12 ಇನಖ್ಹಾಜೆ ತುಮೆ ಶರೀರ್ನ ಖರಾಬ್ ಆಖ್ಹ್ಮ ನಾ ಪಡ್ನೂತೆ ತುಮಾರ ಮಟಿಜಾ಼ವಾಳ ಶರೀರ್ಮ ಪಾಪ್ ಹುಕುಮ್ ಚ಼ಲಾವನ ನಕೊಮ್ಹೇಲಿದೆವೊ. 13 ತುಮಾರ ಶರೀರ್ನು ಭಾಗ್ನ ನೀಚ್ ಕಾಮ್ನ ಚ಼ಲಾವವಾಳು ಕಫ್ಫನ್ನಿತರ ಪಾಪ್ನ ದಿನಾಖೊನಕೊ, ಕತೋಬಿ ಇನ ಬದಲ್ ಮರಣ್ಥು ಜಿವ್ತುಹುಯಿನ್ ತುಮೂನ ದೇವ್ನ ಸಮರ್ಪಣ್ ಕರಿನಾಖೊ. ತುಮಾರ ಶರೀರ್ನ ಭಾಗ್ನ ನೀತಿನು ಕಫ್ಫನ್ ಹುಯಿರ್ಹವಾನಖ್ಹಾಜೆ ದೇವ್ನ ಸಮರ್ಪಣ್ ಕರೊ. 14 ಪಾಪ್ ತುಮಾರಪರ್ ಯಜಮಾನ್ ನಾ ಹುಯಿರ್ಹೇಣು, ಶನಕತೊ ತುಮೆ ಧರ್ಮಶಾಸ್ತ್ರನಿ ಅಧೀನ್ಮ ಕೊಯ್ನಿ, ದೇವ್ನಿ ವಾರ್ಖ್ಹಾನಿ ಅಧೀನ್ಮ ಹುಯಿರ್ಹಾಸ್.
ನೀತಿನು ಗುಲಾಮ್ಖ್ಹಾರು
15 ಇಮ್ಕತೊ ಶಾತ್? ಅಪ್ಣೆ ಧರ್ಮಶಾಸ್ತ್ರನಿ ಅಧೀನ್ ನಾ ರ್ಹೇವ್ಣುತೆ ವಾರ್ಖ್ಹಾನಿ ಅಧೀನ್ ಹುಯಿರ್ಹಿಯೇಸ್ಕರಿ ಪಾಪ್ ಕರೇಜಾ಼ಯ್ಕಿ ಶು? ಕೊಯ್ನಿಕತೊ, 16 ತುಮೆ ತುಮುನಾಸ್ ಗುಲಾಮ್ಹುಯಿನ್ ಕಿನಾತೋಬಿ ದೆವೈಜಾ಼ವಾನಿ ವಖ್ಹತ್ಮ ತುಮೆ ಯಜಮಾನ್ನ ವಿಧೇಯ ಹುಯಿರ್ಹವಾಳ ಸೇವಕ್ ಹುಯಿರ್ಹೆಸ್ಕರಿ ತುಮೂನ ಮಾಲುಮ್ ಛಾ಼. ಪಾಪ್ಮ ಪಡ್ಯುತೊ ಮರಣಸ್ ಫಲ್,ದೇವ್ನ ಭರೋಖ್ಹಾನ ದಾಸಹುಯಾತೊ ನೀತಿ ಮಳ್ಶೆ. 17 ಕತೋಬಿ ದೇವ್ನ ಧನ್ಯವಾದ್ಹುವಾದೆ! ಶನಕತೊ ತುಮೆ ಏಕ್ ವಖ್ಹತ್ಮ ಪಾಪ್ನ ಗುಲಾಮ್ ಹುಯಿರ್ಹತೋಬಿ, ತುಮೆ ಶಿಕಿಲಿದಾತೆ ಖ್ಹಾಚಿ ಬೋಧನೆಮ ಭರ್ಪೂರ್ ಮನ್ಥಿ ವಿಧೇಯ ಹುಯಿರ್ಹಾಸ್. 18 ತುಮೆ ಪಾಪ್ಥಿ ಛುಟ್ಕಾರ್ ಲ್ಯವಾಳಹುಯಿನ್ ನೀತಿನ ಗುಲಾಮ್ ಹುಯಿರ್ಹಾಸ್.
/images/a/6c03efee-c76a-4ab8-fe2e-555683f90900)
/images/a/9ec55bb8-7dc5-47b9-c32a-98aea1c00300)