1 Marigina Alatala yi fe tooni ito yita n na:

Xɛɛn to xaba mangan xa,

sansi nɛnɛn fan yi minima,

Alatala yi tuguminne ramini.

2 E to yelin sansine birin donɲɛ bɔxɔn ma,

n yi a fala,

"Marigina Alatala,

i xa e mafelu e hakɛne ra,

xa na mi a ra

Yaxuba bɔnsɔnna baloma di?

A sɛnbɛn mi gbo."

3 Alatala yi kininkinin e ma,

a yi a fala, a naxa, "Ito mi ligɛ."

Alatala naxa na kiini.

4 Marigina Alatala yi tooni ito yita n na:

Marigina Alatala yi a ragidi a tɛɛn xa mini.

Tɛɛn yi bɔxɔn birin gan,

bɔxɔ igen birin yi xara.

5 N yi a fala,

"Marigina Alatala, yandi, diɲa,

xa na mi a ra

Yaxuba bɔnsɔnna baloma di?

A sɛnbɛn mi gbo."

6 Alatala yi kininkinin e ma,

a yi a fala, a naxa, "Ito mi ligɛ."

Marigina Alatala naxa na kiini.

7 A yi fe tooni ito yita n na alo xiyena:

Marigin yi tixi yinna tinxinxin dɛxɔn,

bitikidi* matinxin lutin yi suxi a yii.

8 Alatala yi n maxɔdin, a naxa,

"Amosi, i nanse toxi?"

N yi a yabi, n naxa,

"Bitikidi matinxin lutina."

Marigin yi a fala,

"N waxi a xɔn,

n ma yamaan xa matinxin, Isirayila kaane.

N mi diɲɛ sɔnɔn.

9 Suxure batude matexine kalama nɛn

Isiyaga bɔxɔn ma.

Isirayila a batudene rabirama nɛn.

N kelima nɛn Yerobowan ma denbayaan xili ma silanfanna ra."

10 Amasiya Betɛli saraxaraliin yi a fala Isirayila manga Yerobowan xa, a naxa, "Amosi yanfan nakelima i xili ma Isirayila bɔnsɔnna tagi. A naxan falama na mi fan bɔxɔn xa. 11 Amosi a falama, ‘Yerobowan faxama silanfanna nan na. Isirayila kelima nɛn a bɔxɔni konyiyani.’ "

12 Amasiya yi a fala Amosi xa, a naxa, "I tan naxan toon tima, keli be, siga Yuda yamanani! Sa i balon fen mɛnni nabiya wanli, 13 koni i nama fa nabiya falane ti Betɛli sɔnɔn, bayo mangana yire sariɲanxin be manga taani ito yi."

14 Amosi yi Amasiya yabi, a naxa, "Nabiin xa mi n na! N fafe fan, nabi mi yi na ra. Xuruse kanna nan n na. N Sikomoro binle fan nawalima. 15 Alatala yi n fen xuruseene tagi, a yi a fala n xa, ‘Siga, nabiya falane ti n ma yamana Isirayila xa.’ 16 Iki, i tuli mati Alatalaa falan na, i tan naxan a falama n xa, ‘I nama nabiya falane ti Isirayila xa, i nama falan ti Isiyaga bɔnsɔnna xa.’ 17 Nayi, Alatala ito nan falaxi, a naxa, ‘I ya ɲaxanla findima nɛn yalunden na taani. I ya diine faxama nɛn silanfanna ra. I ya bɔxɔn bama nɛn i yii, a yitaxun muxu gbɛtɛne ra. I tan, i faxama nɛn bɔxɔ haramuxin ma, Isirayila fan xalima nɛn yire makuyeni.’ "