1 N tan luma nɛn tixi kantan tideni,

n yi lu taan nabilinna yinna xuntagi

alogo n xa a kolon

Ala naxan falama n xa,

mawuga xuini ito yabima kii naxan yi.

2 Alatala yi n yabi, a naxa,

"Fe tooni ito sɛbɛ

n naxan yitama i ra,

i yi a sɛbɛ walaxane ma ki faɲi

alogo muxune xa mafura a xarandeni.

3 Bayo fe makɛnɛnxin na a ra

naxan nakamalima a waxatini.

A fa a waxatin nan legedenma,

a mi luma a ligataren na.

Hali a bu, a mamɛ,

bayo a rakamalima nɛn yati.

A mi xunkuyama ayi.

4 A mato! A yɛtɛ yigboxi,

a niin mi fan.

Koni tinxin muxun nii rakisin sɔtɔma nɛn

a dɛnkɛlɛyaan xɔn."

5 "Dɔlɔn mayanfan nan tima.

Wasoden mi a raxarɛ mumɛ!

A mi wasama alo laxira,

alo sayaan to mi wasama.

A siyane birin malanma a yɛtɛ xa

a e birin suxu yɛngɛni.

6 Na muxune birin xa mi a mafalama ba

magele falane nun fala xɔlɛne ra?

E naxa, ‘Gbalon na kanna xa

naxan se muɲaxine malanma.

A yi a doli goronna fari sa!

Ito fa ligama

han waxatin mundun yi?’

7 I doli faane mi kelɛ i xili ma ba?

Ne mi xulunɲɛ ba,

e fa i yimaxa?

I fan findima nɛn e se suxin na!

8 Bayo i bata siya wuyaxine yii seene tongo yɛngɛni,

yama dɔnxɛne i fan yii seene tongoma nɛn yɛngɛni.

Amasɔtɔ i bata muxune faxa,

i yi yamanane nun taane nun e muxune birin halagi."

9 "Gbalon na kanna xa,

naxan tɔnɔn fenma tinxintareyani

alogo a xa tide gbeen sɔtɔ,

a yi a futuxulu tɔrɔn na.

10 I bata i ya denbayaan yagi feen nan nata na ra,

i yi yama wuyaxi halagi,

i bɔnɔ i niini.

11 Bayo hali i banxin tixi gɛmɛn naxanye ra,

ne gbelegbelema nɛn i xili xunna,

xalanbene fan yi a ratin."

12 "Gbalon na kanna xa,

naxan taan nasabatima muxun wunla xɔn

naxan taan bɛtɛn sama ɲaxankatan xɔn.

13 Alatala Sɛnbɛn Birin Kanna xa mi a ragidixi ba,

a yamane wali xɔnne findixi yegen nan tun na tɛɛn xa,

a siyane e yɛtɛ yixadanma fuyan?

14 Amasɔtɔ bɔxɔ xɔnna rafema nɛn

Alatalaa binyen kolonna ra

alo igen baane rafexi kii naxan yi."

15 "Gbalon na kanna xa,

naxan dɔlɔn fima a adamadi bodene ma

han e xunne yi keli,

a yi e ragenla to.

16 I tan lugoxi yagin nan tun na,

binyen mi a ra.

I fan xa i min,

i xunna yi keli,

i ragenla yi lu.

Alatala a yiifari ma igelengen xɔlɛn soma nɛn i yii

i ya binyen yi findi yagin na!

17 Bayo i gbalon naxan nabaxi Liban yamanani,

na xɛtɛma nɛn i ma.

I bata xuruseen naxanye halagi,

na feen findima gaxun nan na i ma.

Amasɔtɔ i bata muxune faxa,

i yamanane nun taane nun e muxune birin halagi.

18 Suxurene tɔnɔn nanse ra

naxan a ligɛ muxune xa e yitɔn?

Sawuran nan tun ne ra

naxanye rafalaxi wuren naxulunxin na.

E wulen nan falama muxune xa

alogo e rafala muxun xa e yigi sa e yi.

E ala bobone nan nafalama.

19 Gbalon na kanna xa,

naxan a falama wudin xa,

a naxa, ‘Keli!’

A yi a fala gɛmɛn xa,

a naxa, ‘Xulun!’

Xɛmaan nun wure gbeti fixɛn nan soxi a ma,

koni nii mi a yi.

Na fa i xaranma di?

20 Koni Alatala nan a Batu Banxi sariɲanxini.

Bɔxɔn muxune birin xa sabari a yɛtagi."