Mateus 17

ಯೇಸುನು ರೂಪ್ ಬದ್‌ಲ್ಯೂತೆ

1 ಛೊ಼ ದನ್ನ ಬಾದ್‌ಮ ಯೇಸುನೆ ಪೇತ್ರ, ಯಾಕೋಬ ಅಜು಼ ಇನೊ ಭೈ ಯೋಹಾನ್ನ ಬುಲೈಲಿನ್, ಏಕ್‌ ಊಚಾ಼ ಪಹಡ್‌ಪರ್ ಗಯೊ. ಹಿಜ್ಜಾ಼ ಇವ್ಣುನ ಮ್ಹೆಂದಿನ್ ಕೋಣ್‌ಬಿ ಕೋ ಥೂನಿ. 2 ಹಿಜ್ಜಾ಼ ಇವ್ಣ ಡೋಳಾನ ಖ್ಹಾಮ್ಣೇಸ್, ಯೇಸುನು ರೂಪ್ ಬದ್ಲಿಗಯು: ಇನು ಮ್ಹೋಡು ಚಾ಼ಂದ್‍ನಿಘೋಣಿ ಝ಼ಮ್‌ಕಾಲಗ್ಯು ಅಜು಼ ಇನ ಲುಂಗ್ಡ ಉಜಾ಼ಳಾನಿಘೋಣಿ ಧೋಳುಫಟ್ ಹುಯಿಗಯು. 3 ಎತ್ರೇಸ್ ಕಾಹೆತೆ ಮೋಶೇಬಿ, ಎಲೀಯ ಯೇಸುನ ಜೋ಼ಡೆ ವಾತೆ ಬೋಲುಕರಾತೆ ಯೋ ತೀನ್ ಶಿಷ್ಯರ್‌ನೆ ದೇಖ್ಯ. 4 ತದೆ ಪೇತ್ರನೆ ಯೇಸುನ, "ಪ್ರಭು, ಹಮೆ ಹಜ಼್ಜಸ್ ರ‍್ಹವಾನು ಕೆತ್ರೇಕ್ಕಿ ಅಛ್ಛು಼ ಹುಯಿರ‍್ಹೂಸ್! ತೂ ಬೋಲ್ತೊ ಉಶೇತೊ, ಮೇ ಹಜ್ಜಾ಼ ತೀನ್ ಡೇರಾ ಠೋಕೆಸ್, ಏಕ್‌ ತುನ, ಏಕ್‌ ಮೋಶೇನ ಅಜು಼ ಏಕ್‌ ಎಲೀಯನ" ಕರಿ ಬೋಲ್ಯೊ.

5 ಯೋ ಅಮ್ ಬೋಲುಕರಾನಿ ವಖ್ಹತ್‌ಮಾಸ್‌, ಏಕ್‌ ಉಜಾ಼ಖ್ಹ್‌ನು ವಾದ್‌ಳು ಐನ್, ಇವ್ಣಾಪರ್ ಢಪಾಯು, ಅಜು಼ ಯೋ ವಾದ್ಳಾನ ಮಹಿಥು, "ಆ ಮಾರೊ ಪ್ಯಾರ್‌ನೊ ಛಿಯ್ಯೊ, ಅನೇಥಿ ಮೇ ಘಣು ಖ್ಹುಶಿ ಛೂ಼!" ಕರಿ ಏಕ್‌ ಅವಾಜ಼್ ಆಯೊ.

6 ಶಿಷ್ಯರ್‌ನೆ ಆ ಅವಾಜ಼್‌ನ ಖ್ಹಮ್‌ಜಿನ್‌, ಡರ್‌ಥಿ ಮ್ಹೋಡು ಹೇಟ್ ಕರೀನ್, ಜ಼ಮೀನ್‌ಪರ್ ಊಂಧಾ ಪಡಿಗಯ. 7 ತದೆ ಯೇಸು ಇವ್ಣಾಕನ ಐನ್, ಇವ್ಣುನ ಛೀಮಿನ್‌, "ಉಪ್ಪರ್ ಉಠೊ, ಡರೊ ನಕೊ!" ಕರಿ ಬೋಲ್ಯೊ. 8 ತದೆ ಇವ್ಣೆ ಡೋಳಾ ಪಾಡಿನ್ ದೇಖ್ಯ, ತದೆ ಯೇಸು ಎಕ್ಕಸ್ ಜ಼ಣೊ ಥೊ, ಬಿಜು಼ ಕೋಣ್‌ಬಿ ಕೋ ಥೂನಿ.

9 ಇವ್ಣೆ ಯೋ ಪಹಡ್‌ಪರ್‌ಥು ಉತ್ರಿನ್ ಆವಾನಿ ವಖ್ಹತ್‌ಮ, ಯೇಸುನೆ ಇವ್ಣುನ, "ತುಮೆ ಹಮ್ಕೆ ದೇಖ್ಯಾತೆ ಇನ ಅದ್ಮಿನೊ ಛಿಯ್ಯೊ ಮರಿನ್‌, ಪಾಛೊ಼ ಜಿವ್ತೊ ಹುಯಿನ್, ಉಠಿ ಆವಾತೋಡಿ, ಕಿನಾಬಿ ನಾ ಬೋಲ್‌ನು" ಕರಿ ಹುಕುಮ್‌ದಿದೊ.

10 ತದೆ ಶಿಷ್ಯರ್‌ನೆ ಯೇಸುನ, "ಕ್ರಿಸ್ತ ಆವಾನಿ ಅಗಾಡಿ ಎಲೀಯ ಆವ್ಣುಕರಿ ಮೋಶೆನಿ ವಚನ್ ಶಿಕಾಡವಾಳು ಶಾಸ್ತ್ರಿಯೆ ಬೋಲಾಸ್ತೆ ಶನ?" ಕರಿ ಪುಛಾ಼ಯ.

11 ಯೇಸುನೆ ಇವ್ಣುನ, "ಎಲೀಯ ಪಹಿಲೆ ಆವ್ಣುಕರಿ ಇವ್ಣೆ ಬೋಲಾಸ್ತೆ ಬರೊಬರಸ್, ಖ್ಹಾಚಮಾಬಿ ಎಲೀಯ ಆಯಿನ್, ಖ್ಹಾರುಸ್ ಖ್ಹವಾರ್‌ಶೆ. 12 ಕತೋಬಿ ಮೇ ತುಮೂನ ಶಾತ್‌ ಬೋಲುಸ್‌ಕತೊ, ಎಲೀಯ ಅಗಾಡಿಸ್ ಐನ್‌ಬಿ, ಚ಼ಲೆಗಯೊ. ಕತೋಬಿ ಅದ್ಮಿಖ್ಹಾರು ಇನಿ ಖ್ಹಣೇದ್ ಕೋ ಧರ‍್ಯುನಿ, ಅಜು಼ ಇವ್ಣ ಮನ್‌ಮ ಆವಾತೆ ಇಮ್‌ ಇನ ಕರ‍್ಯು. ಇನ ಕರ‍್ಯುತೆ ಇಮ್ಮಸ್ ಅದ್ಮಿನ ಛಿಯ್ಯಾನಾಬಿ ಇವ್ಣೇಥಿ ಖ್ಹತಾಪ್ಣಿ ಉಶೆ" ಕರಿ ಜ಼ವಾಬ್ ದಿದೊ.

13 ಬ್ಯಾಪ್ತಿಸ್ಮದ್ಯವಾಳೊ ಯೋಹಾನ್ನಿ ಬಾರೇಮ ಯೇಸು ವಾತೆ ಬೋಲುಕರಾಸ್ತೆ ಕರಿ ಶಿಷ್ಯರ್‌ನೆ ತದೆ ಮಾಲುಮ್‌ ಕರಿಲಿದ.

ಯೇಸುನೆ ಭೂತ್ ಧರಿರಾಖ್ಯುಥೂತೆ ಏಕ್‌ ಛೋ಼ಕ್ರಾನ ಅಛ್ಛು಼ ಕರ‍್ಯೊತೆ

14 ಯೇಸು ಅಜು಼ ಇನ ಶಿಷ್ಯರ್‌ ಪಾಛು಼ ಫರೀನ್ ಅದ್ಮಿನಿ ಝೂ಼ಂಡ್‌‍ಕನ ಆವಾದಿನ್, ಏಕ್‌ ಜ಼ಣೊ ಯೇಸುಕನ ಐನ್, ಇನಖ್ಹಾಮ್ಣೆ ಗುಡ್‍ಘ್ಯ ಟೇಕಿನ್, 15 "ಪ್ರಭು, ಮಾರ ಛಿಯ್ಯಾನ ಗೋರ್‌ ಕರ್‌! ಇನ ಮಿರ್‌ಘಿ ಲಾಗಿರ‍್ಹೂಸ್, ಇನೇಥಿ ಯೋ ಘಣು ತರಪ್‌ಡುಕರಾಸ್. ಯೋ ತದೆ-ತದೆ ಆಗ್‌ಮಾಬಿ ಪಾಣಿಮಾಬಿ ಪಡ್‌ತೊರ‍್ಹೇಸ್. 16 ಮೇ ಇನ ತಾರ ಶಿಷ್ಯರ್‌ಕನ ಬುಲೈಲಿ ಆಯೊ, ಕತೋಬಿ ಇನ ಅಛ್ಛು಼ ಕರಾನ ಇವ್ಣ ಹಾತೆ ಕೋ ಹುಯೋನಿ" ಕರಿ ಬೋಲ್ಯೊ.

17 ಯೇಸುನೆ, "ಏ, ವಿಶ್ವಾಸ್‌ಕೊಂತೆ ಬುಧ್ಧು ಖಾಂದಾನ್‌ವಾಳ! ಬಿಜು಼ ಕೆತ್ರ ದನ್ ಮೇ ತುಮಾರ ಜೋ಼ಡೆ ರ‍್ಹೇಣು? ಬಿಜು಼ ಕೆತ್ರ ದನ್ ತುಮೂನ ಖ್ಹಮಾಳ್‌ಣು? ಯೋ ಛೋ಼ಕ್ರಾನ ಹಜ್ಜಾ಼ ಮಾರಕನ ಬುಲೈಲಿ ಆವೊ!" ಕರಿ ಬೋಲ್ಯೊ. 18 ಯೇಸುನೆ ಯೋ ಛೋ಼ಕ್ರಮ ಥೂತೆ ಭೂತ್‌ನ ಗುರ್‌ಕಾವಖ್ಹತರ್, ಯೋ ಭೂತ್ ಇನ ಮ್ಹೆಂದಿನ್ ನಿಕ್ಳಿಗಯು. ಯೋಸ್ ವಖ್ಹತ್‌ಮ ಇನ ಅಛ್ಛು಼ ಹುಯಿಗಯು.

19 ಅನಕೇಡೆಥು ಯೇಸು ಎಕ್ಲೋಸ್ ರ‍್ಹವಾನಿ ವಖ್ಹತ್‌ಮ, ಇನ ಶಿಷ್ಯರ್‌ ಇನಾಕನ ಆಯಿನ್, "ಯೋ ಭೂತ್‌ನ ಕಾಡಾನ ಹಮಾರೇಥಿ ಶನ ಕೋ ಹುಯೂನಿತೆ?" ಕರಿ ಪುಛಾ಼ಯ.

20 ತದೆ ಯೇಸುನೆ ಇವ್ಣುನ, "ತುಮಾರಿ ವಿಶ್ವಾಸ್ ಕಮ್ ಥೀತೆ ಇನಖ್ಹಾಜೇಸ್ ತುಮೂನ ಕೋ ಹುಯೂನಿ, ಮೇ ತುಮೂನ ಖ್ಹಾಚಮಾಬಿ ಬೋಲುಸ್ಕಿ, ರಾಯಿನ ದಾಣ ಎವ್ಡಿ ವಿಶ್ವಾಸ್ ತುಮೂನ ರ‍್ಹಯೂತೊ, 21 ತುಮೆ ಆ ಪಹಡ್‌ಣ, ‘ಹಜ್ಜಾ಼ಥು ಹಿಜ್ಜಾ಼ ಜಾ಼!’ ಕರಿ ಬೋಲ್ಯಾತೋಬಿ ಯೋ ಜಾ಼ಶೆ. ತುಮಾರ ಹಾತೆ ಹುವ್ವಾಕೊಂತೆ ಕಾಮ್ ಏಕ್‌ಬಿ ಕೋ ರ‍್ಹಿಶೇನಿ" ಕರಿ ಬೋಲ್ಯೊ.

ಯೇಸುನೆ ಇನಿ ಮರಣ್ಣಿ ಬಾರೇಮ ಪಾಛೊ಼ ಬೋಲ್ಯೋತೆ

22 ಶಿಷ್ಯರ್‌ ಖ್ಹಾರು ಎಕ್ಕದಮ್‌ ಗಲಿಲಾಯಮ ಆವಾದಿನ್, ಯೇಸುನೆ ಇವ್ಣುನ, "ಅದ್ಮಿನ ಛಿಯ್ಯಾನ ಅದ್ಮಿಖ್ಹಾರಾನ ಹಾತ್‌ಮ ದೆವೈಜಾಶೆ. 23 ಇವ್ಣೆ ಇನ ಮಾರಿನಾಕ್‌ಶೆ! ಕತೋಬಿ ತೀನ್ ದನ್‌ಕೇಡೆ ಯೋ ಪಾಛೊ಼ ಜಿವ್ತೊ ಹುಯಿನ್, ಉಠಿ ಆವ್‌ಶೆ" ಕರಿ ಬೋಲ್ಯೊ.

ಅನ ಖ್ಹಮ್‌ಜಿನ್‌, ಶಿಷ್ಯರ್‌ನ ಘಣು ದುಖ್ ಹುಯು.

ಮಂದಿರ್‌ನ ಶುಂಕ ಭಾಂದಾನಿ ಬಾರೇಮ

24 ಯೇಸು ಅಜು಼ ಇನ ಶಿಷ್ಯರ್‌ ಕಪೆರ್ನೌಮ್ ಆವಾದಿನ್, ಮಂದಿರ್‌ನಖ್ಹಾಜೆ ಶುಂಕ ಮಾಂಗವಾಳು ಪೇತ್ರಕನ ಆಯಿನ್, "ತುಮಾರೊ ಗುರು ಮಂದಿರ್‌ನ ದೇವ್ಣುತೆ ಶುಂಕಾನ ಭಾಂದಾ ಕೊಯ್ನಿಕಿ ಶು?" ಕರಿ ಪುಛಾ಼ಯು.

25 ತದೆ ಪೇತ್ರನೆ, "ಒಹೊ, ಭಾಂದ್‌ಶೆ" ಕರಿ ಬೋಲ್ಯೊ.

ಪೇತ್ರ ಘರ್‌ಮ ಆವಾದಿನ್, ಯೇಸುನೆ ಇನೇಥಿ ಪಹಿಲೇಸ್, "ಸೀಮೋನ, ತುನ ಕಿಮ್ ದೆಖಾವಸ್? ಆ ಧರ್ತಿಪರ್‌ಲ್ಯ ರಾಜ಼ಖ್ಹಾರು ಕಿನಾಕಂಥು ಶುಂಕ ಮಾಂಗಾಸ್? ಶೊಂತ್ ದೇಖ್ಹ್‌ನ ಅದ್ಮಿಥೀಕಿ ನತರ್‌ಕಿ ಪರೈದೇಖ್ಹ್‌ವಾಳ ಅದ್ಮಿಕಂಥು ಮಾಂಗಾಸ್?" ಕರಿ ಬೋಲ್ಯೊ.

26 ಪೇತ್ರನೆ, "ಪರೈ ದೇಖ್ಹ್‌ವಾಳಕಂಥು" ಕರಿ ಜವಾಬ್‌ ದಿದೊ.

ತದೆ ಯೇಸುನೆ ಪೇತ್ರನ, "ಇಮ್‍ಕತೊ, ಶೊಂತ್ ದೇಖ್ಹ್‌ವಾಳು ಶುಂಕ ಭಾಂದಾನು ಕೊಯ್ನಿ ಕರಿ ಬೋಲ್ಯೊ. 27 ತೋಬಿ ಶುಂಕ ಮಾಂಗವಾಳು ಅಪ್ಣಿ ಬಾರೇಮ ಖಟು ಕರಾನು ನಕೊ. ಇನಖ್ಹಾಜೆ ತೂ ದರ‍್ಯಾವ್‍ನ ಜೈ಼ನ್, ಗಳ್‌ ನಾಖಿನ್, ಪಹಿಲೆ ಮಳಾಸ್ತೆ ಮಾಛ಼್‌ಲಾನ ಮ್ಹೋಡಾನ ಕಾಡಿ ದೇಕ್, ಇನಾಮ ಶುಂಕ ಭಾಂದಾನ ಹೋಣುತೆ ಏಕ್‌ ಪೈಶಾನು ಬಿಲ್ಲು ಮಳ್‌ಶೆ. ಇನ ಲಯಿನ್, ಅಪ್ಣ ಭೇ ಜ಼ಣಾನು ಕರಿ ಬೋಲಿನ್ ದೇ" ಕರಿ ಬೋಲ್ಯೊ.