಖ್ಹರ್ತಿನಿ ವಾತೆ

1 ಯಾಕೋಬನೆ ಇನ ಛಿಯ್ಯವ್‌ನ ಬುಲೈಮಂಗೈನ್‌ ಇವ್ಣುನ, ತುಮೆ ಖ್ಹಾರು ಮಳಿನ್ ಆವೊ, ಖ್ಹಾಮೇನ ದನ್ಮ ತುಮುನ ಉಶೇತೆ ಯೊ ಖ್ಹಾರು ಖ್ಹಮ್‌ಜಾ಼ಡುಸ್‌. 2 ಯಾಕೋಬನ ಲಡ್ಕಾವೊ, ತುಮೆಖ್ಹಾರು ಮಳಿ ಆಯಿನ್ ಖ್ಹಮ್‌ಜೊ಼, ತುಮಾರೊ ಬಾ ಇಸ್ರಾಯೇಲನಿ ವಾತೇನ ಖ್ಹಮ್‌ಜೊ಼. 3 ರೂಬೇನಾಸ್ ಮಾರೊ ಪೈಲ್ಹೋಟೊ ಛಿಯ್ಯೊಬಿ, ಮಾರಿ ತಾಖತ್‌ಬಿ, ಮಾರಿ ಅಛ್ಛಿಮರ್ಯಾದಿಮಾಬಿ, ಅಧಿಕಾರ್‌ಮಾಬಿ ತೂ ಪೈಲ್ಹೋಸ್‌ ಬಾಗ್‌ ಹುಯಿರೋಸ್‌. 4 ಕತೋಬಿ ಕನಾರಿಪರ್‌ಥು ಉಛಾ಼ಳ್ ಮಾರುಕರಾತೆ ತೋಫಾನ್ನಿತರ ಛಾ಼ತೆ ತೂ, ಬಿಜೂ಼ ಅಶ್‌ಲಿ ಬಣೀಶ್‌ಕೊಯ್ನಿ. ಶನಕತೊ ತೂ ತಾರ ಬಾನು ಬಿಛಾ಼ವ್ಣಪರ್ ಖ್ಹುಯಿನ್, ಯೊ ಮೈಲು ಕರಿನಾಖಿದಿದೋನಿ, ಆ ಹೈರೋತೆ ಮಾರಿ ಬಿಛಾ಼ವ್ಣನ ಚ಼ಢ್ಯೊ. 5 ಸಿಮೆಯೋನ್‌ಬಿ ಲೇವಿಬಿ ಭೈಯೇ. ಅವ್ಣಿ ತಲ್ವಾರೇ ಖ್ಹತಾವನು ಕಫ್ಫನ್. 6 ಮಾರೊ ಜಾನ್‌ ತೂ ನಕೊ ಮಳಿಜೈ಼ಶ್, ಇವ್ಣಿ ಗಪ್‌ಲತ್ನಿ ಖರಾಬ್ ಖ್ಹಯಾಲ್ಮ. ಮಾರೊ ದಿಲ್‌ ತೂ ಇವ್ಣ ಝೂ಼ಂಡ್‌ಮ ನಕೊ ಮಳೀಶ್. ಇನಖ್ಹಾಜೆ ಮಾರೊ ದಿಲ್‌ ಖ್ಹುಶಿಹುವಾಸ್. ಇವ್ಣೆ ಇರಾದೇಥಿ ಅದ್ಮೇವ್‌ನ ಕತ್ರಿನಾಖ್ಯು. ಹಂಕಾರ್‌ಥಿ ಢಾಂಡವ್ನ ಕಮ್‌ಜೋ಼ರಿ ಕರಿನಾಖ್ಯು. 7 ಇವ್ಣೊ ಇರಾದೊ ಭಯಂಕರ್‌ಬಿ, ಇವ್ಣಿ ಚ಼ಂಢಾಳ್ ಕಠೋರ್‌ಬಿ ರ‍್ಹೀನ್ ಯೊ ಶಾಪಲೀರಾಖವಾಳು ಹುಯಿರುಸ್. ಯಾಕೋಬನಿ ಖೂಮ್ಮವಾಳಮ ಇವ್ಣುನ ಅಲಕ್ ಬಣಾವುಸ್‌. ಇಸ್ರಾಯೇಲ್‌ವಾಳಮಾಬಿ ಇವ್ಣುನ ಎಕ್ಕೋಸ್‌ಏಕ್ ಕರುಸ್. 8 ಯೆಹೂದ, ತಾರ ಭೈಯೇ ತುನಾಸ್ ಖ್ಹಲಾಮ್‌ಕರ್‌ಶೆ. ತಾರೊಹಾತ್ ತಾರ ವಹೇರ‍್ಯಾವ್ನಿ ಘಲೇಂಡಿಪರ್‌ ರ‍್ಹಿಶೆ. ತಾರ ಭೈಯೇ ತುನ ಆಡ್‌ಪಡ್‌ಶೆ. 9 ಯೆಹೂದ ಜ಼ವಾನಿ ಶುಂಭನಿತರ ಛಾ಼. ಮಾರ ಛಿಯ್ಯಾ, ತೂ ಜಾನ್ವರ್‌ನ ಧರಿನ್ ಮಾರಿನಾಖಿನ್ ಪಹಾಡ್‌ಮ ಜೈ಼ನ್ ರ‍್ಹೇಯ್ತೆ ಶುಂಭನಿತರ ಛಾ಼. ಯೊ ತಯೇಡ ಶುಂಭಾನಿಘೋಣಿ ಗೋಡ ಖ್ಹಮ್‌ಟೈಲೀನ್ ಕೈರಾಟೆ ಬೇಠೋಸ್. ಜಾನ್ವರ್‌ನೊ ರಾಜಾ಼ನ ಬರೋಬರ್‌ ಹುಯಿರೋತೆ ಅನ ಛೇಡಾವನ ಕಿನೇಥಿ ಉಶೆ? 10 ಇನ ಮಳ್‌ಣುತೆ ರಾಜ್ಯ ಇನ ಶಿಲೋವ್‌ಥು ಆವಾಲಗೂಬಿ ಯೊ ರಾಜ಼ನೊ ಡಂಡೊ ಯೆಹೂದನ ಹಾತ್ಮಾಥೊ ಛು಼ಟ್‌ಶೆಕೊಯ್ನಿ. ರಾಜಾ಼ನೊ ಡಂಡೊ ಇನ ಪಗ್‌ಕಂಥು ಖ್ಹಳಕ್‌ಶೆಕೊಯ್ನಿ. ಖ್ಹಾರು ಜ಼ಗ್‌ಜಾ಼ತ್‌ವಾಳುಬಿ ಇನ ಅದೀನ್ ಹುಯಿಜಾ಼ಶೆ. 11 ಯೊ ಇನ ಸವಾರಿಕರಾನ ಜಾನ್ವಾರ್‌ನ ದ್ರಾಕ್ಷಿನ ವೇಲೇಥಿ ಭಾಂದ್‌ಶೆ, ದ್ರಾಕ್ಷಿನ ವೇಲೇಥಿ ಇನ ಗಧೇಡಿನ ಚೆಲ್ಕಾನ ಭಾಂದ್‌ಶೆ. ಯೊ ಇನ ಲುಂಗ್ಡಾನ ದ್ರಾಕ್ಷಿನ ರಖ್ಹ್‌ಮ ಧೋವ್‌ಶೆ; ಡುಬೈನ್ ಇನ ಝ಼ಗ್ಗಾನ ಧೋವಸ್. 12 ದ್ರಾಕ್ಷಿನ ರಖ್ಹ್‌ಥಿ ಇನ ಡೋಳ ಲಾಲ್‌ಹುಯಿರ‍್ಹಿಶೆ. ದೂದ್‌ಥಿ ಇನ ದಾತ್‌ ಧೋಳಫಟ್ ಹುಯಿರ‍್ಹಿಶೆ. 13 ಜೆಬುಲೂನ್ ದರ‍್ಯಾವ್ನ ಕನಾರೆಮ ಜಿವ್ಣು ಕರಸ್. ಇನ ಜ಼ಹಾಜ಼್ ಅಯಿನ್ ಜಾ಼ಯಿತೆ ಬಂದರ್‌ಕನ ಛಾ಼. ಇನ ಮುಲಕ್ನು ಏಕ್‌ಭಾಗ್ ಸೀದೋನ್ನ ಛಿಮಾವಸ್. 14 ಇಸ್ಸಾಕಾರ ಮೇಂಢಾನ ಕೋಠಾನ ಇಚ಼್‌ಮ ಖ್ಹುತೊಹುಯೊ ಮೋಟೊ ಗಧೇಡೊ. 15 ಇನ ಮಳ್ಯೋತೆ ತಬರ್‌ಖೊ ಅರಾಮ್‌ಕರಾನ ಅಛ಼್ಛುಬಿ ಖ್ಹುಕ್‌ಥಿ ರ‍್ಹಾವಖ್ಹರ್ಕುಬಿ ಹುಯಿರಾವನು ದೇಖ್ಯೊ. ಯೊ ಭೋಜ಼್‌ ಢೊವಾನ ಖ್ಹಾಜೆ ಪೀಟ್‌ಝು಼ಕೈನ್ ಫುಗಟ್‌ನು ಕಾಮ್‌ಕರಾವಾಳೊ ಸೇವಕ್ ಹುಯಿರ‍್ಹಿಶೆ. 16 ದಾನ್‌ನೆ ಇಸ್ರಾಯೇಲವಾಳನು ಖೂಮ್‌ನಿ ಘೋಣಿ ಇನ ಅದ್ಮೆವ್‌ನ ನ್ಯಾವ್‌ದೀನ್ ಚ಼ಲಾವ್‌ಶೆ. 17 ದಾನ್‌ ಮಾರಗ್‌ನ ಇಚ಼್ಮಪಡ್ಯೊರ‍್ಹಾವಾಳೊ ಝಾರ್‌ನ ಖ್ಹಾಪ್‌ನಿತರ ರ‍್ಹಿಶೆ. ಯೊ ಘೋಡಾನಿ ಖುರಿನ ಕಲ್ಡ್‌ಶೆ. ಇನ ಚ಼ಲಾವವಾಳನ ಹೇಟ್ ಚಿತ್ತೊ ರಡ್‌ಕಾವ್‌ಶೆ. 18 ಯೆಹೋವ ದೇವ್‌, ತೂ ಮನ ಬಚಾ಼ಡನೊ ಮಾರಗ್‌ನ ಟಿವೈನ್ ದೇಖೂಕರೂಸ್‌. 19 ಗಾದನ ಉಪ್ಪರ್‌ ಲೂಟಿಕರವಾಳು ಪಡ್ಯುತೊ, ಕತೋಬಿ ಯೊ ಇವ್ಣುನ ರಪೇಟಿಲೀನ್‌ಜಾ಼ಶೆ. 20 ಅಶೇರನ ಅನಾಜ಼್ ಚೆಹೇಳ್‌ಉಶೆ. ಇನಾಕನ ರಾಜ಼ನ ಹೋಣುತೆ ಚೀಜ಼್ ಖ್ಹಾರು ಮಳ್‌ಶೆ. 21 ನಫ್ತಾಲಿ ಛು಼ಟ್‌ಕಾರ್‌ಥಿ ಹರಣ್ ಘೋಣಿಛಾ಼. ಇನೇಥಿ ಖ್ಹಾಜ಼್‌ನಿವಾತೆ ನಿಕಳ್‌ಶೆ. 22 ಯೋಸೇಫ ಘಣುಫಲ್‌ ದ್ಯವಾಳೊ ಝಾಡ್‌ನಿತರ ಚೇಜ಼್‌ಭಾರಕನ ಛಾ಼ತೆ ಫಲ್‌ನು ವೇಲೊ ಹುಯಿರೋಸ್‌. ಭೀತ್‌ನಪಾರ್ ಇನಿ ಡಾಳಿಯೇ ಫೈಲೈರ‍್ಹಯೇಸ್. 23 ಕಡ್‌ವೈಥಿ ಧೂಣ್‌ಮಾರವಾಳು ಇನ ಕಬ್‌ಜಾ಼ಕರಿಲಿಶೆ, ವಹೇರ್‌ಥಿ ತೀರ್‌ನ ಇನಾಪರ್‌ ಫೇಕ್‌ಶೆ. 24 ಕತೋಬಿ ಯಾಕೋಬನ ಖೂಮ್‌ನೊ ಖ್ಹಾರೀಸ್‍ ಶಕತ್‌ಬಳ್‌ವಾಳನಿ ತಾಖಥ್ಥಿಬಿ, ಇಸ್ರಾಯೇಲನ ಪಾಳನ್‌ಹಾರ್ ಚಿಪಾಟ್‌ ಹುಯಿರ‍್ಹವಾಳನ ನಾಮ್‌ಥೀಬಿ ಯೋಸೇಫನ ಹಾತ್‌ಮಾನು ಧೂಣ್ ಘಟ್‍ಥಿ ಭೀರಿಶೆ. ಯಾಕೋಬನ ಯಜಮಾನ್‌ಥಿ ಇನ ಹಾತ್ಮ ತಾಖತ್‌ಛಾ಼. 25 ತಾರೊ ಬಾನೊ ದೇವ್‌ ತುನ ಮದತ್‌ಕರವಾಳೊ ಹುಯಿರೋಸ್. ತಾರೊ ಬಾನೊದೇವ್ ತುನ ಆಶೀರ್ವಾದ್‌ ಕರ್‌ಶೆ. ಸರ್ವಶಕ್ತ ಹುಯಿರೋತೆ ಯೆಹೋವ ದೇವ್, ಯೊ ಉಪ್ಪರ್‌ಲ್ಯಆಬ್‌ಥೀಬಿ, ಹೇಟ್‌ನು ದರ‍್ಯಾವ್‍ನಿ ಪಥಾರಿಯೇಮಾಥೂಬಿ, ಛಾ಼ತಿಯೇಥೀಬಿ, ಗರಬ್‌ನುಫಲ್‌ಥೀಬಿ , ಹುವಾನು ವರ್‌ದಾನ್ ತುನ ದೀನ್ ಆಶೀರ್ವಾದ್‌ಕರಾದೆ. 26 ‘ತಾರ ಬಾನಿ ಆಶೀರ್ವಾದ್‌ಖ್ಹಾರಿ ತಾರ ಗುರುಗುರಬ್‌ಲ್ಯಾನಿ ಆಶೀರ್ವಾದ್‌ಥೀಬಿ ಜಾ಼ಖ್ಹತ್ ಹುಯಿರುಸ್. ಶುರುವಾತ್‌ಥೂಬಿ ಪಹಾಡ್‌ಥಿಹುವಾತೆ ಖ್ಹಾರೂಸ್ ಮೇಲ್‌ಥೀಬಿ, ಶತಾಕಾಲ ಯೋಸೇಫನ ಉಪ್ಪರ್‌ಬಿ ಇನ ಭೈಯೇನ ಉಪ್ಪರ್‌ಬಿ ಛೇಳ್‌ಥಿ ಉತ್ರಿನ್ ಆವಾದೆ. 27 "ಬೆನ್ಯಾಮೀನ್ ಮೇಂಢಾನ ಧರಿಖಾವಾಳೊ ಹಡಾನಿ ತರಛಾ಼. ರಾತೆ ಧರ‍್ಯಹುಯಾನ ವ್ಹಾಣೆಖಾಸ್. ಲೂಟ್ಯಾಹುಯಾನ ಖ್ಹಾಂಜೆ ವಾಟ ಪಾಡಿಲೇಸ್" ಕರಿ ಬೊಲ್ಯೊ.

28 ಅವ್ಣೆಖ್ಹಾರುಬಿ ಯಾಕೋಬಥಿ ಹುಯುತೆ ಬಾರ‍್ಹಖೂಮ್‌; ಆಸ್‌ಖ್ಹಾರು ಇವ್ಣೊ ಬಾನೆ ದಿದೋತೆ ಆಶೀರ್ವಾದ್; ಏಕೇಕ್‌ ಖೂಮ್‌ನ ಇನೆ ಬೋಲ್ಯೋತೆ ಏಕೇಕ್‌ನ ಆಶೀರ್ವಾದ್‌ನು ವಚನ್ ಬೊಲ್ಯೊ.

ಯಾಕೋಬನಿ ಮರಣ್ ಅಜು಼ ಮಖ್ಹಾಣ್ಯು

29 ಯಾಕೋಬನೆ ಇನ ಲಡ್ಕಾವ್ನ ದಿದೋತೆ ಹುಕುಮ್ ಶಾತ್‌ಕತೊ, "ಮೇ ಮಾರ ಗುರುಗುರಬ್‌ಲ್ಯಾಕನ ಮಳಾನಿ ವಖ್ಹತ್‌ಖನ್ನೆಹುಯಿಗು. ಇನಖ್ಹಾಜೆ ಹಿತ್ತಿಯವಾಳೊ ಎಫ್ರೋನನಿ ಜ಼ಮೀನ್‌ಮ ಛಾ಼ತೆ ಘವಿಮ, ಮನ ಮಾರ ಗುರುಗುರಬ್‌ಲ್ಯಾಕನ ಮಖ್ಹಾಣ್ಯುಕರ‍್ನು. 30 ಯೊ ಘವಿ ಕಾನಾನ್ ದೇಖ್ಹ್‌ನು ಮಮ್ರೆಗಾಮ್‌ನ ಮ್ಹೋರೆಛಾ಼ತೆ ಮಕ್ಪೇಲ ಕರಿ ಬಲ್ಡಾಮ ಛಾ಼. ಅಬ್ರಹಾಮ್‌ನೆ ಯೊ ಘವಿನ ಅಶ್‌ಪಿಶ್‌ಥೂತೆ ಜ಼ಮೀನ್‌ಖ್ಹಮೇದ್‌ ಹಿತ್ತಿಯವಾಳೊ ಎಫ್ರೋನ್‌ಥಿ ಶೊಂತ್‌ ಮಖ್ಹಾಣ್ಯಾನಿ ಜ಼ಮೀನ್ನಾಖ್ಹಾಜೆ ಲೀಲಿದೊ. 31 ಹಿಜ್ಜಾ಼ ಅಬ್ರಹಾಮ್‌ನಾಬಿ ಇನಿ ಬಾವಣ್‍ ಸಾರಾನಾಬಿ ಮಖ್ಹಾಣ್ಯುಹುಯು. ಹಿಜ್ಜಾ಼ಸ್ ಇಸಾಕ್‌ನಾಬಿ ಇನಿ ಬಾವಣ್ ರೆಬೆಕ್ಕನಾಬಿ ಮಖ್ಹಾಣ್ಯುಹುಯು. ಹಿಜ್ಜಾ಼ ಲೇಯನಾಬಿ ಮೇ ಮಖ್ಹಾಣ್ಯುಕರ‍್ಯೊ. 32 ಖೇತರ್‌ಖ್ಹಮೇದ್ ಹಿತ್ತಿಯವಾಳಥಿ ಮೋಲ್‌ಲೀಲಿನ್ ಯೊ ಘವಿಮ ಮನಾಬಿ ಮಖ್ಹಾಣ್ಯುಕರ‍್ನು" ಕರಿ ಬೊಲ್ಯೊ. 33 ಯಾಕೋಬನೆ ಇನ ಲಡ್ಕಾವ್ನ ಹುಕುಮ್‌ದ್ಯಾವಾನು ಖತಮ್‌ಕರೀನ್ ಬಿಛಾ಼ವ್ಣಪರ್ ಇನ ಗೋಡಾವ್‍ನ ಖ್ಹಮ್‌ಟೈ ಜಾನ್‌ಮ್ಹೇಲಿನ್, ಗುರುಗುರಬ್‌ಲ್ಯಾಕನ ಮಳೀಗೊ.