1 ಅಬ್ರಹಾಮ್‌ನೆ ಕೆಟೂರಕರಿ ಬಿಜೇಕ್ ಬಾವಣ್ಣ ವ್ಯಾಹ ಕರಿಲಿದೊ. 2 ಹೈರಿತೆನೆ ಇನ, ಜಿಮ್ರಾನ್, ಯೊಕ್ಷಾನ್, ಮೆದಾನ್, ಮಿದ್ಯಾನ್, ಇಷ್ಬಾಕ್, ಶೂಹ, ಅವ್ಣುನ ಜ಼ಣಿ. 3 ಯೊಕ್ಷಾನ್ ಅಜು಼ ಶೆಬಾನೊ ಬಾ ದೆದಾನ್‌. ಅಶ್ಮೂರ್ಯಬಿ, ಲೆಟೂಶ್ಯಬಿ, ಲೆಯುಮ್ಯಬಿ, ದೆದಾನ್ನಿ ಪಿಳ್ಗಿವಾಳು. 4 ಗೇಫಾ, ಗೇಫೆರ್, ಹನೋಕ್, ಅಬೀದಾ, ಎಲ್ದಾಯ ಕರಿ ಅವ್ಣೆ ಮಿದ್ಯಾನಥಿ ಪೈದಹುಯ. ಅವ್ಣೆಖ್ಹಾರುಬಿ ಕೆಟೂರನಿ ಪಿಳ್ಗಿವಾಳು. 5 ಅಬ್ರಹಾಮ್‌ನೆ ಇನಥೂತೆ ಶೊತ್‍ಖ್ಹಾರುಬಿ ಇಸಾಕ್‍ನ ದಿದೊ. 6 ಅಬ್ರಹಾಮ್‌ನೆ ಇನಿ ಬಿಜಿಬಾವ್ಣೆನ ಲಡ್ಕಾವ್ನ ಥೋಡು ಶೊತ್ನ ಧರಮ್‍ಕರೀನ್ ಯೊ ಬಿಜೂ಼ಬಿ ಬಚಿರ‍್ಹವಾನಿ ವಖ್ಹ್‌ತೇಸ್ ಇವ್ಣುನ ಇನೊ ಛಿಯ್ಯೊ ಇಸಾಕ್‍ಕಂಥು ಪೂರಬ್ ದಿಕ್‌ಮಾನು ಕೆದೆಮ್ ಮುಲಕ್‌ಮ ಮೋಕ್ಲಿದಿದೊ.

7 ಅಬ್ರಹಾಮ್ ಎಖ್ಹೊ ಪಾಚ಼್ಉಪ್ಪರ್ ಖ್ಹಡ್‌ತೀನಿಖ್ಹ್ ವರಖ್ಹ್‌ಮ ಮರ‍್ಯೊ. 8 ಅಬ್ರಹಾಮ್‍ನಿ ಪೂರ ಉಂಬರ್ ಖತಮ್ ಹುಯಿನ್ ಭುಡೊಝಿಂಕ್ ಹುಯಿನ್ ಜಾನ್‌ ಮ್ಹೇಲಿನ್ ಇನ ಗುರುಗುರಬ್‍ಲ್ಯಕನ ಮಳಿಗೊ. 9 ಇನ ಛಿಯ್ಯಾ ಇಸಾಕ್, ಇಷ್ಮಾಯೇಲ್‌ನೆ ಹಿತ್ತಿಯವಾಳೊ ಚೋಹರ‍ನೊ ಛಿಯ್ಯೊ ಎಫ್ರೋನ್ನಿ ಜ಼ಮೀನ್ಮ ಥೂತೆ ಮಕ್ಪೇಲನು ಘವಿಮ ಇನ ಮಖ್ಹಾಣ್ಯು ಕರ‍್ಯ. ಯೊ ಮಮ್ರೆ ತೋಪ್ನು ಪೂರಬ್ ದಿಕ್ಮ ಛಾ಼. 10 ಅಬ್ರಹಾಮ್‌ನೆ ಯೊ ಹಿತ್ತಿಯವಾಳಥಿ ಮೋಲ್ ಲೀರಾಖ್ಯೊಥೊ. ಇನಾಮ ಅಬ್ರಹಾಮ್‍ನಾಬಿ, ಇನಿ ಬಾವಣ್ ಸಾರನಬಿ ಮಖ್ಹಾಣ್ಯುಹುಯು. 11 ಅಬ್ರಹಾಮ್ ಮರಿಜಾ಼ವಾನ ಬಾದ್ಮ ದೇವ್‍ನೊ ಆಶೀರ್ವದ್ ಛಿಯ್ಯೊ ಇಸಾಕ್‍ಪರ್‌ಬಿ ಆಯು. ಇಸಾಕ್‍ನೆ ಲಹೈರೋಯಿ ಕರಿ ಬಾವ್ಡಿನ ಖನ್ನೆ ಜಿವ್‍ಕರ‍್ತೋಥೊ.

12 ಅಬ್ರಹಾಮ್‍ನ ಸಾರನಿ ಈಜಿಪ್ಟ್‌ವಾಳಿ ದಾಸಿ ಹಾಗರ‍ಮ ಪೈದಹುಯೋತೆ ಇಷ್ಮಾಯೇಲ್‌ನು ಪಿಳ್ಗಿನಿ ಖೇಣಿ. 13 ಇಷ್ಮಾಯೇಲ್‌ನ ಲಡ್ಕಾವ್‍ನಬಿ ಇವ್ಣೇಥಿ ಪೈದಹುಯುತೆ ಖೂಮ್‍ನಾಬಿ ಛಾ಼ತೆ ನಾಮ್‍ಖ್ಹಾರು ಖೆವುಕತೊ; ಪಹಿಲೆ ಪೈದಹುಯೋತೆ ನೆಬಾಯೋತ್, ಇನಪಾರ್ ಪೈದಹುಯಾತೆ ಕೇದಾರ್, ಅದ್ಬಯೇಲ್, ಮಿಬ್ಸಾಮ್, 14 ಮಿಷ್ಮಾ, ದೂಮಾ, ಮಸ್ಸಾ, 15 ಹದದ್, ತೇಮಾ, ಯಟೂರ್, ನಾಫೀಷ್, ಕೇದ್ಮಾ ಕರಿ ಅವ್ಣೇಸ್. 16 ಅವ್ಣೇಸ್ ಯೊ ಭಾರ ಖೂಮ್ನ ಶುರುವಾತ್‍ನ ಪರ್ಖ್ಹ. ಅವ್ಣ ನಾಮ್ನಾಸ್ ಇವ್ಣ ಗಾಮ್‌ನಾಬಿ ಟೋಳ್‌ನಾಬಿ ಮ್ಹೇಲೈರ‍್ಹುಥು. 17 ಇಷ್ಮಾಯೇಲ್‌ ಏಖ್ಹೊಖ್ಹಾತ್‍ ಉಪ್ಪರ್ ಡೋಡಿಖ್ಹ್‌ ವರಖ್ಹ್ ಬಚಿರ‍್ಹೊ. ಇನಪಾರ್ ಯೊ ಮರ‍್ಯೊ. 18 ಇಷ್ಮಾಯೇಲ್ಯವಾಳು ಹವೀಲಥು ಈಜಿಪ್ಟ್ ದೇಖ್ಹ್‌ನು ಪೂರಬ್‍ಮ ಛಾ಼ತೆ ಅಶ್ಯೂರ್‌ನು ವಾಟ್‍ಪರ್‌ನು ಶೂರ್‌ಲಗು ಜಿವ್ಣುಕರ‍್ಯು. ಅಮ್ ಇವ್ಣೆ ಅಬ್ರಹಾಮ್‍ನಿ ಖಾನ್‍ಧಾನ್‍ವಾಳನ ಆಮಖ್ಹಾಮೇಸ್ ಜಿವ್ಣುಕರ‍್ಯು.

19 ಅಬ್ರಹಾಮ್‌ನೊ ಛಿಯ್ಯೊ ಇಸಾಕ್‍ನಿ ಪಿಳ್ಗಿ. 20 ಇಸಾಕ್ ಚಾ಼ಳಿಖ್ಹ್ ವರಖ್ಹ್‌ವಾಳೊ ಹುಯಿರ‍್ಹಾವನಿವಖ್ಹ್‌ತೆ ಪದ್ದನ್‌ ಅರಾಮ್ಯವಾಳೊ ಬೆತೂವೇಲನಿ ಛೋ಼ರಿಬಿ ಲಾಬಾನನಿ ಭೇನ್‍ಬಿ ಹುಯಿರೀತೆ ರೆಬೆಕ್ಕನ ಮೆಸಪಟೋಮಿಯಥು ಬುಲೈಮಂಗೈನ್‌ ವ್ಯಾಹ ಕರ‍್ಯೊಥೊ. 21 ಯೊ ವಾಂಝ಼್‌ಣಿ ಹುಯಿರ‍್ಹಿಥಿ ಇಸಾಕ್‍ನೆ ಇನಖ್ಹಾಜೆ ಯೆಹೋವ ದೇವ್ನ ಗಿಂಗೈಲಿದೊ. ಯೆಹೋವನೆ ಇನಿ ಬಿಂತಿನ ಖ್ಹಮ್‍ಜ್ಯೋತೆ ಇನಖ್ಹಾಜೆ ರೆಬೆಕ್ಕ ಬೇಜೂನಿ ಹುಯಿ. 22 ಇನ ಗರಬ್‌ಮ ಅವ್ಳಿಜವ್ಳಿಲಡ್ಕ ಏಕ್‍ಥಿಏಕ್ ಧಕ್ಕಾಮುಕ್ಕಿಕರ್ತಾನ ಇನೆ, "ಅಮ್‍ಹುಯೂತೊ ಮೇ ಕಿಮ್‍ ಬಚ಼್‍ಣು" ಕರಿ ಬೋಲಿನ್ ಅನಿ ಬಾರೇಮ ಯೆಹೋವಕನ ಫಿರಾದನ ಗೈ. 23 ಯೆಹೋವನೆ ಇನ, "ತಾರ ಪೇಟ್‍ಮ ಬೇ ಜ಼ಗ್‌ಜಾ಼ತ್‌ ಛಾ಼; ಯೊ ಬೇ ಜ಼ಗ್‌ಜಾ಼ತ್‌ ಪೈದಾಖ್ಹ್‌ಥೂಸ್ ಅಲಕ್ ತರೀಕಾಮ ರ‍್ಹಿಶೆ; ಇನಾಮ ಎಕ್ ಬಿಜೇಕ್‍ಥಿ ಘಣು ತಾಖತ್‌ವಾಳು ಉಷೆ; ಮೋಟೊಸ್ ನ್ಹಾನನಿ ಚಾ಼ಕ್ರಿ ಕರ್‌ಶೆ" ಕರಿ ಬೊಲ್ಯೊ. 24 ಹೈರಿತೆ ದನ್ ಭರಾವದಿನ್ ಅವ್ಳಿ ಜವ್ಳಿ ಲಡ್ಕಜ಼ಣಿ. 25 ಪಹಿಲೆ ಪೈದಹುಯುತೆ ಲಡ್ಕು ಲಲೆಲಾಲ್‌ಬಿ ಆಂಗ್‍ತನ್‌ಭರಿ ಕೇಖ್ಹಾಳು ಹುಯಿರ‍್ಹುಥು. ಇನಖ್ಹಾಜೆ ಇನ, "ಏಸಾವ" ಕರಿ ನಾಮ್‌ಮ್ಹೇಲ್ಯು. 26 ಬೇನು ಲಡ್ಕು ಏಸಾವನಿ ಏಡಿನ ಹಾತೇಖ್ಹು ಧರೀನ್ ಪೈದಹುಯುತೆ ಇನಖ್ಹಾಜೆ "ಯಾಕೋಬ" ಕರಿ ನಾಮ್‌ಮ್ಹೇಲ್ಯು. ಅವ್ಣೆ ಪೈದಹುವಾನಿವಖ್ಹ್‌ತೆ ಇಸಾಕ್ ತೀನೀಖ್ಹ್ ವರಖ್ಹ್‌ವಾಳೊ ಹುಯಿರೋಥೊ.

27 ಯೊ ಭೇ ಛೋ಼ಕ್ರಬಿ ಮೋಟಹುಯಿನ್ ಇವ್ಣಾಮ ಏಸಾವ ಹಲ್ಡೊಕರಾಮ ಪುರ್ಗುಲ್ ಹುಯಿರೋಥೊ; ಯೊ ಝಾ಼ಡಿಮರ‍್ಹಾವಳೊ. ಯಾಕೋಬ ಮ್ಹಾಮುಲಿ ಅದ್ಮಿಹುಯಿನ್ ಡೇರಾನ ಘರ್‌ಮಾಸ್ ಜಿವ್ಣುಕರ‍್ಯೊ. 28 ಹಲ್ಡಾನಿ ಬೋಟಿ ಇಸಾಕ್‌ನ ಪಸಂದ್‍ಥೂತೆ ಇನಖ್ಹಾಜೆ ಯೊ ಏಸಾವನ ಪ್ಯಾರ್ ಕರ‍್ಯೊ; ರೆಬೆಕ್ಕನೆ ಯಾಕೋಬನ ಪ್ಯಾರ್ ಕರಿ. 29 ಏಕ್‍ದನ್ ಯಾಕೋಬ ಖಾಣು ಕರುಕರಾನಿ ವಖ್ಹತ್‌ಮ ಏಸಾವ ಝಾ಼ಡಿಥೊ ಥಕೀನ್‌ ಆಯೊ. ತದೆ ಇನ, "ಮೇ ಘಣೊ ಥಕೀನ್‌ ಐರ‍್ಹೋಸ್; 30 ಯೊ ಲಾಲ್ ಲಜ಼ತ್‍ನು ಚೀಜ಼್‍ನ ಹಮ್ಕೇಸ್ ಖಾವಾನ ದೇ" ಕರಿ ಬೊಲ್ಯೊ. ಆ ವಾತೆಥಿ ಏಸಾವನ "ಎದೋಮ್" ಕರಿ ನಾಮ್‌ಆಯು. 31 ಯಾಕೋಬನೆ ಇನ, "ತೂ ಪಹಿಲೆ ತಾರಿ ಪೈಲ್ಹೋಟ ಹಕ್ನ ಮನ ವೇಚಿನಾಕ್" ಕರಿ ಬೊಲ್ಯೊ. 32 ಏಸಾವನೆ, "ಹುವಾದೆ" ಮಾರೀನ್‌ತರಾನ ಮರಾವಾಳನ ಪೈಲ್ಹೋಟ ಹಕ್‍ನೊ ಫಾಯಿದೊಶನ ಕರಿ ಬೊಲ್ಯೊ. 33 ತದೆ ಯಾಕೋಬನೆ ಪಹಿಲೆ ಕೋಲ್‌ದೆ ಕರಿ ಬೋಲಾನಿವಖ್ಹ್‌ತೆ ಏಸಾವನೆ ಆಣ್‍ಕರಿನ್ ಇನ ಪಹಿಲೋಟ ಹಕ್ನ ಇನ ದಿನಾಖಿದಿದೊ. 34 ತದೆ ಯಾಕೋಬನೆ ಏಸಾವನ ರೋಟೊಬಿ ಲೋಭ್ಯಾನು ಟೋಟನಾಬಿ ದಿದೊ. ಏಸಾವನೆ ಖೈ ಪೀನ್ ಉಠಿ ಚ಼ಲೇಗೊ. ಅಮ್ ಇನೆ ಇನು ಪೈಲ್ಹೋಟ ಹಕ್ನ ಫಿಕ್ಕರ್ ಕರ‍್ಯೋಕೊಂತೆ ಮ್ಹೇಲಿದಿದೊ.