1 ಅಮ್‌ ಅಬ್ರಾಮ್‌ನೆ ಇನುಥೂತೆ ಖ್ಹಾರಾಸ್ನಲೀನ್‌ ಬಾವಣ್ಣಾಬಿ ಲೋಟನಾಬಿ ಜೋ಼ಡ್ಮ ಬುಲೈಲೀನ್ ಈಜಿಪ್ಟ್ ದೇಖ್ಹ್‌ನ ಮ್ಹೇಲಿನ್ ಕಾನಾನ್‌ ದೇಖ್ಹ್‌ನು ದಕ್ಷಿಣ್ ತಬರ್‌ಖಾಮ ಆಯೊ. 2 ಅಬ್ರಾಮ ಘಣು ಧನ್‌ದೌಲತ್‌ವಾಳೊ ಹುಯಿರ‍್ಹೋಥೊ. ಢಾಂಡು ಬೋಕ್ಡು ಮೇಂಢು ಖ್ಹೋನ್ನು ರೂಪುಬಿ ಥು. 3 ಯೊ ದಕ್ಷಿಣ್ ಮುಲಕ್ನ ಮ್ಹೇಲಿನ್ ಅಗಾಡಿ ಚಾ಼ಲ್ತೊಹುಯಿನ್ ಬೇತೇಲ್‌ಲಗು ಕತೊ ಬೇತೇಲ್‌ನಾಬಿ ಆಯಿಕರಿ ಗಾಮ್‌ನ ಪೂರಬ್‌ಮ ಇಚ಼್‌ಮ ಡೇರೊ ನಾಖಿರಾಖ್ಯೊಥೊ. 4 ಚಾ಼ಚ಼ರ್‌ನ ಭಾಂದಿಹುಯಿ ಝಗೋಕನ ಅಬ್ರಾಮ್‌ ಪಾಛೊ಼ಫರಿ ಆಯೊ, ಹಿಜ್ಜಾ಼ ಯೆಹೋವನ ನಾಮ್‌ಪರ್‌ ಆರಾದನೆ ಕರ‍್ಯೊ. 5 ಅಬ್ರಾಮ್‌ನಿ ಜೋ಼ಡ್ಮಥೂತೆ ಲೋಟನಾಬಿ ಮೇಂಢು, ಢಾಂಡು, ಡೇರಾನು ಘರ್‌ಖ್ಹಾರು ಥು. 6 ಇನಖ್ಹಾಜೆ ಇವ್ಣ ಭೇಜ಼ಣಾನ ಜಿವ್ಣಾನ ಝ಼ಗೊ ಪೂರ‍್ಯುಕೊಂತೆ ಹುಯಿಗು. 7 ಅನಖ್ಹಾಜೆ ಅಬ್ರಾಮ್‌ನ ಢಾಂಡ ಚ಼ರಾವವಾಳಮಾಬಿ ಲೋಟನ ಢಾಂಡ ಚ಼ರಾವವಾಳಮಾಬಿ ಲಡೈಹೊತುಥು. ಆ ನಾಹುಯಿನ್ ಕಾನಾನ್ಯವಾಳುಬಿ ಪೆರಿಜೀಯವಾಳೂಬಿ ಯೊ ಹಗಾಮ್ಮ ಯೋಸ್ ದೇಖ್ಹ್‌ಮ ಜಿವ್ಣುಕರುಕರ್ತುಥು. 8 ಅಮ್‌ರ‍್ಹಾವಪರ್‌ ಅಬ್ರಾಮ್‌ನೆ ಲೋಟನ, "ಮನಾಬಿ ತುನಾಬಿ, ಮಾರ ಢಾಂಡ ಚ಼ರಾವವಾಳನಾಬಿ ತಾರ ಢಾಂಡ ಚ಼ರಾವವಾಳನಾಬಿ ಲಡೈನಾಹೋಣು; ಅಪ್ಣೆ ಭೈಯೇ ಕಾಹೆಕಿ ಶು? 9 ಖ್ಹಾರಿ ಧರ್ತಿ ತಾರಖ್ಹಾಮ್ಣೆ ಛಾ಼. ದಯಕರೀನ್‌ ಮನ ಮ್ಹೇಲಿನ್ ಅಲಕ್‌ಹುಯಿಜ಼. ತೂ ಡಾವಿಬಾಜು಼ ಗಯೋತೊ ಮೇ ಖಾವಿಬಾಜು಼ ಜ಼ವುಸ್‌; ತೂ ಖಾವಿಬಾಜು಼ ಗಯೋತೊ ಮೇ ಡಾವಿಬಾಜು಼ ಜ಼ವುಸ್" ಕರಿಬೋಲ್ಯೊ. 10 ಲೋಟ ಡೋಳಪಾಡಿನ್ ದೇಖಖ್ಹತರ್ ಯೊರ್ದನ್ ನದ್ದಿನು ತಬರ್ಖೊ ಚೋಗರ್‌ಲಗು ಪಾಣಿ ರ‍್ಹವಾನು ತಬರ್ಖೊಕರಿ ಮಾಲುಮ್ ಕರಿಲಿದೊ. ಯೆಹೋವ ದೇವ್‌ ಸೊದೋಮ್ ಗೊಮೋರ್‌ ಖ್ಹಯೇರ್‌ನ ನಾಶ್‌ಕರಾನ ಅಗಾಡಿ ಯೊ ತಬರ್ಖೊ ಯೆಹೋವ ದೇವ್ನು ಬಗೀಚನಿತರಾಬಿ, ಈಜಿಪ್ಟ್ ದೇಖ್ಹ್‌ನಿತರಾಬಿ ಪಾಣಿನು ತಬರ್ಖೊ ಹುಯಿರ‍್ಹೊಥೊ. 11 ಇನಖ್ಹಾಜೆ ಲೋಟನೆ ಯೊರ್ದನ್ ನದ್ದಿನು ಅಶ್‌ಪಿಶ್‌ನ ತಬರ್ಖಾನ ಚೂ಼ಣಿಲೀನ್ ಪೂರಬ್ ದಿಕ್‌ಭಣಿ ನಿಕ್‌ಳ್ಯೊ. ಅಮ್‌ ಇವ್ಣೆ ಭೇಜ಼ಣ ಅಲಕ್‌ ಹುಯಿಗಾ. 12 ಅಬ್ರಾಮ್‌ ಕಾನಾನ್‌ ದೇಖ್ಹ್‌ಮ ಜಿವ್ಣುಕರ‍್ಯೊ. ಲೋಟನೆ ಯೊರ್ದನ್‌ ನದ್ದಿನ ಅಶ್‌ಪಿಶ್‌ನ ಖ್ಹಯೇರ್ನ ಬಲ್ಡಾಮ ಜಿವ್ಣು ಕರ್ತೊಹುಯಿನ್ ಸೊದೋಮ್‌ನ ಖನ್ನೆ ಡೇರೊ ನಾಖ್ಯೊ. 13 ಕತೋಬಿ ಸೊದೋಮ್ ಖ್ಹಯೇರ್‌ನು ಅದ್ಮಿ ಯೆಹೋವ ದೇವ್ನಿ ನಜ಼ರ್‌ಮ ಘಣು ಖರಾಬ್‌ಬಿ ಪಾಪಿಖ್ಹಾರು ಹುಯಿರ‍್ಹುಥು.

14 ಲೋಟನೆ ಅಬ್ರಾಮ್‌ನ ಮ್ಹೇಲಿನ್ ಅಲಕ್‌ಹುಯೊ ತದೆ ಯೆಹೋವ ದೇವ್ನೆ ಅಬ್ರಾಮ್‌ನ, "ತೂ ಛಾ಼ತೆ ಝ಼ಗೋಥು ಚಾರ್‌ ಬಾಜು಼ಬಿ ಡೋಳಪಾಡಿನ್‌ ದೇಕ್‌. 15 ತೂ ದೇಖುಕರಾತೆ ಆ ದೇಖ್ಹ್‌ ಖ್ಹಾರುಸ್ ತುನಾಬಿ ತಾರಿ ಪಿಳ್ಗಿಬಿ ಹಮೇಶನಖ್ಹಾಜೆ ದೆವುಸ್‌. 16 ತಾರಿ ಪಿಳ್ಗಿವಾಳನ ಧರ್ತಿನ ಧೂಳ್‌ನಿತರ ಗಣ್ತಿಕೊಂತೆ ಕರುಸ್. ಧರ್ತಿಪರ್ ಛಾ಼ತೆ ಧೂಳ್‌ನ ಗಣ್ತಿಕರಾನ ಹುಯುತೊ ತಾರಿ ಪಿಳ್ಗಿನ ಗಣೇಜಾ಼ಯ್‌. 17 ತೂ ಉಠೀನ್ ಆ ದೇಖ್ಹ್‌ನು ಖ್ಹಾರೀಸ್‍ ಬಾಜೂ಼ಬಿ ಗಖ್ಹತ್‌ಮಾರ್‌; ಯೊ ತುನ ದಿಶ್" ಕರಿಬೋಲ್ಯೊ. 18 ಹಿಜ಼್ಜಾಥೊ ನಿಕ್ಳಿನ್ ಅಬ್ರಾಮ್‌ ಡೇರೊ ಉಖ್ಡಿಲೀನ್ ಹೆಬ್ರೋನ್‌ಮ ಛಾ಼ತೆ ಮಮ್ರೆನು ಪರಿಶುದ್ದ ‘ಮೋರೆ’ಕರಿ ಝಾ಼ಡಕನ ಐನ್ ಹಿಜ್ಜಾ಼ಸ್ ಜಿವ್ಣುಕರಿನ್, ಯೆಹೋವ ದೇವ್ನ ಚಾ಼ಚ಼ರ್‌ ಭಂದಾಯೊ.