ಆದಿಕಾಂಡ 35

ಬೇತೇಲ್‍ಮ ದೇವ್‌ನೆ ಯಾಕೋಬನ ಆಶೀರ್ವಾದ್‌ ಕರ‍್ಯೋತೆ

1 ದೇವ್‌ನೆ ಯಾಕೋಬನ, "ತೂ ಬೇತೇಲ್‌ನ ಜೈ಼ನ್ ಹಿಜ್ಜಾ಼ ಜಿವ್ಣು ಕರ್‌. ತೂ ತಾರೊ ಮೋಟೊ ಭೈ ಏಸಾವಕಂಥೊ ನಾಶಿಗಯೋತೆ ಹಗಾಮ್ಮ ದೇವ್ ತುನ ಹಿಜ್ಜಾ಼ ದರ್ಶನ್‌ದಿದೋನಿ, ಇನಾಖ್ಹಾಜೆ ತೂ ಚಾ಼ಚ಼ರ್‌ನ ಭಂದಾವ್‌" ಕರಿ ಬೊಲ್ಯೊ. 2 ತದೆ ಯಾಕೋಬನೆ ಇನ ಘರ್‌ವಾಳನಾಬಿ ಇನಿ ಜೋ಼ಡ್ಮ ರ‍್ಹಾವಾಳ ಖ್ಹಾರಾಸ್‌ನಾಬಿ "ತುಮಾರಕನ ಛಾತೆ ಅಲಕ್ ದೇವ್ನ ಕಾಡಿಫೇಕಿನ್‌ ತುಮುನ ಶುದ್ದ ಕರಿಲೀನ್, ಕೋರುಲುಂಗ್ಡು ಫೇರಿಲೆವೊ, 3 ಅಪ್ಣೆ ಹಜ್ಜಾ಼ಥ ಬೇತೇಲ್‌ನ ಜೈ಼ಯೇ. ವದೇಖ್ಹ್‌ನ ದನ್ಮ ಮಾರಿ ಬಿಂತಿನ ಖ್ಹಮ್‌ಜಿನ್ ಮೇ ಜ಼ವುತೆ ಮಾರಗ್‌ಪರ್ ಮಾರಿ ಜೋ಼ಡ್ಮ ಥೂತೆ ದೇವ್ನ ಹಿಜ್ಜಾ಼ ಚಾ಼ಚ಼ರ್‌ನ ಭಂದಾವುಸ್". ಕರಿ ಬೊಲ್ಯೊ. 4 ತದೆ ಇವ್ಣೆ ಇವ್ಣಕನಥೂತೆ ಅಖ್ಖುಸ್ ಅಲಕ್ ದೇವ್‍ನಾಬಿ, ಇವ್ಣ ಕಾನ್‌ಮಾನು ಕಾಪ್‌ಖ್ಹಾರು ಯಾಕೋಬನ ದಿದು. ಇನೆ ಯೊ ಅಖ್ಖುಸ್ ಶೆಕೆಮ್‌ ಖ್ಹಯೇರ್‌ನ ಖನ್ನೇನು ಏಲಾ ಝಾ಼ಢ್‌ನ ಹೇಟ್ ಖೋಂದಿ ಘಾಲ್ಯೊ. 5 ಇನಪಾರ್ ಇವ್ಣೆ ಚಾ಼ಲ್ತ ಜಾ಼ವಾನಿ ವಖ್ಹ್‌ತೆ, ಅಶ್‌ಪಿಶ್‌ನು ಖ್ಹಯೇರ್‌ಮ ದೇವ್‌ನೊ ಡರ್‌ಥೂತೆ ಇನಖ್ಹಾಜೆ ಇವ್ಣೆ ಯಾಕೋಬನ ಛಿಯ್ಯಾವ್‍ನ ರಪೇಟಿನ್‌ ಆಯುಕೊಯ್ನಿ. 6 ಅಮ್ ಯಾಕೋಬಬಿ ಇನಿ ಜೋ಼ಡ್ಮ ಥೂತೆ ಅದ್ಮಿಖ್ಹಾರು ಕಾನಾನ್ ದೇಖ್ಹ್‌ಮಾನು ಬೇತೇಲ್‌ ಗಾಮ್‌ನು ಲೂಜ಼್‌ನ ಆಯು. 7 ಯೊ ಇನ ಮೋಟ ಭೈಕಂಥೊ ನಾಶಿಜಾ಼ವನಿ ವಖ್ಹ್‌ತೆ ದೇವ್‌ ಇನ ದೆಖಾಯೋ. ಇನಖ್ಹಾಜೆ ಇನೆ ಹಿಜ್ಜಾ಼ ಚಾ಼ಚ಼ರ್‌ ಭಂದೈನ್ ಯೊ ಝ಼ಗೋನ *35:7 ಬೇತೇಲ್‌ನೊ ದೇವ್‌ ಕರಿ ಮತ್ಲಬ್‌‘ಏಲ್‌ ಬೇತೇಲ್‌’ ಕರಿ ನಾಮ್‌ಮ್ಹೇಲ್ಯೊ. 8 ಹಿಜ಼್ಜ ರೆಬೆಕ್ಕನಿ ದಾಸಿ ದೆಬೋರ ಮರಿಜಾ಼ತಾನ, ಇನ ಬೇತೇಲ್‌ನು ಝ಼ರೂಕೊಮಾನು ಏಲಾ ಝಾ಼ಡ್‌ನು ಬಡ್ಡೇಕನ ಮಖ್ಹಾಣ್ಯುಕರ‍್ಯು. ಯೊ ಝ಼ಗೋನ *35:8 ರೋವಾನು ಝಾ಼ಡು ಕರಿ ಮತ್ಲಬ್‌"ಅಲ್ಲೋನ್ ಬಾಕೂತ್" ಕರಿ ನಾಮ್‌ಮ್ಹೇಲ್ಯು.

9 ಯಾಕೋಬ ಪದ್ದನ್‌ ಅರಾಮ್‌ನ ಆವನಿ ವಖ್ಹ್‌ತೆ ದೇವ್‌ನೆ ಪಾಛೋ಼ ದರ್ಶನ ದೀನ್ ಇನ ಆಶೀರ್ವಾದ್‌ ಕರ‍್ಯೊ. 10 ದೇವ್‌ನೆ ಇನ, "ತುನ ಹಮ್ಕೆ ಯಾಕೋಬ ಕರಿ ನಾಮ್‌ ಛಾ಼. ಅನಪಾರ್ ತೂ ಯಾಕೋಬ ಕರಿ ಬೋಲೈಲೀಶ್‌ ಕೊಯ್ನಿ "ಇಸ್ರಾಯೇಲ್" ಕರಿ ಪುಕಾರೈಲೀಶ್ ಕರಿ ಬೊಲ್ಯೊ. ಅಮ್ ಇನ ಇಸ್ರಾಯೇಲ್‌ಕರಿ ನಾಮ್ ಮ್ಹೇಲ್ಯೊ. 11 ಆನಾಹುಯಿನ್‌ ಯೆಹೋವ ದೇವ್ ಇನ, ಮೇಸ್ ಸರ್ವಶಕ್ತ ಹುಯಿರೋತೆ ದೇವ್, ತೂ ಜಾ಼ಖ್ಹತ್ ಪಿಳ್ಗಿವಾಳೊ ಹುಯಿನ್‌ ಭಡೀಶ್, ತಾರೇಥಿ ದೇಖ್ಹ್‌ಬಿ, ಜ಼ಗ್‌ಜಾ಼ತ್‌ನು ಟೋಳ್‌ ಖ್ಹಾರು ಉಶೆ. ಅಜು಼ ರಾಜ಼ವ್‌ಖ್ಹಾರು ತಾರೇಥಿ ಪೈದ ಉಶೆ. 12 ಮೇ ಅಬ್ರಹಾಮ್ ಅಜು಼ ಇಸಾಕ್‌ನ ದೇಖ್ಹ್‌ನ ತುನಾಬಿ ಇನಕೇಡೆಥು ತಾರಿ ಪಿಳ್ಗಿನಾಬಿ ದೀಶ್" ಕರಿ ಬೊಲ್ಯೊ. 13 ಇನಪಾರ್ ದೇವ್ ಇನಿ ಜೋ಼ಡ್ಮ ವಾತ್ ಬೋಲ್ಯೋತೆ ಝ಼ಗೋಥು ಉಪ್ಪರ್‌ ಚ಼ಲೆಗಯೊ. 14 ಯಾಕೋಬನೆ ಇನಿ ಜೋ಼ಡ್ಮ ದೇವ್ ವಾತ್ ಬೋಲ್ಯೋತೆ ಝ಼ಗೋಮ ಬಂಡಾನು ಖಂಬು ಭೀರಾಖಿನ್ ಇನಾಪರ್ ದ್ರಾಕ್ಷಿನೊ ರಖ್ಹ್‌ ನಾಖಿನ್ ತೇಲ್ನ ರಂಚಿನ್ ಪಾಕ್‌ಕರ‍್ಯೊ. 15 ಯಾಕೋಬನೆ ಇನಿ ಜೋ಼ಡ್ಮ ದೇವ್ ವಾತ್ ಬೋಲ್ಯೋತೆ ಝ಼ಗೋನ *35:15 ಬೇತೇಲ್‌ಕತೊ ದೇವ್ನು ಘರ್‌ಕರಿ ಮತ್ಲಬ್‘ಬೇತೇಲ್‌’ ಕರಿ ನಾಮ್ ಮ್ಹೇಲ್ಯೊ.

ರಾಹೇಲ್‌ನಿ ಮರಣ್‌

16 ಇವ್ಣೆ ಬೇತೇಲ್‌ಥು ಜಾ಼ತುರ‍್ಹಾವಾನಿ ವಖ್ಹ್‌ತೆ ಎಫ್ರಾತ್‌ನ ಪೋಚಾ಼ನ ಬಿಜು಼ ದರಾಶಿ ದೂರ್ ರ‍್ಹಾವಾನಿ ವಖ್ಹ್‌ತೆ ರಾಹೇಲ್‌ನ ಪೈದಾಖ್ಹ್‌ನು ಘಣು ದರ್ದ್‌ಹುಯು. 17 ಯೊ ಜ಼ಣತ್‌ನಿ ಅಜಾ಼ಥಿ ಘಣು ಖ್ಹತಾಪ್ಣಿ ಪಡುಕರಾನಿ ವಖ್ಹ್‌ತೆ ಜ಼ಣಾವವಾಳಿನೆ ಇನ, "ಡರ್‌ನಕೊ ಬಿಜೇಕ್ ಪರ್‌ಖ್ಹೊಲಡ್ಕು ಪೈದಉಶೆ" ಕರಿ ಬೋಲಿ. 18 ಕತೋಬಿ ರಾಹೇಲ್ ಮರಿಗೈ. ಯೊ ಜಾನ್‌ಮ್ಹೆಲಾನಿ ವಖ್ಹ್‌ತೆ ಇನೆ ಯೊ ಲಡ್ಕಾನ, ‘ಬೆನೋನಿ’ ಕರಿ ನಾಮ್‌ಮ್ಹೇಲಿ. ಕತೋಬಿ ಯೊ ಲಡ್ಕಾನ ಬಾನೆ ಇನ, *35:18 ದುಖ್‌ನಿ ವೇಳ್‌ನು ಲಡ್ಕು ಕರಿ ಮತ್ಲಬ್‌"ಬೆನ್ಯಾಮೀನ್" ಕರಿ ನಾಮ್‌ಮ್ಹೇಲ್ಯೊ. 19 ರಾಹೇಲ್ ಮರಿಗೈ ತದೆ, ಎಫ್ರಾತ್‌ನ ಜಾ಼ವಾನ ಮಾರ್ಗೆ ಇನ ಮಖ್ಹಾಣ್ಯು ಕರ‍್ಯು. ಯೊ ಝ಼ಗೋನ ಹಮ್ಕೆ ಬೇತ್ಲೆಹೇಮ್‌ ಕರಿ ಬೋಲಸ್. 20 ಯಾಕೋಬನೆ ಇನ ಮಖ್ಹಾಣ್ಯಕನ ಖ್ಹಣೇದ್‍ನು ಖಂಬು ಭೀರಾಖ್ಯೊ. ಯೊ ಹಮ್ಕೆಲಗೂಬಿ "ರಾಹೇಲ್‌ನು ಮಖ್ಹಾಣ್ಯನು ಖಂಬು" ಕರೀಸ್ ಬೋಲೈರ‍್ಹುಸ್. 21 ಹಿಜ್ಜಾ಼ಥೊ ಇಸ್ರಾಯೇಲ್‌ನೆ ಚಾ಼ಲ್ತೊಹುಯಿನ್‌ ಮಿಗ್ದಲ್ ಏದರ್‌ನ ಗುಮಜ಼್‌ನ ಪಾರ್ಲಿ ಬಾಜೂ಼ಮ ಇನೊ ಡೇರೊ ಠೋಕಾಯೊ.

ಯಾಕೋಬನ ಛಿಯ್ಯಾ

22 ಇಸ್ರಾಯೇಲ್ ಯೊ ದೇಖ್ಹ್‌ಮ ಜಿವ್ಣುಕರಾನಿ ವಖ್ಹ್‌ತೆ ರೂಬೇನ್ನೆ ಇನ ಬಾನಿ ಬಾವ್ಣೆಮ ಎಕ್ ಬಾವಣ್ ಬಿಲ್ಹಕನ ಮಳ್ಯೊ. ಆ ವಾತೆ ಯಾಕೋಬನ ಖ್ಹಮಜ಼್‌ಪಡಿನ್ ಘಣು ಇರಾದೊ ಕರ‍್ಯೊ. ಯಾಕೋಬನ ಭಾರಜ಼ಣ ಛಿಯ್ಯಾಥ. 23 ಯಾಕೋಬನ ಲೇಯಮ ಪೈದ ಹುಯಾತೆ ಕೋಣ್‌ಕತೊ; ಯಾಕೋಬನೊ ಪೈಲ್ಹೋಟೊ ಛಿಯ್ಯೊ ರೂಬೇನ್ ಅಜು಼ ಸಿಮೆಯೋನ್‌, ಲೇವಿ, ಯೆಹೂದ, ಇಸ್ಸಾಕಾರ್, ಜೆಬುಲೂನ್. 24 ರಾಹೇಲ್‌ಮ ಪೈದಹುಯಾತೆ; ಯೋಸೇಫ ಅಜು಼ ಬೆನ್ಯಾಮೀನ್. 25 ರಾಹೇಲ್‌ನಿ ದಾಸಿ ಬಿಲ್ಹಮ ಪೈದಹುಯಾತೆ; ದಾನ್‌, ನಫ್ತಾಲಿ, 26 ಲೇಯನಿ ದಾಸಿ ಜಿಲ್ಪಮ ಪೈದಹುಯಾತೆ; ಗಾದ್, ಅಶೇರ್, ಪದ್ದನ್‌ ಅರಾಮ್ಮ ಯಾಕೋಬನ ಪೈದಹುಯಾತೆ ಲಡ್ಕಾವ್ ಅವ್ಣೇಸ್.

ಇಸಾಕ್‌ನಿ ಮರಣ್‌

27 ಯಾಕೋಬ ಇನೊ ಬಾ ಇಸಾಕ್‍ಕನ ಮಮ್ರೆನ ಆಯೊ. ಮಮ್ರೆಗಾಮ್ ಹೆಬ್ರೋನ್‌ ಕರಿ ಕಿರ್ಯತರ್ಬನ ಮಳ್ಯುಹುಯು. ಯೊ ಅಬ್ರಹಾಮ್ ಇಸಾಕ್ ಪರ್‌ದೇಖ್ಹ್‌ವಾಳ ಹುಯಿನ್‌ ಜಿವ್ಣು ಕರ‍್ಯುಹುಯಿ ಝ಼ಗೊ. 28 ಇಸಾಕ್ ಏಕ್‌ಖ್ಹೊ ಚಾರೀಖ್ಹ್ ವರಖ್ಹ್‌ ಬಚಿರ‍್ಹಿನ್ ಮರ‍್ಯೊ. 29 ಇಸಾಕನ ಛಿಯ್ಯಾ ಏಸಾವ ಅಜು಼ ಯಾಕೋಬನೆ ಇನ ಮಖ್ಹಾಣ್ಯು ಕರ‍್ಯ.