ಆದಿಕಾಂಡ 32

ಏಸಾವನ ಭೇಟಿಹುವಾನ ಯಾಕೋಬನಿ ತಯ್ಯಾರ್‌

1 ಯಾಕೋಬ ಅಗಾಡಿ ಚಾ಼ಲ್ತೊರ‍್ಹಾವನಿ ವಖ್ಹತ್ ದೇವ್ನ ದೂತರ್ ಇನ ಖ್ಹಾಮ್ಣೆ ಆಯು. 2 ಯಾಕೋಬ ಇವ್ಣುನ ದೇಖಾನಿ ವಖ್ಹ್‌ತೆ, ಆ ದೇವ್‍ನು ಬೇ ಟಾಂಡು" ಕರಿ ಬೋಲಿನ್ ಯೊ ಝ಼ಗೋನ "ಮಹನಯಿಮ್" ಕರಿ ನಾಮ್ ಮ್ಹೇಲ್ಯೊ. 3 ತದೆ ಯಾಕೋಬನೆ ಇನೇಥಿ ಅಗಾಡಿ ಎದೋಮ್ಯವಾಳನು ದೇಖ್ಹ್‌ ಹುಯಿರ‍್ಹುತೆ ಸೇಯಿರ್‌ ತಬರ್ಖಾನ ಇನೊ ಭೈ ಏಸಾವಕನ ಇನ ಖಬರ್‌ ದ್ಯವಾಳಾನ ಮೋಕ್‌ಲ್ಯೊ. 4 ಮೋಕ್ಲಾನಿ ವಖ್ಹ್‌ತೆ ಇವ್ಣುನ, "ತುಮೆ ಮಾರೊ ಮಾಲಿಕ್ ಏಸಾವಕನ ಜೈ಼ನ್ ಆ ಖಬರ್ ದೆವೊ; ಇನ, ‘ತಾರೊ ಸೇವೆ ಕರಾವಾಳೊ ಯಾಕೋಬ ಅತ್ರದನ್ ಲಾಬಾನಕನ ಜಿವ್ಣು ಕರುಕರ‍್ತೋಥೊ. 5 ಹಮ್ಕೆ ಇನಕನ ಢಾಂಡು, ಗಧೇಡು ಮೇಂಢು, ಬೋಕ್ಡಿ, ಕೈಯೇಕ್ ಜಾನ್ವರ್‌ನು ಮಂಧುಬಿ ದಾಸದಾಸಿಯೆವ್‌ಬಿ ಛಾ಼. ಮಾಲಿಕ್‌ನಿ ದಯಾ ಹಮಾರಪರ್ ರ‍್ಹೇವ್ಣುಕರಿ ಖಬರ್‌ ದ್ಯವಾನಖ್ಹಾಜೆ ಹಮುನ ಮೋಕ್ಲಿರಾಖ್ಯೊಸ್" ಕರಿ ಬೋಲೊ". 6 ತದೆ ಯೊ ಖಬರ್‌ ದ್ಯವಾಳು ಯಾಕೋಬಕನ ಪಾಛು಼ ಫರಿ ಆಯಿನ್, ಹಮೆ ತಾರ ಮೋಟ ಭೈ ಏಸಾವಕನ ಜೈ಼ನ್ ಆಯಿರ‍್ಹಾಸ್, ಯೊ ಚಾರ್‌ಖ್ಹೋ ಅದ್ಮಿ ಖ್ಹಮೇದ್ ತುನ ಮಳಾನ ವಳ್ಯಾವಸ್ ಕರಿ ಬೋಲಖ್ಹತರ್, 7 ಯಾಕೋಬನ ಘಣು ಡರ್ಬಿ ಕಲಾವ್ಣಿಬಿ ಹುಯು. ಇನೆ ಇನಿ ಜೋ಼ಡ್ಮಥೂತೆ ಅದ್ಮೆವ್‍ನ, ಮೇಂಢ ಢಾಂಡವ್ನ ಅಜು಼ ಊಟೆವ್ನ ಬೇ ಝೂ಼ಂಡ್‌ಕರಿ ಭಾಗ್‍ಕರ‍್ಯೊ. 8 ಶನಕತೊ, "ಏಸಾವ ಎಕ್ ಝೂ಼ಂಡ್‍ಪರ್ ಪಡ್ಯೋತೋಬಿ ಬಿಜೇಕ್ ಝೂ಼ಂಡ್ ಲಪೀನ್ ಜ಼ಯೇಜಾ಼ಯ್" ಕರಿ ಇನೆ ಸೋಚಿಲಿದೊ. 9 ಆನಾಹುಯಿನ್ ಯಾಕೋಬನೆ ದೇವ್ನ ಪ್ರಾರ್ಥನೆ ಕರೀನ್, "ಯೆಹೋವದೇವ್, ಮಾರೊ ಬಾ ಅಬ್ರಹಾಮ್‌ನೊ ದೇವ್, ಮಾರೊ ಬಾ ಇಸಾಕ್‍ನೊ ದೇವ್, ತುನೆ ಬೋಲ್ಯೊಥೋಕಿ ‘ತಾರ ಶೊಂತ್‌ ದೇಖ್ಹ್‌ನಾಬಿ, ಮಾಯಮಾತ್ರಕನಾಬಿ ಪಾಛೊ಼ ಜಾ಼ವ್ಣುಕರಿ ಮನ ಹುಕುಮ್ ಕರೀನ್ ತುನ ಅಛ್ಛು಼ ಕರೀಶ್‌ಕರಿ. 10 ಕತೋಬಿ ತೂ ತಾರೊ ದಾಸ ಹುಯಿರೋತೆ ಮಾರಪರ್ ಕೆತ್ರೇಕ್ಕಿ ಪ್ಯಾರ್‌ ರಾಖಿನ್ ತಾರಿ ವಾಗ್ದಾನ್ನ ಚ಼ಲೈದಿದೋನಿ, ಮೇ ಇನ ಲ್ಹಾಯೇಕ್‌ಕೊಂತೆ ಹುಯಿರ‍್ಹೊಸ್. ಮೇ ಪಹಿಲೆ ಆ ಯೊರ್ದನ್ ನದ್ದಿನ ಉಲಾಂಗನಿವಖ್ಹ್‌ತೆ ಮಾರಾಕನ ಎಕ್ ಲಠ್ಠೊ ಖಲಿ ಥೋ. ಹಮ್ಕೆ ಬೇ ಝೂ಼ಂಡ್‍ ಛಾ಼. 11 ಮಾರೊ ಮೋಟೊ ಭೈ ಏಸಾವ ಆಯಿನ್ ಮನಾಬಿ, ಮಾರ ಲಡ್ಕಾವ್ನಬಿ, ಇವ್ಣಿ ಆಯಾವ್‍ನಾಬಿ ಮಾರಿನಾಖಸ್‍ಕಿಶುಕಿ ಕರಿ ಮನ ಡರ್‌ ಛಾ಼. ಇನ ಹಾತ್ಮ ನಾಖ್ಹಪಡ್ನುತೆ ಹಮುನ ಬಚಾ಼ಡ್‍ನುಕರಿ ತುನ ಮೇ ಬಿಂತಿ ಕರಿಲೇವುಸ್. 12 ‘ತುನ ಖ್ಹಚಂಬಿ ಅಛ್ಛು಼ಕರೀನ್, ತಾರಿ ಪಿಳ್ಗಿನ ಗಣಾನ ಕೊಹುವಾಂತೆ ದರ‍್ಯಾವ್‍ನಿ ರೇತ್ನಿತರ ಭಡಾವುಸ್ ಕರಿ ತುನೆ ಮನ ಬೋಲಿರಾಖ್ಯೋಸ್‌ನಿ" ಕರಿ ಬೊಲ್ಯೊ. 13 ಯಾಕೋಬ ಯೊ ರಾತ್ ಹಿಜ್ಜಾ಼ಸ್‍ ಖ್ಹುತೊ. ಇನೆ ಲಾಯೊಥೋತೆ ತಿನಾಮಥು ಥೋಡು ಇನೊ ಭೈ ಏಸಾವನ ಕಾಣ್ಕೆ ದ್ಯಾವಾನ ಚೂ಼ಣಿ ಕಾಡಿಲಿದೊ. 14 ಬೇಖ್ಹೊ ಬೋಕ್ಡಿಯೆ ಬೇಖ್ಹೊ ಮೇಂಢಿಯೆ, ವೀಖ್ಹ್‌ ಬೋಕ್ಡ, ವೀಖ್ಹ್‌ ಮೇಂಢ 15 ಚೆಲ್ಕ ಖ್ಹಮೇದ್ ದೂದ್ ನಿಚೋಡಾನಿ ಡೋಡಿಖ್ಹ್‌ ಊಟೆ, ಚಾ಼ಳಿಖ್ಹ್‌ ಗೈಯೆ, ದಖ್ಹ್‌ ಘುಳಿ, ವೀಖ್ಹ್‌ ಗಧೇಡಿಯೇ, ದಖ್ಹ್‌ ಗಧೇಡ, 16 ಆ ಅಖ್ಖು ಇನೊ ಭೈ ಏಸಾವನ ಕಾಣ್ಕೆ ದ್ಯವಾನ ಕಾಡಿ ಮ್ಹೇಲ್ಯೊ. ಆ ಅಖ್ಖಾ ಮಂಧಾವ್ನ ಅಲಕ್ ಅಲಕ್ ಬಣೈನ್ ಇನ ಆಳ್‌ನ ದೀನ್, "ತುಮೆ ಮಾರೇಥಿ ಅಗಾಡಿ ಜಾ಼ವೊ ಅಜು಼ ಹರೇಕ್ ಮಂಧಾವ್‌ನಾಬಿ ಇಚ಼್‌ಮ ಝ಼ಗೊರ‍್ಹಾವಾದೆ" ಕರಿ ಬೊಲ್ಯೊ. 17 ಫೈಲ ಮಂಧಾನ ದೇಖಿಲ್ಯಾವಾಳನ, "ಮಾರೋಮೋಟೊ ಭೈ ಏಸಾವ ತಾರ ಖ್ಹಾಮ್ಣೆ ಆಯಿನ್, ‘ತೂ ಕಿನೊ ಆಳ್‌? ಕಿಜ್ಜಾ಼ ವಳ್ಯೊಜಾ಼ಸ್? ತಾರ ಖ್ಹಾಮ್ಣೆ ಛಾ಼ತೆ ಆಖ್ಹಾರು ಜಾನ್ವರ್‌ ಕಿನು?" ಕರಿ ಪುಛಾ಼ಯೋತೊ, 18 ತದೆ ತೂ, "ಆ ತಾರೊ ಸೇವಕ್‌ ಹುಯಿರೋತೆ ಯಾಕೋಬನು. ಇನೊ ಮಾಲಿಕ್ ಏಸಾವನ ಆ ಅಖ್ಖು ಕಾಣ್ಕೆ ದೀನ್‌ ಮೋಕ್ಲಿರಾಖ್ಯೊಸ್. ಯೋಬಿ ಹಮಾರ ಪೀಠೆ ವಳ್ಯೋಆವಸ್". ಕರಿ ಜ಼ವಾಬ್‌ ದೇವ್ಣುಕರಿ ಹುಕುಮ್‌ ದಿದೊ. 19 ಇಮ್ಮಸ್ ಬೇನೆವಾಳನಾಬಿ ತೀನ್ನೇವಾಳನಾಬಿ ಮಂಧಾನ ಪೀಠೆ ಜಾ಼ವಾಳ ಖ್ಹಾರಸ್‌ನಾಬಿ, "ತುಮೆ ಏಸಾವನ ದೇಖಾನಿ ವಖ್ಹ್‌ತೆ ಅಮ್ನಿಸ್ ಪರಕ್‌ ಬೋಲ್ನು. 20 ತಾರೊ ಸೇವಕ್ ಯಾಕೋಬಸ್ ಹಮಾರ ಪೀಠೆ ವಳ್ಯೋಆವಸ್ ಕರಿ ಬೋಲೊ" ಕರಿ ಹುಕುಮ್‌ ಕರ‍್ಯೊ. ಯಾಕೋಬನೆ ಇನ ದಿಲ್ಮ, "ಮಾರ ಅಗಾಡಿ ಜಾ಼ಶೇತೆ ಆ ಕಾಣ್ಕೇಥಿ ಏಸಾವನ ಇರಾದನ ಸಮಾಧಾನ್‍ ಕರುಸ್ ತದೆ ಇನ ಮಳಾನಿ ವಖ್ಹ್‌ತೆ, ಏಕ್‌ವೇಳ್‌ ಮನ ಮಳೈಲಿಶೆ" ಕರಿ ಬೋಲಿಲಿದೊ. 21 ಅಮ್‌ ಯೊ ಕಾಣ್ಕೆನ ಅಗಾಡೀಸ್‌ ಮೋಕ್ಲಿನ್, ಇನೆ ಯೊ ರಾತ್‌ ಇನ ಟಾಂಡಮಸ್‌ ರ‍್ಹಯೊ.

ದೇವ್ನಿ ಜೋ಼ಡ್ಮ ಯಾಕೋಬನಿ ಕುಸ್ತಿ

22 ಯೋರಾತ್‌ ಇನಿ ಬೇ ಬಾವ್ಣೆನ, ಬೇ ದಾಸಿಯೇನ, ಅಜು಼ ಗ್ಯಾರ‍್ಹಜ಼ಣ ಲಡ್ಕಾವ್ನ ಬುಲೈಲಿನ್ ಯಬ್ಬೋಕ್‌ ವ್ಹೇಕ್ಳಾನ ಉಲಾಂಗ್ಯೊ. 23 ಅಮ್‌ ಇವ್ಣುನಾಬಿ, ಇನಿ ಶೊತ್‌ನಾಬಿ ವ್ಹೇಕ್ಳಾನಿ ವಾಟೆ ಉಲಾಂಗಾಯೊ. 24 ತದೆ ಯಾಕೋಬ ಎಕ್ಕಸ್‌ಜ಼ಣೊ ಪೀಠೆ ಭೀಯೊತೆತದೆ ಕೋಣ್ಕಿ ಎಕ್ ಪರ್ಖ್ಹೊ ವ್ಹಾಣುಹುವಾಲಗು ಇನಿ ಜೋ಼ಡ್ಮ ಕುಸ್ತಿಭೀಡ್ಯೊ. 25 ಯೊ ಪರ್ಖ್ಹೊ ಇನೆ ಜೂತ್ಯೊಕೊಂತೆ ಇನಖ್ಹಾಜೆ ಯಾಕೋಬನಿ ಜಾ಼ಂಗ್‌ನಿ ಕೀಲ್‌ಛೀಮ್ಯೋತೆ ಇನಖ್ಹಾಜೆ ಯಾಕೋಬ ಇನಿ ಜೋ಼ಡ್ಮ ಲಡ್‌ತೊರ‍್ಹವಾನಿ ವಖ್ಹ್‌ತೇಸ್‌ ಜಾ಼ಂಗ್‌ನಿ ಕೀಲ್ ಉಳ್‌ಕಿಗೈ. 26 ಯೊ ಪರ್ಖ್ಹೊ, "ಮನ ಮ್ಹೇಲ್‌, ವ್ಹಾಣು ಹುಯಿಚಾ಼ಲ್ಯು" ಕರಿ ಬೋಲಖ್ಹತರ್‌, ಯಾಕೋಬನೆ, "ತೂ ಮನ ಆಶೀರ್ವಾದ್‌ ಕರಾಲಗೂಬಿ ಮೇ ತುನ ಮ್ಹೇಲುಕೊಯ್ನಿ" ಕರಿ ಬೊಲ್ಯೊ. 27 ಯೊ ಪರ್ಖ್ಹೊ, "ತಾರು ನಾಮ್ ಶಾತ್?" ಕರಿ ಬೋಲ್ತಾನ ಇನೆ, ‘ಯಾಕೋಬ" ಕರಿ ಬೊಲ್ಯೊ. 28 ಇನೆ ಯಾಕೋಬನ, "ಅನಾಪರ್ ತೂ ಯಾಕೋಬಕರಿ ಬೋಲೈಲೀಶ್‌ ಕೊಯ್ನಿ; ತೂ ದೇವ್ನಿ ಜೋ಼ಡ್ಮಾಬಿ, ಅದ್ಮಿನಿ ಜೋ಼ಡ್ಮಾಬಿ ಲಡೀನ್‌ ಜೂತ್ಯೋತೆ ಇನಾಖ್ಹಾಜೆ ತುನ ‘ಇಸ್ರಾಯೇಲ್‌’ ಕರಿ ನಾಮ್‌ಉಶೆ" ಕರಿ ಬೊಲ್ಯೊ. 29 ಯಾಕೋಬನೆ, "ದಯಾಕರಿನ್ ತಾರು ನಾಮ್‌ ಮನ ಬೋಲ್ನು" ಕರಿ ಇನ ಗಿಂಗೈಲೇತಾನ ಇನೆ, "ಮಾರ ನಾಮ್ನ ಪುಛಾ಼ವನು ಶನಾ?" ಕರಿ ಬೋಲಿನ್‌ ಹಿಜ್ಜಾ಼ ಇನ ಆಶೀರ್ವಾದ್‌ ಕರ‍್ಯೊ. 30 ತದೆ ಯಾಕೋಬನೆ, "ಮೇ ದೇವ್ನ ಆಮಖ್ಹಾಮೆ ದೇಖ್ಯೊ, ತೋಬಿ ಮಾರೊ ಜಾನ್‌ ಬಚ್ಯೊ" ಕರಿ ಬೋಲಿನ್‌ ಯೊ ಝ಼ಗೋನ *32:30 ಪೆನಿಯೇಲ್‌ಕತೊ ಮೇ ದೇವ್ನ ಆಮಖ್ಹಾಮೆ ದೇಖ್ಯೊ. ಇನೆ ಮಾರ ಜಾನ್ನ ಬಚಾ಼ಡ್ಯೊ ಕರಿ‘ಪೆನೀಯೇಲ್‌’ ಕರಿ ನಾಮ್‌ಮ್ಹೇಲ್ಯೊ. 31 ಇನೆ, ಪೆನೂವೇಲ್‌ನ ಉಲಾಂಗಾನಿ ವಖ್ಹ್‌ತೆ ಚಾ಼ಂದ್‌ ನಿಕ್‌ಳ್ಯೊ. ಕತೋಬಿ ಯಾಕೋಬ ಜಾ಼ಂಗ್‌ನಿ ಅಜಾ಼ಥಿ ಲಂಗಡ್‌ತೊ ನಿಕ್‌ಳ್ಯೊ. 32 ಯೊ ಪರ್ಖ್ಹೊ ಯಾಕೋಬನಿ ಜಾ಼ಂಗ್‌ನಿ ಕೀಲ್‌ನ ಛೀಮ್ಯೋತೆ ಇನಾಖ್ಹಾಜೆ ಇಸ್ರಾಯೇಲ್‌ವಾಳು ಹಮ್ಕೆಲಗೂಬಿ ಜಾ಼ಂಗ್‌ನಿ ನ್ಹಾರ್‌ನ ಖಾಯಿಕೊಯ್ನಿ.