1 ಅಬ್ರಹಾಮ್‍ನ ಹಗಾಮ್ಮ ಪಹಿಲು ಕಾಳ್‌ದುಕಾಳ್ ಕಾಹೆತೆ ಬಿಜೇಕ್ ಕಾಳ್‌ದುಕಾಳ್‌ಬಿ ಕಾನಾನ್ ದೇಖ್ಹ್‌ನ ಆಯು. ತದೆ ಇಸಾಕ್‍ನೆ ಫಿಲಿಷ್ಟಿಯವಾಳನೊ ರಾಜ಼ ಅಬೀಮೆಲೆಕನ ದೇಖಾನ ಗೆರಾರ್‌ನ ಗಯೊ. 2 ಹಿಜ್ಜಾ಼ ಯೆಹೋವನೆ ಇಸಾಕ್‍ನ ದರ್ಶನ್‌ದೀನ್, "ತೂ ಈಜಿಪ್ಟ್ ದೇಖ್ಹ್‌ನ ನಕೊ ಜಾ಼; ಮೇ ಬೋಲುತೆ ದೇಖ್ಹ್‌ಮ ತೂ ಜಿವ್ಣು ಕರ್ನು. 3 ತೂ ಆ ದೇಖ್ಹ್‌ಮ ರ‍್ಹೇ; ಮೇ ತಾರಕನ ರ‍್ಹೀನ್ ತುನ ಆಶೀರ್ವಾದ್ ಕರಿನ್‌ ತುನಾಬಿ, ತಾರಿ ಪಿಳ್ಗಿವಾಳನಬಿ ಆ ಖ್ಹಾರಸ್ ತಬರ್ಖಾನ ದೆವುಸ್‌. ಅಮ್ ತಾರೊ ಬಾ ಅಬ್ರಹಾಮ್‍ನ ಕರ‍್ಯೊತೆ ವಾಗ್ದಾನ್ನ ಚ಼ಲಾವುಸ್. 4 ತಾರಿ ಪಿಳ್ಗಿವಾಳನ ಆಬ್‍ಮ ಛಾ಼ತೆ ಶುಕ್ಕರ್‌ನಿತರ ಭಡೈಶ್. ತಾರಿ ಪಿಳ್ಗಿನ ಆ ತಬರ್ಖೊ ಖ್ಹಾರೋಸ್ ದೆವುಸ್. ತಾರಿ ಪಿಳ್ಗಿಥಿ ಧರ್ತಿನು ಖ್ಹಾರುಸ್‍ ಜ಼ಗ್‌ಜಾ಼ತ್‍ನಾಬಿ ಆಶೀರ್ವಾದ್‌ ಉಷೆ. 5 ಶನಕತೊ ಅಬ್ರಹಾಮ್ ಮಾರಿ ವಾತ್ನ ಮುಡ್‌ಕ್ಯುಝು಼ಕೈನ್ ಮಾರಿ ವಿಧಿನ, ಮಾರಿ ಹುಕುಮ್‍ಖ್ಹಾರನ, ಮಾರಿ ಖಾನೂಲ್‍ನ, ಮಾರಿ ಹುಕುಮ್‌ನ ಪಾಡಿಚಾ಼ಲ್ಯೊ" ಕರಿ ಬೊಲ್ಯೊ.

6 ಇನಖ್ಹಾಜೆ ಇಸಾಕ್‍ ಗೆರಾರ‍್ಮ ಜಿವ್ಣುಕರ್ತೋಥೊ. 7 ಯೊ ಝ಼ಗೋನು ಅದ್ಮಿ ಇನಿ ಬಾವಣ್ಣ ದೇಖಿನ್ ಇನಿ ಬಾರೇಮ ಪುಛಾ಼ಯು. ತದೆ ಇನೆ ರೆಬೆಕ್ಕ ಶನ್‌ಗಾರ್‌ನಿ ಥೀತೆ ಖ್ಹಾಜೆ ಆ ಝ಼ಗೋನು ಅದ್ಮಿ ಅನಾಖ್ಹಾಜೆ ಮನ ಮಾರಿನಾಕ್‍ಶೆನಿ ಕರಿ ಇನೆ ಇನಿ ಬಾವಣ್‌ಕರಿ ಬೋಲಾನ ಡರಿನ್ ಭೇನ್‍ಲಾಗ್ಣು ಕರಿ ಬೊಲ್ಯೊ. 8 ಇನೆ ಯೊ ಝ಼ಗೋಮ ಘಣಾದನ್ ರ‍್ಹವಾನಪಾರ್ ಏಕ್‍ದನ್ ಫಿಲಿಷ್ಟಿಯವಾಳನೊ ರಾಜ಼ ಅಬೀಮೆಲೆಕನೆ ಕಿಟ್ಕೆಥು ದೇಖಾನಿವಖ್ಹ್‌ತೆ ಇಸಾಕ್‍ ಇನಿ ಬಾವಣ್ ರೆಬೆಕ್ಕನಿ ಜೋ಼ಡ್ಮ ಲಾಡ್‌ಕರಾನು ದೇಖ್ಯೊ. 9 ಅಬೀಮೆಲೆಕನೆ ಇಸಾಕ್‍ನ ಬುಲೈಮಂಗೈನ್‌, "ಖ್ಹಾಚಮ ಆ ಹೈರಿತೆ ತಾರಿ ಬಾವಣ್‍ ಕಾಹೆಕಿಶು, ಭೇನ್‍ಕರಿ ಶನ ಬೊಲ್ಯೊ?" ಕರಿ ಪುಛಾ಼ವಖ್ಹತರ್ ಇಸಾಕ್‍ನೆ, "ಇನಾಖ್ಹಾಜೆ ಅದ್ಮಿಖ್ಹಾರು ಮನ ಮಾರಿನಾಕ್‌ಶೆ ಕರಿ ಇಮ್ ಬೋಲ್ಯೊತೆ" ಕರಿ ಬೊಲ್ಯೊ. 10 ಇನ ಅಬೀಮೆಲೆಕನೆ, "ತೂ ಹಮುನ ಅಮ್ ಶನ ಕರ‍್ಯೋತೆ? ಹಮಾರಮ ಕೋಣ್‌ತೋಬಿ ತಾರಿ ಬಾವಣ್ಣಿ ಜೋ಼ಡ್ಮ ಮಳ್ವಾಖ್ಹರ್‌ಕು ಹುಯಿಗುಹೋತ್ನಿ? ತಾರೇಥಿ ಹಮಾರಪರ್ ಖೋಟ್‍ ಆವಖ್ಹರ್‌ಕು ಹುಯುಹೋತ್ನಿ?" ಕರಿ ಬೊಲ್ಯೊ. 11 ಅಮ್ ಅಬೀಮೆಲೆಕನೆ ಇನ ಅದ್ಮೆವ್‍ನ, "ಆ ಅದ್ಮಿನ ರ‍್ಹವೊ ಅನಿ ಬಾವಣ್‌ಥಿ ರ‍್ಹವೊ ಖರಾಬ್ ಪರಕ್ಮ ಚಾ಼ಲ್ಯತೊ ಮರಣ್ಣಿ ನಿಶತ್ ಛು಼ಕ್‌ಶೆ ಕೊಯ್ನಿ" ಕರಿ ಹುಕುಮ್‍ಕರ‍್ಯೊ. 12 ಇಸಾಕ್‍ನೆ ಯೊ ದೇಖ್ಹ್‌ಮ ದಾಣ ಬಿತ್‌ಕರೀನ್ ಯೋಸ್‍ ವರಖ್ಹ್‌ಮ ಏಕ್‌ನ ಖ್ಹೋಎತ್ರು ಅನಾಜ಼್‍ವ್ಹಾಡ್ಯೊ; ಅಜು಼ ಯೆಹೋವನೆ ಇನ ಘಣು ಆಶೀರ್ವದ್ ಭಡಾಯೊ; 13 ಇನು ಧನ್‍ದೌಲತ್ ದನ್‍ಪರ್‌ದನ್ ಭಡ್ಯುತೆ ಇನಖ್ಹಾಜೆ ಘಣೊ ದೌಲತ್ತಿಬಣ್ಯೊ. 14 ಇನ ಢಾಂಡ ಬೋಕ್ಡಾವ್‌ಬಿ, ಧನ್‌ದವ್ಲತ್‍ಬಿ, ಚಾ಼ಕ್ರಿಕರಾವಳುಬಿ ಘಣುಥೂತೆ ದೇಖಿನ್ ಫಿಲಿಷ್ಟಿಯವಾಳು ಪೇಟ್ನೊಬಳಾಪೊ ಕರ‍್ಯು. 15 ಇನೊ ಬಾ ಅಬ್ರಹಾಮ್‌ನು ಆಳ್‌ಖ್ಹಾರು ಅಬ್ರಹಾಮ್‌ನ ಹಗಾಮ್ಮಸ್ ಖೋಂದ್ಯಹುಯ ಬಾವ್ಡಿಯೇನ ಫಿಲಿಷ್ಟಿಯವಾಳನೆ ಮಾಟಿನಾಖಿನ್ ಮೂಚಿನಾಖ್ಯು. 16 ಅಮ್‌ರ‍್ಹಾವಪರ್ ಅಬೀಮೆಲೆಕನೆ ಇಸಾಕ್‍ನ, "ತೂ ಹಮಾರೆಥಿ ಘಣು ಭಡೀಗೊ, ಇನಖ್ಹಾಜೆ ಹಮಾರಕಂಥೊ ಚ಼ಲ್ಯೋಜಾ಼ವ್ಣು" ಕರಿ ಬೊಲ್ಯೊ. 17 ಇಸಾಕ್‍ ಹಿಜ್ಜಾ಼ಥೊ ಜೈ಼ನ್ ಗೆರಾರ್ ಝೋ಼ಕ್‍ನು ಬಲ್ಡಾಮ ಲಂಗರ್‌ನಾಖಿನ್ ಹಿಜ಼್ಜ ಜಿವ್ಣುಕರ‍್ಯೊ. 18 ಅಬ್ರಹಾಮ್‌ನೆ ಖೋಂದಾಯೊತೆ ಬಾವ್ಡಿಯೇನ ಯೊ ಮರಿಜಾ಼ವನಿ ವಖ್ಹ್‌ತೆ ಫಿಲಿಷ್ಟಿಯವಾಳನೆ ಮೂಚಿನಾಖ್ಯುತೆ ಇನಖ್ಹಾಜೆ ಇಸಾಕ್‍ನೆ ಯೊ ಅಖ್ಖಾನ ಪಾಛೋ಼ ಖೋಂದೈನ್, ಬಾನೆ ಮ್ಹೇಲ್ಯೋತೆ ನಾಮ್ನಾಸ್ ಮ್ಹೇಲ್ಯೊ. 19 ಇಸಾಕ್‍ನು ಆಳ್‌ಖ್ಹಾರು ಝೋ಼ಕ್‍ಮ ಖೋಂದಖ್ಹತರ್ ಇವ್ಣುನ ಉಕ್ಳಾನು ಚೇಜ್ಭಾ಼ರಾನು ಬಾವ್ಡಿ ಮಳ್ಯು. 20 ಗೆರಾರ‍್ನು ಢಾಂಡ ಚ಼ರಾವವಾಳು ಅಯಿನ್ ಯೊ ಪಾಣಿ ಹಮಾರುಕರಿ ಬೋಲಿನ್ ಇಸಾಕ್‍ನು ಢಾಂಡ ಚ಼ರಾವವಾಳನಿ ಜೋ಼ಡ್ಮ ಲಡೈ ಕರ‍್ಯೂತೆ ಇನಖ್ಹಾಜೆ ಇಸಾಕ್‍ನೆ ಯೊ ಬಾವ್ಡಿನ "ಏಸೆಕ್*" ಕರಿ ನಾಮ್ ಮ್ಹೇಲ್ಯೊ. 21 ಇನಪಾರ್‌ ಇನು ಅದ್ಮಿ ಬಿಜೇಕ್ ಬಾವ್ಡಿ ಖೋಂದಾನಿವಖ್ಹ್‌ತೆ ಯೊ ದೇಖ್ಹ್‌ವಾಳು ಇನಖ್ಹಾಜೇಬಿ ಲಡೈ ಕರ‍್ಯುತೆಖ್ಹಾಜೆ ಇಸಾಕ್‍ನೆ ಇನ *"ಸಿಟ್ನಾ" ಕರಿ ನಾಮ್‍ಮ್ಹೇಲ್ಯೊ. 22 ಇನೆ ಹಿಜ್ಜಾ಼ಥೊ ನಿಕ್ಳಿನ್ ಅಜೇಕ್ ಬಾವ್ಡಿ ಖೋಂದಾವನಿ ವಖ್ಹ್‌ತೆ ಇನಿ ಬಾರೇಮ ಕೋಣ್‍ಬಿ ಲಡೈಕರ‍್ಯುಕೊಂತೆ ಇನಖ್ಹಾಜೆ ಇನೆ, "ಹಮ್ಕೆ ಯೆಹೋವನೆ ಹಮಾರಖ್ಹಾಜೆ ಘಣಿ ಝ಼ಗೊ ಕರಿದಿದೋತೆ ಇನಖ್ಹಾಜೆ ಹಮೆ ಭಡ್‍ಶು" ಕರಿ ಬೋಲಿನ್ ಇನ, "ರೆಹೋಬೋತ್" ಕರಿ ನಾಮ್‍ಮ್ಹೇಲ್ಯೊ. 23 ಇಸಾಕ್‍ನೆ ಹಿಜ್ಜಾ಼ಥೊ ನಿಕ್ಳಿನ್ ಘಾಟ್ ಛ಼ಢೀನ್ ಬೇರ್ಷೆಬನ ಗಯೊ. 24 ಯೊ ರಾತ್ ಯೆಹೋವ ದೇವ್‍ ಇನ ದೆಖೈನ್, "ಮೇ ತಾರೊ ಬಾ ಅಬ್ರಹಾಮ್‌ನೊ ದೇವ್; ತೂ ಡರ್‌ನಕೊ; ಮೇ ತಾರಿ ಜೋ಼ಡ್ಮ ಛೂ಼; ಮಾರೊ ಸೇವಕ್ ಅಬ್ರಹಾಮ್‍ನಖ್ಹಾಜೆ ತುನ ಆಶೀರ್ವಾದ್‌ ಕರೀನ್ ತಾರಿ ಪಿಳ್ಗಿನ ಭಡಾವುಸ್" ಕರಿ ಬೊಲ್ಯೊ. 25 ಇಸಾಕ್‍ನೆ ಚಾ಼ಚ಼ರ್‌ ಭಂದೈನ್ ಯೆಹೋವನು ನಾಮ್‍ಬೋಲಿನ್ ಆರಾದನೆ ಕರೀನ್ ಹಿಜ಼್ಜಾ ಇನು ಲಂಗರ್ ನಖೈಲಿದೊ. ಹಿಜ಼್ಜ ಬಾವ್ಡಿನ ಖೊಂದಾಯೊ.

26 ಯೊ ವಖ್ಹತ್‌ಮ ಅಬೀಮೆಲೆಕನೆ ಇನೊ ಖ್ಹೂಜ಼್‌ ಬೋಲಿದ್ಯವಾಳೊ ಅಹುಜ್ಜತನಾಬಿ, ಶಿಪಾಯಿ ಹುಯಿರೋತೆ ಫೀಕೋಲನಾಬಿ ಜೋ಼ಡ್ಮ ಬುಲೈಲೀನ್ ಗೆರಾರ್‌ಥೊ ಇಸಾಕ್‍ಕನ ಆಯೊ 27 ಇಸಾಕ್‍ನೆ, "ತುಮೆ, ಮನ ವಹೇರ್‌ಕರೀನ್ ತುಮಾರಕಂಥು ಮೋಕ್ಲಿದಿದಾನಿ; ಹಮ್ಕೆ ಮಾರಕನ ಶನ ಆಯ?" ಕರಿ ಇವ್ಣುನ ಬೊಲ್ಯೊ. 28 ಇನ ಇವ್ಣೆ, "ಯೆಹೋವ ತಾರಿ ಜೋ಼ಡ್ಮ ಛಾ಼ ಕರಿ ಹಮುನ ಅಛ್ಛಿನಿತರ ಮಾಲುಮ್‌ಪಡ್ಯು ಇನಖ್ಹಾಜೆ ತೂಬಿ, ಹಮೇಬಿ ಏಕ್‍ಥಿಏಕ್ ಆಣ್‍ಕರ‍್ವಾಥಿ ಒಪ್ಪಂದ ಕರಿಲಿಯೆ ಕರಿ ಖ್ಹೂಜ಼್ ಕರಿರಾಖ್ಯಸ್. 29 ಹಮೆ ತುಮುನ ಶನೂಬಿ ಖರಾಬ್‌ ಕರಿಲಿದಾಕೊಂತೆ ಅಛ಼್ಛೂಸ್ ಕರೀನ್ ತುನ ಸಮಾಧಾನ್‌ಥಿ ಮೋಕ್‌ಲ್ಯಾನಿ. ಇಮ್ಮಸ್ ತೂಬಿ ಹಮುನ ಖರಾಬ್ ಕೋಕರಿಷ್‌ನಿ ಕರಿ ಆಣ್ ಕರ್ನು. ತೂ ಹಮ್ಕೆ ಯೆಹೋವನಿ ಆಶೀರ್ವದ್ ಲೀರಾಖ್ಯೋಸ್‍ ಕೊಯ್ನಿಕಿಶೂ?" ಕರಿ ಬೋಲ್ಯ. 30 ತದೆ ಇಸಾಕ್‍ನೆ ಇವ್ಣುನ ಮಿಝ್ವಾ಼ನ್ ಕರಾಯೊ. ಇವ್ಣೆಖ್ಹಾರು ಖಾವಣ್‍ ಪೀವಣ್‍ ಖತಮ್‍ಕರ‍್ಯು. 31 ಇವ್ಣೆಖ್ಹಾರು ವ್ಹಾಣೆಉಠಿನ್ ಏಕ್‍ಥಿಏಕ್ ಒಪ್ಪಂದ ಕರಿಲಿದು. ಇಸಾಕ್‍ನೆ ಇವ್ಣುನ ಮೋಕ್ಲಾಖ್ಹತರ್ ಇವ್ಣೆ ಸಮಾಧಾನ್‌ಥಿ ಚ಼ಲಿಗಯು. 32 ಯೋಸ್ ದನ್ನೆ ಇಸಾಕ್‍ನು ಸೇವಕ್‌ಖ್ಹಾರು ಇವ್ಣೆ ಖೋಂದ್ಯಾತೆ ಬಾವ್ಡಿನಿ ಬಾರೇಮ "ಹಮುನ ಪಾಣಿ ಮಳ್ಯು" ಕರಿ ಆಯಿನ್‌ ಬೋಲ್ಯು. 33 ಇನೆ ಯೊ ಬಾವ್ಡಿನ "*ಷಿಬಾ" ಕರಿ ನಾಮ್ ಮ್ಹೇಲ್ಯೊ. ಇನಖ್ಹಾಜೆ ಹಿಜ಼್ಜ ಛಾ಼ತೆ ಖ್ಹಯೇರ್‌ ಹಮ್ಕೆಲಗೂಬಿ "ಬೇರ್ಷಬ" ಕರಿ ನಾಮ್‌ಹುಯು.

34 ಏಸಾವ ಚಾ಼ಳಿಖ್ಹ್ ವರಖ್ಹ್‌ವಾಳೊ ಹುವಾದಿನ್ ಹಿತ್ತಿಯವಾಳೊ ಬೇರಿನಿ ಛೋ಼ರಿ ಯೆಹೂದೀತನಾಬಿ ಹಿತ್ತಿಯವಾಳೊ ಏಲೋನನಿ ಛೋ಼ರಿ ಬಾಸೆಮತನಾಬಿ ವ್ಯಾಹ ಕರಿಲಿದೊ. 35 ಅವ್ಣಖ್ಹಾಜೆಥಿ ಇಸಾಕ್‍ನಾಬಿ ರೆಬೆಕ್ಕನಾಬಿ ದಿಲ್‍ನುಕುಢಾಪೊ ಹುಯು.