Rute 4

ಬೋವಜ್ ರೂತ್ ನ ವ್ಯಾಹ ಕರ್ಯೊತೆ

1 ಹಂಕಡ್ ಬೋವಜ್ ಗಾಮ್‌ನು ದರ್ವಾಜಕನ ನ್ಯಾವ್‌ ಕರನಿ ಝಗೋಮ ಜೈನ್ ಇಜ್ಗೊ ಬೇಖ್ಹಿಗಯೊ. ಎತ್ರಸ್ ಮ ಇನೆ ಬೋವಜ್ ನೆ ಪಯಿಲೆ ಬೋಲ್ಯುಥುತೆ ಎಲಿಮೆಲೆಕ್ ನ ಖನ್ನೆವಾಳೊ ಹುಯಿರೊತೆ ಸಮಂದಿಕರ್ ಇಜ್ಗೊ ಅಯು. ತದೆ ಬೋವಜ್ ನೆ ಇನ; "ಆವ್‌ಲ ಭ್ಹಯಿ, ಅಜ್ಗ ಬೇಖ್ಹ್." ಕರಿ ಬುಲವಮ, ಯೊ ಆಯಿನ್ ಶೆಡೆಸ್ ಬೇಶಿಗಯೊ. 2 ಆ ಹುಯಿಜವದಿನ್ ಯೊ ಗಾಮ್ಮ ಶಣವ್ ಮ ದಖ್ಹ್‌ ಜಣಾನ ಬುಲವಮ ಇವ್ಣೇ ಅಯಿನ್ ಬೆಖ್ಹಿಗಯು. 3 ಅ ಹುಯಿಜವದಿನ್ ಬೋವಜ್ ಯೊ ಖನ್ನೆವಾಳೊ ನ, "ಹಮ್ನ ಸ್ವಂತವಳೊ ಹುಯಿರೊತೆ ಎಲಿಮೆಲೆಕ್ ನ ಮಳ್ಯುತೆ ಎಕ್ ಭಗ್ ನು ಖೆತರ್ ಚ್ಹಾ ಖಯೆನಾ, ಇನ ಮೋವಾಬ್ ಮುಲುಕ್ ಖ್ಹು ಪಾಚುಪರಿನ್ ಆಯಿರುತೆ ನವೊಮಿ ಎಚ್ಹ್ ನು ಕರಿ ಚ್ಹಾ. 4 ಅ ತುನ ಬೊಲ್ ನು ಕರಿ ಅನ್ಸಯು, ಯೊ ಜಮೀನ್ ನ ಲಿಲ್ಯಾವಾನ ತುನ ಮನಸ್ಉಶೇತೊ ಅಜ್ಗೊ ಬೇಠೂತೆ ಶಣವ್ ನ ಖ್ಹಾಮೆ ಲೀಲಿದೋತೊ ಹಕ್ಕು ಪಯಿಲೆ ತುನಸ್, ಅ ಹುಯಿಜವದಿನ್ ಮನಸ್ ಮಳ್ ಶೆ; ಬುಜು ಕಿನಾಬಿ ಕೊಯ್ನಿ, "ಕರಿ ಬೊಲ್ಯೊ. ತದೆ ಯೊ ಅದ್ಮಿ; "ಮೇಸ್ ಲೀಲೆವ್ಸ್", ಕರಿ ಬೊಲ್ಯೊ. 5 ತದೆ ಬೋವಜ್ ನೆ, "ತೂ ಯೊ ಜಮೀನ್ನ ಲೀಲ್ಯಾವಾಳೊ ಉಶೇತೊ, ನವೊಮಿ ನಿ ವ್ಹಾವ್ ಹುಯಿರಿತೆ ಮೋವಾಬ್ ವಾಳಿ ರೂತ್ ನ ವ್ಯಾಹಕರ್‌ನು. ತದೆ ಯೊ ಖೆತರ್‌ನು ಖಾತೆ ನವೊಮಿ ನೊ ಮರಿಗಯೊತೆ ಛಿಯ್ಯಾನ ನಾಮ್‌ಪರಸ್‌ ರ‍್ಹಶೆ. "ಕರಿ ಬೊಲ್ಯೊ. 6 ಇನ ಯೊ ಖನ್ನೆವಾಳೊ, "ಇಮ್‌ಕತೊ ಖೆತರ್ ನು ಖಾತೆ ಲೀಲಿದೋತೊ ಹಕ್ ನ ಮೇ ಮ್ಹೇಲಿದೆವ್ಸ್. ಕೊಯ್ನಿಕತೊ ಮಾರ ಕುಟಂನ ಮಳಿರುತೆ ಆಸ್ತಿ ನ ನಷ್ಟಉಶೆ. ಇನಾಕಜೆ ಯೊ ಹಕ್ ನ ತೂಸ್‌ ಲೀಲೆ ಮರೆಥಿ ಕೋವುಶೆನಿ." ಕರಿ ಬೊಲ್ಯೊ. 7 ಇಸ್ರಾಯೇಲ್‌ ಮ ಆಸ್ತಿ ಪಾಸ್ತಿ ಎಚನಿವಖ್ಹತ್ ನತೊ ಲೆವನಿವಖ್ಹತ್ ಎಕ್ ನಿಯಮ್ ಥು; ದೆವಳು ಲಿಲೆವಳನ ಇನ ಗೋಡಾನಿ ಚಪ್ಪಲ್ ನ ಕಡಿನ್ ದೆತುಥು. ಅಮ್ ಇಸ್ರಾಯೇಲ್‌ ಮ ಘಟ್‌ಹುಯಿಗಿಕರಿ ಮಾಲಂ ಕರಿಲೇತುಥು. 8 ಇಮ್ಮಸ್ ಯೊ ಖನ್ನೆವಾಳೊ ನೆ, "ಖೆತರ್‌ ನ ತೂಸ್‌ಲೀಲೆ," ಕರಿ ಬೋಲಿನ್ ಇನ ಗೋಡಾನಿ ಚಪ್ಪಲ್ ಬೋವಜ್ ನ ಕಾಡಿದಿದೊ. 9 ತದೆ ಬೋವಜ್ ಗಾಮ್ ನ ಶಣವ್ ನ ಅಕ್ಕವ್ ನ ಬುಜು ಖ್ಹಾರಾಸ್‌ಅದ್ಮಿನಾಬಿ, "ಎಲಿಮೆಲೆಕ್ ನ ಬುಜು ಕಿಲ್ಯೋನ್, ಮಹ್ಲೋನ್ ಅವ್ಣ ಮಳಿರುತೆ ಆಸ್ತಿ ಅಕ್ಕುಸ್ ನವೊಮಿ ಥಿ ಮೇ ಲೀರ‍ಕ್ಯೊಸ್. ಅನ ತುಮೆಖ್ಹರು ಸಾಕ್ಷಿ ಹುಯಿರಾಸ್. 10 ಅಖಯೆತೆ, ಮಹ್ಲೋನ್ ನಿ ಭಯಿಕೊ ಹುಯಿರಿತೆ ಮೋವಾಬ್ ವಾಳಿ ರೂತ್ ನ ಮಾರಿ ಭಯಿಕೊ ನಿತರ ಕರಿಲಿದೊ. ಅನೇಥಿ ಖೆತರ್‌ನಿ ಖಾತೆ ಮರಿಗಯೋತೆ ಮಹ್ಲೋನ್ನ ನಾಮ್ಮಸ್ ಬಚಿರ‍್ಹಶೆ. ಅಖಯೆತಿಮ್ ಇನು ಘರ್‌ಪರಿವಾರ್‌ವಾಳಮಾಬಿ, ಇನ ಬಂಧುಬಳಗಂ ಗಮ್ಮಸ್ ರ‍್ಹಶೆ. ಅನ ತುಮೇಸ್ ಸಾಕ್ಷಿ," ಕರಿ ಬೊಲ್ಯೊ. 11 ತದೆ ಗಾಮ್‌ನ ಶಣವ್ ಬಿ ಬುಜು ಖ್ಹಾರೂಸ್ ಅದ್ಮಿಬಿ; "ಒಹೊ, ಹಮೇಸ್ ಸಾಕ್ಷಿ ಹುಯಿರ‍್ಹಾಸ್; ಯೆಹೋವ ದೇವ್ ಇಸ್ರಾಯೇಲ್‌ ನ ಘರ್ ನ ಭಡಯೊತೆ ರಾಹೇಲ್ ಬುಜು ಲೇಯಾ ಕರಿ ತಯೇಡಾವ್‌ನ ಕಿಮ್‌ಕಿ ಇಮ್ ಆಶೀರ್ವಾದ್ ಕರದೆ. ಎಫ್ರಾತಮ್ ಜತ್ ಮಾ ಧನ್ ಧವ್ಲತ್ ವಳೊ ಹು; ಬೇತ್ಲೆಹೇಮ್‌ಮ ನಾಮ್‌ಕಮಾವ್‌. 12 ಯೊ ತಯಡ ಥಿ ಯೆಹೋವ ದೇವ್ ತುನ ದಿಶೇತೆ ಲಡ್ಕ ಖ್ಹು ತಾರುಘರ್ ಯೆಹೂದನಿ ತಾಮಾರಳ್ ಥಿ ಪೈದಹುಯೋತೆ ಪೆರೆಚ್ ಘರ್‌ವಾಳನಿ ಘೋಣಿ ನಾಮ್‌ ಕಮಾವದೆ ಕರಿ ಬೊಲ್ಯು.

ಬೋವಜ್ ಅಜು ಇನು ಖಾನ್‌ದಾನ್‌

13 ಬೋವಜ್ ರೂತ್ ನ ವ್ಯಾಹಕರಿಲಿನ್ ಗರ್ ಕನ ಬುಲೈನ್ ಗಯೊ. ಯೆಹೋವನಿ ದಯಾಥಿ ಯೊ ಬೇಜೂನಿಹುಯಿನ್ ಎಕ್ ಛಿಯ್ಯಾನ ಜಣಿ. 14 ಗಾಮ್ ನಿ ಖ್ಹರಿ ಭಯಿಕ ನವೊಮಿ ನ: "ಯೆಹೋವಾಸ್ ಆಶೀರ್ವದ್ ಖ್ಹು ಉಛ್ಹೊಹುವದೆ! ಹಂಕ್ಕೆ ತುನ ಖನ್ನೆವಾಳೊ ನಿ ಜತ್ ನು ಜಿಮ್ಮೆದರಿ ಪಡವಳಾನ ದಿರಕ್ಯೊಸ್ತೆ. ಇಸ್ರಾಯೇಲ್‌ ನ ಮುಲಕ್ ಮ ಯೊ ಲಡ್ಕು ನಾಮ್ ಕಮವದೆ! 15 ಯೊ ತುನ ನವೊ ಜಾನ್ ದಿನ್ ವಯಶ್ ಹುಯಿಗುತೊ ತುನ ಜತನ್‌ ಥಿ ಪಳಿಲಿಶೇ. ಖ್ಹಾತ್‌ ಜಣ ಚ್ಹಿಯ್ಯಾತೆ ಬಿ ಘಣು ಲಾಡ್ ಕರಾವಾಳಿ ಹುಯಿರಿತೆ ತಾರಿ ಲಾಡ್ ನಿ ವ್ಹಾವ್‌ನೆ ಅ ಚ್ಹಿಯ್ಯೊನ ತುನ ದಿರಕಿಸ್!" ಕರಿಬೋಲಿ. 16 ನವೊಮಿ ನೆ ಯೊ ಲಡ್ಕಾನ ಇನ ಖೋಳಾಮ ರಾಖಿನ್ ಪಾಳುಕರ್ ಥಿಥ್ಹಿ. 17 ಖ್ಹಮೆ ಪಿಟೆಲಿ ಭಯಿಕಖ್ಹರು, "ನವೊಮಿ ನ ಜತ್ ನೊ ಎಕ್ ಛಿಯ್ಯೊ ಪೈದಹುಯಿರ‍್ಹೋಸ್!" ಕರಿ ಬೋಲಿನ್ ಯೊ ಲಡ್ಕಾನ "ಓಬೇದ್" ಕರಿ ನಾಮ್ ಮ್ಹೇಲ್ಯು. ಆಸ್ ಇಷಯ್ ನೊ ಬಾ, ಬುಜು ಇಷಯ್ ದಾವೀದ್ ನೊ ಬಾ. 18 ಪೆರೆಚನು ಖಾನ್‌ಧಾನ್; ಪೆರೆಚ್ ನೊ ಚ್ಹಿಯ್ಯೊ ಹೆಚ್ರೋನ್, 19 ಹೆಚ್ರೋನ್ ನೊ ಚ್ಹಿಯ್ಯೊ ರಾಮ್, ರಾಮ್ ನೊ ಚ್ಹಿಯ್ಯೊ ಅಮೀನದಾಬ್, 20 ಅಮೀನದಾಬ್ ನೊ ಚ್ಹಿಯ್ಯೊ ನಹಶೋನ್, ನಹಶೋನ್ ನೊ ಚ್ಹಿಯ್ಯೊ ಸಲ್ಮೋನ್, 21 ಸಲ್ಮೋನ್‌ ನೊ ಚ್ಹಿಯ್ಯೊ ಬೋವಜ್, ಬೋವಜ್ ನೊ ಚ್ಹಿಯ್ಯೊ ಓಬೇದ್, 22 ಓಬೇದ್ ನೊ ಚ್ಹಿಯ್ಯೊ ಇಷಯ್, ಇಷಯ್ ನೊ ಚ್ಹಿಯ್ಯೊ ದಾವೀದ್.