Mawuga Xuine Sora 1

Yerusalɛn taan luxi nɛn alo kaɲa gilɛ rabeɲinxina

1 Ee! Yerusalɛn bata rabeɲin,

taani ito naxan yi rafexi nun.

Ee! A bata lu alo kaɲa gilɛna!

A tan naxan yi findixi taa sɛnbɛmaan na siyane yɛ,

a tan naxan yi findixi manga taan na yamanane xun na,

a bata findi konyin na to.

2 A kɔɛɛn ɲanma wugɛ,

a yɛɛgen bata a xadene maxa.

A xanuntenne mi fa a madɛndɛnma.

A xɔyine birin bata e mɛ a ra,

e findi a yaxune ra!

3 Yuda yamaan birin bata xali konyiyani,

e ɲaxankataxi, e rayarabixi.

E bata sa dɔxɔ siya gbɛtɛne konni

e mi matabu yo sɔtɔma.

E sagatan muxune birin bata sa e li tɔrɔni.

4 Sunun nan Siyon taan kirane xɔn,

bayo muxu yo mi fa fama a sanle yi.

Taan so dɛɛne birin bata kala,

a saraxaraline e kutunma,

a sungutunne sunuxi.

Siyon taan bata rafe sɔxɔlɛ gbeen na!

5 A yɛngɛfane bata sɛnbɛn sɔtɔ a xun na.

A yaxune bata lu bɔɲɛ xunbenli.

Bayo Alatala bata taan muxune lu sununi

masɔtɔ e Ala matandi wuyaxine xɔn.

Yaxune bata e diine suxu siga e ra konyiyani,

e yɛngɛfane yi siga e ragbɛngbɛnɲɛ.

6 Siyon taana binyen birin bata kala.

A kuntigine bata e gi alo xɛnle

naxanye mi e dɛgede sɔtɔma,

e xadanxin sigama e giyɛ donsone bun.

7 Yerusalɛn kaane nɛma na xun xɔn sigama tɔrɔni,

e mirima e waxati danguxin nafunle birin ma.

A yamaan to sa a yaxune sagoni,

muxu yo mi fa a mali.

A yaxune yi a matoma nɛn,

e gele a kala kiin ma.

8 Yerusalɛn kaane bata yulubin liga han!

Nanara, taan bata findi yire xɔsixin na.

Naxanye birin yi a binyaxi,

ne fa a rayelefuma nɛn.

A bata lu

alo e muxu ragenla nan toma,

naxan kutunma tɔrɔni,

a a makuya.

9 A xɔsin bata sa a domaan na.

A mi a mirixi a raɲan kii ma.

A kala feen bata a ratɛrɛna.

Muxu yo mi a madɛndɛnma.

A a falama, a naxa,

"Alatala, n ma tɔrɔn mato,

bayo n yaxun bata nɔɔn sɔtɔ."

10 A yɛngɛfane bata a nafunle birin tongo.

A bata siya gbɛtɛne to soɛ a yire sariɲanxini

i tɔnna dɔxɔ naxanye ma,

a e nama so i ya yamaan malanni.

11 Taan muxune birin kutunma,

e donseen fenma,

e e se kɛndɛne masarama balon na

alogo e xa lu e nii ra.

E a falama, e naxa, "Alatala, a mato,

i yi a rakɔrɔsi

n nayarabixi kii naxan yi.

12 Ɛ tan naxanye birin dangun kiraan xɔn,

feni ito mi ɛ sɔtɔxi.

Ɛ a mato ki faɲi

xa sɔxɔlɛni ito sifan muxu gbɛtɛ ma,

alo sɔxɔlɛn naxan n halagima.

Alatala nan a saxi n fari a xɔlɔ gbeen lɔxɔni.

13 A bata tɛɛn nagodo

keli kore n xɔnne gan xinla ma.

A bata yalaan nati n yɛɛ ra,

a yi n naxɛtɛ xanbin na,

a yi n findi muxu rabeɲinxin na

n lu furaxi waxatin birin.

14 A bata n yulubine xidi n kɔɛɛn ma

alo goron tongo gbelemɛna.

A bata e maxidi,

a yi e singan n kɔɛ.

Marigin bata n sɛnbɛn ɲan,

a yi n sa muxune sagoni,

n mi nɔɛ tiyɛ naxanye yɛɛ ra.

15 Sofa kɛndɛn naxanye birin yi n yii,

Marigin bata a mɛ ne birin na.

A bata ganla malan n xili ma

alogo e xa n ma sofa banxulanne halagi.

Marigin bata Yuda yamani butuxun ki faɲi.

16 Nanara, n wugama,

yɛɛgen bata n yɛɛn xɔnna rafe.

Naxan nɔɛ n madɛndɛnɲɛ,

a yi n niini fan n ma,

na bata a makuya n na.

N ma diine bata yigitɛgɛ,

bayo yaxune bata nɔɔn sɔtɔ."

17 Siyon kaane bata e yiini bandun muxune ma

koni muxu yo mi e madɛndɛnma.

Alatala bata yamarin fi

Yaxuba bɔnsɔnna rabilinna siyane ma

a e xa a yɛngɛ.

Yerusalɛn taan bata findi se xɔsixin na e tagi.

18 Yamaan yi a fala,

e naxa, "Alatala nan tinxin,

bayo nxu bata murutɛ a ma.

Nayi, ɛ tuli mati, ɛ tan siyane birin,

ɛ n ma sɔxɔlɛn mato.

Nxɔ dii sungutunne nun nxɔ dii banxulanne bata siga konyiyani.

19 Nxu bata nxu xɔyine xili,

e yi nxu yanfa.

Nxɔ saraxaraline nun nxɔ fonne birin bata faxa taani,

e yi donseen fenma waxatin naxan yi

alogo e xa lu e nii ra.

20 Alatala, a mato,

nxu ɲaxankataxi kii naxan yi,

han nxu kuine e raminima.

Nxu bɔɲɛn bata kala nxu kui,

bayo nxu bata murutɛ i ma mumɛ!

Nxɔ diine bata faxa silanfanna ra tandeni*1.20 Silanfanna: Sofane yɛngɛso dɛgɛmana.

sayaan nan mɔn a ra banxini.

21 Muxune nxu kutun xuiin mɛma,

koni muxu yo mi nxu madɛndɛnma.

Nxu yaxune birin bata nxɔ sɔxɔlɛna fe mɛ!

Ala, i naxan ligaxi nxu ra,

e sɛwaxi na nan na.

I bata lɔxɔn nafa,

i naxan ma fe fala.

Tin nxu yaxune xa lu

alo nxu tan!

22 E fe ɲaxine birin mato,

e birin xa saran e ra

alo i nxu saranxi nxu yulubine ra kii naxan yi!

Nxu kutunma waxatin birin,

nxu bɔɲɛn tɔrɔxin na ra yati."