Mateus 7

ಬಿಜಾ಼ನ ತೀರ್ಪ್ ಕರಾನಿ ಬಾರೇಮ

1 "ತುಮೆ, ಬಿಜಾ಼ನ ತೀರ್ಪ್‌ ನಕೊ ಕರೊ, ತದೆ ದೇವ್‌ಬಿ ತುಮೂನ ತೀರ್ಪ್‌ ಕೋ ಕರ್‌ಶೇನಿ. 2 ತುಮೆ ಬಿಜಾ಼ನ ಕಿಮ್ ತೀರ್ಪ್‌ ಕರಾಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ತೀರ್ಪ್ ಕರ್ಶೆ, ಅಜು಼ ತುಮೆ ಬಿಜಾ಼ನ ಕಿಮ್ ಮಾಪಿನ್‌ ದೇಸ್ಕಿ, ಇಮ್ಮಸ್ ದೇವ್‌ಬಿ ತುಮೂನ ಮಾಪಿನ್‌ ದಿಶೆ. 3 ‘ತೂ ತಾರ ಡೋಳಾಮ ಛಾ಼ತೆ ಪೇದಡ್‌ನಿ ಬಾರೇಮ ಸೋಚ್ಯೊಕೊಂತೆ, ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿನಿ ಬಾರೇಮ ಸೋಚಾಸ್ತೆ ಕಿಮ್? 4 ತು ತಾರ ಭೈನ, ಭೈ ತಾರ ಡೋಳಾಮ ಛಾ಼ತೆ ಕಾಕ್ರಿನ ಕಾಡುಸ್‌ ಆವ್’ ಕರಿ ತು ಕಿಮ್ ಬೋಲಾಸ್? ತಾರ ಡೋಳಾಮ ಪೇದಡಸ್‌ ಛಾ಼ನಿ? 5 ಅಲಾ ಠಗಾರ! ತಾರ ಡೋಳಾಮ ಛಾ಼ತೆ ಪೇದಡ್‌ನ ಪಹಿಲೆ ಕಾಡ್, ತದೆ ತಾರ ಭೈನ ಡೋಳಾಮ ಛಾ಼ತೆ ಕಾಕ್ರಿ ತುನ ಅಛ್ಛಿನಿತರ ದೆಖಾವ್‌ಶೆ.