1 Yamaan xali konyiyani waxatin naxan yi, na ɲɛɛ fu nun kedenden xi singe lɔxɔni, Alatala yi falan ti n xa, a naxa, 2 "Adamadina, bayo Tire kaane Yerusalɛn magele nɛn, e naxa:

‘Siyane birin yi danguma taan naxan yi,

na bata kala yati!

A to bata findi taa xɔnna ra,

nxu tan nan fa nafulu gbeen sɔtɔma!’

3 Na ma, Marigina Alatala ito nan falaxi,

a naxa: N bata keli ɛ xili ma,

ɛ tan Tire kaane!

N siya wuyaxine rafama nɛn ɛ xili ma

alo fɔxɔ igen mɔrɔnne tema kii naxan yi.*

4 E Tire taan makantan yinna kalama nɛn,

e yi a sangansone rabira.

N na a burunburunna makɔma nɛn,

han n yi a findi gɛmɛ magenla ra.

5 A yi findi yala ratiden na yɛxɛ suxune xa fɔxɔ igen tagi.

N tan nan falan tixi.

A sama nɛn siyane sagoni,

e yi lu fuyɛ a ma.

Marigina Alatalaa falan nan na ra.

6 A banxidɛɛn naxanye burunna ra,

ne muxune faxama silanfanna nan na.

Nayi, e a kolonma nɛn,

a Alatala nan n na."

7 Amasɔtɔ Marigina Alatala ito nan falaxi, a naxa, "N Nebukadanesari rafama nɛn Tire taan xili ma sa keli kɔmɛn fɔxɔni, Babilɔn mangana, mangane mangana, e nun a soone nun a yɛngɛ so wontorone nun a soo ragine nun gali gbeena.

8 Banxidɛɛn naxanye burunne ra,

a yi ne muxune faxa silanfanna ra.

A yire makantanxine tima nɛn ɛ taan nabilinni,

a yi gbingbinna rate ɛ taan nabilinna yinna xɔn,

a sofane yi e yɛ masansan wure lefane yite ɛ xili ma.

9 A yɛngɛ so seene rafama nɛn ɛ taan makantan yinna rabiradeni,

a yi ɛ sangansone rabira a wali seene ra.

10 A soo kurun gboma ayi nɛn

han a yi gbangbanna so ɛ xunna,

ɛ taan yinne yi xuruxurun a yɛngɛ so wontorone

nun a giseene san xuine bun,

e na so ɛ taan so dɛɛne ra waxatin naxan yi

alo nɔ tiine soma yinna yalenne ra kii naxan yi.

11 A soone sanne ɛ kirane birin yibodonma nɛn,

a yi ɛ muxune faxa silanfanna ra,

a ɛ gɛmɛ sɛnbɛtɛn gbeene rabira bɔxɔni.

12 Ɛ nafunle tongoma nɛn,

ɛ sare seene yi findi yɛngɛ yi se tongoxine ra,

e yi ɛ taan yinne rabira,

e yi ɛ banxi faɲine kala,

e yi ɛ taan gɛmɛne nun a wudine

nun a burunburunna woli fɔxɔ igeni.

13 N danna sama nɛn ɛ sigi xuine ra,

ɛ konden xuiin mi fa mɛ mumɛ!

14 N na ɛ taan findima nɛn fanye magenla ra,

ɛ konna yi findi yala ratiden na yɛxɛ suxune xa,

a mi fa tima sɔnɔn.

N tan Alatala nan falan tixi."

Marigina Alatalaa falan nan na ra.

15 "Marigina Alatala ito nan falaxi Tire taan xa, a naxa: Hali fɔxɔ ige tagi bɔxɔne muxune, ne mi xuruxurunɲɛ gaxuni ba, e na ɛ konna kala feen xinla mɛ, muxu faxamatɔne na lu kutunɲɛ lɔxɔn naxan yi, faxa gbeen na ti ɛ konni lɔxɔn naxan yi? 16 Kuntigin naxanye birin fɔxɔ igen dɛ, ne kelima nɛn e manga gbɛdɛne yi, e yi e gubane rate e ma, e yi e dugi sɔxɔnxine ba e ma. Gaxun yi e suxu e dɔxɔ bɔxɔni, e lu yigitɛgɛxi waxatin birin, masɔtɔ ɛ kalana fe ra. 17 E sunu sigini ito sama nɛn ɛ xa, e naxa,

‘Ee! Ɛ konna bata kala!

Ɛ taa xili kanni ito,

fɔxɔ igeni siga muxune dɔxɔdena,

taan naxan sɛnbɛ yi gbo baan xun ma,

ɛ tan naxan yi ɛ rabilinna muxune birin magaxuma!

18 Iki, fɔxɔ ige tagi bɔxɔne muxune xuruxurunma nɛn gaxuni,

ɛ taan na kala lɔxɔn naxan yi.

E gaxuma nɛn ɛ halagi feen na.’ "

19 "Amasɔtɔ, Marigina Alatala ito nan falaxi, a naxa: N na ɛ konna findi taa xɔnna ra waxatin naxan yi, a fan yi lu alo taa kalaxine, n na fufaan nafa ɛ xili ma waxatin naxan yi, ige gbeen yi sa ɛ konna xun ma, 20 nayi n na ɛ nun muxu danguxine rabirama nɛn ɛ bode xɔn ma naxanye godoma gaburun na. N sa ɛ radɔxɔma nɛn bɔxɔ xɔnna ma, dɛnaxan luxi alo yire kalaxi fonna, ɛ nun naxanye godoma laxira yi, ɛ mi fa dɔxɔma ɛ konni sɔnɔn. N yi binyen fi niiramane yamanan ma. 21 N na ɛ raɲanna fe magaxuma ayi nɛn, ɛ mi fa luma na mumɛ! Muxune ɛ fenma nɛn, koni ɛ mi fa toma sɔnɔn! Marigina Alatalaa falan nan na ra."