Luka Sora 8

Yesu yi muxu firin nakɛndɛya

40 Yesu xɛtɛ daraan bode fɔxɔn na waxatin naxan yi, yamaan yi a ralan amasɔtɔ e birin yi a legedenma. 41 Xɛmɛna nde yi fa naxan yi xili Yirusu, salide banxin kuntigin nan yi a ra. A yi bira Yesu sanna bun ma, a yi a mafan, a xa siga a konni 42 amasɔtɔ a dii tɛmɛ keden peen yi faxa feni. A sɔtɔn bata yi ɲɛɛ fu nun firin ti. Yesu sigama Yirusu fɔxɔ ra waxatin naxan yi, yamaan yi a yigbɛtɛn han! 43 Ɲaxanla nde yi na yi, ɲaxalan furen yi a ma xabu ɲɛɛ fu nun firin. A bata yi a yii seen birin so seribane yii, koni muxu yo mi nɔ a rakɛndɛyɛ. 44 A fa yamaan tagi Yesu xanbi ra, a yi a yiin din Yesu a doma lenben na, a kɛndɛya mafurɛn! 45 Yesu yi maxɔdinna ti, a naxa, "Nde a yiin dinxi n na?" Muxun birin yi a tandi, koni Piyɛri yi a fala, a naxa, "N kanna, yamaan tixi i rabilinni, e bata i yigbɛtɛn." 46 Koni Yesu naxa, "Muxuna nde bata a yiin din n na yati, n bata a kolon amasɔtɔ sɛnbɛna nde bata mini n yi." 47 Ɲaxanla yi a to fa fala a bata mini kɛnɛnni. Nayi, a fa, a xuruxurunma, a yi a sa Yesu bun ma yamaan birin yɛtagi. A a yiin dinxi Yesu ra feen naxan ma, a na fala a xa, e nun a kɛndɛyaxi kii naxan yi mafurɛn! 48 Yesu yi a fala a xa, a naxa, "N ma dii tɛmɛna, i ya dɛnkɛlɛyaan bata i rakɛndɛya. Siga bɔɲɛ xunbenli."

49 Yesu na falama waxatin naxan yi, xɛraan yi fa sa keli salide banxin kuntigina banxini, a yi a fala Yirusu xa, a naxa, "I ya dii tɛmɛn bata faxa, i nama Karamɔxɔ tɔrɔ sɔnɔn." 50 Yesu yi na mɛ, a yi a fala Yirusu xa, a naxa, "I nama gaxu, i dɛnkɛlɛya tun, a kɛndɛyama nɛn."

51 Yesu na li waxatin naxan yi, a mi tin muxu yo xa so a fɔxɔ ra fɔ Piyɛri nun Yoni nun Yaki, e nun diidina nga nun a fafe. 52 Muxune birin yi wugama, e gbelegbelema diidina fe ra. Yesu naxa, "Ɛ nama wuga, diidin mi faxaxi, a xiin nɛn tun!"

53 E birin yi gele a ma amasɔtɔ e yi a kolon yati, fa fala diidin bata faxa! 54 Koni Yesu yi a suxu a yiin ma, a yi a xili, a naxa, "Diidina, keli!" 55 A niin yi xɛtɛ ayi, a keli mafurɛn! Yesu yi a fala e xa, a naxa, "Ɛ donseen so a yii." 56 A sɔtɔ muxune yi kabɛ, koni Yesu yi e maxadi, a naxa, "Feen naxan ligaxi, ɛ nama na fala muxu yo xa."