1 ಹೈರುತೆ ಎದೋಮ್ ಕರಿ ಏಸಾವನಿ ಖಾನ್‌ದಾನ್‌; 2 ಏಸಾವ ಕಾನಾನ್ಯವಾಳನಿ ತಯೇಡಾವ್‌ನ ವ್ಯಾಹ ಕರಿಲಿದೊ. ಇವ್ಣೆ ಕೋಣ್‌ಕತೊ , ಹಿತ್ತಿಯವಾಳೊ ಏಲೋನನಿ ಛೋ಼ರಿ ಆದಾ, ಹಿವ್ವಿಯವಾಳೊ ಸಿಬಿಯೋನ್ನಿ ನಾತ್‌ಣಿ ಹುಯಿರ‍್ಹಿತೆ ಅನಾಹನಿ ಛೋ಼ರಿ ಒಹೊಲೀಬಾಮ, 3 ಅಜು಼ ಇಷ್ಮಾಯೇಲ್‌ನಿ ಛೋ಼ರಿ ನೆಬಾಯೋತ್‌ನಿ ಭೇನ್‌ ಹುಯಿರ‍್ಹಿತೆ ಬಾಸೆಮತನ ವ್ಯಾಹ ಕರಿರಾಖ್ಯೋಥೊ. 4 ಆದಾನೆ ಏಸಾವಮ ಎಲೀಫಜನ ಜ಼ಣಿ. ಬಾಸೆಮತನೆ ರೆಗೂವೇಲನ ಜ಼ಣಿ. 5 ಒಹೊಲೀಬಾಮನೆ ಯೆಗೂಷನ, ಯಳಾಮನಾಬಿ, ಅಜು಼ ಕೋರಹನ ಜ಼ಣಿ. ಕಾನಾನ್ ದೇಖ್ಹ್‌ಮ ಏಸಾವನ ಪೈದಹುಯಾತೆ ಲಡ್ಕ ಅವ್ಣೇಸ್. 6 ಇನಾಪಾರ್ ಏಸಾವನೆ ಇನಿ ಬಾವ್ಣೆನಾಬಿ,ಪರ್ಖ್ಹೋ ತಯೇಡ ಲಡ್ಕಾವ್‍ನಾಬಿ, ಇನ ಘರ್ನ ಮಳ್ಯುಹುಯು ಆಳ್‌ಖ್ಹಾರನಾಬಿ, ಇನ ಥೂತೆ ಜಾನ್ವರ್‌ನ ಮಂಧಾವ್‌ನಾಬಿ ಢಾಂಡು ಬೋಕ್ಡು, ಕಾನಾನ್ ದೇಖ್ಹ್‌ಮ ಕಮಾಯೋತೆ ಶೊತ್‌ ಖ್ಹಾರೂಬಿ ಲೀನ್ ಇನೊ ನ್ಹಾನೊಭೈ ಯಾಕೋಬಕಂಥೊ ಅಲಕ್ ದೇಖ್ಹ್‌ನ ಚ಼ಲೇಗಯೊ. 7 ಇವ್ಣಿ ಶೊತ್ ಜಾ಼ಖ್ಹತ್‌ಹುಯಿಗುತೆ ಇನಾಖ್ಹಾಜೆ ಇವ್ಣೆ ಭೇಜ಼ಣಾಬಿ ಎಕ್ಕಸ್ ಝಗೊ ರ‍್ಹಾವಾನ ಹುಯುಕೊಯ್ನಿ. ಇವ್ಣುನ ಜಾನ್ವರ್‌ ಅಖ್ಖು ಘಣುಥೂತೆ ಇನಾಖ್ಹಾಜೆ ಇವ್ಣೆಥೂತೆ ದೇಖ್ಹ್‌ ಇವ್ಣುನ ಬಶ್‌ಕೋಹುಯುನಿ. 8 ಅಮ್ ಏಸಾವನೆ ಸೇಯೀರ್ ಪಹಾಡ್‌ನೊ ತಬರ್‌ಖಾನ ಜೈ಼ನ್ ಹಿಜ್ಜಾ಼ಸ್‌ ಜಿವ್ಣು ಕರ‍್ಯೊ. ಏಸಾವಕತೊ ಎದೋಮಕರಿ. 9 ಸೇಯೀರ್ ಪಹಾಡ್‌ನ ತಬರ್‌ಖಾಮ ಥೂತೆ ಎದೋಮ್ಯವಾಳನ ಶುರುವಾತ್ನೊ ಪರ್ಖ್ಹೊ ಏಸಾವನು ಖಾನ್‌ದಾನ್ನಿ ಖೇಣಿ; 10 ಏಸಾವನ ಲಡ್ಕಾವ್ನು ನಾಮ್ ಶಾತ್‌ಕತೊ; ಏಸಾವನಿ ಬಾವಣ್ ಆದಾನೊ ಛಿಯ್ಯೊ ಎಲೀಫಜ. ರೆಗೂವೇಲ, ಏಸಾವನಿ ಬಾವಣ್ ಬಾಸೆಮತನೊ ಛಿಯ್ಯೊ. 11 ಎಲೀಫಜನ ಲಡ್ಕ ಕೋಣ್‌ಕತೊ; ತೇಮಾನ್, ಓಮಾರ್, ಚೆಪೋ, ಗತಾಮ್, ಕೆನೆಜ್, 12 ಏಸಾವನೊಛಿಯ್ಯೊ ಎಲೀಫಜನ ತಿಮ್ನಕರಿ ರಖೇಲ್‌ ಬಾವಣ್‌ಥಿ. ಅನೆ ಎಲೀಫಜಥಿ ಅಮಾಲೇಕನ ಜ಼ಣಿ. ಅವ್ಣೇಸ್ ಏಸಾವನಿ ಬಾವಣ್ ಆದಾನಿ ಖಾನ್‌ದಾನ್‌ ಹುಯಿರುಸ್. 13 ರೆಗೂವೇಲನ ಲಡ್ಕ ಕೋಣ್‌ಕತೊ; ನಹತ್, ಜೆರಹ, ಶಮ್ಮಾ, ಮಿಜ್ಜಾ, ಅವ್ಣೆ ಏಸಾವನಿ ಬಾವಣ್ ಬಾಸೆಮತನ ಖಾನ್‌ದಾನ್‌ವಾಳು ಹುಯಿರ‍್ಹುಸ್. 14 ಏಸಾವನಿ ಬಾವಣ್ ಸಿಬಿಯೋನನೊ ಛಿಯ್ಯೊ ಹುಯಿರೋತೆ ಅನಾಹನಿ ಛೋ಼ರಿ ಒಹೊಲೀಬಾಮನ ಲಡ್ಕ ಕೋಣ್‌ಕತೊ; ಯೆಗೂಷ್, ಯಳಾಮ್ ಅಜು಼ ಕೋರಹ,ಕರಿ ತೀನ್ ಜ಼ಣ ಲಡ್ಕಾಥ. 15 ಏಸಾವನು ಖಾನ್‌ದಾನ್ನು ಖೂಮ್‌ನ ಘಲ್ಡಾ ಕೋಣ್‌ಕತೊ; ಏಸಾವನೊ ಫೈಲೋಟೊ ಛಿಯ್ಯೊ ಎಲೀಫಜಥಿ ತೇಮಾನ, ಓಮಾರ್, ಚೆಪೋ, ಕೆನೆಜ್, 16 ಕೋರಹ, ಗತಾಮ್, ಅಮಾಲೇಕ್,ಕರಿ ಖೂಮ್‌ನ ಫೈದಹುಯ. ಆ ಗಲ್ಢಾ ಎದೋಮ್ಯವಾಳನ ಮುಲಕ್‌ಮಥಾತೆ ಎಲೀಫಜಥಿ ಆಯಹುಯ ಆದಾನಿ ಪಿಳ್ಗಿಮ ಪೈದಹುಯ. 17 ಏಸಾವನೊ ಛಿಯ್ಯೊ ರೆಗೂವೇಲನ, ನಹತ್, ಜೆರಹ, ಶಮ್ಮಾ, ಮಿಜ್ಜಾಕರಿ ಖೂಮ್‌ನ ಗಲ್ಢಾ ಪೈದಹುಯ. ಅವ್ಣೆ ಎದೋಮ್ಯವಾಳನ ಮುಲಕ್‌ಮ ಏಸಾವನಿ ಬಾವಣ್ ಬಾಸೆಮತನಿ ಪಿಳ್ಗಿಮ ಪೈದಹುಯ. 18 ಏಸಾವನಿ ಬಾವಣ್‍ ಒಹೊಲೀಬಾಮನಿ ಪಿಳ್ಗಿಮ ಪೈದಹುಯಾತೆ ಖೂಮ್‌ನ ಗಲ್ಢಾ ಕೋಣ್‌ಕತೊ: ಯೆಗೂಷ್, ಯಳಾಮ, ಅಜು಼ ಕೋರಹ, ಅವ್ಣೇಸ್ ಅನಾಹನಿ ಛೋ಼ರಿಬಿ ಏಸಾವನಿ ಬಾವಣ್‌ಬಿ ಹುಯಿರೀತೆ ಒಹೊಲೀಬಾಮನಿ ಪಿಳ್ಗಿವಾಳು. 19 ಎದೋಮ್ ಕರಿ ಬೋಲೈಲ್ಯಾವಾಳೊ ಏಸಾವಥಿ ಪೈದಹುಯುತೆ ಖೂಮ್ನ ಗಲ್ಢಾ ಅವ್ಣೇಸ್.

20 ಯೊ ತಬರ್‌ಖಾನು ಜ಼ಮಾನೇಥು ಜಿವ್ಣುಕರವಾಳು ಹೋರಿಯವಾಳೊ ಸೇಯೀರ್‌ಥಿ ಪೈದಹುಯುತೆ ಕೋಣ್‌ಕತೊ ಲೋಟಾನ್, ಶೋಬಾಲ್, ಸಿಬೆಯೋನ್, ಅನಾಹ, 21 ದೀಶೋನ್‌, ಏಚೆರ್, ದೀಶಾನ್, ಇವ್ಣೆ ಎದೋಮ್ಯವಾಳನ ದೇಖ್ಹ್‌ಮ ಸೇಯೀರನಿ ಪಿಳ್ಗಿವಾಳು ಹೋರಿಯವಾಳಮ ಪೈದಹುಯಾತೆ ಖೂಮ್‌ನ ಗಲ್ಢಾ. 22 ಲೋಟಾನನ ಹೋರಿ, ಹೇಮಾಮ್ ಕರಿ ಛಿಯ್ಯಥಾ, ಇನ ತಿಮ್ನಕರಿ ಭೇನ್‌ಬಿ ಥಿ. 23 ಶೋಬಾಲನ ಲಡ್ಕಾವ್‌ಕತೊ; ಅಲ್ವಾನ್, ಮಾನಹತ್, ಗೇಬಾಲ್, ಶೆಪೋ ಅಜು಼ ಓನಾಮ್. 24 ಸಿಬೆಯೋನನ ಲಡ್ಕಾವ್‌ಕತೊ; ಅಯ್ಯಾ ಅಜು಼ ಅನಾಹ ಕರಿ ಬೇಜ಼ಣ ಲಡ್ಕ. ಆ ಅನಾಹಸ್ ಇನೊ ಬಾ ಸಿಬೆಯೋನ ಗಧೇಡ ಚ಼ರಾವಾನಿ ವಖ್ಹ್‌ತೆ ಝಾ಼ಡಿಮ ಗರಮ್ ಪಾಣಿನು ಚೇಜ಼್‌ಭಾರಾವ್‌ನ ದೇಖಿನ್ ಮಾಲುಮ್ ಕರ‍್ಯೋಹುಯೊ. 25 ಅನಾಹನ ಲಡ್ಕ ಕೋಣ್‌ಕತೊ ದೀಶೋನ್‌ ಅಜು಼ ಅನಾಹನಿ ಛೋ಼ರಿ ಒಹೊಲೀಬಾಮ. 26 ದೀಶೋನನ ಲಡ್ಕಾವ್ ಕೋಣ್‌ಕತೊ; ಹೆಮ್ಡಾನ್, ಎಷ್ಬಾನ್, ಇತ್ರಾನ್, ಕೆರಾನ್, 27 ಏಚೆರನ ಲಡ್ಕಕತೊ; ಬಿಲ್ಹಾನ್, ಜಾವಾನ್, ಅಕಾನ್. 28 ದೀಶಾನನ ಲಡ್ಕಾವ್ ಕೋಣ್‌ಕತೊ; ಊಚ್ ಅಜು಼ ಅರಾನ್. 29 ಹೋರಿಯ ವಾಳೇಥಿ ಪೈದ ಹುಯಾತೆ ಖೂಮ್‌ನ ಗಲ್ಢಾ; ಲೋಟಾನಾ, ಶೋಬಾಲ್, ಸಿಬೆಯೋನ್, ಅನಾಹ. 30 ದೀಶೋನ್, ಏಚೆರ್, ದೀಶಾನ್, ಅವ್ಣೇಸ್ ಹೋರಿಯಥಿ ಪೈದಹುಯಿನ್‌ ಸೇಯೀರ್ ತಬರ್‌ಖಾಮ ರಾಜ಼್ ಚ಼ಲಾಯಾತೆ ಖೂಮ್‌ನ ಗಲ್ಢಾ.

31 ಇಸ್ರಾಯೇಲ್‌ವಾಳನು ರಾಜ಼ವ್ ರಾಜ಼್‌ಚ಼ಲಾವನ ಅಗಾಡಿ ಎದೋಮ್ಯವಾಳನ ದೇಖ್ಹ್‌ಮ ರಾಜ್ ಚ಼ಲವ್‌ಕರ್ತುಥೂತೆ ರಾಜವ್‌ನು ನಾಮ್‌ಅಖ್ಖು; 32 ಬೆಯೋರನೊ ಛಿಯ್ಯೊ ಬೇಲಗನೆ ಎದೋಮ್ಯವಾಳಪರ್ ರಾಜ಼್ಚ಼ಲಾಯೊ. ಇನ ಖ್ಹಯೇರ್‌ನು ನಾಮ್ ದಿನ್ಹಾಬಾ. 33 ಬೇಲಗ ಮರಿಗೊ ತದೆ ಬೊಚ್ರವಾಳೊ ಜೆರಹನೊ ಛಿಯ್ಯೊ ಯೋಬಾಬ ಯೂಫ್ರೇಟೀಸ್. 34 ಯೋಬಾಬ ಮರಾದೀನ್ ತೇಮಾನೀವಾಳನೊ ಹುಷಾಮನೆ ಇನ ಬದಲ್ ರಾಜ಼್ಚ಼ಲಾಯೊ. 35 ಹುಷಾಮ ಮರಿಜಾ಼ವಾದೀನ್ ಮೋವಾಬ್ಯವಾಳನ ಬಲ್ಡಾಮ ಮಿದ್ಯಾನ್‌ವಾಳನ ಹರಾಯೋತೆ ಬೆದದನೊ ಛಿಯ್ಯೊ ಹದದನೆ ರಾಜ಼ ಬಣ್ಯೊ ಇನು ರಾಜಧಾನಿನು ನಾಮ್ ಅವೀತ್. 36 ಹದದ ಮರಾದಿನ್ ಮಸ್ರೇಕವಾಳೊ ಸಮ್ಲಾಹನೆ ರಾಜ಼ಹುಯೊ. 37 ಸಮ್ಲಾಹ ಮರಾದಿನ್ ನದ್ದಿನು ಕನಾರಿಮ ಥೂತೆ ರೆಹೋಬೋತೂರ್‌ ಖ್ಹಯೇರ್‌ನೊ ಸೌಲ ರಾಜ಼ಹುಯೊ. 38 ಸೌಲ ಮರಾದಿನ್ ಅಕ್ಬೋರನೊ ಛಿಯ್ಯೊ ಬಾಳ್ಹಾನಾನೆ ರಾಜ಼ಹುಯೊ. 39 ಅಕ್ಬೋರನೊ ಛಿಯ್ಯೊ ಬಾಳ್ಹಾನಾನ ಮರಾದಿನ್ ಹದದ ರಾಜ಼ಹುಯೊ. ಇನು ರಾಜಧಾನಿನು ನಾಮ್ ಪಾಗು. ಇನಿ ಬಾವಣ್ಣು ನಾಮ್ ಮಹೇಟಬೇಲ್; ಯೊ ಮೇಜಾಹಾಬನಿ ಛೋ಼ರಿಹುಯಿರೀತೆ ಮಟ್ರೇದನಿ ಛೋ಼ರಿ. 40 ಝ಼ಗೊ, ಜಾತ್‌ನಿ, ನಾಮ್ನ ಪರಕ್ಮ ಏಸಾವಥಿ ಪೈದಹುಯಾತೆ ಖೂಮ್‌ನ ಮೋಟಾವ್ನು ನಾಮ್ ಶಾತ್‌ಕತೊ; ತಿಮ್ನ, ಅಲ್ವಾ, ಯೆತೇತ, 41 ಒಹೋಲಿಬಾಮ, ಏಲಾ, ಪೀನೋನ್, 42 ಕೆನೆಜ್, ತೇಮಾನ್, ಮಿಪ್ಚಾರ್, 43 ಮಗ್ದೀಯೇಲ್, ಗೀರಾಮ್, ಅವ್ಣೇಸ್ ಇವ್ಣ ದೇಖ್ಹ್‌ನು ಜಿವ್ಣು ಕರಾನಿ ಝ಼ಗೋನ ಪರಕ್ಮ ಎದೋಮ್ಯವಾಳನ ಖೂಮ್ನ ಗಲ್ಢಾ. ಆಸ್ ಎದೋಮ್ಯವಾಳನೊ ಶುರುವಾತ್ನೊ ಪರ್ಖ್ಹೊ ಏಸಾವ.