1 ಆದಾಮ್ ಇನಿ ಬಾವಣ್‍ ಹವ್ವನ ಮಳ್‌ವಾಮ ಯೊ ಬೇಜೂನಿಹುಯಿನ್ ಛಿಯ್ಯಾನ ಜ಼ಣೀನ್, "ಮೇ ಯೆಹೋವನ ಮದತ್‌ಥಿ ಕಾಯಿನನ ಜ಼ಣಿಲಿದಿ" ಕರಿಬೋಲಿ. 2 ಇನಕೇಡೆಥು ಹವ್ವ ಹೇಬೆಲಕರಿ ಬಿಜೇಕ್ ಜ಼ಣಾನ ಜ಼ಣಿ. ಹೇಬೆಲ ಮೇಂಢಾನ ಕಾವಲ್ ಕರಾವಳೊ ಬಣ್ಯೊ. ಕಾಯಿನ ನಾಗ್ರವಾಳೊ ಬಣ್ಯೊ. 3 ಥೋಡದನ್ನ ಬಾದ್‌ಮ ಕಾಯಿನನೆ ಖೆತರ್‌ನು ಪಿಕಾವ್ಣಿಮ ಥೋಡು ಲಯಿನ್ ಯೆಹೋವಕನ ಕಾಣ್ಕೆ ಲಾಯೊ. 4 ಹೇಬೆಲಬಿ ಇಮ್ಮಸ್ ಇನ ಮಂಧಾಮಾಥು ಫೈಲೊಟು ಮೇಂಢಾವ್ನ ಲಯಿನ್ ರ‍್ಹೇಶಿನ್ ಇನ ಮತ್ತಾ ಭಾಗ್ನ ಢಪ್ಕಾರ ದಿದೊ, ಯೆಹೋವನೆ ಹೇಬೆಲನಾಬಿ ಇನಿ ಕಾಣ್ಕೆನಾಬಿ ಪಸಂದ್‌ ಕರ‍್ಯೊ. 5 ಕತೋಬಿ ಕಾಯಿನನಾಬಿ ಇನಿ ಕಾಣ್ಕೆನಾಬಿ ಪಸಂದ್‌ ಕರ‍್ಯೊಕೊಯ್ನಿ. ಇನಖ್ಹಾಜೆ ಕಾಯಿನನೆ ಜಾ಼ಖ್ಹತ್ ಇರಾದೊಕರ‍್ಯೊ. ಇನು ಮ್ಹೋಡು ಇರಾದೇಥಿ ಲಾಲ್‌ಹುಯಿನ್‌ ಕಂಬ್‌ಲೈಗಯು. 6 ತದೆ ಯೆಹೋವನೆ ಕಾಯಿನನ, "ತೂ ಇರಾದೊ ಕರ‍್ಯೊತೆ ಶನ? ತಾರು ಮ್ಹೋಡು ಕಂಬ್‌ಲೈಗೂತೆ ಶನ? 7 ತೂ ಅಛ್ಛು಼ಕಾಮ್‌ ಕರ‍್ಯೊಹೊತ್ತೊ ತಾರು ಮುಡ್‌ಕ್ಯು ಉಪ್ಪರ್ ಪಡಾಯುಹೊತ್. ಪಾಪ್ ತುನ ಇನ ಕಬ್‌ಜಾ಼ಮ ರಾಖನ ಕರುಕರಸ್. ಕತೋಬಿ ತೂ ಇನ ಕಬ್‌ಜಾ಼ಮ ರಾಕ್ಣು" ಕರಿಬೋಲ್ಯೊ. 8 ಇನಕೇಡೆಥು ಕಾಯಿನನೆ ಇನೊ ನ್ಹಾನೊಭೈ ಹೇಬೆಲನ, "ಆವ್ ಅಪ್ಣೆ ಖೇತ್ರೆ ಜಿಯೆ" ಕರಿ ಬುಲಾಯೊ. ಖೇತ್ರೆ ಆವಖ್ಹತರ್‌ ಕಾಯಿನನೆ ಇನ ಭೈಪರ್‌ ಪಡೀನ್ ಇನ ಮಾರಿನಾಖ್ಯೊ. 9 ಯೆಹೋವನೆ ಕಾಯಿನನ, "ತಾರೊ ನ್ಹಾನೊಭೈ ಹೇಬೆಲ ಕ್ಯಾ?" ಕರಿ ಬೋಲಖ್ಹತರ್‌ ಇನೆ, "ಮನ ಮಾಲುಮ್‌ಕೊಯ್ನಿ, ಮಾರ ನ್ಹಾನಭೈನ ಕಾವಲ್ ಕರಾವಾಳೊ ಮೇ‍ಕಿಶು? ಕರಿ ಜ಼ವಾಬ್‌ದಿದೊ. 10 ಇನ ಯೆಹೋವನೆ, "ತೂ ಶಾತ್ ಕರ‍್ಯೊತೆ? ತಾರ ನ್ಹಾನಭೈನು ಲ್ಹೋಯಿ ರದನ್‌ಕರಿನ್‌ ಜ಼ಮೀನ್‌ಥು ಮನ ಫುಕಾರುಕರಸ್‌. 11 ಹಮ್ಕೆ ತೂ ತಾರ ಹಾತೆಥಿ ರಂಚ್ಯೋತೆ ತಾರ ನ್ಹಾನಭೈನು ಲ್ಹೋಯಿನ ಪೀದುತೆ ಆ ಜ಼ಮೀನ್‌ಥಿ ಹಮ್ಕೆ ತಾರಪರ್‌ ಶಾಪ್ ಆಯು. 12 ತೂ ಧರ್ತಿನ ನಾಗ್‍ರ್ಯೊತೋಬಿ. ಯೊ ಅನಪಾರ್ ತುನ ಫಲ್‍ಕೋದಿಶೆನಿ, ತೂ ಧರ್ತಿಪರ್ ಘರ್‌ಕೊಂತೆ ಡುಂಡ್ವವವಾಳೊ ದ್ರೋಹಿಹುಯಿರಿಶ್" ಕರಿ ಬೊಲ್ಯೊ. 13 ತದೆ ಕಾಯಿನನೆ ಯೆಹೋವನ, "ಆ ನಿಶತ್‌ನು ಫಲ್ ನಾ ಖ್ಹಮಾಳಯೆತ್ರು ಹುಯಿರ‍್ಹುಸ್. 14 ಹಂದೇಕ್‌, ತೂ ಆ ಜ಼ಮಿನ್‌ಥು ಅಜು ತಾರಿ ಸನ್ನಿಧಿಕಂಥು ಮನ ನಖ್ಹಾಡಿದಿದೊನಿ! ಮೇ ಧರ್ತಿಮ ಘರ್‌ಕೊಂತೆ ವನ್‍ವನ್‍ತೊಫಂಡಾನು ಉಷೆ. ಅಜು಼ ಕೋಣ್‌ತೊಬಿ ಮನ ದೇಖವಾಳು ಮಾರಿನಾಕ್‌ಶೆ" ಕರಿ ಬೊಲ್ಯೊ. 15 ಕತೋಬಿ ಯೆಹೋವನೆ, "ಕೋಣ್‌ತೋಬಿ ತಾರ ಜಾನ್ನ ಕಾಡವಾಳಾನ ಖ್ಹಾತ್‍ಪಟ್ ಎತ್ರು ನಿಶತ್‍ಉಶೆ" ಕರಿ ಬೊಲ್ಯೊ. ಕಾಯಿನನ ದೇಖವಾಳುಖ್ಹಾರು ಮಾರಿನಾಕ್ಣುನಾತೆ ತಿಮ್ ಯೆಹೋವನೆ ಇನಾಪರ್ ಎಕ್ ಖ್ಹಣೇದ್ ಕರ‍್ಯೊ. 16 ತದೆ ಕಾಯಿನನೆ ಯೆಹೋವನ ಖ್ಹಾಮ್ಣೆ ಥೊ ನಿಕ್ಳಿನ್ ಏದೆನ್‍ನು ಪೂರಬ್ ದಿಕ್‍ಮಾಥು *‘ನೋ‍ದ್’ ಕರಿ ಮುಲಕ್‌ಮ ರ‍್ಹಯೊ.

17 ಕಾಯಿನ ಇನಿ ಬಾವಣ್ಣ ಮಳ್‌ವಾಮ ಯೊ ಬೇಜೂನಿ ಹುಯಿನ್ ಹನೋಕ್‌ನ ಜ಼ಣಿ. ಆ ನಾಹುಯಿನ್ ಕಾಯಿನನೆ ಏಕ್‌ ಗಾಮ್‌ಭಾಂದಿನ್ ಇನ ಹನೋಕ್‌ಕರಿ ಇನ ಛಿಯ್ಯಾನು ನಾಮ್ನಸ್ ಮ್ಹೇಲ್ಯೊ. 18 ಹನೋಕ್‌ಥಿ ಈರಾದ ಕರಿ ನಾಮ್ನೊ ಛಿಯ್ಯೊ ಪೈದಹುಯೊ. ಈರಾದಥಿ ಮೆಹೂಯಾಯೇಲ ಪೈದಹುಯೊ; ಮೆಹೂಯಾಯೇಲಥಿ ಮೆತೂಷಾಯೇಲ ಪೈದಹುಯೊ; ಮೆತೂಷಾಯೇಲನೆ ಲೆಮೆಕನ ಪೈದಕರ‍್ಯೊ. 19 ಲೆಮೆಕನೆ ಆದಾ, ಝಿಲ್ಲಾಕರಿ ಬೇಬಾವ್ಣೇನ ವ್ಯಹಾಕರಿಲಿದೊ. 20 ಆದಾನೆ ಯಾಬಾಲನ ಜ಼ಣಿ; ಡೇರಮ ಜಿವ್ಣುಕರಿನ್ ಢಾಂಡಬೋಕ್ಡಾನ ಪಾಳವಾಳನ ಶುರುನೊ ಪರ್ಖ್ಹೊ ಆಸ್. 21 ಇನ ನ್ಹಾನಭೈನು ನಾಮ್ ಯೂಬಾಲ; ಆ ತಂತಿನುವಾಜು಼ ಅಜು಼ ವಾಖ್ಹ್‌ಳಿ ವಜಾ಼ಡವಾಳನೊ ಶುರುನೊ ಪರ್ಖ್ಹೊ ಹುಯಿರ‍್ಹೊಸ್‌. 22 ಝಿಲ್ಲಾಕರಿ ಬೋಲವಾಳಿನೆ ತೂಬಲ್ ಕಾಯಿನನ ಜ಼ಣಿ. ಆಹೈರೋತೆ ಲ್ಹೋಡು ಅಜು಼ ಕಂಚ್‌ನು ಜಿನಖ್ಹ್‌ ಬಣಾವವಾಳು ಕೋಲ್‍ಮಿವಾಳನ ಶುರುನೊ ಪರ್ಖ್ಹೊ. ತೂಬಲ್‌ ಕಾಯಿನಾನು ಭೇನ್ನು ನಾಮ್ ನಯಮಾ. 23 ಲೆಮೆಕನೆ ಇನಿ ಬಾವ್ಣೇವ್ನ ಅಮ್ ಬೊಲ್ಯೊ "ಆದಾ, ಝಿಲ್ಲಾ ಮಾರಿವಾತ್ನ ಖ್ಹಂಜೊ; ಮನ ಘಾವ್‍ಕರ‍್ಯುತೆ ಎಕ್ ಅದ್ಮಿನ ಮಾರಿನಾಖ್ಯೊ; ಮನ ಮಾರ‍್ಯುತೆ ಎಕ್ ಜ಼ವಾನಿನ ಮೆ ಮಾರಿನಾಖ್ಯೊ. 24 ಕಾಯಿನನ ಮಾರಿನಾಖವಾಳನ ಖ್ಹಾತ್‍ಪಟ್ ಪಾಛು಼ ನಿಶತ್ ಆವಾನು ರ‍್ಹಯುತೊ, ಲೆಮೆಕನ ಮಾರವಾಳನ ಖ್ಹಾತ್‌ಉಪ್ಪರ್ ಖ್ಹಡ್‌ತೀನಿಖ್ಹ್‌ ಎತ್ರೆ ನಿಶತ್ ಮಳ್‌ಷೆ ಕೊಯ್ನಿಕಿಶು?" ಕರಿ ಬೊಲ್ಯೊ.

25 ಆದಾಮ್‌ ಪಾಛೋ಼ ಇನಿ ಬಾವಣ್ಣಾ ಮಳ್‌ವಾಮ ಇನೆ ಛಿಯ್ಯಾನ ಜ಼ಣಿನ್, "ಕಾಯಿನನೆ ಮರ್‌ನಾಖ್ಯೊತೆ ಹೇಬೆಲನ ಬದಲ್‍ ದೇವ್ನೆ ಮನ ಬಿಜೇಕ್ ಛಿಯ್ಯಾನ ದಿದೊ" ಕರಿ, ಯೊ ಲಡ್ಕಾನ "ಸೇತ್" ಕರಿ ನಾಮ್‌ಮ್ಹೇಲಿ. 26 ಇನವಾರ್ ಸೇತ್‌ನಾಬಿ ಎಕ್ ಛಿಯ್ಯೊಹುಯೊ. ಇನ, "ಎನೋಷ್" ಕರಿ ನಾಮ್ ಮ್ಹೇಲ್ಯೊ. ತಪ್‌ಥು ಅದ್ಮಿಯೆವ್ನೆ, "ಯೆಹೋವ" ಕರಿ ನಾಮ್ನ ಬೋಲಿನ್ ಆರಾದನೆ ಕರಾನ ಶುರುಕರ‍್ಯು.