1 ಎಕ್ ದನ್ ನವೊಮಿ ನೆ ರೂತ್ ನ, "ದೆಕ್ಲಿ ಭಯಿ ತು ವ್ಯಾಹ ಕರಿನ್ ಅಚ್ಚಿರ‍್ಹನುಕರಿ ಬುಜು ಸುಖಂ ಖ್ಹು ರ‍್ಹನು ಕರಿ ಪ್ರಯತ್ನಂ ಕರನು ಮಾರು ಜಿಮ್ಮೇದಾರಿ ಖಾಯೆ ನಾ? 2 ಯೊ ಬೋವಜ್ ಅಪ್ ಣು ಖನ್ನೆಲ್ಯೊ. ತೂ ಇನಿ ಕಮ್ ಕರವಳಿ ತಯಡನಿ ಜೋಡ್ಮ ಬುಟ್ಟವ್ ನ ಚುಣಸ್‌ತೆ ಖಯೆ ನಾ? ಹಂಕ್ಕೆ ಮೇ ಬೊಲುಸ್ತೆ ಖ್ಹಮಜ್; ಆ ರಾತೆ ಬೋವಜ್ ಖಳಮ ಬರಿಕ್‍ಗ್ಹವ್ ನ ತೂರ್‌ಶೆ. 3 ತೂ ಪಾಣಿ ನ್ಹೊಯಿಲೀನ್ ವಾನು ತೇಲ್ ಲಗಾಡಿಲಿನ್, ಘಣೂ ಅಚ್ಚು ಲುಂಗ್ಡನ ಫೇರಿಲಾ. ಇನಪರ್ ಖಳಮ ಜಾ. ಯೊ ಖಾಣುಪಾಣಿ ಖಾವಾಲಗೂಬಿ ಇನ ನಕೊ ದೆಖೈಶ್. 4 ಯೊ ಕಿಜ್ಗೊ ಖ್ಹುವಾಸ್ಕಿ ಝಗೊನ ದೆಖಿಲ. ಯೊ ಖ್ಹುಯಿಜವದಿನ್ ಇಜ್ಗ ಜ. ಇನ ಗೊಡಾಪರ್‌ ಲ್ಯು ಗೋದ್ರನ ಖ್ಹರ್ ಕೈನ್ ಗೊಡವ್ನ ಶೆಡೆಸ್ ಖ್ಹುಯಿಜಜೊ; ಇನಪರ್ ತೂ ಶಾತ್ ಕರ್‌ನು ಕರಿ ಯೋಸ್ ಬೋಲ್‌ಶೆ." ಕರಿ ಬೋಲಿ. 5 ರೂತ್ ನೆ, "ತೂ ಬೋಲಿತಿಮ್ಮಸ್ ಮೇ ಕರಿಶ್" ಕರಿ ಬೋಲಿ. 6 ಇಮ್ಮಸ್ ರೂತ್ ಖಳಮ ಜೈನ್ ಫುಯಿ ನೆ ಬೋಲಿ ದಿದೀತೆ ಇಮ್ಮಸ್ ಕರಿ. 7 ಬೋವಜ್ ನೆ ಖಾಣುಪಾಣಿ ಖೈನ್ ಭಶ್ ಹುಯಿರು ಥೊ. ಅ ಹುಯಿಜವದಿನ್ ಭಜ್ರೊ ನು ಗುಡ್ಡಾನ ಶೆಡೆ ಖ್ಹುಯಿಗಯೊ. ತದೆ ರೂತ್ ಶೊಪೊತಿ ಆಯಿನ್ ಇನ ಕನ್ನೆ ಜೈನ್ ಇನ ಗೊಡಪರ್ ಲ್ಯು ಗೋದ್ರು ಹಳ್ಳೆತ್ತಿ ಖ್ಹರ್ ಕಯಿನ್ ಗೊಡವ್ನ ಶೆಡೆಸ್ ಖ್ಹುಯಿಗಿ. 8 ಹಾದಿ ರಾತ್ ಮ ಇನ ಪಟಕ್ಕರಿ ನಿಂದರ್ ಮಥು ಹೊಶರ್ ಹುಯಿಗು. ಜುಕಿನ್ ದೆಖಮ ಎಕ್ ತಯಡ ಗೊಡಕನ ಖ್ಹುತಿತೆ ತಯಡನ ದೆಕಿನ್ ಘಬ್ರೈಗೊ. 9 ತದೆ ಬೋವಜ್ ನೆ ಇನ ದೆಕಿನ್ "ತು ಕೊಣ್?" ಕರಿ ಪುಚ್ಹವಮ. ಇನಕಾಜೆ ರೂತ್ ನೆ, "ಯಜಮಾನ್, ಮೇ ತರಿ ದಾಸಿ ರೂತ್. ತೂ ಹಮಾರೊ ಖನ್ನೆವಾಳೊ ಹುಯಿರೊಸ್ ತೆ ಇನಾಖ್ಹಾಜೆ ತಾರು ಗೋದ್ರನು ಕೋಣೊನ ಮಾರಪರ್‌ ನಾಕ್" ಕರಿ ಬೋಲಿಲಿದಿ. 10 ಬೋವಜ್ ನೆ, "ಭಯಿ, ಯೆಹೋವ ತುನ ಆಶೀರ್ವದ್ ದೆವಾದ! ತೂ ಗರೀಬ್ ಶೌಕಾರ್‌ ಕವರವ್ ನ ದೆಖಿಕೊಗೈನಿ. ತೂ ಪೈಲೆ ವತಳಿತೆ ಅಛ್ಛು ಮರ್ಯಾದಿತೆಬಿ ಹಂಕ್ಕೆ ತು ವತಾಳುಕರಸ್ತೆ ಮರ್ಯಾದಿ ಘಣುಮೊಟು. 11 ಭಯಿ ಡರ್‌ನಕೊ, ತೂ ಇಜ್ಜತ್‌ವಾಳಿಕರಿ ಗಾಮ್ ವಳ ಖ್ಹಾರವ್ ನಸ್ ಮಾಲಂ; ತೂ ಮಾಂಗಸ್ತೆ ಅಖ್ಖೂಸ್ ಮೇ ದಿಷ್. 12 ಮೇ ತುಮ್ನ ಖನ್ನೆವಾಳೊ ಕತೊ ಖ್ಹಚ್ಚಸ್. ರೈತೊಬಿ ಮಾರೇಥೆಬಿ ಖನ್ನೆವಾಳೊ ಎಕ್‌ಜಣೊ ಛಾ. 13 ಆ ರಾತ್ ಅಜ್ಗೊಸ್ ಖ್ಹು. ಯೊ ತುನ ಪಾಳ್ಷೇಕಿ ಕೊಯ್ನಿಕಿ ಕರಿ ಕಾಲ್ ಪುಚ್ಹಯೆ. ಯೊ ಇನ ಲೀಲಿದೋತೊ ಅಛ್ಛು. ನಾ ಹುತುಉಷೆತೊ ಮೇಸ್ ಯೊ ಲೀಲಿಶ್ ಕರಿ ಜನ್ ಚ್ಹಾತೆ ಯೆಹೋವ ದೇವ್ ನ ಖ್ಹಾಮ್‌ ಬಿ ತುನ ಬೋಲೂಸ್. ಶಾನಿಬಿ ಖ್ಹಯಲ್ ಕೊಯ್ನಿ ತೆ ವ್ಹಾಣುಹುವಾಲಗು ಖ್ಹೂ. "ಕರಿ ಬೊಲ್ಯೊ. 14 ಇಮ್ಮಸ್‌ ಯೊ ಇನ ಗೋಡಾಕನಾಸ್ ಖ್ಹುತಿತಿ. ಯೊ ತಯಡ ಖಳಮ ಆಯಿತೆ ಕಿನಾಬಿ ಮಾಲಂ ನಾ ಪಡ್ನುಕರಿ ಬೋವಜ್ ನೆ ಬೊಲ್ಯೊ; ತಿಮ್ಮಸ್ ಹಂದರು ರ‍್ಹವದಿಶ್ ನ ಯೊ ಉಠಿನಿಕ್ಳಿ. 15 ಬೋವಜ್ ನೆ ಯೊ ತಯಡನ, "ತಾರು ಹೋಡನು ಗೊದ್ರು ಬಿಚ್ಹವ್," ಕರಿ ಬೋಲಿನ್ ಇನಾಮ ಕಮ್ ಶೆ ಕಮ್ ಚ್ಹೋ ಪಡಿ ಎತ್ರು ಬರಿಕ್‍ಗ್ಹವ್ ನಖಿನ್ ಇನ ಪಡಿನ್ ದಿದೊ. ಯೊ ಇನ ಪಾಡಿಲೀನ್ ಗಾಮ್ಮ ಗಯಿ. 16 ಫುಯಿಕನ ಆವಾಮ, "ಭಯಿ ತೂ ಗೈತೆ ಕಾಮ್ ಶಾತ್‌ಹುಯು?" ಕರಿ ಪುಚ್ಹವಮ, ರೂತ್ ನೆ ಬೋವಜ್ ಕರ್ಯೋತೆ ಕಮ್ ಅಕ್ಕುಸ್ ಬೋಲಿ. 17 ಅಖಯೆತಿಮ್, ಫುಯಿಕನ ಖಾಲಿ ಹಾತ್ ನಕೊ ಜಾ, ಕರಿ ಬೋಲಿನ್ ಚ್ಹೋ ಪಡಿ ಎತ್ರು ಬರಿಕ್‍ಗ್ಹವ್ ದಿದು," ಕರಿ ಬೋಲಿ. 18 ತದೆ ನವೊಮಿ, "ಭಯಿ, ಅನು ಕಾಮ್ ಶಾತ್‌ಹುವಸ್‌ ಕರಿ ಮಾಲಂ ಪಡಾತೊಡಿ ಖ್ಹಮಾಳಿನ್ ರ‍್ಹಜೊ. ಬೋವಜ್ ಅನಿ ಬಾರೇಮ ಬರೋಬರ್ ಕರತೊಡಿ ಯೊ ಶೊಪೊತಿ ಕೊರ‍್ಹಶೆನಿ." ಕರಿ ಬೋಲಿ.